მოდელები, რომლებიც ძალადობას ემსხვერპლნენ

სამხრეთ აფრიკელი მოდელი და მსახიობი რივა სტინკამპი ცნობილმა პარაოლიმპიელმა მორბენალმა, ოსკარ პისტორიუსმა 2013 წლის 14 თებერვალს მოკლა. რივა დაახლოებით, ღამის 4 საათზე პისტორიუსის სახლში, იარაღიდან რამდენჯერმე ნასროლმა ტყვიამ იმსხვერპლა. ხმები იმის შესახებ, რომ პისტორიუსს იგი მძარცველში შეეშალა, პოლიციამ არ დაადასტურა. სამართალდამცავების თქმით, მკვლელობის ადგილზე, რივას და ოსკარის გარდა არავინ იმყოფებოდა. 2014 წლის 10 სექტემბერს ოსკარ პისტორიუსი დამნაშავედ სცნეს განზრახ მკვლელობაში, თუმცა, 2014 წლის 12 სექტემბერს, მას მოუხსნეს ეს ბრალდება. 2014 წლის 21 ოქტომბერს სასამართლომ პისტორიუსს ხუთი წლით თავისუფლების აღკვეთა მიუსაჯა.



გავრცელებული ხმების მიხედვით, წმინდა ვალენტინის დღესთან დაკავშირებით, გოგონას შეყვარებულისთვის სიურპრიზის გაკეთება უნდოდა. ის სპორტსმენის სახლში ღამის 4:00 საათზე შევიდა და გააღვიძა. შეშინებულ სპორტსმენს გოგონა მძარცველი ეგონა და გაისროლა.



19 წლის მარია ხოსე ალვარადომ "მის ჰონდურასის" ტიტული 2014 წლის აპრილში მოიპოვა. მალე ის ლონდონში, "მის მსოფლიოს" კონკურსისთვის მოსამზადებლად უნდა გაფრენილიყო, რომელიც დეკემბერში გაიმართება. თუმცა, ყველაფერი მაშინ შეიცვალა, როდესაც პოლიციამ მარია ხოსე ალვარადოსა და მისი 23 წლის დის, სოფიას ცხედრები იპოვა. სამართალდამცველების განცხადებით, გოგონების ცხედრებს მდინარის ნაპირზე მიაგნეს. დები ერთ-ერთ კურორტზე წვეულებაზე ყოფნის შემდეგ დაიკარგნენ. პოლიციამ 10 ადამიანი დაკითხა, რომლებმაც გოგონები გაუჩინარებამდე ნახეს. მათ შორის, ვილის პატრონი, სადაც წვეულება მიმდინარეობდა და სოფიას მეგობარი ბიჭი. როგორც პოლიციაში განაცხადეს, სწორედ მან ნახა ბოლოს გოგონები. ერთ-ერთი ეჭვმიტანილი სწორედ ისაა. პოლიციის ვარაუდით, მამაკაცმა შეყვარებული ეჭვიანობის ნიადაგზე მოკლა და მისი დაც გაიმეტა სასიკვდილოდ.



ყოფილი "მის ვენესუელა" მონიკა სპიარი ქმართან ერთად, 6 იანვარს ჩაცხრილეს. ავტომობილს, რომლითაც მოდელი ქმარ-შვილთან ერთად მგზავრობდა, ბორბალი გაუსკდა. როგორც ჩანს, ყაჩაღობა წინასწარ დაგეგმილი იყო, რადგან დამნაშავეები მანქანის გაჩერებისთანავე გამოჩნდნენ და ცეცხლი გახსნეს. წყვილი შვილთან ერთად მანქანაში ჩაიკეტა. სროლის შედეგად, ყოფილი "მის ვენესუელა" და

მისი ირლანდიელი მეუღლე ადგილზე დაიღუპნენ, მათი 5 წლის გოგონა კი ფეხში დაიჭრა. ყოფილი "მის ვენესუელას" მკვლელობამ ქვეყანაში დიდი რეზონანსი გამოიწვია. ამ ფაქტს პრეზიდენტი ნიკოლას მადუროც გამოეხმაურა.

29 წლის მონიკა სპიარმა "მის ვენესუელას" ტიტული 2004 წელს მოიპოვა. მას შემდეგ ლამაზმანი ამერიკაში გადასახლდა და ესპანურენოვან სერიალებში მონაწილეობდა. საბედისწერო დღეს სპიარი ოჯახთან ერთად სამშობლოში საახალწლო არდადეგებზე ბრუნდებოდა.



19 წლის კატია კორენი ყირიმის ერთ-ერთ სოფელში, საკუთარი სახლის მახლობლად იპოვეს მკვდარი. მუსულმანი გოგონა ქვებით ჩაქოლეს, მას შემდეგ, რაც მან უკრაინის სილამაზის კონკურსში მიიღო მონაწილეობა. ყირიმის სამართალდამცავმა ორგანოებმა სისხლის სამართლის საქმე აღძრეს და სამი მამაკაცი დააკავეს, რომელთაც გოგონას მკვლელობა ედებოდათ ბრალად. მამაკაცებმა აღიარეს დანაშაული და განაცხადეს, რომ კატია შარიათის წესების დარღვევის გამო მოკლეს.