ინტიმური ჰიგიენის 7 ძირითადი წესი

1. ინტიმური ჰიგიენის დროს ნუ გამოიყენებთ ჩვეულებრივ საპონს. ამ დროს შეიძლება ინტიმური ბალანსი დაირღვეს.

გამოიყენეთ უშუალოდ ინტიმური ჰიგიენისთვის განკუთვნილი საშუალებები, რომლებიც უზრუნველყოფს სისუფთავეს, ანადგურებს მავნე ფლორას და ხსნის ლორწოვანის გაღიზიანებას. გახსოვდეთ: ინტიმური ჰიგიენისთვის განკუთვნილი გელი არ კურნავს სქესობრივი გზით გადამდებ თუ სხვა ქალურ დაავადებებს. ამიტომ თუ გამონადენი, წვა ან ქავილი გაწუხებთ, აუცილებლად მიმართეთ ექიმ-გინეკოლოგს.

2. დაიბანეთ ინტიმური ადგილები 2-ჯერ დღეში. იდეალური იქნებოდა ამის გაკეთება საპირფარეშოში ყოველი შესვლის შემდეგ, მაგრამ ამის საშუალება ფიზიკურად არ არის. ამიტომ მოიმარაგეთ სველი ხელსახოცები, რომლებიც გაჟღენთილია ანტისეპტიკური ლოსიონით, არ შეიცავს სპირტს და ამდენად, არ აღიზიანებს ლორწოვანს.

ზემოთ ხსენებული ხელსახოცები უხვად არის გაჯერებული მცენარეული ზეთებისა და სამკურნალო ბალახების დამამშვიდებელი ექსტრაქტებით. გახსოვდეთ: შეფუთვაზე უნდა იყოს წარწერა "ინტიმური" და მსგავსი პროდუქცია მხოლოდ აფთიაქებში უნდა შეიძინოთ!

3. ყოველდღიური საფენები 4 საათში ერთხელ უნდა იცვალოთ. მეტხანს საფენის გაჩერების შემთხვევაში იზრდება ბაქტერიების გამრავლების რისკი, რაც თავისთავად არასასურველ შედეგს გამოიღებს.

ეს წესი კრიტიკულ დღეებზეც ვრცელდება. თუ ალერგიისკენ ხართ მიდრეკილი, თავი შეიკავეთ არომატული დანამატების მქონე საფენების გამოყენებისგან. განსაკუთრებული ყურადღება ინტიმურ ჰიგიენას ფეხმძიმობის დროს მიაქციეთ. გართულებების 60%-ზე მეტი ჰიგიენის ელემენტარული წესების არცოდნის მიზეზითაა გამოწვეული.

4. საფენები კრიტიკულ დღეებში შეფუთვაზე არსებული "წვეთების" რაოდენობის მიხედვით გამოიყენეთ. შეფუთვაზე გამოსახული წვეთი - 1, 2, 3 - მიუთითებს იმაზე, თუ რამდენი სითხის შეწოვა შეუძლია საფენს და არა - ციკლის დღეების რაოდენობაზე.

თუ შეფუთვაზე 6 წვეთია გამოსახული, მაშინ ეს საფენი ღამით გამოიყენეთ. ის ფორმითაც და ზომითაც განსხვავდება და უზრუნველყოფს ღამის დაცვას. ციკლის პირველ დღეებში გინეკოლოგები 4-წვეთიანი საფენების გამოყენებას გირჩევენ, რადგან დენა უფრო ინტენსიურია.

5. ტამპონები 2-3 საათში ერთხელ გამოიცვალეთ. მათი მეტხანს გაჩერება იწვევს სიმშრალეს და ლორწოვანის გაღიზიანებას, იქმნება ხელსაყრელი გარემო მიკრობების გამრავლებისთვის.

ნივთიერებები, რომლებსაც ეს მიკრობები დიდი რაოდენობით გამოყოფს, შეიძლება სისხლში მოხვდეს და ტოქსიკური შოკის სინდრომი გამოიწვიოს. გახსოვდეთ: საშოსა და საშვილოსნოს ყელის დაავადებების დროს ტამპონებს ნუ გამოიყენებთ!

6. ბაქტერიებისა და სიმშრალისგან დასაცავად გამოიყენეთ სპეციალური კრემები. სასურველია მათი გამოყენება აუზში ბანაობის წინაც. ინტიმური კრემები შეიცავს ანტისეპტიკურ დანამატებს და მიკრობებიც ვეღარ მრავლდება.

ამ კრემის გამოყენება შეიძლება სექსის დროს (დამატენიანებელ საშუალებად, საცხად). ეს განსაკუთრებით აქტუალურია "ბალზაკის" ასაკში. საქმე ისაა, რომ 40 წლის შემდეგ იცვლება ჰორმონული ფონი და ინტიმური ადგილებიც საჭიროებს "დატენიანებას".

7. ქალის საცვალი უნდა იყოს მაქსიმალურად მოსახერხებელი. ეს ინტიმური ჯანმრთელობის საწინდარია. არავინ დავობს იმაზე, რომ ტანგა-ტრუსი ძალიან ლამაზი და სექსუალურია, მაგრამ წვრილი ზოლი სიარულის დროს "მუშაობს" როგორც ბაქტერიის გადამტანი ანუსიდან სასქესო ორგანოებში.

გარდა ამისა, თუ საცვალი ზედმეტად მჭიდროდ ეკვრის კანს, ფერხდება ჟანგბადის მიწოდება და სისხლის მიმოქცევა ირღვევა.

ქალის თეთრეული უნდა იყოს ნატურალური ქსოვილისგან (ბამბა, სელი და სხვა). ამ შემთხვევაში კანი სუნთქავს და ბაქტერიებსაც მცირე "შანსები" აქვთ. ნატურალური ქსოვილისგან დამზადებული საცვლების ერთადერთი ნაკლი ისაა, რომ მალე კარგავს ფორმას. განსაკუთრებით, ზაფხულის პერიოდში შეიკავეთ თავი სინთეტიკური საცვლების ჩაცმისგან.

ნებისმიერ შემთხვევაში, რა ქსოვილის თეთრეულიც უნდა შეიძინოთ, შეეცადეთ, უბე მაინც იყოს ნატურალური ქსოვილისგან.

ჟურნალი "და ქალი"