ნინო ადამაშვილი მეჰრიბან ალიევას და სოფი ლორენს ბაძავს - „დღეში დაახლოებით 5-6-ჯერ ვჭამ...“

ნინო ადამაშვილი პროფესიით მსახიობია. მაყურებელმა ის პირველად „202“ -დან გაიცნო. იყო იუმორისტულ ჯგუფ „ვიაგრა სუპერლაითის“ სოლისტი, ამჟამად შალვა რამიშვილის შოუში მუშაობს, მასზე ხშირად ამბობენ, რომ კარიერაში გამორჩეული გარეგნობა დაეხმარა.  დავინტერესდით, რას აკეთებს ნინო იმისთვის, რომ ყოველთვის ფორმაში იყოს.

- თავის მოვლას ბევრ დროს უთმობ? 
- თავს ძირითადად დილას
ვუვლი. რისთვისაც დაახლოებით 15 წუთი მჭირდება. პირის დაბანის შემდეგ აუცილებლად  სახეზე მკვებავ კრემს ვისვამ. მერე უკვე მოგვიანებით, შინიდან გასვლის წინ ნახევარი საათით ადრეც იგივეს ვაკეთებ, მაკიაჟის გაკეთებამდე.

- შენთვის სილამაზის ეტალონი ვინაა?
- ჩემი ეტალონი არის აზერბაიჯანის პირველი ლედი მეჰრიბან ალიევა.  ვერ გეტყვით, რომ ვბაძავ, ასე ვერ გავკადნიერდები. ვთვლი, რომ ეს ქალბატონი თავად არის სილამაზის და გემოვნების ეტალონი. ულამაზესი, დახვეწილი, თავშეკავებული. პოსტ-საბჭოთა სივრცეში, ის ჩემი კუმირია. ასევე ჩემი ეტალონია მსახიობი სოფი ლორენი. ულამაზესი, კეთილშობილი და ძალიან უბრალო ადამიანია. ყოველთვის ამას ამბობენ, მასზე მის ირგვლივ მყოფნი და რაც მთავარია, მე თავადაც ვთვლი, რომ ქალის სილამაზე მისი სულიერებიდან და უბრალოებიდან იწყება. არ მიყვარს ძალიან გადაპრანჭული და "გასვეცკებული" ხალხი... და მიბაძვას რაც შეეხება. ადამიანურობის და

უბრალოების ასპექტში ამ ორ ქალბატონსაც ვბაძავ და ყველა სხვასაც, ვინც ასეთია... 

-  იმისთვის რომ ფორმაში იყო, ბევრს ვარჯიშობ?
- ვარჯიში ძალიამ მიყვარს, თან ჩემი პროფესია მუდმივად ითხოვს რომ ფორმაში ვიყო, მაგრამ სამწუხაროდ სისტემატურად ვერ ვახერხებ. მაქვს გარკვეული პერიოდები, როდესაც ვვარჯიშობ ხოლმე, ახლა პაუზა მაქვს. სექტემბრისთვის კვლავ დავუბრუნდები ვარჯიშს.

-  დიეტას ხშირად იცავ?
- ო, ეს ჩემთვის ძალიან აქტუალური და ამავდროულად მტკივნეული თემაა. თითქმის მუდმივად დიეტაზე ვარ და თუ მომბეზრდა და მივანებე თავი, მაშინვე ვიმატებ ზედმეტ კილოგრამებს. იცით, ამას დიეტას ვერც დავარქმევ, ეს არის უფრო სწორად შედგენილი კვების რაციონია. ანუ დღეში დაახლოებით 5-6-ჯერ ვჭამ ძალიან მცირე რაოდენობით. ამ რაციონში შედის ხილიც, ბოსტნეულიც, რძის ნაწარმიც, წვნიანიც და სალათები. წყალს ვსვამ 2-დან 3 ლიტრამდე და ფეხითაც დავდივარ 1 საათი მაინც, თუ მოვახერხე, ფეხით უფრო მეტსაც დავდივარ ხოლმე.

-  მშობიარობის შემდეგ ფორმაში ჩადგომა გაგიჭირდა?
- აი, ზუსტად მშობიარობის შემდეგ მოვიმატე წონაში. მერე ელენე გიორგაძის კლინიკაში დავდიოდი, და ენდოკრინოლოგ- დიეტოლოგის მეშვეობით დავიკელი მომატებული თითქმის 20 კილოგრამი. ვცდილობ, რომ დღემდე ამ მეთოდებით შევინარჩუნო წონა.

-  ზღვაზე წასვლის წინ რას აკეთებ იმისთვის, რომ სანაპიროზე კარგად გამოიყურებოდე?
-  გაზაფხულობით განსაკუთრებულად ვაქტიურდები ხოლმე, სწორი კვება, წყალი, ფეხით სიარული და ვარჯიში, ყოველდღიური ხდება.  მომავალ წელს მინდა, რომ ამ ყველაფერში ექიმი მასაჟისტიც ჩაერთოს. ჩემი აზრით, ცუდი არ იქნება, რადგან ანტიცელულიტური მასაჟი ხელს შეუწყობს ცხიმის წვას, და რაც ყველაზე მთავარია, ხელს შეუშლის ცელულიტის წარმოქმნას.

წყარო: reitingi.ge