ვინ იბრძოლებს საქართველოდან მსოფლიოს საუკეთესო მოდელის ტიტულისთვის

გამოაქვეყნა: admin
//
04 დეკემბერი 2012
//
//
//
ნახვები: 1181
ვინ იბრძოლებს საქართველოდან მსოფლიოს საუკეთესო მოდელის ტიტულისთვის
13 ნოემბერს თბილისში "ბესტ მოდელ ოვ ზი ვორლდის" ("მსოფლიოს საუკეთესო მოდელის") შესარჩევი კონკურსი ჩატარდა. 14 კაციანმა ჟიურიმ 22 კონკურსანტი გოგონასა და ვაჟისგან საუკეთესო წყვილი გამოავლინა. ორივე გამარჯვებული სამოდელო სააგენტო "კატრინიდან" დასახელდა. გოგონებიდან გამარჯვება 18 წლის თამთა ქენქაძემ მოიპოვა, ხოლო ბიჭებიდან პირველობა სპორტსმენს, სამოდელო სფეროში აბსოლუტურად გამოუცდელ 23 წლის ბესუს ქრისტესიაშვილს ერგო. ისინი საქართველოს სახელით 8 დეკებერს სტამბულში გამართულ საერთაშორისო კონკურსზე წარდგებიან. იქ გამარჯვებულისთვის სოლიდური პრიზია დაწესებული – 100 ათასი დოლარი. და, რა თქმა უნდა, ხელსაყრელი კონტრაქტები და დიდი პერსპექტივები მსოფლიო პოდიუმებზე.
თბილისში გამართული შესარჩევი კონკურსი შოუს ელემენტებსაც შეიცავდა. მოდელები ჯერ საცურაო კოსტიუმებში გამოვიდნენ, შემდეგ ჩანთების კოლექცია წარმოადგინეს, ბოლოს კი – აზიური სტილის სამოსი. ტურებს შორის პოდიუმზე სიმღერით გამოდიოდნენ მარკუს მეტრეველი, ქეთი ორჯონიკიძე, ნინი შერმადინი. ეს უკანასკნელი საზოგადოებას სიმღერით დაემშვიდობა. იმ ღამით ნინი შერმადინი თბილისს და საქართველოს დიდიხნით გამოეთხოვა და ამერიკაში გაემგზავრა. როგორც "სარკე" უკვე წერდა, მომღერალმა საკუთარი ძალები ბროდვეის მიუზიკლებში უნდა მოსინჯოს.
საქართველოში "ბესტ მოდელ ოვ ზი ვორლდის" ჩატარების უფლება სამოდელო სააგენტო "კატრინის" ხელმძღვანელ ეკა მგალობლიშვილს აქვს მოპოვებული. ეკა შესარჩევი კონკურსის შედეგებით კმაყოფილი დარჩა. კონკურსანტ ბიჭებში სწორედ ბესუსი ყოფილა მისი ფავორიტი, ხოლო გოგონებში თამთასთან ერთად სხვა ფავორიტებიც ჰყავდა. სანამ ჟიური თათბირობდა, ქალბატონმა ეკამ დარბაზში გამოკითხვა ჩაატარა და დაადგინა, რომ ხალხის რჩეული სწორედ თამთა იყო. ასე რომ, საზოგადოებისა და ჟიურის აზრები ერთმანეთს დაემთხვა.
თუმცა ჟიურიმ, რომლის შემადგენლობაში იყვნენ დალი ჩიტალაძე, გიორგი ნაზღაიძე, მარკუს მეტრეველი, დათუნა სულიკაშვილი, ნინო ცქიტიშვილი, ჟურნალ "სარკის" მთავარი რედაქტორის მოადგილე ავთო ჩიტიძე, საკმაოდ დიდხანს ითათბირა. გამარჯვებულის დასახელება არც ისე იოლი გამოდგა.
ეკა მგალობლიშვილი:
– ძალიან კმაყოფილი ვარ არა მხოლოდ იმიტომ, რომ საღამომ კარგად ჩაიარა, არამედ იმის გამოც, რომ ორივე გამარჯვებული სამოდელო სააგენტო "კატრინიდან" დასახელდა.
რამდენიმე სამოდელო სააგენტოს მოდელები მონაწილეობდნენ და მეტი ობიექტურობისათვის მათი ხელმძღვანელებიც დავსვი ჟიურიში. ამით დამტკიცდა, რომ სამართლიანად ჩატარდა კონკურსი – საქართველოს საუკეთესო მოდელი მსოფლიოსათვის. არ მაინტერესებს, ვინ რომელი სამოდელო სააგენტოს მოდელია, არ მაინტერესებს, ვინ ვისი შვილია. ჩემი შვილიც რომ იყოს, თუ ის ღირსეული კანდიდატი არ არის და საქართველოს ღირსეულად ვერ წარადგენს, არ წავიყვან ასეთ მასშტაბურ კონკურსზე! ჩემს პროექტებში გადაწყვეტილებას ყოველთვის ხალხი მიიღებს და არა – მხოლოდ ოთხი კაცი. კონკურსზე საქართველო მიდის, ერთმანეთს გვერდით დავუდგეთ და ჩვენი ქვეყანა ღირსეულად წარმოვაჩინოთ.
– და მაინც, ალბათ გყავდათ თქვენი ფავორიტები, რომელთა გამარჯვებაც თქვენთვის სასიამოვნო იქნებოდა.
– ბიჭებიდან ჩემი ფავორიტი ბესუსი იყო. გოგონებში რამდენიმე კანდიდატი მყავდა. მაყურებელმა თამთა აირჩია და ჟიურის და საზოგადოების გემოვნება ერთმანეთს დაემთხვა. თამთა ქენქაძე ძალიან თავდაჯერებულია. 4 წელია ვზრდით. ჩემს მოდელებს არამარტო აერობიკას და პოდიუმზე სიარულს, არამედ საქართველოს სიყვარულს ვასწავლით. ვითხოვ, რომ ქართულში, ისტორიაში, ინგლისურში აუცილებლად ძლიერები იყვნენ. მათ აქვთ მეტყველების, ფსიქოლოგიის გაკვეთილები. არ მინდა, მოდელებზე თქვან, რომ ისინი ნაკითხი არ არიან და მხოლოდ პოდიუმზე გამოსვლა იციან. მხოლოდ ვიზუალი ვერაფერს იზამს, თუ მას გამოცდილება და ნიჭიერება არ ახლავს.
– თამთა გამოცდილი მოდელი ყოფილა, მაგრამ, როგორც ვიცი, ბესუსს ამ სფეროში გამოცდილება არ აქვს. ალბათ საკმაოდ დიდი მუშაობა მოგიწევთ მასზე.
– თამთა ძალიან მაღალი არ არის, მაგრამ აქვს არაჩვეულებრივი აღნაგობა და სახე. ჩემი აზრით, მას ძალიან ბევრი ქვეყანა შესთავაზებს ფოტომოდელობას. რაც შეეხება ბესუსს, მას სიარულზე, მანერებზე მეტი მუშაობა მოუწევს. მე, კრისტიმ, მარკუს მეტრეველმა, ქეთი ორჯონიკიძემ, ყველამ ერთად უნდა ვიმუშაოთ ბესუსზე. ვიზუალი ძალიან კარგი აქვს და რაღაც–რაღაცეებში დახვეწა მოუწევს. ის ერთი სპორტსმენი ბიჭია და ამ სფეროში არანაირი გამოცდილება არ აქვს.
...
გამარჯვებულები, თამთა და ბესუსი, გახარებულები და ამავდროულად დაბნეულები იყვნენ. როგორც აღმოჩნდა, არც ერთი ელოდა გამარჯვებას და არც იმაზე უფიქრიათ, წინ როგორი რთული მოსამზადებელი პერიოდი აქვთ გასავლელი, რადგან 100 ქვეყნის საუკეთესო მოდელებს შორის მოუწევთ პირველობისათვის ბრძოლა.
თამთა ქენქაძე:
– 2 წლის წინ "მის თინეიჯერზე" გავედი და მეორე ადგილი ავიღე. წელს უბრალოდ ბედი ვცადე, ვიფიქრე, გამოცდილებას მაინც შევიძენ–მეთქი. ნამდვილად არ ველოდი, თუ გავიმარჯვებდი. საოცარი განცდა მაქვს. ყველაზე კარგი შედეგი, რაც ვიფიქრე, ის იყო, რომ მეგონა, ხუთეულში გავიდოდი. იმაზე საერთოდ არ მიფიქრია, რომ ამხელა კონკურსზე მომიწევს წასვლა.
– თამთა, თქვენ ხალხის რჩეულიც გახდით. ამან ალბათ დაგაიმედათ, რომ შეიძლებოდა საზოგადოების და ჟიურის გემოვნება ერთმანეთს დამთხვეოდა.
– ხალხმა რომ ამირჩია, ვიფიქრე, შეიძლებოდა "ვიცე მისი" გავმხდარიყავი, მაგრამ თუ გავიმარჯვებდი, რას ვიფიქრებდი?! ღმერთო ჩემო, აზრზე ვერ მოვსულვარ! ჟიურიმ ალბათ გარეგნობას მიაქცია ყურადღება, მათთან კონტაქტი არ მქონია და სხვა რითი შეიძლებოდა შევეფასებინე, არ ვიცი.
ბესუს ქრისტესიაშვილი:
– ბიჭებში ძლიერი კონკურენცია იყო. ამ სფეროში ძალიან გამოუცდელი ვარ და საკმაოდ ვინერვიულე. ბედნიერი ვარ, რომ გავიმარჯვე.
– კონკურსში მონაწილეობა რატომ გადაწყვიტეთ?
– შემთხვევით მოვხვდი. არ ვიცოდი, კონკურსი რომ ტარდებოდა, მეგონა, უბრალოდ სამოდელო სააგენტოში მოდელი სჭირდებოდათ და ჩემმა მეგობარმა მითხრა, მივსულიყავი. ძალიან ვღელავ, სხვა არაფრის თქმა შემიძლია.
...
"სარკის" ფავორიტები
კონკურსის ორგანიზატორებთან შეთანხმებისამებრ, ჟურნალ "სარკეს" საკუთარი ფავორიტები უნდა დაესახელებინა. ეს რჩეულები თამუნა ჯიშკარიანი და გიორგი კეჭაყმაძე გახდნენ. აღმოჩნდა, რომ ისინი ასაკით ყველაზე პატარები იყვნენ – 17 წლის. თამუნამ კონკურსში საპრიზო პირველი ადგილიც დაიკავა, ის ქუთაისიდანაა, გიორგი კი – რუსთავიდან. ჩვენი ჟურნალის მკითხველებს მათ საკუთარ თავზე უამბეს.
გიორგი კეჭაყმაძე:
– რუსთავში ვცხოვრობ და მეთორმეტე კლასში ვსწავლობ. მოდელობაზე არც მიფიქრია, მეგობრებმა მირჩიეს, კონკურსზე გავსულიყავი. აქამდე პატარ–პატარა რეკლამებში ვყოფილვარ, მაგრამ პოდიუმზე პირველად გამოვედი. ძლიერი კონკურენტები იყვნენ და ვფიქრობ, გამარჯვებულები იმსახურებენ აღიარებას.
– მოდელობა მოგეწონათ?
– სიმართლე გითხრათ, მოდელობა მაინცდამაინც არ მომეწონა. ვფიქრობ, კაცს არ უხდება. დიდად არ მოვიხიბლე. შეიძლება მომავალშიც გამოვიდე ჩვენებებში, მაგრამ ზუსტად ვიცი, რომ ეს არ იქნება ჩემთვის პროფესია და ყოველთვის გართობის დონეზე დარჩება. ფოტომოდელობა უფრო საინტერესოა, მომწონს კამერასთან მუშაობა.
– რა იყო ყველაზე რთული ამ კონკურსში თქვენთვის?
– მოლოდინი. ერთი სული მქონდა, დროზე გავსულიყავი პოდიუმზე. ძალიან ვინერვიულე, როცა შედეგებს აცხადებდნენ. ალბათ გულის სიღრმეში ველოდი, რომ მე გავიმარჯვებდი, მაგრამ ჩემთვის ისიც საამაყოა, რომ "სარკის" სიმპათია გავხდი.
– რა პროფესიას ირჩევთ?
– ჟურნალისტობა მინდა და ვემზადები, რომ ჩავაბარო. უფრო ტელეწამყვანობა მომწონს და შევეცდები, მიზანს მივაღწიო. მოცურავეც ვარ, მაგრამ ამ მხრივ გაგრძელებას არ ვაპირებ. ცურვა ჩემთვის ჯანსაღი ცხოვრების წესია.
– სკოლის გოგონებში ალბათ პოპულარული ბიჭი ხართ.
– საკუთარ თავზე მერიდება საუბარი, მაგრამ ნამდვილად პოპულარული ვარ სკოლაშიც და რუსთავშიც. გოგოებისგან ყურადღებას ყოველთვის ვგრძნობ. პირდაპირ მეცნობიან კიდეც. ერთხელ გოგონამ პლაჟზე "შლოპანცები" მომპარა იმ მიზნით, რომ გამეცნო. ქუჩაშიც პირდაპირ უთქვამთ, შენი გაცნობა მინდაო. ასეთ გოგონებს სერიოზულად არ ვუყურებ. ვფიქრობ, მამაკაცმა უნდა შეძლოს ქალის მოხიბვლა და არა – პირიქით. მე თვითონ არავინ მომწონს.
– რატომ?
– შეყვარებულს ცოტა ხნის წინ დავშორდი და ამ ეტაპზე სერიოზულად არავისზე ვფიქრობ.
– სიყვარულში იმედი გაგიცრუვდათ?
– ალბათ ბოლომდე არ ვენდობოდი, რამაც საბოლოოდ ჩვენს სიყვარულზე იმოქმედა.
– როგორი გოგონები მოგწონთ?
– ჩემი შეყვარებული უნდა იყოს იდეალური. მის ცხოვრებაში, ჩემ გარდა, სხვა ადამიანი არ უნდა არსებობდეს და არავითარ შემთხვევაში არ უნდა დამთმოს. გარეგნულად უნაკლო უნდა იყოს. ვერ ვიტან მწეველ გოგონებს.
თამუნა ჯიშკარიანი:
– ვცხოვრობ ქუთაისში, სკოლის მოსწავლე ვარ. 12 წლის ვიყავი, პოდიუმზე პირველად რომ გავედი. ეს საქმე ძალიან მიყვარს. მახსოვს, 12 წლის გოგონა დიზაინერთან კასტინგზე როგორ მივედი და ვუთხარი, ამიყვანეთ–მეთქი.

– რა მოგწონთ მოდელობაში?
– უდიდესი სიამოვნებაა ჩემთვის, როცა ყურადღების ცენტრში ვარ. პოდიუმზე თავს კარგად ვგრძნობ. გოგოსთვის მოდელობა, ვფიქრობ, კარგი პროფესიაა. ქალს უფრო დახვეწილს ხდის. ძალიან ბევრს ვმუშაობ საკუთარ თავზე. ყოველი ჩვენებიდან ვცდილობ, რაიმე ახალი ვისწავლო. მოდელების კონკურსი ჩემთვის ახალი გამოცდილება იყო და მიხარია, რომ პირველი ადგილი ავიღე.
– კონკურსანტის როლში ყოფნა რთული იყო თუ ადვილი?
– საინტერესო იყო. იმედი მქონდა, რომ ჟიურის სიმპათიას გარკვეულწილად დავიმსახურებდი. გამარჯვების შანსი ყველას ჰქონდა. ძალიან მეამაყება, რომ "სარკის" რჩეული გოგონაც გავხდი, რადგან ეს ჟურნალი საქართველოში ყველაზე პოპულარულია. "სარკეში" დაბეჭდილი ინტერვიუ ახალ შესაძლებლობს მომცემს, შეიძლება რომელიმე დიზაინერს მოვეწონო და ჩვენებაში მიმიწვიოს. ამიტომ ჩემთვის "სარკის" აღიარება ძალიან მნიშვნელოვანია.
– გარს ალბათ ბევრი თაყვანისმცემელი გახვევიათ, შეყვარებული ხომ არ ხართ?
– ჩემთვის თაყვანისმცემლები და სიყვარული ჯერ საინტერესო არ არის. მიზანი მაქვს, რომ გავხდე პოპულარული მოდელი, შევიქმნა კარგი კარიერა და შემდეგ ვიფიქრო სიყვარულზე. ჩემს თაყვანისმცემლებს ყოველთვის ვეუბნები: "მადლობა, რომ მოგეწონეთ, მაგრამ ურთიერთობებისათვის არ მცალია". შესაბამისად არც შეყვარებული არ მყავს.
– ზოგადად როგორი ბიჭები მოგწონთ?
– მომწონს სპორტსმენი ბიჭები, კონკრეტულად კი – ფეხბურთელები. მხიბლავს განათლებული, ჭკვიანი და სერიოზული მამაკაცი. არ მომწონს ბიჭი, რომელსაც საკუთარ თავზე დიდი წარმოდგენა აქვს.
– რა პროფესიას აირჩევთ?
– მოდელობა ჩემთვის გართობა არ არის, მას პროფესიულად ვუყურებ. მინდა, ჩემი ძალები საზღვარგარეთ მოვსინჯო. სააგენტო "კატრინმა" რამდენიმე უცხოურ სააგენტოში ჩემი ფოტოები გაგზავნა და პასუხის მოლოდინში ვარ. ვაპირებ, იურიდიულზე ჩავაბარო, მომავალში ჩემი თავი ადვოკატის ამპლუაში წარმომიდგენია.
– რა იქნება შემდეგი ეტაპი?
– ზაფხულისათვის ვემზადები, მინდა მონაწილეობა მივიღო სილამაზის კონკურსში და ვიბრძოლო "მის თინეიჯერის" ტიტულისათვის.
ქეთი დინოშვილი
Popular Login Last More