ზღვა, ბუნებაში ყოფნა და ფლირტი - რასთან ასოცირდება ჯულიანასთვის დასვენება

"ბავშვობიდან ვცდილობდი, ყველაფერში პირველი ვყოფილიყავი. დამარცხებას ვერ ვეგუებოდი. ყოველთვის ვიბრძოდი და ბევრს ვშრომობდი საიმისოდ, რომ საკუთარი შესაძლებლობების მაქსიმუმი გამეკეთებინა",-
ამბობს ჯულიანა ბარ-გნარმა, რომლისთვისაც იდეალური დასვენება მზესთან, ზღვასთან, ბუნებაში ყოფნასთან და ფლირტთან ასოცირდება.

ბავშვობა და კომპლექსები
-ვერ ვიტყვი, რომ ზედმეტად ცელქი და მოუსვენარი ვიყავი. თუმცა, თანატოლებში აქტიურობით ყოველთვის გამოვირჩეოდი. მქონდა კომპლექსებიც. მაგალითად: როცა უცხო ადამიანების გარემოცვაში მოვხვდებოდი, საკუთარ თავში ვიკეტებოდი. მოგეხსენებათ, ცეკვაზე პატარაობიდანვე დავდიოდი და როცა ახლობლები შეიკრიბებოდნენ, გამუდმებით მთხოვდნენ, მეცეკვა, მე კი ამის მერიდებოდა...
-სკოლაში როგორ სწავლობდი?
-სწავლას პირველი კლასიდანვე, დიდი პასუხისმგებლობით ვეკიდებოდი. პედაგოგებისგან შენიშვნა ჩემთვის მიუღებელი იყო. ვცდილობდი, მეაქტიურა და ყველაფერში პირველი ვყოფილიყავი... ჰო, კიდევ ერთი კომპლექსი მქონდა: ქართულად კარგად ვერ ვლაპარაკობდი და ამის მრცხვენოდა.
-ბავშვები დაგცინოდნენ, ამა თუ იმ სიტყვას არასწორად რომ ამბობდი?
-ვერ ვიტყვი, რომ დამცინოდნენ. უბრალოდ, ჩემი საუბრის მანერაზე ხალისობდნენ...
-თუ გახსოვს, მშობლები რის გამო გიბრაზდებოდნენ?
-სახლში ძალიან მოუსვენარი ვიყავი და თან, ყველაფერზე საკუთარ აზრს გამოვთქვამდი. მე და დედა ხშირად ვკამათობდით. მაგალითად, როცა ის მთხოვდა, მისი შერჩეული კაბა ჩამეცვა, ამას ყოველთვის ვაპროტესტებდი, ვეწინააღმდეგებოდი.
-პრეტენზიული იყავი?
-პრეტენზიული არა, მაგრამ თავნება ნამდვილად ვიყავი. ყოველთვის იმას ვაკეთებდი, რაც მინდოდა. არავის არაფერს ვუჯერებდი.

გემოვნება და იმიჯი
-სილამაზის აღქმის განსაკუთრებული უნარი მქონდა. ყოველთვის სიახლის ძიებაში ვიყავი და დღემდე მაქვს ეს ჩვევა. ვცდილობდი, საინტერესო უცხოური გადაცემები მენახა და შემდეგ რაღაცები ჩვენს რეალობაში გადმომეტანა. ყოველთვის მაინტერესებდა, მაგალითად, როგორ კეთდებოდა კარგი მაკიაჟი, ვინ როგორ იცვამდა, რა იყო მოდაში... აქედან გამომდინარე, საკუთარი გემოვნების დახვეწაზე თავად ვიმუშავე. ყოველთვის ისეთი რაღაცები მომწონს, რაც მიხდება. რადგან პოპულარული გოგო ვარ და საზოგადოებაში მცნობენ, ეს იმას ნიშნავს, რომ რაღაც განსაკუთრებული უნდა მეცვას ან მეკეთოს. ხელოვნურობა არ მჩვევია. ყველაფერს იმისდა მიხედვით ვაკეთებ, რასაც შინაგანი მე მკარნახობს.


პირველი წარმატება
-9 წლისამ ევროპულ ცეკვების წრეზე დავიწყე სიარული და სულ რაღაც 1 თვის შემდეგ დამაწყვილეს ძალიან კარგ მოცეკვავესთან. გავედით შეჯიბრებაზე და გაგვიმართლა -გავიმარჯვეთ. ამ წარმატების შემდეგ მივხვდი, რომ ცეკვა იყო ჩემი საქმე. ვაღიარებ, ბუნებით ლიდერი ვარ. არ მიყვარს ჩრდილში დგომა. თუმცა, შეიძლება, ამ აღიარებაში განსაკუთრებული არაფერია -არ მეგულება ადამიანი, ვისაც რაიმე საქმეში პირველობა არ სურს... მთავარი ის არის, როგორ იბრძვი და რას აკეთებ მიზნის მისაღწევად. ზოგჯერ ვგრძნობ, არ მაქვს ძალა საბრძოლველად -ასეთ დროს საკუთარ თავს ასე ვთქვათ, "ვქოქავ". ბოლოს და ბოლოს, ერთხელ ვცხოვრობთ ამ ქვეყანაზე და საკუთარი შესაძლებლობის მაქსიმუმი უნდა გავაკეთოთ.

დასვენება
-ჯერჯერობით ქალაქიდან გასვლას ვერ ვახერხებ, რადგან სულ მალე ჩემი საუკეთესო მეგობრის ქორწილია, მეჯვარე უნდა ვიყო და თან, ამ ცერემონიის საორგანიზაციო საქმეებშიც აქტიურად ვარ ჩართული... შეიძლება, ზღვაზე წასვლა აგვისტოში მოვახერხო.
-მეგობრებთან ერთად დასვენებას აპირებ?
-როგორც წესი, ყოველ წელს მეგობრებთან ერთად ვისვენებ ხოლმე. თუმცა, წელს აგვისტოში ჩემი ძმა ჩამოვა საქართველოში. ის "სოჩაში" ცხოვრებს და იშვიათად ვნახულობთ ერთმანეთს. ჰოდა, დასასვენებლად ალბათ, მასთან ერთად წავალ.
-შენი ძმა დაოჯახებულია?
-დიახ, დაოჯახებული გახლავთ.
-აქტიური დასვენება

გხიბლავს თუ პასიური?
-ბუნებით აქტიური ადამიანი ვარ და არც კურორტზე ყოფნისას გახლავართ პასიური. პენსიონერივით დასვენება არ მიყვარს.
-როცა დასასვენებლად მიდიხარ, დიდი ჩანთა მიგაქვს?
-საკმაოდ ბევრი რამ მიმაქვს ხოლმე (იცინის). მეზარება ფიქრი იმაზე, რა დამჭირდება კურორტზე ყოფნისას და რა -არა, ამიტომ ყველაფერს ჩემოდანში ვალაგებ.
-საცურაო კოსტიუმის შერჩევისთვის ბევრი დრო გჭირდება?
-რა თქმა უნდა! ჩემთვის საცურაო კოსტიუმის სწორად შერჩევა ძალიან მნიშვნელოვანია. პირველ რიგში, ყურადღებას ხარისხს ვანიჭებ, შემდეგ დიზაინს და იმას, თუ რამდენად კომფორტულად ვიგრძნობ მასში თავს.

ნამზეური და განწყობილება
-ნამზეური უკვე გაქვს. სოლარიუმს სტუმრობ ხოლმე?
-მიუხედავად იმისა, რომ ნამზეური ძალიან მიყვარს, სოლარიმში ვიზიტზე კატეგორიულ უარს ვამბობ ხოლმე. ჩემი "ზაგარი" ბუნებრივია: რამდენჯერმე, ორ-ორი დღით მოვახერხე ბათუმში ჩასვლა. როცა მეკითხებიან, დასასვენებლად მთას ანიჭებ უპირატესობას თუ ზღვასო? -ყოველთვის ვამბობ, რომ ზღვა უფრო მეტად მიყვარს. ვგიჟდები, მზეზე და ზღვაზე. ეს ალბათ, იმიტომ, რომ ჰოროსკოპით "კირჩხიბი" ვარ.
-"კიჩხიბის" ნიშნის ქვეშ დაბადებული ადამიანები, როგორც ვიცი, ცვალებადი ხასიათით გამოირჩევიან. ასეა?
-გეთანხმებით, ცვალებადი ხასიათი მაქვს. შეიძლება არაფრის გამო, მოულოდნელად განწყობილება გამიფუჭდეს.
-როცა პლაჟზე გხედავენ, უცხო ადამიანებს როგორი რეაქცია აქვთ?
-საერთოდ, ხალხმრავალ ადგილებში დასავენებლად წასვლას ვერიდები. ჩემთვის დასვენება ასოცირდება ზღვასთან, ბუნებაში ყოფნასთან, ფლირტთან, მაგრამ სამწუხაროდ, ასეთ დასვენებას ხშირად ვერ ვახერხებ.
-ოდესმე საკურორტო რომანი გქონია?
-ზღვაზე დროებითი რომანი ნამდვილად არ მქონია. თუმცა, უცხო ადამიანები გამიცნია და დავმეგობრებულვართ კიდეც. არ ვარ იმ კატეგორიის ადამიანი, გრძნობების გამოხატვა რომ უადვილდებათ. შეიძლება, მამაკაცი მომეწონოს, მაგრამ ხშირ შემთხვევაში, ის ამას ვერც ამჩნევს.

ძლიერი სქესი
-ვერ ვიტყვი, რომ მამაკაცის გარეგნობას მნიშვნელობას არ ვანიჭებ. კაცი სიმპათიური უნდა იყოს და ძლიერიც, მაგრამ მნიშვნელოვანია, რომ ჭკვიანი, იუმორის გრძნობით დაჯილდოებული და ლიდერობის მსურველიც იყოს...
-შეყვარებული ხარ?
-არა, თავისუფალი ვარ. კარგია როცა შეყვარებული ხარ, მაგრამ ახლაც ბედნიერად ვგრძნობ თავს.
-შეყვარებული ბევრჯერ ყოფილხარ?
-ბევრჯერ -არა, მაგრამ სიყვარული გამომიცდია (იღიმის).


თავის მოვლა
-საკუთარი თავი მოწესრიგებას ყოველთვის ვახერხებ. პროფესიული საქმიანობიდან გამომდინარე, იმდენი რამ ვისწავლე, რომ სალონებში ელემენტარული რაღაცების გამო აღარ დავდივარ. თუმცა, თმის შეჭრა-შეღებვას დამოუკიდებლად ნამდვილად ვერ მოვახერხებ.
-სახის კანს განსაკუთრებულად უვლი?
-დიახ, ბუნებრივ ნიღბებს ვიკეთებ. თუმცა, პრობლემური სახის კანი არ მაქვს.

ჯანსაღი ცხოვრების წესი
-რას ნიშნავს შენთვის ჯანსაღი ცხოვრების წესი?
-პირველ რიგში, სწორ კვებას. ყავას საერთოდ არ მივირთმევ. კარგად გამოძინებაც მნიშვნელოვანია იმისთვის, რომ კარგად გამოიყურებოდე.
-რომელ საათზე იწყება შენი დილა?
-დაძინება მიჭირს. ყველაზე ადრე, ღამის 3 საათზე ვახერხებ დაძინებას. მიუხედავად ამისა, დილით ადრე ადგომა მაინც არ მიძნელდება, მალე ვახერხებ ენერგიის აღდგენას. სამაგიეროდ, როცა შვებულება მაქვს, იმ პერიოდში ვცდილობ, კარგად გამოვიძინო. ზაფხულში ჩემი დილა 11 საათზე იწყება.

შოპინგი
-შოპინგი ძალიან მიყვარს და როცა საშუალება მაქვს, ამ სიამოვნებაზე უარს არასდროს ვამბობ. საკმაოდ ხშირად ვახერხებ შოპინგს -ეს სასიამოვნო პროცესია... ახლა პირველი ხელფასი გამახსენდა: ძალიან პატარა ვიყავი, მასწავლებელმა ცეკვა რომ დაგვადგმევინა და ტელევიზიით გამოგვიყვანა, მერე ამაში ჰონორარიც გადაგვიხადეს.
-იმ ფულით რა შეიძინე?
-ქურთუკი ვიყიდე და მახსოვს, ამ ფაქტით ძალიან გახარებული ვიყავი (იცინის)... ბედნიერი ვარ, რომ საყვარელი საქმე მაძლევს საშუალებას, მატერიალურად დამოუკიდებელი ვიყო. არ შემიძლია, თუნდაც, ოჯახის წევრებს ვუყურო ხელებში. ყველას მატერიალურ კეთილდღეობას ვუსურვებ.

წყარო: ambebi.ge