ქალბატონთა რომელი ნაკლი იზიდავს მამაკაცებს

აუცილებელია, იყოთ უზადო მეოჯახე და დამოუკიდებელი? მოდური და გემოვნებიანი? მამაკაცებისგან განსხვავებით, ქალბატონები სულ სხვაგვარად აფასებენ საკუთარ შესაძლებლობებსა და ფიზიკურ მონაცემებს – ის, რაც მათ ნაკლად მიაჩნიათ, აღმოჩნდა, რომ მამაკაცთა უმრავლესობისთვის მიმზიდველია.

მაგალითად:

ზედმეტი წონა. ხშირად, როცა ქალი თავს მსუქნად მიიჩნევს, ერიდება მამაკაცის გაცნობას, გაშიშვლებას სექსის დროს - ეს, რა თქმა უნდა, ხელს უშლის მას, თავი ბედნიერად იგრძნოს. შედეგად, ქალბატონები უამრავ მტანჯველ დიეტას მიმართავენ, სპორტდარბაზებში უკანასკნელი ძალების გამოცლამდე ვარჯიშობენ და ცდილობენ, პოდიუმზე მონარნარე მოდელებს დაემსგავსონ.

არადა, სინამდვილეში მამაკაცთა მხოლოდ ძალიან მცირე პროცენტს მოსწონს ზედმეტად გამხდარი გოგონები. მამაკაცთა უმრავლესობას ეგრეთ წოდებული ”ქვიშის საათის” აღნაგობის ქალბატონები მოსწონს – საკმაოდ ფუმფულა ქალური ფორმებით.

პატარა მკერდი. ეს არ არის ტრაგედია. საერთოდ, მამაკაცებს ზოგადად ქალის მკერდი უყვართ. პატარა მკერდს თავისი პლუსები აქვს: შეგიძლიათ ბიუსტჰალტერი არ ჩაიცვათ, თანაც ქსოვილიდან გამოკვეთილი კერტების ცდუნებას რომელი მამაკაცი გაუძლებს?

კარგი მადა. ბევრი ქალბატონი ერიდება მამაკაცის თანდასწრებით მადიანად ჭამას, მხოლოდ მსუბუქი სალათებით შემოიფარგლება, მაგრამ როგორც კი თავს მარტო დაიგულებს, შეუძლია, მთელი მაცივარი გამოაცარიელოს.

ფსიქოლოგები ამტკიცებენ, რომ მამაკაცებს სულაც არ მოსწონთ ისეთი ქალბატონის გვერდით ყოფნა, რომელიც ხან ერთ კერძზე იბზუებს ცხვირს და ხან მეორეზე; შემდეგ კი ცდილობს, მალულად დანაყრდეს. გამოსავალი მარტივია - უბრალოდ, ისწავლეთ ლამაზად ჭამა და მამაკაცის თანდასწრებით მიირთვით რამდენიც გენებოთ.

ცუდი დიასახლისი. რა თქმა უნდა, მამაკაცს უნდა, რომ მისი ცხოვრების თანამგზავრი კარგი დიასახლისი იყოს, მაგრამ ჰიპერაქტიური მეოჯახეობა ყოველთვის სათანადო გამოძახილს ვერ პოულობს მის გულში.

თუ ქალი მთელ თავის ენერგიასა და დროს სახლში სამაგალითო წესრიგის დამყარებას უთმობს, მამაკაცი მალე კარგავს მისადმი ინტერესს. მას აინტერესებს ქალი, რომელიც მისითაა დაინტერესებული.

არამოდური ტანსაცმელი. ბევრ ქალბატონს რცხვენია თავისი მოკრძალებული გარდერობის. შიშობს, მამაკაცის თვალში არასტილური და არამოდური არ გამოჩნდეს. თუმცა, რა ტენდენციებსაც უნდა გვთავაზობდეს მოდა, მამაკაცს, უპირველეს ყოვლისა, ქალური სამოსი მოსწონს, რომელიც ხაზგასმით წარმოაჩენს ქალის ფიგურას.

ქალის სამოსში მამაკაცის თვალისთვის მთავარი კრიტერიუმი სისუფთავე და მოწესრიგებულობაა. სწორედ ამიტომ არ მოსწონს მათ უმეტესობას ჟატი ქსოვილებისა და დახეული ჯინსების მოდური ტენდენციები.

ჟურნალი ”რეიტინგი”