ნანუკა ჟორჟოლიანის და ერეკლე კოდუას ქორწილი ჩაიშალა

გამოაქვეყნა: admin
//
19 ოქტომბერი 2012
//
//
//
ნახვები: 2557
ნანუკა ჟორჟოლიანის და ერეკლე კოდუას ქორწილი ჩაიშალა
"ძალიან მალე დაგემშვიდობებით და გეტყვით ყველას მადლობას, რომ იყავით ჩემთან ერთად!.. რამდენიმე გადაცემა გავა ეთერში, ის, რაც ჩაწერილია, ანუ პირველი სეზონი ვიქნებით ერთად, მერე დაგემშვიდობებით... ეს ძალიან მძიმეა ჩემთვის, მაგრამ..." – პოპულარული ტოქ შოუს წამყვანმა ნანუკა ჟორჟოლიანმა "ფეისბუქის" საკუთარ გვერდზე მას შემდეგ დაწერა, რაც გაირკვა, რომ ტელეკომპანია "იმედი" სამაუწყებლო ფორმატზე გადავიდა და ყველა გასართობი შოუ დაიხურა. თუმცა ტელეწამყვანის გვერდზე მალევე გაჩნდა ასეთი სტატუსი: "ახალი სეზონიდან ჩვენი გადაცემის გადარჩენის და "იმედზე" დარჩენის საშუალება არსებობს, მოკლედ, მგონია, რომ გადავრჩებით".
"ნანუკას შოუ" "თიბისი ტივის" შეუერთდა და დაიხურება თუ არა, ეს იმაზეა დამოკიდებული, ტელეწამყვანი რამდენად შეძლებს სპონსორების მოძებნას.

ნანუკა ჟორჟოლიანთან ინტერვიუ მანამდეა ჩაწერილი, სანამ ”იმედი” პატარკაციშვილების ოჯახს გადაეცემოდა და ნანუკა ჟორჟოლიანი ”იმედიდან” წამოვიდოდა.


– ნანუკა, როგორ ფიქრობთ, რატომ შეელია "იმედი" თქვენს გადაცემას, ორი დიდი გასართობი პროექტი ხომ დარჩა არხზე?
– ტელეკომპანია "იმედი" ამბობს, რომ ის პოლიტიკურ, საინფორმაციო გადაცემებს დააფინანსებს. თუ რაიმე ფული იქნება მოძიებული, ის ამ მიმართულებით იქნება გამოყენებული. არხი გასართობ გადაცემებს ტოვებს, მაგრამ ამბობს, თქვენ თვითონ მოიზიდეთ ფინანსებიო. ახალი წლიდან ამ არხზე ორი მეგაპროექტი, გასართობი გადაცემა იწყება და მათ უკვე ჰყავთ დამფინანსებელი. "ნანუკას შოუს" სპონსორი 2012 წლის ბოლომდე ჰყავს, ამიტომ გადაცემების ჩაწერა გრძელდება. არ მინდა, იმედი დავკარგო, მაგრამ, თუ სპონსორს ვერ ვნახავ, ბუნებრივია, ტოქ შოუ არ გაგრძელდება.
– როგორც ვიცი, არხის ხელმძღვანელობისგან შეთავაზება მიიღეთ, რომ პოლიტიკური ტოქ შოუ წაგეყვანათ.
– ეს შეთავაზება ნამდვილად მივიღე, მაგრამ ახლა ჩემი მთავარი ამოცანაა, ისევე, როგორც დილით საბა საბავშვო ბაღში უნდა გავუშვა, მარიამი – სკოლაში, ეს გადაცემა არსებობდეს. ვიცი, რითი შევძლებ არსებობას, ჩემი რესურსი ყველაზე კარგად ვიცი. ვთვლი, რომ ეს გადაცემა არის ის, რისი გაკეთებაც ჟურნალისტიკაში მინდოდა. ამ გადაცემას თავისი რესურსი არ ამოუწურავს. როცა ამის გაკეთებას ვიწყებდი, ბევრი სკეპტიკურად უყურებდა და ამბობდა, ნანუკა რას გააკეთებს, პოლიტიკური ჟურნალისტიკიდან მოდისო, მაგრამ მე ვამბობდი, რომ შევძლებდი. ახლაც ვამბობ, რომ მე მაქვს რესურსი, ამ გადაცემამ, მინიმუმი, ორი წელი იარსებობს.
– თქვენი გადაცემა "ღამის შოუს" სტუდიას არ ეკუთვნოდა? რატომ შეუერთდით "თიბისი ტივის" სტუდიას და რას გააკეთებს ის თქვენთვის?
– "ნანუკას შოუ" უკვე ორი წელია, რაც "ღამის შოუს" სტუდიას გამოეყო. ახლავე გეტყვით, თუ რატომ გავიტანე ეს გადაცემა გარეთ. შეიძლება იყვნენ ბიზნესმენები, რომლებმაც იტყვიან, რომ მე კი მინდა "ნანუკას შოუ" დავაფინანსო, მაგრამ არ მინდა, ეს ფული სხვა რამისკენ იყოს მიმართული. ამიტომ გადაწყვეტილება მივიღე, პროექტი გარეთ გამეტანა, რათა ბიზნესმენმა ზუსტად იცოდეს, რომ ის მარტო "ნანუკას შოუს" აფინანსებს. 21 კომპანია, ეს იქნებოდა ბანკი თუ ნებისმიერი კერძო პირი, ამ ხნის განმავლობაში მზადყოფნას აცხადებდა ჩვენთან თანამშრომლობაზე. თუ მათ ფინანსური პრობლემა არ აქვთ და, ამის მიუხედავად, თანამშრომლობაზე უარს იტყვიან, ჩავთვლი, რომ ეს ხელოვნურად შექმნილი პრობლემაა, რომ "ნანუკას შოუმ" არსებობა არ განაგრძოს.
დეკემბრის ჩათვლით ეთერში ვარ, წინ ორი თვე მაქვს. ამ ორი თვის განმავლობაში ამ კომპანიებთან მუშაობა მოგვიწევს. თუ ამდენი ხანი ამ გადაცემაში თანხის ინვესტიცია მომგებიანი იყო, ხვალ კი მეტყვიან, რომ ფული მაქვს, მაგრამ შენთან აღარ ვითანამშრომლებო, ჩავთვლი, რომ "ნანუკას შოუსთვის" ბარიერები ხელოვნურად იქმნება.
– "ფეისბუქზე" რა გამოხმაურება მოჰყვა თქვენს დამშვიდობებას?
– ამ დღეების განმავლობაში ყოველდღე უამრავ, დაახლოებით 750–მდე წერილს ვიღებდი, ჩემს სტატუსებს ათასობით ლაიქი ჰქონდა. უცხოეთიდან ქართული სათვისტომოები მწერდნენ, რომ ანგარიშს გახსნიდნენ და გადაცემას დაეხმარებოდნენ. ჩემს ორ შვილს გეფიცებით, ამ გადაცემის გაკეთება მარტო ამისთვის ღირდა.
– ადამიანები რომლებიც, ასე ვთქვათ, სახელისუფლებო სახეებად ითვლებოდნენ და პრესას ნაკლებად ეკონტაქტებოდნენ, თქვენთან სტუმრობაზე უარს არ ამბობდნენ. არჩევნების შედეგებით თუ ვიმსჯელებთ, გამოდის, რომ საზოგადოების დიდმა ნაწილმა არჩევანი სულ სხვა ადამიანებზე გააკეთა და არა – მათზე. მომავალში როგორ შეარჩევთ სტუმრებს?
– ვინ მოვა და ვინ – არა, ეს გადაცემის იმიჯზეა დამოკიდებული. ვიღაც "ნანუკას შოუში" მოდის და ვიღაც – არა. მაგალითად, ლაშა ბუღაძეს გადაცემაში მოსვლაზე ჩემთვის უარი უთქვამს, ისევე როგორც ლევან რამიშვილს, რომელმაც მითხრა, რომ მსგავსი ტიპის გადაცემებს არ უყურებდა. საერთოდ ამ თემებით სპეკულირება არ მომწონს და არც იმაზე დავიწყებ ლაპარაკს, რა გაგვიკეთებია, მაგრამ ჩემი გადაცემა იმდენად აპოლიტიკური იყო, რომ განსხვავებული პოლიტიკური მოსაზრებების მქონე ადამიანებს აქ ხშირად ნახავდით. "ნანუკას შოუში" ირაკლი ალასანიას ცოლი, ნათია ფანჯიკიძე იყო და რა, არ უნდა მომეყვანა?! ჩემს გადაცემაში ახალი მემარჯვენეების თითქმის ყველა წევრი იყო. შალვა ნათელაშვილის ცოლი, ბელა ალანია მყავდა სტუმრად და რადგან ისინი ოპოზიციაში არიან, აღარ უნდა მოვიყვანო?! მე სეზონი ჭაბუა ამირეჯიბით გავხსენი და, როგორც ჟურნალისტი, ამით მთელი ცხოვრება ვიამაყებ. ჩემს გადაცემაში ნატო მეტონიძეს უმღერია, არ უნდა ემღერა?! სხვებს არ ვახსენებ, რადგან არ მინდა, სპეკულაციაში ჩამეთვალოს.
იცით, რა მაღიზიანებს? დღეს რომ გამოდიან და ამბობენ, მედიაში ჩვენზე ზეწოლა იყოო. თუ ერთი გადაცემა ახერხებდა პოლიტიკურად ლავირებას, ის რატომ ვერ ახერხებდა?! ადამიანურ გადაცემას უფრო მეტი ძალა აქვს, ვიდრე პოლიტიკურ ტოქ შოუებს. ამ გადაცემას შეუძლია ხალხს რესპონდენტი შეაყვაროს და ამის არაერთი პრეცედენტი მაქვს. თუ ერთი ჟურნალისტი ახერხებდა ამ არხზე "ამის ცოლი", "იმის ცოლი" მოეყვანა და არამხოლოდ მოეყვანა, პოზიტიური იმიჯი შეექმნა მისთვის, სხვა რატომ ვერ აკეთებდა იმავეს? როცა პოლიტიკურ დევნაზე ლაპარაკობენ, კიდევ გავიმეორებ, თუ ამას ერთი შოუ ახერხებდა, ის რატომ ვერ აკეთებდა?!
ვიღაცამ შეიძლება თქვას: "ნანუკაზე მელაპარაკები? მაგას ხომ შეეძლო". მაგრამ მე თუ ვახერხებდი სხვა პოზიციაზე მდგომი ადამიანების, მათ შორის ოპოზიციის, მოყვანას და გადაცემა არ იხურებოდა, რა მნიშვნელობა აქვს, ამას რის ფასად ვახერხებდი, ის რატომ ვერ ახერხებდა?!
– პასუხი არ გაგიციათ, დაბრუნდებით თუ არა პოლიტიკურ ჟურნალისტიკაში. ეს სფერო არ გენატრებათ?
– არ მენატრება. ეს გადაცემა მესამე შვილივით მყავს და ჩემი "ნანუკას შოუ" მინდა! რაც შეეხება შეთავაზებას, უარი არაფერზე მითქვამს. ეს თემა არ განიხილება. ახლა ყველაზე მთავარი რამ, "ნანუკას შოუს" გადარჩენა განიხილება.
– თუ თქვენი გადაცემა მაინც ვერ გადაარჩინეთ, ჟურნალისტიკიდან წახვალთ?
– თუ "ნანუკას შოუ" დაიხურება, მერე უკვე ჟურნალისტიკაში ჩემი ადგილის მოძებნა მომიწევს. როგორც უკვე გითხარით, პოლიტიკური ტოქ შოუს წაყვანაზე მივიღე შეთავაზება და, ბუნებრივია, ამაზე დავიწყებ ფიქრს. მაგრამ, იცით, რომ საინფორმაციო გამოშვებას საერთოდ არ ვუყურებ? ხშირად მადანაშაულებენ, რომ ეს ჩემგან სწორი საქციელი არ არის. ამბებს ყველაზე გვიან ვიგებ. სამსახურიდან ჩემი ქმრის წასვლის ამბავი, ჟურნალისტებმა რომ დამირეკეს, მერე გავიგე. თურმე ასეთი ინფორმაცია გავრცელებულა.

– ანუ თქვენი ქმარი, ერეკლე კოდუა, სამსახურიდან არ წასულა?
– სამსახურიდან წასვლაზე კი არა, იმაზეც იყო საუბარი, რომ ის ქვეყნიდან წავიდა. რამდენადაც ვიცი და შეგიძლიათ ეს ინფორმაცია შინაგან საქმეთა სამინისტროში გადაამოწმოთ, ჩემს მეუღლეს სამსახურიდან წამოსვლის შესახებ განცხადება არ დაუწერია.
– ოჯახში პოლიტიკაზე ალბათ ხშირად საუბრობთ, განსაკუთრებით ბოლო პერიოდში.
– შეიძლება ვიღაცისთვის ეს უცნაურია და თქვას, როგორ შეიძლება ჟორჟოლიანი და კოდუა პოლიტიკაზე არ ლაპარაკობდნენო, მაგრამ სახლში ისე გვიან მივდივართ, რომ ამაზე ნამდვილად არ ვსაუბრობთ. 12 საათზე სახლში რომ შევდივარ, მე მიხარია, პირველ საათზე ირაკლი რომ მოდის, მას უხარია. ამ დროს რა პოლიტიკაზეა საუბარი, ხომ არ ხუმრობთ!
– თქვენი მაზლი, გიორგი კოდუა, ზუგდიდში ირაკლი ალასანიას მიერ ჩატარებულ აქციაზე გამოჩნდა, თქვა, რომ მისი მეგობარია და მას უჭერს მხარს.
– გიორგიმ ალასანიას აქციაზე მისვლამდე და ამ პოლიტიკურ შედეგებამდე გააკეთა განცხადება, მაშინ, როცა ჯერ კიდევ ნაცონალური მოძრაობა იყო ხელისუფლებაში. მან ინტერვიუში თქვა, რომ ბიძინა ივანიშვილის პარტიას მიესალმებოდა. ის რაღაცაზე იყო განაწყენებული. გიორგი კოდუა თვლის, რომ მისმა ძმამ ვერ შეძლო მისი დახმარება და დაიჩაგრა, ახლა ამ პოლიტიკურ არჩევანს აკეთებს. ეს მისი საქმეა, მე რამდენად მივიდოდი და საერთოდ ჩავერეოდი თუ არა პოლიტიკაში, ეს უკვე სხვა საკითხია. ალასანიასთან მისი გამოჩენა არ გამკვირვებია.
– ძმები განსხვავებული პოლიტიკური პოზიციების გამო არ კამათობენ?
– ირაკლი დიდიხანია ამ სტრუქტურაში მუშაობს, მაგრამ ის პოლიტიკოსი არ არის. გიორგის ჰყავს ცოლი, შვილი და ის არის ძალიან დიდი. არ არის არასრულწლოვანი, რომელსაც შეიძლება რაღაც ვურჩიო. ირაკლი ყველაზე უმცროსია, გიორგი მასზე უფროსია, მათ კიდევ ჰყავთ უფროსი ძმა. კოდუები ხომ კრებით სახელად განიხილებიან...

– ახლახან "ფეისბუქზე" ვიღაც გემუქრებოდათ თქვენი შვილების მისამართით. როგორ დამთავრდა ეს ყველაფერი?
– ერთადერთი შემთხვევა იყო, როცა ვიღაცამ მუქარის წერილით გამოიჩინა თავი. რა თქმა უნდა, მაშინ სამართალდამცავებს მივმართე, არ ვიცი, ამის გამოძიება გაგრძელდება თუ არა, მაგრამ ვიღაც აღმოჩნდა, ყოველგვარი პოლიტიკური კუთვნილების გარეშე, რომელიც, როგორც ჩანს, რაღაცაზე იყო განაწყენებული. ის ორჯერ არის ნასამართლევი და, სხვათა შორის, ირაკლი კოდუას მიერ არცერთხელ ყოფილა დაკავებული. ამქვეყანაზე უკმაყოფილო ადამიანი არ დაილევა. როგორ შეიძლება ყველას მოსწონდე, მაგრამ ვერ გეტყვით, რომ საზოგადოების მხრიდან, რომელიმე ქალაქში ან ქუჩაში ასეთი დამოკიდებულება მეგრძნოს.
– რამდენადაც ვიცი, პატიმართა წამების ამსახველი კადრების გავრცელების შემდეგ თქვენი თანამშრომლები აქციის მონაწილეებს შეუერთდნენ. ამაზე რა რეაქცია გქონდათ?
– როცა ეს კადრები გავრცელდა, თბილისში არ ვიყავი, ეგვიპტეში გახლდით. ჩემმა თანამშრომლებმა დამირეკეს და მკითხეს, იქ წასვლა რამე უხერხულობას ხომ არ შემიქმნიდა. ზოგიერთი თანამშრომლის ოჯახის წევრი პატიმარია, ზოგს წარსულში ჰქონდა პრობლემა. მათი მთავარი მიზანი მოქალაქეობრივი პოზიციის დაფიქსირება იყო. ის არ იყო რომელიმე პოლიტიკური პარტიის აქცია, არამედ სტუდენტების. მოქალაქეობრივი პოზიციის დაფიქსირება ის ღირსებაა, რომელიც ადამიანს არ უნდა შეულახო, სადაც უნდა მუშაობდეს.

– არჩევნების შედეგების მიხედვით, ჩვენს ბევრ კოლეგას პოლიტიკური შეხედულებები შეეცვალა. ხომ არ არის შესაძლებელი, პოზიციები თქვენც შეცვალოთ?
– 2 ოქტომბერს ძალიან ბევრმა თეთრი მაისური გაიხადა და აღმოჩნდა, რომ შიგნით ცისფერი ეცვა. ამას წინათ ყოფილი მაღალჩინოსნის სტატიას ვკითხულობდი. 2003 წლის მოვლენებზე ესაუბრებოდნენ, ჰკითხეს, შენს ლიდერს რატომ არ უღალატეო. მან უპასუხა, არ მინდოდა, მერე ცხოვრებაში ჩემთვისაც ეღალატათო. ის იყო ერთადერთი, რომელიც მაშინდელი პრეზიდენტის გვერდით ბოლომდე იდგა. მიყვარს ყველა ის ადამიანი, რომელიც თავისი პრინციპების ერთგული რჩება, დამარცხების მიუხედავად, თავის არჩევანს არ ცვლის. თუ დღეს იტყუები, რომ შენ ზეწოლა გქონდა, ძალიან ცუდია. მესმის, რომ საარსებო მინიმუმისთვის სამსახური აუცილებელია, მაგრამ მეორე საკითხია, რამდენად უნდა უღალატო საკუთარ ღირსებას ფულის გამო. არის სამსახური, სადაც არ წავალ, რამდენიც უნდა გადამიხადონ. თუ დღეს ზეწოლაზე საუბრობ, ამდენი ხანი სად იყავი?! თუ შენთვის საყვარელი ადამიანები გადაცემაში ვერ მოგყავდა, მაშინ სად იყო შენი ღირსება?! თუ ყველაფერი კუჭზე გადის, მაშინ ვფიქრობ, რომ ასეთ ადამიანებთან საერთოდ საუბარი არ ღირს. მე სხვა ღირებულებები მაქვს, ჩემთვის ყველაფერი კუჭზე არ გადის.
– "მეცხრე არხზე" რომ შემოგთავაზონ მუშაობა, წახვალთ?
– მე არსად წავალ, მე გადაცემა მაქვს რეიტინგულ არხზე. თუ სადმე მივალ, ეს არის ბიზნესმენი, რომელსაც ვეტყვი, რომ ამ გადაცემას გადარჩენის შანსი აქვს.
– როგორც ვიცი, ამ შემოდგომაზე ქორწილი უნდა გადაგეხადათ. გეგმები ხომ არ შეგეცვალათ?
– ბუნებრივია, ეს ქორწილი გადაიდო. ახლა სხვა გამოწვევების წინაშე ვდგავარ, სამსახურს ვგულისხმობ. როგორც კი გავიგებ, რომ ჩემი შოუ ეთერში რჩება, მაშინვე დავქორწინდები ჩემს მეუღლეზე. ახლა ქორწილის ხასიათზე არ ვარ, ის ადამიანი კი გვერდით ისედაც მყავს. უბრალოდ გვინდოდა, ჩვენი ექვსწლიანი ურთიერთობა ქორწილით დაგვეგვირგვინებინა.
– ზაფხული როგორ გაატარეთ?
– ეს ზაფხული ჩემს შვილთან ერთად გავატარე და ამან ჭორები გამოიწვია, რადგან ფოტოებს მარტო ჩემს შვილთან ერთად ვდებდი და არა – ქმართან ერთად. მთელი ეს ზაფხული მარიამს და მის მეგობრებს მივუძღვენი, ბათუმი შემოვატარე, მერე ყაზბეგში მყავდნენ. შემდეგ მე და მარიამი არასწორად შერჩეულ დროს ეგვიპტეში წავედით.
ეკა ლემონჯავა
Popular Login Last More