რუსკა მაყაშვილი ცეკვის წინ გამაყუჩებლებს იკეთებს

მსახიობი რუსკა მაყაშვილი, მოგეხსენებათ, მოცეკვავე გოგონაცაა. სწორედ თავისებურ ორიგინალურ სტილში ცეკვით აღმოაჩინა ის რამდენიმე წლის წინ მაყურებელმა ერთ სარეკლამო რგოლში, რომელიც ძალიან პოპულარული გახლდათ. ახლა უკვე კონკურსში ცდის თავის ძალებს და გვერდით ბევრისთვის სანატრელი, პროფესიონალი მოცეკვავე უდგას – ოთო ფოლადაშვილი. წყვილის მიმართ ჟიური ქებას არ იშურებს, ხოლო მაყურებელი – ესემეს–ებს. ერთი სიტყვით, ყველა მოხიბლეს, მაგრამ ცოტამ თუ იცის, რის ფასად უჯდება ეს რუსკა მაყაშვილს. ის ტრავმირებულია და თან საკმაოდ სერიოზულად.
ოთო და რუსკა საკუთარი თავისა და ერთმანეთის მიმართაც ძალიან მომთხოვნები არიან. მათ სარეპეტიცო დარბაზში შევხვდით, სადაც ძირითადად მაშინ ვარჯიშობენ, როცა რუსკა თეატრიდან და სხვა საქმეებიდან თავისუფლდება, ანუ საღამოს. ამ დროს უკვე საკმაოდ დაღლილია ხოლმე და ოთოსგან საყვედურებს იღებს.
რუსკა: სანამ იმ დონემდე მივალ, რომ კარგად ვიცეკვო, ძალიან ვიტანჯები. ის ცეკვები, რომლებიც აქამდე ვიცოდი, ჩემთვის ძალიან იოლია და ადვილადაც ვისწავლე. სამეჯლისო ცეკვები კი ძალიან მირთულდება – თეძო გააგდე, შემოაგდე, თავზე ფეხი შემოიდე... მგონია, რომ უფრო მეტიც შემიძლია, მაგრამ რატომღაც არ გამომდის.
– ოთო, თქვენ რას ფიქრობთ, მაგარია რუსკა ცეკვაში?
ოთო: ჯერჯერობით ყველაფერი შესანიშნავად მიდის, მაგრამ მაინც ვფიქრობ, რომ რუსკას უფრო მეტი შეუძლია. მას უბრალოდ დროის ნაკლებობა აქვს სპექტაკლების გამო და ეს ცოტათი ხელს უშლის. რეპეტიციებზე მაქსიმუმს აკეთებს. რაც მთავარია, სამეჯლისო ცეკვები კარგად გამოსდის. იმდენად იხდენს ამ ცეკვებს, თითქოს ეს საქმე მისია.
რუსკა: მართლა?! ოთოსგან ასეთი შეფასების მოსმენა ძალიან მიხარია!
ოთო: კი, ძალიან იხდენს სამეჯლისო ცეკვებს.
– რუსკა, ეს ცეკვები თავდაუზოგავ შრომას მოითხოვს, პარალელურად სპექტაკლებშიც თამაშობთ. ამ ყველაფრისთვის დროს როგორ ანაწილებთ?
რუსკა: დღის განმავლობაში მართლა ძალიან ვიღლები. თეატრში რეპეტიციები მაქვს, სხვა ათას საქმეზეც დავრბივარ. მე და ოთოს რეპეტიციები ხშირ შემთხვევაში საღამოს გვაქვს და სარეპეტიციო დარბაზში ძალიან დაღლილი მოვდივარ. ოთოს კი არ ესმის, რომ საშინლად დაღლილი ვარ. თან კიდევ ერთი პრობლემა გამიჩნდა – წელის მარჯვენა მხარეს ნერვი მომყვა ნეკნში. მასაჟებს ვიკეთებ. ერთი ხელის გაშლით ფაქტობრივად ოთხ ნაწილად დავიშალე. ამის გამო დიდი დისკომფორტი მაქვს. წელი მართლა ძალიან მტკივა, მაგრამ არ ვწუწუნებ, გამივლის, აქ ჩემ გარდა სხვებიც დაიშალნენ. ყველა ცეკვის დროს გამაყუჩებლები მქონდა გაკეთებული.
– თქვენს წყვილში "უფროსი" ალბათ ოთოა, როგორც პროფესიონალი. მას უნდა დაუჯეროთ, რჩევა ჰკითხოთ, დაემორჩილოთ კიდეც. გულახდილად გვითხარით, ხომ არ ეურჩებით?
რუსკა: რა თქმა უნდა, აბსოლუტურად ყველაფერს ოთოს ვეკითხები, მაგრამ ჩვენ მუსიკასთან სულ პრობლემა გვაქვს. მე ის მუსიკა არ მომწონს, რაც ოთოს და პირიქით, ოთოს ჩემი შერჩეული მუსიკა არ მოსწონს. ამაზე სულ ვდავობთ. რაც შეეხება ცეკვას, ჩემთვის ოთო საქართველოში საუკეთესო მოცეკვავეა. სწორედ ამიტომ დგას ჩემ გვერდით. მის უამრავ მიღწევას, კონკურსს, გამარჯვებას რომ გადავხედოთ, ნამდვილად დავრწმუნდებით, რომ ის ყველაზე მაგარია და ამას სულაც არ ვამეტებ. როცა ასეთი მოცეკვავე მყავს პარტნიორად, სხვას ვის შეიძლება რჩევა ვკითხო, თუ არა ოთიკოს, ჩემს შვილს?!
– ოთო, იცოდით, რომ რუსკას მოთხოვნა იყო, თქვენთან ან გიგი გაჩეჩილაძესთან ეცეკვა, თუ არა და პროექტში მონაწილეობაზე უარს ამბობდა?
ოთო: კი, რუსკამ პირველივე სეზონზე თქვა, რომ ან ჩემთან უნდა ეცეკვა, ან გიგისთან.
– წინა სეზონზე რუსკა წამყვანის ამპლუაში მოგწონდათ?
ოთო: როგორც წამყვანი, ნეტა, ვის მოსწონდა, ეგ მითხარით.

რუსკა: სხვათა შორის, ბევრს მოვწონდი!
ოთო: ჩემი აზრით, შედარებაც კი არ შეიძლება იმასთან, რასაც დღეს აკეთებს. როგორც მოცეკვავე, ბევრად უფრო მაგარია, ვიდრე წამყვანი იყო.

– ძალიან დიდი კონკურენციაა. ეს არ გაშინებთ?

რუსკა: კონკურენცია არც ერთს გვაინტერესებს. მართალია, შეჯიბრია, მაგრამ პირადად მე იმაზე არ ვფიქრობ, რომ ვინმეზე უკეთ ვიცეკვო. რაც შემიძლია, იმას ვაკეთებ და რაც არ გამომდის, თავს ვანებებ. იმას არ ჩავეჭიდები, რაც არ გამომდის. ჩემს პროფესიაში არ ვეჯიბრები არავის და აქ რატომ უნდა მქონდეს შურის მომენტი?
– ოთო, რუსკასგან განსხვავებით ალბათ თქვენ აზარტული ხართ და გამარჯვებისთვის ბოლომდე იბრძვით.
ოთო: შეიძლება აზარტულიც ვარ. გამარჯვებას მიჩვეული ვარ, რაც, მგონი, ჩემი პრობლემაა...
რუსკა: რომელ კონკურსშიც კი მიიღე მონაწილეობა, ყველგან გაიმარჯვე და მიეჩვეოდი, აბა, რა იქნებოდა!

ოთო: დიდი აზარტი არც დამჭირვებია. ყველაფერი თითქოს თავისით მოდიოდა. ერთხელ და ორჯერ რომ მოიგებ, სტიმულია და, რა თქმა უნდა, აზარტი გემატება, უფრო თავდაჯერებულიც ხდები. ჩვენს სფეროში კი არის კონკურენცია, მაგრამ მოცეკვავეები ძალიან ახლოს ვართ ერთმანეთთან. შური ბავშვობიდან ამოგდებული მაქვს თავიდან. "თელაში" ისე ვიზრდები, როგორც ოჯახში. თითოეული მოცეკვავე ჩემთვის ძალიან ახლობელია და იმას არ ვუყურებ, ჩემზე უკეთ ცეკვავენ თუ არა. ყველა იმიტომ ვცეკვავთ, რომ ჩვენი თავი მაქსიმალურად წარმოვაჩინოთ.
ამ პროექტშიც ყველა დავმეგობრდით და შურით არ ვუყურებთ ერთმანეთს. მე და რუსკას არავისთან გაჯიბრება არ გვჭირდება. ჩვენთვის ვცეკვავთ, კარგადაც გამოგვდის და გვიხარია. გვინდა, მაყურებელი და ჟიური ვასიამოვნოთ და შესაძლებლობების მაქსიმუმი გავაკეთოთ. ალბათ სხვებიც იმავეს ფიქრობენ. სიმართლე გითხრათ, მე და რუსკა სხვა წყვილების ცეკვებს არც ვუყურებთ.
– ოთო, ქართველ ბიჭებში არცთუ ისე პოპულარულია სამეჯლისო ცეკვები, ყოველ შემთხვევაში, ამ პროექტამდე ასე იყო. თქვენ როდის დაინტერესდით ამ სფეროთი?
ოთო: ჩემი და დადიოდა სამეჯლისო ცეკვებზე. დედას მეც მივყავდი ხოლმე და ჩემს დას მშობლების ოთახში ველოდებოდით. ბოლოს დავიღალე მოსაცდელში ჯდომით და ერთხელაც დედაჩემს ვთხოვე, გეხვეწები, შევალ და გაკვეთილს დავესწრები–მეთქი. რომ შევედი, მეც დავდექი და ილეთებს ვაკეთებდი. მეორე გაკვეთილზე უკვე ცეკვის ჩუსტებიც ჩავიცვი. ჩემები გადაირივნენ, ბიჭს სამეჯლისო ცეკვაზე რა უნდაო.
რუსკა: არადა ბავშვი სამეჯლისო ცეკვების მეფეა!
ოთო: გამოვიდა, რომ 6 წლის ბავშვი ჩემით შევედი ცეკვაზე. ახლა ჩემი და აღარ ცეკვავს, მე კი ამ საქმეში წარმატებული ვარ. ვნახოთ, შემდეგში რა იქნება.

– ოთო, ამ პროექტის პირველ სეზონში ნუკი კოშკელიშვილთან ცეკვავდით. გულწრფელად მითხრათ, რომელთან უფრო ადვილია მუშაობა, ნუკი უფრო კარგი პარტნიორია თუ რუსკა?
ოთო: შედარებას ვერ გავაკეთებ, მაგრამ გეტყვით, რომ ორივე ძალიან მაგარია. ნუკიც თავის მაქსიმუმს აკეთებდა და რუსკაც ცდილობს, რაც შეუძლია, ის გააკეთოს. ნუკის და ჩემი ცეკვა სანახაობრივი, კარგი იყო. რუსკასგან განსხვავებით, ნუკის ბავშვობაში ცეკვაზე არ უვლია... უკვე ყველა ხედავს, რუსკა როგორ ცეკვავს და, მგონი, ჩემი თქმა ზედმეტია. ძალიან მაგარია და მისით კმაყოფილი, აღფრთოვანებული ვარ. ნუკიც გადასარევი პარტნიორი იყო.
რუსკა: ბავშვობაში ქართულ ცეკვებზე დავდიოდი. ქორეოგრაფიული სასწავლებელი მაქვს დამთავრებული. როდესაც კლასიკური ცეკვები გაქვს გავლილი, ყველა ცეკვა გიადვილდება. თეატრალურ უნივერსიტეტში რომ ვაბარებდი, ერთი წელი კიდევ ვიარე ცეკვებზე, რომ ფორმაში ვყოფილიყავი. ასე რომ, ქართულ ცეკვებთან, მგონი, ყველაზე კარგად ვარ.
– ოთო, როგორ ფიქრობთ, გაქვთ გამარჯვების შანსი?
ოთო: რუსკასი მჯერა. მართლა გადასარევად ცეკვავს. ალბათ თვალებზე ხელი უნდა აიფარო, რომ მასზე თქვა, ცეკვა არ გამოსდისო. გულშემატკივრების იმხელა არმია ჰყავს, რომ ასე მგონია, ფინალში გავალთ.
– დარბაზში ვინ გგულშემატკივრობთ ხოლმე?
რუსკა: ჩემი მეგობრები, ჩემი ფანებიც შემოიპარებიან ხოლმე და მთელი ჟივილ–ხივილია. მაისურები გააკეთეს ჩვენი ნომრებით და ფოტოებით, "ფეისბუქზეც" მთელი ამბავია ატეხილი, რაც ძალიან მიხარია. აპლოდისმენტები იმხელა სტიმულს მაძლევს, რომ მინდება, უფრო და უფრო კარგად ვიცეკვო.
ოთო: დარბაზში სტუდია "თელას" ბევრი ბავშვი მოდის. იმდენნი არიან, რომ მთელი დარბაზი მათ უჭირავთ.

– ჟიურიში ნანუკა ჟორჟოლიანი მარინა ბერიძემ ჩაანაცვლა. ამის პარალელურად გავრცელდა ინფორმაცია, რომ პროექტი იხურებოდა. ამან თქვენზე როგორ იმოქმედა?
რუსკა: ჭორებს ყურადღებას არ ვაქცევ. რაც შეეხება ჟიურის წევრის შეცვლას, ალბათ ასე იყო საჭირო. ზუსტად არ ვიცი, რა მოხდა. ამ საკითხში კომპეტენტური არ ვარ.
ოთო: ეს არც ჩემთვის წარმოადგენს პრობლემას.
– როგორც ვხვდები, ერთმანეთთან დამეგობრებაც მოასწარით.
რუსკა: ჩვენ წინა შოუდან ვმეგობრობთ. მე, ოთომ და გიგი გაჩეჩილაძემ ერთმანეთი რომ გავიცანით, ფაქტობრივად, მაშინვე დავმეგობრდით და დღემდე ასე ვაგრძელებთ.
ოთო: ბევრმა წყვილმა ახლა გაიცნო ერთმანეთი. სანამ მეწყვილეს შეეწყობი, ხასიათებს შეუწყობ, დრო გადის. მე და რუსკას ეს პრობლემა არ გვქონია.
– ოთო, მთელი თქვენი დრო ცეკვით არის შევსებული თუ სხვა რამითაც ხართ დაკავებული?
ოთო: სტუდია "თელას" ქორეოგრაფ–ასისტენტი ვარ. რა თქმა უნდა, "თელას" მოცეკვავეც ვარ, ჯულიანა ბარ–გნარი ჩემი მეწყვილეა. ვვარჯიშობთ, კონკურსებში ვმონაწილეობთ, ნოემბერში საქართველოს თასის კონკურსია და მისთვის ვემზადებით. პლუს, ტექნიკური უნივერსიტეტის სტუდენტი ვარ. სხვა რაღას უნდა ვაკეთებდე?

რუსკა: და ქალების გულთამპყრობელია!
– ბევრი თაყვანისმცემელი ნამდვილად ჰყავს.
რუსკა: ნამდვილად, ოთო ხომ ჩემი მეგობარია და ყველაფერს მიყვება. კარგი, სიმპათიური ბიჭია და ბევრ გოგოს მოსწონს.
– ოთო თქვენ თუ მოგწონთ ვინმე?
რუსკა: ამას ყველა მოსწონს.
ოთო: რატომაც არ უნდა მომეწონოს?! აბა, რისთვის ვარ?!
რუსკა: გეუბნებით, მუსუსია!
ოთო: მუსუსი არ ვარ, მაგრამ გოგოების ყურადღების ცენტრში ყოფნა ნამდვილად მსიამოვნებს.
– რუსკა, თეატრში ამჟამად რაზე მუშაობთ?
რუსკა: რუსთაველის თეატრში "პატარა უფლისწულის" რეპეტიციები მაქვს, მუსკომედიის თეატრში – სპექტაკლ "ფსიქოზის". ნოემბრის ბოლოს ჩემი თეატრი მოლდოვაში მიდის გასტროლზე.
ოთო: ნოემბრის ბოლოს რანაირად მიდიხარ?!
რუსკა: ჩავალ, ვითამაშებ და ჩამოვალ, შენ ნუ ნერვიულობ!
ქეთი დინოშვილი