თიკო ნატროშვილის სილამაზის საიდუმლო - რატომ ამბობს უარს ჟურნალისტი ბოტოქსზე...

მოდელი და ჟურნალისტი თიკო ნატროშვილი, ამჟამად ბავშვთა და ახალგაზრდობის ეროვნულ ცენტრში საზოგადოებასთან ურთიერთობის სამსახურში მუშაობს. თიკოს ორი ბავშვი ჰყავს, თუმცა არაჩვეულებრივად გამოიყურება და ზედმეტი კილოგრამები არ აწუხებს.  დავინტერესდით, როგორ უვლის თავს და რამდენიმე კითხვით მივმართეთ.

- რამდენ დროს უთმობ დღის განმავლობაში თავის მოვლას?
- თავის მოვლა-მოწესრიგების დროს მთელი კვირის მანძილზე, საჭიროების მიხედვით ვანაწილებ. არ ვგულისხმობ თმას ან მაკიჟს და ა.შ რომელსაც ქალი ყოველდღიურად რაღაც დოზით უთმობს დროს. ყოველდღიურად მსუბუქი და თავისუფალი სტილი მაქვს, რაც მომწონს და მიადვილებს ცხოვრებას. დატვირთული დღის რეჟიმი მაქვს. ბავშვები, სამუშაო გრაფიკი, სახლის საკითხები, რომელიც მე მაბარია - ბევრ დროს და ენერგიას ითხოვს. ამიტომ ეგოისტივით მხოლოდ საკუთარ თავზე ფიქრის საშუალება არ მაქვს. საერთოდ, ბუნებრიობას ვანიჭებ უპირატესობას. ზედმეტად "დავარცხნილი" ქალები არ მომწონს. მეც ვცდილობ, თუ რაიმე განსაკუთრებულ ღონისძიებაზე ან ეკრანზე გამოჩენა არ მიწევს, მარტივად გადავწყვიტო ჩემი ე.წ. "ლუქი".

- ვინაა შენთვის სილამაზის და ქალურობის ეტალონი?
- ქალურობისა და სილამაზის სიმბოლოდ საქართველოშიც და მსოფლიო მასშტაბითაც არაერთის დასახელება შემიძლია. ამ წუთში ოდრი ჰეპბერნი მახსენდება. ალბათ, იმიტომ რომ მას სინაზე, სილამაზე, ეშხი და შინაგანი შარმი ბუნებრივად აქვს.

- ბაძავ ან მიგიბაძია როდისმე ვინმესთვის?
- ვცდილობ, ისეთი ვიყო, როგორიც ვარ. ინდივიდუალიზმი უფრო დასაფასებელია ქალში ვიდრე მცდელობა ვინმეს დაემსგავსო გარეგნობით ან ქცევით და ვიღაცის პროტოტიპად იქცე. თუმცა მსოფლიოს მასშტაბით არსებობენ ცნობილი ქალები, რომლებმაც ისტორია, განწყობა, ტენდენციები შექმნეს ქალურობის, ქცევის, მანერების და ა.შ. გაითვალისწინო ცხოვრებაში ეს ყველაფერი, როგორც წარმატების კომპონენტები, ცუდი ნამდვილად არ არის.

- ვარჯიშობ?
- მეორე შვილი რაც გავაჩინე, ინტენსიურად სპორტით არ დავკავებულვარ და ძალიან განვიცდი. მთელი ცხოვრება წელიწადში რამდენიმე თვე აუცილებლად ვსტუმრობდი სპორტდარბაზებს - აერობიკა, ტრენაჟორები, აუზი აუცილებელი პირობა იყო სხეულის სიმკვრივისთვის. აუცილებლად დავუბრუნდები ძველ მდგომარეობას. იმედია, ეს მცირე პაუზა საგრძნობლად არ დამეტყობა.

- იცავ დიეტას?
- დიეტას არ დავარქმევ, რადგან ეს ჩემი ცხოვრების წესია. არ ვშიმშილობ. "დიეტა", რომელიც მკაცრ რეჟიმს გულისხმობს და გრამებით არის განსაზღვრული საკვების რაოდენობა - არ დამიცავს. ვცდილობ, შემწვარ - მოხრაკული, მოხარშული საკვებით ჩავანაცვლო. კვირაში 1 - 2 დღე განტვირთვა გავაკეთო - ბოსტნეულით, ხილით, რომელიც ძალიან მიყვარს. არ მიყვარს ტკბილეული და იშვიათად მივირთმევ. მაქვს ჩემი კვების რაციონი, რაც ზუსტად ვიცი, არ გამასუქებს და მივირთმევ შეუზღუდავი რაოდენობით. კვების ასეთი რეჟიმით წონას სტაბილურად ვინარჩუნებ.

- როგორ მოახერხე მშობიარობის შემდეგ ფორმაში ჩადგომა.
- ორივე ორსულობაზე 25 კილო მოვიმატე. ორსულობის პერიოდში ზედმეტს მივირთმევდი და აისახა ჩემს გარეგნობაზე. ფორმაში ჩასადგომად მკაცრ დიეტას ვგეგმავდი, მაგრამ არ დამჭირდა. ზემოთ რაც ჩამოვთვალე ისევ იმ რეჟიმს დავუბრუნდი. ერთადერთი მკაცრად რასაც ვაკონტროლებდი 6 საათის მერე აღარაფერს მივირთმევდი. ეს დამოკიდებულება ჯანმრთელობისთვისაც არაჩვეულებრივი

გამოსავალია, მაგრამ ძალიან რთულია. მშობიარობიდან 4 - 5 თვეში ძველ ფორმაში ჩავდექი.

- თმას როგორ უვლი?
- თმას არ ვიღებავ და დაზიანების რისკი (გაუხეშება, მტვრევა და ა.შ) ნაკლები მაქვს. შესაბამისად არ ვიყენებ ქიმიურ ან აღმდგენ საშუალებებს. წლის გარკვეულ მონაკვეთში მეწყება ინტენსიური ცვენა და ამ დროს ბუნებრივ თმის ნიღბებს ვიყენებ. თავის დაბანის შემდეგ ძმრიანი წყლის გადავლებაა საჭირო. შეიძლება იფიქროთ, რომ ძმრის არასასიამოვნო სუნის გამო არ ღირს ამის გაკეთება, მაგრამ თუ მენდობით, არაჩვეულებრივ შედეგს მიიღებთ. თმა ბზინვარებასაც იძენს და მოცულობასაც.

- სახის მოვლის შენი მეთოდი გაქვს?
- არაფერი განსაკუთრებული. ამჟამად მაქვს შინაურულად დამზადებული კრემი, რომელსაც ფარმაცევტი მიმზადებს და ზუსტად ვიცი, რომელი ინგრედიენტებისგან არის მომზადებული და განსაზღვრულია კანის სიმკვრივისთვის. ძალიან ეფექტური და კარგი საშუალებაა. შესაძლოა, კანის სტრუქტურაც მიწყობს ხელს, რადგან ასაკობრივი ნაოჭების პრობლემა ჯერ არ დამწყებია.

ვცდილობ, 2 ლიტრამდე წყალი მივიღო დღის მანძილზე. ადრეულ დაბერებას პირველ რიგში განწყობით უნდა ებრძოლო. ერთადერთი ზუსტად ვიცი, არასოდეს შევუშვებ სხეულში ბოტოქსს. 40 და 50 წლის ასაკში მე ჩემი ნაოჭები უფრო მეყვარება, ვიდრე სილიკონით გადაჭიმული უემოციო სახე!

წყარო: reitingi.ge