ნანუკა ჟორჟოლიანი შესაძლოა, "მაესტროზე" გადავიდეს

"ნანუკა ჟორჟოლიანის შოუს" მაყურებელი კვლავ იხილავს. შოუს ეთერში დაბრუნებასთან დაკავშირებით გადაცემის წამყვანმა, ნანუკა ჟორჟოლიანმა Media.Ge-სთან ისაუბრა. "ნანუკას ჟორჟოლიანის შოუ" იქნება ისეთი, როგორიც იყო", - ამბობს ჟორჟოლიანი. მისი თქმით, ამ ეტაპზე რამდენიმე ტელარხთან მიმდინარეობს მოლაპარაკება და უახლოეს 2 თვეში გადაცემა მაყურებელს დაუბრუნდება. წამყვანმა აღნიშნა, რომ გადაცემას შოუს ძირითადი შემოქმედებითი ჯგუფი გააკეთებს.

გავა თუ არა ნანუკა ჟორჟოლიანის შოუ ტელეკომპანია "მაესტროზე" - ამ კითხვით Media.Ge-მ ტელეკომპანიის დირექტორს, ილია კიკაბიძეს მიმართა. კიკაბიძემ განაცხადა, რომ ამ ინფორმაციას "ჯერ ვერ დაადასტურებს".

ნანუკა ჟორჟოლიანმა საავტორო გადაცემა "იმედზე" მას შემდეგ დახურა, რაც ტელევიზიის პატარკაციშვილების ოჯახისთვის გადაცემის შესახებ განცხადება გავრცელდა. "მე მივიღე გადაწყვეტილება არხიდან წავიდე. ეს მხოლოდ ადამიანური გადაწყვეტილებაა. შეიძლება დავარქვათ მორალური ვალდებულებაც!" - წერდა იგი თავის "ფეისბუქის" გვერდზე.