"გაშიშვლება ერთგვარი მანიპულაციაა..." - ნატალი მაჩიტაძე

"გაშიშვლება ერთგვარი მანიპულაციაა - ცნობილი ხდები"
მსახიობი ნატალი მაჩიტიძე პოპულარული რუსული სერიალის - "სამზარეულო" - ქართულ ვერსიაში მონაწილეობს. სერიალს ქართველი ტელემაყურებელი შემოდგომაზე იხილავს. ამჟამად, ნატალი ერთ-ერთი კარაოკე-ბარის წამყვანი გახლავთ და ცდილობს, სამსახურს საზაფხულო არდადეგებიც შეუთავსოს...


გარეგნობაზე ზრუნვა
- ჩემს მომხიბვლელობაში დარწმუნებული დღემდე არ ვარ. ამაში დიდი წვლილი შეიტანა ჩემმა ბებომ: ის ბავშვობიდან "მახინჯ თოჯინას" მეძახდა, რაც გონებაში ისე ჩამრჩა და დაილექა, რომ ქუჩაში გასულს თუ მეუბნებოდნენ, - რა ლამაზი გოგო ხარო! - უკან ვიყურებოდი: მეგონა, ვიღაც სხვაზე ამბობდნენ... "მახინჯი თოჯინა" ქვეცნობიერად მომყვება... ძალიან მომწონს, როცა ქალი საკუთარ თავს უვლის. რა თქმა უნდა, გარეგნობაზე შეძლებისდაგვარად, მეც ვზრუნავ. ვერ ვიტყვი, ამისთვის პლასტიკურ ქირურგებს მივმართავ-მეთქი. როგორც გამოვიყურები, ეს გენეტიკის წყალობა გახლავთ. ამისთვის - მადლობა ჩემს მშობლებს (იცინის)!

"მშობიარობის შემდეგ, ქალები სუქდებიან, ჩვენ - არა"
- სულ ერთი და იგივე წონა მაქვს. ესეც გენეტიკის წყალობაა. საერთოდ, მშობიარობის შემდეგ, ქალები სუქდებიან, ჩვენ - არა: დედას დღემდე ლამაზი ტანი აქვს. რადგან სიმსუქნისკენ მიდრეკილება არ მაქვს, კვებისას არ ვიზღუდები. ვარჯიშს რაც შეეხება - უბრალოდ, ველოსიპედით სეირნობა და ცურვა მიყვარს. როცა არ ვმუშაობ და არც გადაღება მაქვს, ჩემს ქალაქში ველოსიპედით ვსეირნობ, აუზზე საცურაოდ დავდივარ...

ვარცხნილობა, თმის ფერი
- წინათ თმა არასოდეს შემიღებავს, მაგრამ წელს წითლად (როგორც რიანას აქვს) შევიღებე. ძალიან მომწონდა. მერე ვინანე... მანამდეY ყველა მეუბნებოდა, - არ შეიღებო, გადასარევი თმის ფერი გაქვსო. შეღებილივით მუქი შავი თმა მქონდა... მერე წითლად ღებვამ დამტანჯა: ბუნებრივი ფერის თმა მალე ამომდიოდა და შენაღებთან კონტრასტი ჩანდა. Bბოლოს და ბოლოს, ისევ შავად გადავიღებე და მოკლე "კარე" შევიჭერი. თმაზე ბევრი ექსპერიმენტი ჩავიტარე. ახლა გადავწყვიტე, დავასვენო და გავაჯანსაღო.
ნატალი, ანჯელინა და შორენა.
- ანჯელინა ჯოლის პირველად, სკოლის მოსწავლეობის პერიოდში შემადარეს: მაშინ არც ვიცოდი, ანჯელინა ვინ იყო. უბრალოდ, მეზობელს შავ-თეთრი გაზეთიდან ამოჭრილი მისი ფოტო ჰქონდა და გამომატანა, - ამ გოგოს ძალიან ჰგავხარო. ოჯახის წევრებს რომ ვუჩვენე, ყველამ აღნიშნა, - რა მაგრად ჰგავხარო!.. მერე ანჯელინა ჯოლის მონაწილეობით ფილმებიც ვნახე. ეს მსახიობი საქართველოშიც ძალიან ცნობილი გახდა და "ანჯელინას" ბევრი მეძახდა.

- შენთვის ეს ქათინაური იყო?
- ალბათ, ბავშვობაში უფრო მიხაროდა. ანჯელინა ჯოლის გარეგნობა მომწონდა, მაგრამ სულ ვამბობდი და დღემდე იმ აზრის ვარ, რომ მხოლოდ ერთი შეხედვით ვგავარ. ჩვენ შორის დიდ მსგავსებას ვერ ვპოულობ.

- შორენა ბეგაშვილსაც გამსგავსებენ. მასთან მსგავსების გამო, უხერხულ სიტუაციაში ხომ არ ჩავარდნილხარ?
- არა. გუშინაც, ბათუმში, ერთ-ერთ კაფეში მეგობრებთან ერთად ვიყავი. მიმტანები ჩემს მეგობრებს ეკითხებოდნენ, - შორენას და არის თუ - ორეულიო (იცინის)? ძალიან მიხარია, როცა მცნობენ, თუმცა, შორენასთან მსგავსება არ მაღიზიანებს: შორენა ძალიან ლამაზია.

- პირადად თუ იცნობ? თქვენი მსგავსების შესახებ თავად თუ აღუნიშნავს?
- "იღბლიან ბორბალში" ვმონაწილეობდი, რომლის წამყვანებიც - დუტა სხირტლაძე და შორენა ბეგაშვილი იყვნენ. უბრალოდ, დუტამ აღნიშნა, რომ მეც და შორენაც რუსთაველები ვართ, ორივე "თეატრალურ

სარდაფში" ვთამაშობდით და ორივე - მსახიობი და ლამაზი ვართ (იცინის). ჩვენ შორის მსგავსებაზე არაფერი უთქვამს.

ნამზეური და საცურაო კოსტიუმი
- ბევრი გოგონას მსგავსად, გარუჯვა მეც ძალიან მიყვარს. ბედნიერი ვარ, როცა კანს ფერი ეცვლება. საცურაო კოსტიუმებს რაც შეეხება, უპირატესობას ბიკინის ვანიჭებ, რადგან ტოპების ჩაცმა მიყვარს და არ მომწონს, როცა გაურუჯავი მუცელი ჩანს. უპირატესობას შავ საცურაო კოსტიუმს ვანიჭებ, მაგრამ ფერადიც მაქვს.

- პლაჟზე თაყვანისმცემლები არ გაწუხებენ?
- ზღვაში წყნარად რომ ვცუ­რავ, ჩემს გასაცნობად იქაც კი შემოცურავენ ხოლმე (იცინის). ამიტომ ზღვაში შორს გავდივარ. იქ გამოცურვას ვეღარ ბედავენ... პლაჟზე უმეტესად, მეგობრებთან ერთად გავდივარ. წელს გოგონებთან ერთად ვისვენებდი, სულ ერთად დავდიოდით. საშოპინგოდ თურქეთშიც გადავედით, მაგრამ უკმაყოფილო დავრჩით - იმდენი რაღაც ვერ ვიყიდეთ, რამდენიც გვინდოდა... იმედია, ბარსელონაში რომ წავალ, იქაურ მაღაზიებს "დავიპყრობ" (იცინის).

ყოფილ მეუღლესთან ერთად გართობა
- მე და ჩემს ყოფილ ქმარს კარგი ურთიერთობა გვაქვს, რაც ძალიან მომწონს, - ჩვენ ხომ საერთო შვილის მშობლები ვართ! ერთმანეთს პატივს ვცემთ, ვმეგობრობთ, ყველა თემაზე ვსაუბრობთ... მე და ჩემი მეგობრები თურქეთიდან ახალი დაბრუნებულები ვიყავით, როცა ყოფილმა მეუღლემ დამირეკა და შემომთავაზა, კლუბში წავიდეთო. მეგობრებთან ერთად იყო და უარი ვერ ვუთხარი. თან, იმ კლუბში ყველანი ჩემი ახლობლები არიან - შარშან იქ ვმუშაობდი. მოკლედ, გავერთეთ და დავიშალეთ... ზაფხულში ბავშვს ბათუმში, მამასთან ვუშვებ ხოლმე - ამ მხრივ, არ ვზღუდავ. ამ ქალაქში გამგზავრებაც ხშირად მიწევს, რადგან შვილის გარეშე ვერ ვძლებ. მინდა თუ არა, მეც იქ ვისვენებ, რომ მარიტასთან ერთად ვიყო...

- ყოფილ მეუღლესთან ურთიერთობა როგორ ვითარდება? თქვენი ახალი თანაცხოვრების შანსი არსებობს?
- არა. ცალ-ცალკე რომ ვართ, ერთმანეთს იმიტომ ვეწყობით. ჩვენ რადიკალურად განსხვავებული ადამიანები ვართ. თანაცხოვრებისას ბედნიერი ვერ ვიქნებოდი. ახლა არაფერი შეიცვლება, რადგან საერთოდ, ადამიანები არ იცვლებიან. ჯობს, ცალ-ცალკე ვიყოთ და კარგი ურთიერთობა გვქონდეს. რა თქმა უნდა, ცუდი ფაქტია და გული მწყდება, რომ ჩემი შვილი დედ-მამასთან ერთად არ იზრდება, მაგრამ ორივე მშობელი ცალ-ცალკე, შვილისთვის ბევრს ვაკეთებთ.

ოჯახი
- მე, ჩემი შვილი, ბებო და ჩემი ძმა ერთად ვცხოვრობთ. ძმა ჩემზე უფროსი - 33 წლის გახლავთ, პროფესიით - სტომატოლოგი, უცოლოა... ძალზე შეგნებული ბიჭია. ჯანსაღი ცხოვრების წესს მისდევს. ბებო ჩემთვის დედასავით არის. წარამარა მირეკავს - ამხელა გოგოსაც კი მაკონტროლებს (იღიმის). როცა მცალია, დროს შვილთან, ოჯახის წევრებთან ერთად ვატარებ. თუკი მარიტა ჩემთან არ არის, შეიძლება, მეგობრებთან ერთად განვიტვირთო ხოლმე.

- ნატალი, "ფლეიბოისთვის" თუ ფილმებისთვის გაშიშვლებაზე უარი ძმის გამო ხომ არ თქვი?
- არა. ბოლოს ხუმრობით მეუბნებოდა, - ამდენი შემოთავაზება გქონდა, გაგეხადაო (იცინის)... ამ ნაბიჯის გადადგმა ჩემთვის ოჯახს არ დაუშლია. თუ გავიხდიდი, შეიძლება, არ მოსწონებოდათ, მაგრამ მხარს დამიჭერდნენ. ისეთ ქვეყანაში ვცხოვრობთ, სადაც გაშიშვლებით პოპულარული იოლად ხდები, მაგრამ მირჩევნია, ჩემთვის მისაღები ნაბიჯებით შორი გზა მოვიარო და მიზანს ისე მივაღწიო. გაშიშვლება ერთგვარი მანიპულაციაა - ცნობილი გახდები. სამაგიეროდ, მერე რეჟისორები ერთ "ნიშაში" გხედავენ: ფიქრობენ - ეს კარგად იხდის, მოდი, ყველა ფილმისთვის დავუძახოთ და გაიხადოსო...

- არადა, სოციალურ ქსელში საკმაოდ თამამ ფოტოებს აქვეყნებ ხოლმე...
- "ფეისბუკზე" ისეთი განსხვავებული არაფერი "მიდევს", რაც სხვას არ აქვს გამოქვეყნებული...

საქმე
- კარაოკე-ბარში წამყვანად ვმუშაობ. იქაურობა ჩემი მეორე სახლივით, ოჯახივით არის. დილამდე ვმუშაობ ხოლმე. უქმე დღეებს ბათუმში ვატარებ, ასე რომ, ბარგი სულ გამზადებული მაქვს... ასევე, რეკლამებში, სხვადასხვა გადაღებაში ვმონაწილეობ, კასტინგებიდან პასუხებს ველი და ა.შ.

ბარსელონა და სინანული
- დედიკო ბარსელონაში მყავს და ძალიან მენატრება. ორი კვირით მიმიწვია და უნდა ვესტუმრო. კანარის კუნძულებზეც წამიყვანს, ყველაფერს დამათვალიერებინებს... წლებია, დედა ბარსელონაში მუშაობს. გამგზავრების შემდეგ, საქართველოში ჩამოსვლა ერთხელ მოახერხა. დედა ბარსელონაში "რეალითი შოუში" ჩემი მოგებული ფულით გაემგზავრა, რადგან საქართველოში შვილების მისახედად ვერაფერი მოიფიქრა. ჩვენი სწავლის ფული, სხვადასხვა საზრუნავი მხრებზე დააწვა. მშობლისთვის ძალიან ძნელია შვილების დატოვება, მაგრამ დედა შვილებს ყოველთვის საკუთარ თავზე წინ აყენებს. დედა ჩემთვის სამაგალითო, ყველაზე ძვირფასი და წმინდაა... ის ძალიან მაკლია... ზოგჯერ მინანია კიდეც, - ნეტავ, საერთოდ არ მომეგო, დედა აქ იქნებოდა-მეთქი...