მაკა ზამბახიძე: ''ჩემს სურათთან ერთად ეძინა და ამბობდა, სულ არ მჭირდება პოპულარული დედა, მე მინდა დედა სახლში''

მაკა ზამბახიძეს 14 წლის შვილი - სალომე ჰყავს. დედა 18 წლის გახდა და შვილს, როგორც თოჯინას ისე ექცეოდა. ახლა მკაცრი დედაა, თუმცა შვილს ხანდახან ასაკიდან გამომდინარე უთმობს.

- სალომე რომ გამიჩნდა, საკმაოდ პატარა, 18 წლის ვიყავი. ამ ასაკშიც კი ბავშური ვიყავი, ძალიან ჩამოყალიბებული და ყველფრის მცოდნე არ გახლდით, მეტიც, როცა გავთხოვდი, ჩემ გარშემო ეს ყველას გაუკვირდა, შოკის მომგვრელი ფაქტი იყო. მიუხედავად ჩემი ასაკისა, შვილს ისე არ ვექცეოდი, როგორც თოჯინას,თავიდანვე გავაცნობირე ჩემი პასუხისმგებლობა და საკითხს სერიოზულად მივუდექი. ვკვებავდი ბუნებრივად და მინდოდა, ეს შვიდ თვემდე მაინც გაგრძელებულიყო. სალომეს გაზრდაში დედა მეხმარებოდა, მეტწილად მისი გაზრდილია, მაგრამ მე ყოველთვის ჩართული ვიყავი ამ პროცესში...

- მაშინ რამდენად აქტიური იყავი კარიერული თვალსაზრისით...
- ბავშვის გაჩენიდან ექვსი წელი ჩვეულებრივი დიასახლისი, დედა ვიყავი, უმოქმედო მომღერალი (იცინის). 24 წლის ასაკში დაიწყო ჩემი კარიერული წინსვლა



- როგორი იყო შენი აღზრდის მეთოდი?
- სკოლის ასაკამდე სალომე ადვილი გასაზრდელი იყო, ახლა რომ ვუყურებ დედებისა და შვილების ურთიერთობას, ძალიან მიკვირს, იმიტომ, რომ სალომე უპრობლემოდ გავზარდე, არ იყო ჩემზე მოწებებული, საკმაოდ

მარტივად ვტოვებდი, შემეძლო გამეტანებინა ჩემი მეგობრისთვის, არ გვქონდა ის მომენტი, რომ უჩემოდ ან დედაჩემის გარეშე ვერ დაეძინა... ერთადერთი, რისიც მეშინია, დაკარგვაა, ესეც იმიტომ, რომ ერთი-ორჯერ დამეკარგა. სამი წლის იყო, მეზობელთან შესულა, ჩვენ ვეძებდით, გადავატრიალეთ მთელი უბანი... მიუხედავად იმისა, რომ პატარა არაა, 14 წლისაა, დღეს მაინც მკაცრი ვარ, თუმცა რაღაც-რაღაცებს ასაკიდან გამომდინარე ვუთმობ და ვცდილობ, ჩემთვის მისაღებ ჩარჩოებში მივცე თავისუფლება.

- როგორ შეხვდა სალომე შენს კარიერულ წინსვლას?
- საკმაოდ რთულად. იყო პერიოდი, როცა ჩემს სურათთან ერთად ეძინა და ამბობდა, არ მჭირდება პოპულარული დედა, მე მინდა დედა სახლში... ახლა უკვე დიდი გოგოა და გაგებით ეკიდება ამ თემას, არ გვაქვს ეს პრობლემები, მაგრამ მაინც სულ ვენატრები.



- სიმღერით რა ასაკიდან დაინტერესდა, შენი ფაქტორი იყო გადამწყვეტი ამ საკითხში?
- ბავშვობიდან ნათელი იყო, რომ სალომეს ჰქონდა აბსოლუტური
სმენა და კარგი ხმა, მაგრამ სამი წლის ასაკში გლანდების ოპერაცია გავუკეთეთ და ხმა გაუფუჭდა. ვეღარც კი წარმომედგინა, თუ ოდესმე იმღერებდა. დასანანი იყო, რომ სმენა ჰქონდა, ხმა კი ხელს არ უწყობდა, მაგრამ წლები რომ გავიდა, ხმა ნელ-ნელა აღუდგა და ძალიან კარგი ტემბრი ჩამოუყალიბდა. მე და სალომემ რომ ჩავწერეთ სიმღერა, ეს უკვე ცნობილია საზოგადოებისთვის, მაგრამ სალომემ დამიწერა სიმღერა, რომელიც უკვე ჩაწერილია და მალე ვიდეორგოლთან ერთად შევთავაზებ მსმენელს. ეს იქნება ჩემი პირველი სოლოსიმღერა.

წყარო: reitingi.ge