"რატომ უყვარდებათ ქართველ კაცებს პუტანკები?!"

ერთ-ერთი მეძავი ასეთ შეკითხვასაც უსვამს თავის კლიენტს: "რატომ უყვარდებათ ქართველ კაცებს პუტანკები?!"
ახმეტელის თეატრმა სეზონი პრემიერით გახსნა. წარმოდგენილი იყო დათო ტურაშვილის პიესის მიხედვით დადგმული სპექტაკლი "შავი კედები", რომლის რეჟისორი დიმიტრი ხვთისიაშვილია.

მოქმედება თანამედროვე საქართველოში, თბილისის ერთ-ერთი გარეუბნის ბინაში ვითარდება, რომლის ბინადრებიც მსუბუქი ყოფაქცევის ქალები არიან. მათი მომსახურებით საზოგადოების ყველა ფენა სარგებლობს: სტუდენტები, პროფესორები, მთავრობის წარმომადგენლები, ბიზნესმენები და ა.შ.

წინასაარჩევნო პერიოდია და მეძავების მტკიცებით, ასეთ დროს მათთან ორჯერ უფრო მეტი ადამიანი მიდის, ვიდრე ჩვეულებრივ დღეებში. ქალებს ბორდელში მოხვედრის სხვადასხვა ამბავი აქვთ და ამ ამბებს მაყურებელი სპექტაკლის მსვლელობისას იგებს.

უცხო არავისთვისაა, რომ ბევრ მამაკაცს ასეთი ქალების მიმართ თბილი გრძნობები უღვივდება. აქაც ანალოგიური სიტუაციაა და ერთ-ერთი მეძავი ასეთ შეკითხვასაც უსვამს თავის კლიენტს: "რატომ უყვარდებათ ქართველ კაცებს პუტანკები?!"

მოკლედ, ამ ჯოჯოხეთს თავს სწორედ ეს მეძავი ლოლა დააღწევს, რომელიც თავის ერთ-ერთ კლიენტს შეუყვარდება. შეყვარებული ბიჭი მას შავ კედებს მოუტანს, რომლის საშუალებითაც ქალს იმ ბინიდან გაქცევის საშუალება ეძლევა.

თუ როგორ განვითარდება მოვლენები, ეს უკვე სპექტაკლის ფინალია და მაყურებელი თავად ნახავს. ჩემი აზრით, პიესა თანამედროვეობის ზუსტი ანარეკლია და რეჟისორის გადაწყვეტილებაც მომწონს, რომ "შავი კედები" დადგა. ოქტომბრის შუა რიცხვებიდან მოყოლებული, ეს სპექტაკლი ახმეტელის თეატრის რეპერტუარშია და ვფიქრობ, ღირს მისი ნახვა.

დიჯეი ბუკლე
ჟურნალი "რეიტინგი"