• ვინ დააბრუნა კატო კირვალიძე „ჩემი ცოლის დაქალებში“

    რამდენიმე დღეში სერიალ "ჩემი ცოლის დაქალების" ახალი, მერვე სეზონი იწყება. სერიალის შემქმნელები მაყურებელს დიდ სურპრიზს უმზადებენ, "ჩემი ცოლის დაქალებში" ნინო გაჩეჩილაძე, ნამდვილი კატო კირვალიძე ბრუნდება. მან სერიალი ორწელიწადნახევრის წინ დატოვა, რასაც ათასი ჭორ-მართალი და მაყურებლის უკმაყოფილება მოჰყვა. რას აკეთებდა ამ პერიოდის მანძილზე, რატომ თქვა უარი სხვა არხების შემოთავაზებებზე და რატომ დათანხმდა სერიალში დაბრუნებას, ამის შესახებ ნინო გაჩეჩილაძე "ამბები.გე"-ს ექსკლუზიურად ესაუბრა.

    - ნინო, ჩვენთვის ცნობილია, რომ "ჩემი ცოლის დაქალებში" დაბრუნებაზე ყოველთვის უარს ამბობდით, რატომ მიიღეთ სერიალში დაბრუნების გადაწყვეტილება ამდენი ხნის შემდეგ?
    - დაახლოებით ორწელიწადნახევის წინ დავტოვე სერიალი. იმიტომ ვამბობდი უარს დაბრუნებაზე, რომ ამ როლზე სხვა მსახიობი იყო აყვანილი და მასზე იწერებოდა სცენარი. მე "ფორმულა კრეატივიდან" სკანდალით არ წამოვსულვარ. უბრალოდ იყო რაღაც გაუგებრობა, თუმცა ჩემი თანამშრომლობა მათთან გრძელდებოდა, ეს იყო რეკლამა, რომელიც გიორგი ლიფონავამ გადაიღო და ფილმი "ტაქსი", რომელიც გადაიღო მიშა მშვილდაძემ. შესაბამისად, ჩვენ ნორმალური ურთიერთობა გვქონდა. მე დავრჩი სერიალის გულშემატკივარი, რადგან ჩვენი დაწყებული იყო "ჩემი ცოლის დაქალები". მათი შემოთავაზება დავრუნებოდი სერიალს, მოულოდნელი იყო, თუმცა დაბრუნება იქ, სადაც შენი ადგილია ყოველთვის უფრო ადვილია. "კატო" ჩემთვის ორგანული პერსონაჟია, ბევრს ვმუშაობდი, ბოლომდე გათავისებული მყავდა ეს პერსონაჟი. ძალიან დიდი შემართებით ვარ. ეს იქნება საკმაოდ საინტერესო სეზონი, მომენატრა ჩემი მაყურებელი, დაბრუნების ერთ-ერთი მთავარი მიზეზი სწორედ მაყურებელია, რომელიც ამ პერიოდის მანძილზე ყოველდღიურად მწერდა სოციალურ ქსელში, ქუჩაში მაჩერებდნენ, მელოდებოდნენ ეკრანზე და მეუბნებოდნენ შენს მიერ განსახიერებულ კატოს ველოდებითო. მსახიობისთვის დაბრუნება იქ, სადაც ერთგული მაყურებელი და კარგი სტაფი ელოდება, ძალიან მნიშვნელოვანია. არანაკლებად გაუხარდა ჩემი დარუნება სტაფს, როცა მოლაპარაკებაზე მივედი, მივხვდი მარტო მე კი არ მომენატრნენ ისინი, მათაც მოვენატრე.
    დარწმუნებული ვარ, ისევე წარმატებულად გაგრძელდება ჩვენი თანამშრომლობა, როგორც დაიწყო.

    - რას საქმიანობდით ამ პერიოდის მანძილზე, როცა სერიალში აღარ თამაშობდით?
    - მარჯანიშვილის თეატრში ახალ როლებზე ვმუშაობდი. 2003 წლიდან ვარ ამ თეატრში, ჩემთვის თეატრი მეორე სახლია, კინოს, ტელევიზიას, თეატრს თავისი ადგილი აქვს ჩემს ცხოვრებაში.თუმცა ალბათ არავის გაუკვირდება, თუ ვიტყვი, რომ ჩემს გულში ყველაზე დიდი ადგილი თეატრს უჭირავს. სერიალიდან წამოსვლის შემდეგ ვითამაშე სპექტაკლებში "მთვრალი ალუბალი", "შევხვდებით სამოთხეში", "ქალი ქვიშაში", მარგოს როლი "ჯაყოს ხიზნებში", ახლა დავიწყეთ მუშაობა ვაცლავ ჰაველის "წასვლაზე", რომელსაც დგამს ორი რეჟისორი: ლევან წულაძე და დავით ჩხარტიშვილი. იმის მიუხედავად, რომ ეთერით არ ვჩანდი, ბედნიერი ვარ რომ აქტიურად ვიყავი დაკავებული თეატრში.

    - სხვა ტელევიზიებიდან თუ იყო შემოთავაზებები წამყვანობაზე და სერიალებში გადაღებაზე?
    - რა თქმა უნდა, იყო შემოთავაზებები. როგორც კი გადაწყდა, რომ მე უნდა წამოვსულიყავი სერიალიდან ზუსტად ორ დღეში დამირეკეს სხვადასხვა არხებიდან. "დღის შოუდან", პირადად თამარ ღვინიანიძე დამიკავშირდა და შემომთავაზა ქასთინგზე მისვლა, მაგრამ არ წავედი, ვინაიდან ვთვლი რომ ჩემთვის გადაცემის ეს ფორმატი არ არის საინტერესო. ბევრად საინტერესოა ფილმში და სერიალში გადაღება, ვიდრე სოციალურ თემებზე გადაცემის წაყვანა. საკუთარი თავი არ
    მიმაჩნია ისეთ კომპეტენტურად "დღის შოუს" ეთერში დავჯდე და სოციალურ პრობლემებზე ვისაუბრო.

    - მხოლოდ ეს იყო უარის მიზეზი?
    - ბევრმა ფაქტორმა განაპირობა უარი, თუმცა მთავარი მიზეზი მაინც იყო თეატრი, სერიალიდან წამოსვლის შემდეგ კი ის პეროდი ავანაზღაურე, რომელიც სერიალის დროს დავაკელი თეატრს.

    - დიდხანს იფიქრეთ სერიალში დაბრუნებაზე?
    - ეკა მჟავანაძემ, ქასთნგ მენეჯერმა დამირეკა, ორი დღე ვიფიქრე და ურთიერთშეთანხმების საფუძველზე მივიღე გადაწყვეტილება, რომელიც ყველა მხარემ მოიწონა, ჩემმა მეგობრებმა, ოჯახის წევრებმაც და სერიალის მხარემ- მათ თქვეს რომ ძალიან მაგარი იქნებოდა ჩემი დაბრუნება სერიალისთვის…

    - სერიალში ლელა მებურიშვილმა ჩაგანაცვლათ, თუ სოციალური ქსელის და ფორუმების მომხმარებლების შეფასებებით ვიმსჯელებთ, მათ მისი კანდიდატურა კატო კირვალიძის როლზე ვერ მიიღეს, თავად რას ფიქრობთ ამაზე და რა ურთიერთობა გაქვთ ლელა მებურიშვილთან?
    - ასე ვერ ვიტყოდი, ჩემი მხრიდან არაკორექტული იქნება ამ აზრის დაფიქსირება. ლელა მებურიშვილს მხოლოდ წარმატებებს და ბედნიერებას ვუსურვებ.

    - რა ცვლილებები იგეგმება სერიალში, როგორი იქნება კატო კირვალიძე მერვე სეზონზე?
    - რა თქმა უნდა პერსონაჟი ისევ გააქტიურდება, როგორც იყო პირველ და მეორე სეზონებში. ზუსტად რა იქნება, როგორ და რა ბედი ეწევა მას, საიდუმლოდ დავტოვებ. წლის ბოლომდე ალბათ საოცრებებს მოახდენს კატო, როგორც სჩვევია მის პერსონაჟს.

    - როცა სერიალში აღარ თამაშობდით, მისი აქტიური მაყურებელი იყავით?
    - სიმართლე გითხრათ, აქტიურად ვერ ვუყურებდი, რადგან საღამოობით გვქონდა დანიშნული სპექტაკლები. როცა ტელევიზორთან ვიყავი საღამოს 10 საათზე, აუცილებლად ვუყურებდი. იქ ჩემი მეგობრები თამაშობენ, ანი, ყოჩი, მაკა…რომელი ერთი ჩამოვთვალო? ძალიან მიყვარს და ვგულშემატკივრობ მათ. სულ ვისმენდი სხვების აზრს სერიალის შესახებ სოციალურ ქსელში, ინბოქსში მომდიოდა მაყურებლის ბევრი წერილი, რომლებიც ბოლომდე არ კარგავდნენ იმის იმედს, რომ დავრუნდებოდი სერიალში. როგორც ჩანს, იმდენად დიდი იყო მათი სურვილი, რომ მართლაც დავბრუნდი. ძალიან დიდი მადლობა მინდა გადავუხადო მაყურებელს გულშემატკივრობისთვის, გპირდებით რომ ეს იქნება ერთ-ერთი საუკეთესო სეზონი. კატო კირვალიძე დაბრუნდა.
    წყარო: reitingi.ge
    1 995 ნახვა
    GOGATV

    abezara