სად შეიკრიბნენ ერთად ყველაზე აზარტული ადამიანები და რომელ ცნობილ სახეს დაავიწყდა ნინო ქათამაძის სახელი

აჩი არველაძე, გიორგი ყიფშიძე, ამიკო ჩოხარაძე, ნანიკო ხაზარაძე, მაკა ზამბახიძე, ლიკა ქორქია, გია ნიკოლაძე, გივი სიხარულიძე, ზურა მანჯავიძე. ეს არის მონაწილეების არასრული სია, რომლებიც გასართობი შოუ ''მიმიხვდის'' მესამე სეზონში ჩაერთვნენ.
28 ივნისს ''პალიტრა TV''-ის ეთერში ''მიმიხვდის'' მორიგი სეზონი დაიწყო. მხიარული და აზარტული გადაცემა ზაფხულის განმავლობაში ბევრ სიახლეს გვპირდება. გადაცემის წამყვან თამთა ასათიანს სწორედ ამ სიახლეებზე ვესაუბრეთ.

- ''მიმიხვდის'' პირველი და მეორე სეზონი ძალიან წარმატებული იყო. ინტერნეტშიც, სოციალურ ქსელშიც და ჩვენს ვებგვერდზეც ბევრი მაყურებელი გამოგვეხმაურა. სახალისო გადაცემაა, ცნობილი ადამიანები განსხვავებულ ამპლუაში არიან, მონაწილეებმა და გადაცემამ მაყურებლის დიდი ინტერესი გამოიწვია.



მესამე სეზონი განსხვავებული იქნება. მონაწილეები იქნებიან პოპულარული მსახიობები, მომღერლები და სპორტსმენები. მათ საშუალება მიეცემათ, გამოავლინონ სამსახიობო ნიჭი, რადგან გადაცემაში წარმატება ძირითადად პანტომიმასა და მიმიკების გამოცნობაზეა დამო-კიდებული. გადაცემის ძირითადი პრინციპი დავტოვეთ, მონაწილეებმა ცნობილი ადამიანების ვინაობა უნდა აუხსნან ერთმანეთს. თუმცა გვაქვს სიახლეც, მესამე ტურში ჩვენს მონაწილეებს შეუძლიათ, მათთვის სასურველი დავალება აირჩიონ. მეწყვილეს შეუძლია, სიტყვები ხატვით ახსნას. მეორე ალტერნატივა ყურსასმენის ტურია. ერთ მონაწილეს უკეთდება ყურსასმენი, სადაც მაღალ ხმაზე იქნება ჩართული სიმღერა და მხოლოდ პირის მოძრაობით უნდა მიხვდეს, რას ამბობს მისი მეწყვილე. მონაწილეებს ხატვის ტურიც ძალიან მოეწონათ. ზოგი წუწუნებდა, არ ვიცი კარგად ხატვა და არ გამოგვივაო, მაგრამ ყველაფერს მშვენივრად ართმევენ თავს.

- თამთა, უკვე მესამე სეზონია, გადაცემა მიგყავს და შეგიძლია თქვა, რომელი პროფესიის ადამიანები არიან ყველაზე მიხვედრილები?
- პირველი სეზონის ექვსივე ფინალისტი მსახიობი იყო. გამარჯვებული რუსკა მაყაშვილი გახდა შეყვარებულთან ერთად და მეორე სეზონში ჯანო იზორიამ და გვანცა გიორგობიანმა გაიმარჯვეს, რომლებიც მსახიობები არიან. ვერ ვიტყვი, რომ სხვებს არ გამოსდით, მაგრამ მსახიობებს უფრო უმარტივდებათ თამაში და კარგად ესმით ერთმანეთის. დარწმუნებული ვარ, მესამე სეზონში ეს სტერეოტიპი დაიმსხვრევა.

- მესამე სეზონის რამდენიმე გადაცემა უკვე ჩაიწერა. ყველაზე ემოციური რომელი მონაწილე იყო?
- პირველი გადაცემის ყველა მონაწილე აქტიურად ჩაერთო თამაშში. გადაცემის დასაწყისში ყველამ მითხრა, აზარტულები არ ვართო, მერე, როგორც წესი, გვეხვეწებოდნენ, იქნებ, ერთი ტური კიდევ დაამატოთ ან კვლავ მიგვიწვიოთო.



პირველ გადაცემაში ყველაზე ემოციური იყო გიორგი ყიფშიძე, რომელსაც ნინო ქათამაძის სახელი დაავიწყდა. მღეროდა მის სიმღერებს, მაგრამ სახელს ვერაფრით იხსენებდა. ამ დროს ძალიან ემოციური იყო და განიცადა ეს ყველაფერი. არანაკლებ ემოციური გახლდათ ზურა მანჯავიძე. განსაკუთრებით ყურსასმენის ტურში. საკმაოდ კარგად გაუგეს ერთმანეთს ამიკო ჩოხარაძემ და თაკო აბაშიძემაც.

თამამად შემიძლია გითხრათ, რომ პირველ და მეორე სეზონზე კიდევ უფრო სახალისო და სასაცილო მესამე სეზონი გველოდება.

გიორგი ყიფშიძე:

- გადაცემა ყოველთვის ძალიან მომწონდა. მეგონა, რომ გამიჭირდებოდა და ვერ ვითამაშებდი, მაგრამ ისეთ აზარტში შევედი, საბოლოოდ მე და ჩემი მეწყვილე ანრი ბიბინეიშვილი ნახევარფინალში გავედით. ნახევარფინალისთვის კარგად მოვემზადებით, რომ ადვილად მივახვედროთ ერთმანეთს.



ანრი ბიბინეიშვილი:

- ანრი, აზარტული ხარ?
- ზოგადად ძალიან აზარტული ვარ, ამიტომ ვერიდები ხოლმე თამაშებს, რომ არ შემიტყუოს.

- კაზინოში დადიხარ?
- არ ვიტყვი, რომ კაზინოში არ მითამაშია, მაგრამ დროულად შემიძლია გავჩერდე და ვთქვა, რომ ეს ჩემი საქმე არაა. თამაში რომ გავაგრძელო, ისეთი აზარტული ვარ, შეიძლება, სერიოზულ ვალებშიც გადავვარდე.

- გადაცემას აქტიურად ადევნებდი თვალს?
- შეიძლება, ვერ მეყურებინა პარასკევ საღამოს, მაგრამ ''ფეისბუქზე'' სხვადასხვა მონაწილის თამაშის ვიდეოები მინახავს და სულ მინდოდა, გადაცემის სტუმარი ვყოფილიყავი. დაახლოებით ორი კვირის წინ პროდიუსერმა სოციალურ ქსელში მომწერა, გადაცემაში გვინდა მოგიწვიოთო. იმ მომენტში ჩემზე ბედნიერი კაცი არ იყო. ჩაწერისას იმდენი ვიხალისე და იმდენად კარგი ემოციებით დავიტვირთე, მთელ საქართველს ვუსურვებ, ასეთი დადებითი ემოციები ჰქონოდეთ მთელი ცხოვრება.



- ნახევარფინალში გასვლას ელოდი? ძლიერი კონკურენტები გყავდათ.
- მართლა ძლიერი კონკურენტები გვყავდა. ყველა კარგად თამაშობდა. ჩემი და გიორგის, ამიკო ჩოხარაძისა და თაკო აბაშიძის წყვილმა ერთნაირი ქულები დავაგროვეთ და ნახევარფინალში ორივე გადავედით. მე და გიორგის გვინდოდა გადაცემისთვის მომზადება, მაგრამ ვერ მოვახერხეთ. თამაშამდე ერთმანეთს ვერ შევხვდით, გიორგი სულ დაკავებული იყო. მაგრამ ნახევარფინალამდე აუცილებლად გავივლით რეპეტიციას. უკვე ვხვდები, რომ შეთამაშებისთვის რეპეტიცია აუცილებელია.



ზურა მანჯავიძე:
- ძალიან მომწონს ეს გადაცემა, დიდი სიამოვნებით ვითამაშე. სამწუხაროდ, პირველი სიტყვის გამოცნობისას დავიბენი და ვერ გამოვიცანი. ზოგადად, ასოციაციობანა მომწონს და ხშირად მითამაშია. თუ კიდევ მიმიწვევენ გადაცემაში, ვეცდები, გაცილებით უკეთესი შედეგი ვაჩვენო.

წყარო: reitingi.ge