საგუნდო მუსიკის დღესასწაული

საგუნდო მუსიკის მოყვარულთათვის მაისის თვე სასიამოვნოდ დატვირთული აღმოჩნდა საერთაშორისო ფესტივალებით, კონცერტებით თუ საგუნდო მუსიკის საღამოებით. ამ შემოქმედებითმა აქტივობებმა საქართველოს სხვადასხვა ქალაქი მოიცვა და ერთი მოვლენის ირგვლივ გააერთიანა ქართული და უცხოური საგუნდო კოლექტივები. მუსიკალური საზოგადოება და მსმენელი განებივრებული იყო ევროპული სტანდარტის მქონე საღამოებით. დღესასწაულად ქცეული დღეები კი იყო შედეგი ხანგრძლივი მოსამზადებელი პერიოდის, დიდი შრომის და მაღალი პროფესიონალიზმის მქონე ხელოვანთა ერთობისა. ამ მხრივ, საქართველოს კულტურულ ცხოვრებაში უდაოდ მნიშვნელოვანი როლი აქვს საქართველოს საგუნდო საზოგადოებას, რომლის ინიციატივით არაერთი ღირებული პროექტი განხორციელდა.

 

აღსანიშნავია საქართველოს ბავშვთა და ახალგაზრდული საგუნდო კოლექტივების მეორე ეროვნული კონკურსი, რომელიც ორ ტურად ჩატარდა და მოიცვა მთელი საქართველო. სხვადასხვა კატეგორიაში წარმოდგენილ იქნა მრავალი საგუნდო კოლექტივი, რამაც კიდევ ერთხელ დაადასტურა ქართველი ერის დიდი სიყვარული საგუნდო მუსიკის მიმართ. კონკურსის გალა კონცერტს და დაჯილდოებას 21 მაისს უმასპინძლა ვ. სარაჯიშვილის სახელობის თბილისის სახელმწიფო კონსერვატორიის დიდმა საკონცერტო დარბაზმა. კონცერტში მონაწილეობდნენ საპრიზო ადგილების მფლობელი გუნდები, ასევე პირველი ეროვნული კონკურსის გრანპრის მფლობელი - თბილისის გოგონათა გუნდი, რომელიც სტუმრის სტატუსით მონაწილეობდა ამ კონცერტში.

ცალკე ყურადღებას იმსახურებს XI საერთაშორისო ფესტივალი "აღდგომიდან ამაღლებამდე", რომლის ფარგლებშიც თბილისის სხვადასხვა კულტურულ ცენტრში საინტერესო საღამოები შედგა. 22 მაისის საღამო კი ქართულ საგუნდო მუსიკას დაეთმო. კონცერტში მონაწილეობდა გორის ქალთა გუნდი, ვაჟთა ფოლკლორული გუნდი "მძლევარი", ახალგაზრდული შერეული გუნდი "თუთარჩელა" და თბილისის გოგონათა გუნდი. შესრულდა სხვადასხვა დროის ქართველ კომპოზიტორთა შესანიშნავი ქმნილებები. ეს იყო ქართული საგუნდო მუსიკის დღესასწაული, რომელიც სრულიად საქართველოს კათოლიკოს-პატრიარქის, უწმინდესის და უნეტარესის ილია მეორის საგალობლით დაგვირგვინდა.

მაისის თვის კულმინაციად კი შეიძლება ჩაითვალოს პირველი საერთაშორისო საგუნდო ფესტივალი, რომელსაც 23-26 მაისს ქ. გორმა უმასპინძლა. ფესტივალში მონაწილეობდნენ ქართული და უცხოური (ფინეთი, ესტონეთი, სომხეთი, აზერბაიჯანი) საგუნდო კოლექტივები. ფესტივალის ფარგლებში შედგა საინფორმაციო შეხვედრა ასოციაცია ევროპა-კანტატას პრეზიდენტთან; პრეზენტაცია - ღია გაკვეთილები, ექსკურსიები და შთამბეჭდავი კონცერტები, რომლებიც გორის გ. ერისთავის სახელობის სახელმწიფო დრამატულ თეატრში ტარდებოდა. ქართველმა მსმენელმა გაიცნო ფინეთის, ტალინის პორტის, სომხეთის სახელმწიფო კამერული გუნდები და აზერბაიჯანის სახელმწიფო კაპელა. ქართული კოლექტივებიდან წარმოდგენილი იყო ვაჟთა გუნდი "მძლევარი", საქართველოს ნ. სულხანიშვილის სახელობის სახელმწიფო ეროვნული კაპელა, აფხაზეთის სახელმწიფო კაპელა, ახალგაზრდული შერეული გუნდი "თუთარჩელა", თბილისის გუნდი "ბაროკო", გორის ქალთა კამერული გუნდი, ს. ცინცაძის სახელობის სამუსიკო საზოგადოებრივი კოლეჯის ბავშვთა გუნდი, მამაკაცთა გუნდი "გორი" და თბილისის გოგონათა გუნდი. ამ ფესტივალის მნიშვნელობა უდაოდ დიდია ქართული მუსიკალური საზოგადოებისათვის. ეს არის მაღალი სტანდარტის მქონე მუსიკალური მოვლენა, რომელსაც პროფესიონალთა შემოქმედებითი გუნდი ქმნის და ნამდვილ დღესასწაულს უწყობს საგუნდო მუსიკაზე შეყვარებულებს.

დასასრულს, აუცილებლად უნდა აღინიშნოს, რომ ზემოთ დასახელებულ მნიშვნელოვან მოვლენებს მხარს უჭერდა საქართველოს კულტურისა და ძეგლთა დაცვის სამინისტრო, თბილისის მერია, საქართველოს საგუნდო საზოგადოება, ვ. სარაჯიშვილის სახელობის თბილისის სახელმწიფო კონსერვატორია, საქართველოს განათლებისა და მეცნიერების სამინისტრო, საქართველოს ფოლკლორის სახელმწიფო ცენტრი, ფონდი ქართული გალობა, ახალგაზრდობის სულიერი და ინტელექტუალური განვითარების ცენტრი, საქართველოს მასწავლებელთა პროფესიული განვითარების ეროვნული ცენტრი, საქართველოს საპატრიარქოს ტელევიზია "ერთსულოვნება" და საქართველოს საზოგადოებრივი მაუწყებელი.

როგორც საგუნდო მუსიკის მსმენელი და ამასთან, თბილისის გოგონათა გუნდის წევრი, ვულოცავ ქართულ მუსიკალურ საზოგადოებას წარმატებულ და შემოქმედებითად ნაყოფიერ თვეს და ყველა საგუნდო კოლექტივს ვუსურვებ წინსვლას და დღეგრძელობას. მიხარია, რომ გახლდით ამ საყოველთაო დღესასწაულის მონაწილე!

წყარო: intermedia.ge