ია ფარულავა მორიგ სკანდალში გაეხვა
მას შემდეგ, რაც ბადრი პატარკაციშვილის ოჯახმა ტელეკომპანია "იმედი" დაიბრუნა, არხზე სერიოზული რეორგანიზაცია მიმდინარეობს. ტელევიზიაში გასართობი გადაცემები ჯერ კიდევ არჩევნებში "ქართული ოცნების" გამარჯვების შემდეგ დაიხურა, ასევე არხი დატოვა ნანუკა ჟორჟოლიანმა, რის მიზეზადაც მორალური პასუხისმგებლობა დაასახელა. "იმედმა" ძველი ლოგო დაიბრუნა, გადაცემებიდან კი მხოლოდ ორი გრძელდება - მუსიკალური კონკურსი "ახალი ხმა" და შოუ "ცეკვავენ ვარსკვლავები". ეს უკანასკნელი ის პროექტია, რომელსაც სკანდალები პირველივე სეზონიდან სდევდა თან.
მორიგ საკონკურსო ტურამდე რამდენიმე დღით ადრე ცნობილი გახდა, რომ "იმედის" ახალი ხელმძღვანელობის გადაწყვეტილებით, ნანუკა ჟორჟოლიანს "ცეკვავენ ვარსკვლავების" ჟიურიც უნდა დაეტოვებინა და ის მარინა ბერიძემ ჩაანაცვლა, თუმცა ყველაფერი ამით არ დამთავრებულა...
ასეთი ხმაურიანი ტური "ცეკვავენ ვარსკვლავების" ისტორიას არ ახსოვს. ჟიურის მკაცრი შეფასებებისა და განაწყენებული კონკურსანტების პარალელურად, სიტუაცია სოციალურ ქსელშიც დაიძაბა, ამის მიზეზი კი ია ფარულავასა და თაკო გაჩეჩილაძეს შორის მომხდარი შელაპარაკება გახდა.
მომღერალი თაკო გაჩეჩილაძე შოუში ვარსკვლავის სტატუსით მონაწილეობს, მისი მეწყვილე კი "ცეკვავენ ვარსკვლავების" პირველ სეზონში გავარსკვლავებული გიგი გაჩეჩილაძე გახლავთ. ფაქტია, რომ ამ წყვილმა ჟიური ჯერჯერობით ვერ მოხიბლა, რასაც მესამე ტურში სკანდალი მოჰყვა. გიგის და თაკოს გამოსვლამდე ეთერში მათი მზადების შესახებ ვიდეო გავიდა, სადაც თაკო აღნიშნავდა, რომ ხერხემლის პრობლემები ჰქონდა და ვარჯიში უჭირდა. წყვილმა "სამბა" იცეკვა, რასაც ჟიურის მხრიდან მკაცრი შეფასებები მოჰყვა, თუმცა ყველაფერს თანმიმდევრობით მივყვეთ...
წყვილის წარუმატებელი გამოსვლა პირველად ია ფარულავამ შეაფასა. იას და თაკოს დიალოგი ასე წარიმართა:
ია ფარულავა:
- ეს იყო სამბა, ორი რობოტის შესრულებით. მე არ ვიცი, სად იყო ემოცია, თაკო, წესიერი გოგო ვერასოდეს ვერ იცეკვებს "სამბას" კარგად. სად არის შენი გაუხედნავი ბუნება, მარტო თმის გაჩეჩვა ხომ არ არის საქმე.
თაკო გაჩეჩილაძე:
- მე რობოტი ვიყავი, საქმეც მაგაშია.
ია ფარულავა:
- რობოტი და "სამბა" ერთად არ მიდის.
თაკო გაჩეჩილაძე:
- ჩვენ გადავწყვიტეთ, რომ წავიდეს.
ია ფარულავა:
- ჰოდა, მე გადავწყვიტე, დაბალი ქულა დაგიწეროთ ამ "სამბაში".
თაკო გაჩეჩილაძე:
- შენ მაინც სულ დაბალ ქულებს მიწერ, არა უშავს.
წყვილი ჟიურის სხვა წევრებმაც შეაფასეს. კოტე ფურცელაძემ თაკოს მუშაობა დაუწუნა. თეა გობეჯიშვილი შევიდა თაკოს მდგომარეობაში და აღნიშნა, რომ რთულია ერთ კვირაში ცეკვის მომზადება და თაკოს ამისთვის მეტი დრო სჭირდებოდა. მარინა ბერიძემ აღნიშნა, რომ თაკოს დისკომფორტი ჰქონდა. გოჩა ჩერტკოევმა კი უთხრა, რომ კომპოზიცია თავიდან ბოლომდე დაავიწყდა, რაზეც თაკომ უპასუხა, რომ დაუნი რობოტი იყო. იაზე გაბრაზებამ თაკოს კულისებშიც არ გადაურა და საკუთარი გამოსვლა ასე შეაფასა.
თაკო გაჩეჩილაძე:
- მე ვიტყვი, რომ ჩვენ ვიყავით ორი დაუნი რობოტი, ასე გამოგვივიდა. რაღაც განსხვავება ხომ უნდა იყოს ჩვენს ცეკვაში, მაშინ ასე დავარქვათ...
გიგი გაჩეჩილაძე:
- მე, ყოველ შემთხვევაში, არ ვცდილობდი, რომ დაუნი რობოტი ვყოფილიყავი, მაგრამ ასე გამოვიდა?
ია ფარულავა:
- ორ დაუნ რობოტს ჩემგან საჩუქრად ხუთიანი.
თაკო გაჩეჩილაძე:
- დაუნი რობოტები არიან ძალიან კმაყოფილები.
იასგან განსხვავებით, ჟიურის სხვა წევრებმა წყვილს უფრო დაბალი ქულები დაუწერეს, საბოლოოდ თაკოს და გიგის წყვილი შემდეგ ტურში მაინც გადავიდა.
სოციალურ ქსელში აღშფოთება მოჰყვა ფრაზას "დაუნი რობოტი", რომელიც პირველად შოუში თაკო გაჩეჩილაძემ გამოიყენა. ინტერნეტმომხმარებლები ითხოვდნენ, რომ თაკოს და იას ეთერის განმავლობაში ბოდიში მოეხადათ, მაგრამ შოუ გაგრძელდა და ისე დამთავრდა, რომ მომხდარს ღია ეთერში არავინ გამოხმაურებია.
მეორე დღეს სპეციალური განცხადება გაავრცელა დაუნის სინდრომის მქონე ბავშვების მშობლებისა და პროფესიონალების კავშირმა - "ჩვენი ბავშვები". მათ თაკო გაჩეჩილაძესა და ია ფარულავას იმავე გადაცემის ფორმატში ბოდიშის მოხდა მოსთხოვეს.
"ამ ორ ადამიანს, როგორც საჯარო ფიგურებს, უნდა ესმოდეთ, რომ გადაცემას "ცეკვავენ ვარსკვლავები" მრავალრიცხოვან აუდიტორიასთან ერთად, დაუნის სინდრომის მქონე ბევრი ადამიანი და მათი ოჯახის წევრები უყურებენ და ამგვარი გამონათქვამები ყველა მათგანისთვის შეურაცხმყოფელია", - ვკითხულობთ განცხადებაში.
ორგანიზაცია იასა და თაკოს მოუწოდებს, გაეცნონ ინფორმაციას დაუნის სინდრომის შესახებ და საკუთარ კოლეგებსაც გაუზიარონ, რათა მომავალში ამგვარი უხერხული სიტუაცია თავიდან აირიდონ.
მასალის მომზადებისას თაკო გაჩეჩილაძეს კომენტარისთვის დავუკავშირდით.
თაკო გაჩეჩილაძე:
- არანაირ კომენტარს არ ვაკეთებ მომხდართან დაკავშირებით. ასმა ჟურნალისტმა დამირეკა და ყველას უარი ვუთხარი.
- ორშაბათს, შოუს დროს გააკეთებთ განცხადებას, თუ თავს იკავებთ კომენტარისგან?
- შემდეგ ორშაბათს რას გავაკეთებ, ეგ მე ვიცი, მაგრამ ჟურნალისტებთან და ტელევიზიით ამ კვირის განმავლობაში არანაირ კომენტარს არ გავაკეთებ.
- ინტერნეტში გავრცელდა ინფორმაცია, თითქოს "ფეისბუქის" საკუთარ გვერდზე დაწერეთ, რომ ბოდიშს არ მოიხდიდით.
- ვიღაც უსაქმური ზის და წერს, ერთი კვირაა "ფეისბუქზე" არ შევსულვარ, ცეკვების რეპეტიციებზე დავდივარ.
"რასაც ახლა ვიტყვი, სიტყვა-სიტყვით დაწერთ", - ასე გვითხრა ია ფარულავამ, რომელიც ბოლო დროს ბეჭდურ მედიას არ სწყალობს, თუმცა "რეიტინგს" მომხდართან დაკავშირებით საკმაოდ ვრცელ კომენტარზე დათანხმდა. იას ასევე ვკითხეთ ანრი ჯოხაძესთან დაპირისპირებაზე, რაზეც ამ ბოლო დროს სოციალურ ქსელში ბევრი იწერება. შოუს ერთგულ მაყურებელს ალბათ ახსოვს, როცა ერთ-ერთი ცეკვის შემდეგ იამ ანრის ჰკითხა, ჰქონდა თუ არა თან "კისლატა"...
ია ფარულავა:
- ჩემო ძვირფასო, თქვენი ცხოვრების განმავლობაში რამდენჯერ გითქვამთ ვიღაცაზე ან რაღაცაზე დაუნი?
- არ მახსენდება, შეიძლება ეს სიტყვა ცხოვრებაში გამომიყენებია, მაგრამ ტელევიზიით არ მითქვამს.
- თქვენ ახლა ცრუობთ.
- ტელევიზია და ყოველდღიური ცხოვრება სხვადასხვა რამეა...
- ჯერ ერთი, პირველად ვინ ახსენა შოუში ეგ სიტყვა?
- თაკო გაჩეჩილაძემ...
- რამდენჯერ ახსენა?
- თუ არ ვცდები, რამდენჯერმე.
- თაკომ ორჯერ თქვა, ერთხელ - გიგიმ. მე შეფასება მივეცი მათ მიერ ნათქვამ დაუნ რობოტს, მე არ მითქვამს, დაუნის სინდრომით დაავადებული, ეს სხვა რამეა და ნუ გამომეკიდება ის ორგანიზაცია. მივესალმები ასეთი ორგანიზაციის არსებობას, მიხარია, რომ ასეთი დაავადების მქონე ადამიანების უფლებებს იცავენ, მაგრამ ძალიან გთხოვთ, ჩემს ხარჯზე ნუ გაიკეთებენ პიარს. საერთოდ, მჩვევია სიტყვების კარგად გათამაშება და იმიტომაც ვზივარ ჟიურიში, რომ შოუს გაკეთება შემიძლია. ისედაც გაღიზიანებული ვიყავი თაკოზე, იმიტომ, რომ საშინლად იცეკვა და კიდევ დიდ გულზე იყო. უბრალოდ, მისი სიტყვები გადავათამაშე - "დაუნ რობოტებს ჩემგან ხუთიანი საჩუქრად". მე სადმე ვთქვი, დაუნის სინდრომით დაავადებულები? კარგით რა, ნამუსიც კარგი საქონელია.
არ დამავიწყდება ის შოკი, რომელიც რამდენიმე წლის წინ მივიღე, როდესაც ჩემი მეგობრის ოჯახში დაუნის სინდრომით დაავადებულ 45 წლის ძმას სარდაფში მალავდნენ, როგორც "ჯეინ ეარში" როჩესტერის ცოლს... მეგობრებმა ამის შესახებ არაფერი ვიცოდით. ერთხელ ცოტა ადრე მივედით და ეს ბიჭი შემთხვევით გარეთ იჯდა, საჭმელს აჭმევდნენ. რომ დაგვინახა, ისეთი ღრიალი დაიწყო, ეს შოკი არასოდეს გამოვა ჩემი წარმოსახვიდან.
ამ ადამიანებისთვის შეურაცხყოფის მიყენება არც მიფიქრია. დღეში ასჯერ ამბობენ, შიზოფრენიკი ხარო, მაშინ ისე გამოდის, რომ ფსიქიკურად დაავადებული ადამიანების დისკრიმინაცია ხდება? იმ ორგანიზაციებმა ახლა თავი წამოყვეს და უნდათ, ჩემით გაიკეთონ პიარი. სადაც უნდათ, იქ მიჩივლონ. მე დაუნის სინდრომით დაავადებული ადამიანებისთვის შეურაცხყოფა არ მიმიყენებია, მე შეურაცხყოფა მივაყენე თაკო გაჩეჩილაძეს, რომელმაც ვერ იცეკვა და საერთოდ მიმაჩნია, რომ არ უნდა იყოს პროექტში ამდენი ხანი.
- ერთ კითხვასაც დაგისვამთ, ასევე ბევრს საპარაკობენ თქვენი და ანრი ჯოხაძის დაპირისპირებაზე, როდესაც ცეკვის შემდეგ ჰკითხეთ, ჰქონდა თუ არა თან "კისლატა"...
- რა სისულელეა, კონკურსის დაწყებამდე ანრი გადაცემა "დღის შოუში" სტუმრად მოვიდა და მითხრა, ია ფარულავა, შენ თუ იქ ხუმრობას დამიწყებ, "კისლატას" მოვიტან და სახეში შეგასხამო. ქულების დაწერისას სწორედ ამაზე მივანიშნე. გული მწყდება, რომ ანრი არ არის პროექტში. მანამდე ანრის ვეუბნებოდი, რომ ის უნდა ყოფილიყო პროექტში. მე და ანრი ვიღადავებდით და შოუს ცოტა გავახალისებდით. ძალიან დამწყდა გული, მე თვითონაც რაღაც "პრიკოლები" მქონდა ანრიზე მოფიქრებული, მაგრამ ეს ყველაფერი წყალში ჩამეყარა. მე თუ მკითხავთ, ანრი უნდა ყოფილიყო პროექტში, თაკო გაჩეჩილაძეზე ცოტა უკეთესად მაინც ცეკვავს.
3 441 ნახვა
1-11-2012, 08:21
