თაკო გაჩეჩილაძეს ია ფარულავას წინააღმდეგ სასამართლოში სარჩელი შეაქვს

თითქოს ის არ კმაროდა, რომ პროექტის "ცეკვავენ ვარსკვლავები" ირგვლივ ერთი სკანდალი ძლივს ჩაიფარცხა, რომ უკვე მეორე აგორდა. ჯერ ჟიურის წევრმა ია ფარულავამ და მოცეკვავე მომღერალმა თაკო გაჩეჩილაძემ მოიხადეს საჯარო ბოდიში შეზღუდული შესაძლებლობების მქონე პირების ღირსების დამამცირებელი გამოთქმის გამო, ახლა კი თავად პროექტიდან გავარდნილი თაკო უჩივის ია ფარულავას პირადი შეურაცხყოფისთვის. ჟიურის წევრი, მკვეთრი გამოთქმებით ცნობილი მსახიობი ია ფარულავა, თაკო გაჩეჩილაძის ცეკვას ყოველთვის მკაცრად აფასებდა და ამ შეფასებების დროს ლექსიკაში თავს ნამდვილად არ იზღუდავდა. რაც მართალია, მართალია, თაკო სცენაზე ნამდვილად არ ბრწყინავდა, ჟიურის შეფასებებსაც თითქოს მეტნაკლებად იზიარებდა, მაგრამ კულისებმიღმა თურმე სულ სხვა რამ ხდებოდა. ამის შესახებ თაკო გაჩეჩილაძე თავად გვიამბობს.
– თაკო, რა პრეტენზიები გაქვთ ია ფარულავას მიმართ?
– ხუთი ტურის განმავლობაში ია ფარულავას შეფასებები მხოლოდ ჩემს ცეკვას არ ეხებოდა, პირად შეფასებებზე გადმოვიდა. ხან თურმე ტანი არ მაძლევდა ცეკვის საშუალებას, ხან, მისი შეფასებით, ფეხებს შორის ჯოხი მქონდა და ა.შ. ერთ დღეს მიშა გასიტაშვილის სალონში შევხვდით ერთმანეთს. მაშინ ვკითხე, ია, რატომ ხარ ჩემ მიმართ ასე განწყობილი, იცი, რომ მე და ქრისტინე (მომღერალი ქრისტინე იმედაძე – ია ფარულავას ძმისშვილი. ავტ.) მეგობრები ვართ–მეთქი. ვუთხარი, შენი აგრესია ჩვენს ქულებზეც აისახება და საერთოდ, პირად შეურაცხყოფას რატომ მაყენებ–მეთქი. მიპასუხა, რა მნიშვნელობა აქვს, ქრისტინეს მეგობარი რომ ხარ, მას მეც არ ველაპარაკებიო. ისიც უხეშად მოიხსენია და ბოლოს მითხრა, საჯაროდ გპირდები, ძალიან მაღალ ქულებს დაგიწერო. გაიხუმრა!
შემდეგ ტურზე იგივე გაიმეორა. ქულებზე არ მქონდა აქცენტი. ჩემთვის მხოლოდ გოჩა ჩერტკოევის ქულები იყო მნიშვნელოვანი. არავის ვაყენებ შეურაცხყოფას, მაგრამ ის არის ჩემთვის პროფესიონალი. ია ფარულავა პირად შეურაცხყოფას მაყენებდა. მე ქრისტინესაც დავურეკე და ვკითხე, მამიდაშენს რა სჭირს–მეთქი. ქრისტინემ მითხრა, რა ვქნა, ეგეთია, მეც არ მელაპარაკებაო. გადავწყვიტე, მისთვის ყურადღება არ მიმექცია.
– მერე რაღა მოხდა?
– მეხუთე ტურის დაწყებამდე 15 წუთით ადრე საგრიმიოროში შევედი, მაკიაჟს ვიკეთებდი. მოცეკვავეებიც და ვიზაჟისტებიც იქ იყვნენ. ფარულავა შემოვიდა. ეტყობა, ვერ დამინახა ან დამინახა და სპეციალურად, ჩემ გასაღიზიანებლად, გიგის უთხრა, ტექსტი მაქვს მომზადებული, სადაც უნდა ვთქვა, გიგის გვერდით მოუქნელი დათვიც კი აცეკვდებოდაო. მე ვკითხე, რა ტექსტი ჰქონდა მომზადებული, რაზეც პასუხად მივიღე, რომ ვეზიზღები, თურმე ვერავინ მიტანს, ნორმალური არ ვარ, ვერ ვცეკვავ და კონკურსში არაფერი მესაქმება. ვუთხარი, რომ ეს მისი საქმე არ იყო, რომ ალინა არველაძემ დამპატიჟა. თანაც, ჟიურიმ ცეკვა უნდა შემიფასოს და არა – ტანი. იას ვუთხარი, გამწარებული ქალის შთაბეჭდილებას ტოვებ, ალბათ გვერდით მამაკაცი გაკლია, ვინც დაგაწყნარებს–მეთქი. მან კი სოციალურ ქსელში დაწერა, რომ მე ბილწი სიტყვები გამოვიყენე, რაც სიმართლე არ არის. იქ ვიდეოკამერა იყო ჩართული და ვიდეოჩანაწერიც არსებობს. ჩვენს ლაპარაკს სხვებიც ესწრებოდნენ.
ფარულავა არ გაჩერდა, მაგინა და მითხრა, ეკა კახიანიც ვერ გიტანს და არ გელაპარაკებაო. ეკაც გახვია ამ საქმეში. ვერ გამიგია, რა დავუშავე. მასთან არანაირი შეხება არ მქონია. როგორც ქრისტინე იმედაძის მამიდას, ისე ვიცნობდი და მარტო მისი ფილმი "სიყვარული ვენახში" გამიგია. ყველა კონკურსანტი მამშვიდებდა, რომ არ ავყოლოდი.
– ვიდეოჩანაწერი თქვენ გაქვთ?
– სამწუხაროდ, პროექტის პროდიუსერი ალინა არველაძე არ მაძლევს ჩანაწერს, სადაც ასახულია, რა როგორ მოხდა. მისი მესმის, შოუ მიდის და არ უნდა, სკანდალი დაიწყოს. ვაპირებ, ია ფარულავას პირადი შეურაცხყოფისთვის სასამართლოში ვუჩივლო. ჩემს პირად ადვოკატს, დიმა გაბუნიას, უკვე ველაპარაკე და ამ დღეებში სარჩელს შევიტან. ვიდეოჩანაწერი რომც არ მქონდეს, მოწმეების ჩვენებით და გადაცემების ჩანაწერებითაც მოვიგებ სასამართლოს.
– თქვენი პარტნიორი, გიგი გაჩეჩილაძე, ამ კონფლიქტში არ ჩაერია?
– არა და არც სხვები ჩაერიენ, ყველამ უკან გაიწია. მათი მესმის, შეიძლება მეც ასე მოვქცეულიყავი, თუმცა გიგის ადგილას, რაც იამ ჩემზე უთხრა, რაღაცას ვეტყოდი, გიგი კი ოთახიდან გავიდა.
– თქვენ და გიგის დღეს როგორი ურთიერთობა გაქვთ?
– არაჩვეულებრივი! მიხარია, რომ გავიცანი.
– ეკა კახიანს როგორი რეაქცია ჰქონდა ამ ყველაფერზე, მას ესაუბრეთ?
– არა, ამას აბსოლუტურად არ ვთვლი საჭიროდ.
– არც თვითონ მოგიკითხათ?
– არა, თვითონაც არ დაურეკავს. არც ნინის (ბადურაშვილი – ეკა კახიანის ქალიშვილი და თაკოს მეგობარი. ავტ.) დაურეკავს.
– ია ფარულავასთან მანამდე არასოდეს გქონიათ კონფლიქტი?
– არანაირი კონფლიქტი და დაპირისპირება არ მქონია. არ ვმეგობრობდი, მაგრამ სადმე თუ შემხვდებოდა, ჩვეულებრივად მოვიკითხავდი ხოლმე. გადაცემა "დღის შოუში" რამდენჯერმე მქონდა შეხება, სადაც კბენა დამიწყო. ვფიქრობდი, რა უნდოდა ჩემგან, მაგრამ მერე ვთქვი, რომ ეგეთი იყო და გავატარე. მართლა ვერ ვხვდები, ჩემ მიმართ ასეთი აგრესიული რატომ არის.
– გადაცემა "პროფილში" გავიდა სიუჟეტი, სადაც ქრისტინემ მამიდამისი მოატყუა, ვითომ თხოვდებოდა. უთანხმოება ამის გამო ხომ არ მოუვიდათ?
– კი, ზუსტად იმის მერე არ ელაპარაკებიან ერთმანეთს. მანამდეც არ ჰქონდათ ურთიერთობა დალაგებული, მაგრამ იმის შემდეგ სულ აერიათ.
მანანა ნოდია