ნათია წიწილაშვილი "რეალ ტვ"-დან ბერას ტელევიზიაში გადაბარგდა

რამდენიმე დღის წინ ბერა ივანიშვილის ახალგაზრდულ არხს "ჯიდიესს" ვუყურებდი. მოულოდნელად მსახიობი ნათია წიწილაშვილი დავინახე ეკრანზე, "მუსიკალური ათეული" მიჰყავდა. მისი ამ არხზე დანახვა ძალიან გამიკვირდა. ნათიას ხომ ჯერ კიდევ ზაფხულში "რეალ ტვ"-ზე მიჰყავდა გადაცემა. სიმართლე გითხრათ, აღვშფოთდი კიდეც. ვერ გავიგე, როგორ ხდება, ხალხი ასე სწრაფად და რადიკალურად რომ იცვლის შეხედულებებს. პრინციპში, არც იმ ადამიანების მესმის, ვინც ნათიას ბერას ტელევიზიაში უპრობლემოდ გამოუძებნა ადგილი. ნათია წიწილაშვილს დავუკავშირდი და ახალ სამსახურზე ვესაუბრე.

- ნათია, "ჯიდიესზე" მუშაობა როგორ დაიწყე?
- ჩვეულებრივ. დამირეკეს, მითხრეს, რომ არხზე კასტინგი იყო. მივედი და ამიყვანეს სამსახურში.
-
როგორ მოგწონს ახალი სამსახური? როგორც ვიცი, მსგავსი ტიპის გადაცემა არ წაგიყვანია.
- ძალიან მომწონს ახალი სამსახური. ყველანაირად კმაყოფილი ვარ. ყოველ შემთხვევაში, ჯერჯერობით.

- მუსიკალურ ათეულს როგორ ადგენთ?
- ბრიტანული და ამერიკული ჩარტების მონაცემებით. მუსიკალური ათეული სხვადასხვა დღეს მე, სანდრო ჟღენტს და სანდრა პაიჭაძეს მიგვყავს.

- მანამდე "რეალ ტვ"-ის ეთერში სამ გოგოს, შენ, თაკო აბაშიძეს და ადელინას მიგყავდათ გადაცემა "გოგოები". როგორც ვხვდები, ეს ხელისშემშლელი ფაქტი არ გამხდარა, რომ ბერას ტელევიზიაში ახალი სამსახური უპრობლემოდ დაგეწყო.
- "რეალ ტვ"-დან მე თვ­ითონ წამოვედი, "ჯიდიესში" არანაირი პრობლემა არ შემქმნია.

- მე ხანდახან ვუყურებდი თქვენს გადაცემას. სამ გოგოს ბევრჯერ გიხუმრიათ უტაქტოდ ბიძინა ივანიშვილზე და მისი გუნდის სხვა წევრებზე. ამის გაკეთებას გაიძულებდნენ და ამის გამო წამოხვედი?
- არხიდან წამოსვლის გადამწყვეტი და მნიშვნელოვანი ფაქტორი სწორედ ეს იყო. მიწევდა ისეთი რაღაცების თქმა, რაზეც ხელოვანი ადამიანი არ უნდა საუბრობდეს. ეს ჩემი პირადი აზრია. ზოგი სხვაგვარად ფიქრობს და სხვაგვარად იქცევა. მე კი მგონია, რომ ხელოვან ადამიანს პოლიტიკასთან კავშირი არ უნდა ჰქონდეს. პოზიცია კი უნდა გააჩნდეს, მაგრამ ამას საქვეყნოდ არ უნდა ამბობდეს.

- როგორც ვხვდები, "რეალ ტვ"-ის არხის ხელმძღვანელობიდან და­ვალება გქონდათ, რომ ასე გეხუმრათ...
- დავალება არ ყოფილა. ცოტა სხვა სიტუაცია იყო. მე, როგორც გითხარით, არ მსურდა მესაუბრა პოლიტიკაზე.

- დავალება არ ყოფილაო ამბობ, ე.ი გთხოვდნენ, ასე იხუმრეთო?
- არ ვიცი, თქვენ თვითონ დაარქვით ამ ყველაფერს სახელი.

- თაკო და ადელინა ამჯერად რას საქმიანობენ?
- ზუსტად არ ვიცი, მგონი, "კომედი არხზე" იწყებენ მუშაობას. კონკრეტულად არ ვიცი. ყურმოკვრით გავიგე, რომ ტექსტის ჩაწერაზე იყო ორივე.

- სანამ "რეალ ტვ" დაიხურებოდა, მანამდე ბევრად ადრე წამოხვედი არხიდან?
- ივლისში წამოვედი. ბოლო ეთერი 26 ივლისს გვქონდა. სეზონი დამთავრდა და ვუთხარი, სექტემბრიდან თქვენთან აღარ ვიქნები-მეთქი.

- დანარჩენებმაც მოგბაძეს? პროტესტის გამო ადელინამ და თაკომაც დატოვეს არხი?
- როგორც ვიცი, ისინი ეთერში უნდა დაბრუნებულიყვნენ. მერე არხი დაიხურა. სიმართლე რომ გითხრათ, ხშირი კონტაქტი აღარ მაქვს არც ადელინასთან და არც თაკოსთან.

- შენი მეუღლე გიორგი კალანდაძე ამჯერად რას საქმიანობს? მახსოვს, ისიც "რეალ ტვ"-ში ერთ-ერთი გადაცემის წამყვანი იყო. მანაც შენთან ერთად დატოვა არხი?
- არხზე რაღაცები შეიცვალა. გადაცემები გადახალისდა და გიორგიც წამოვიდა. ჯერჯერობით არაფერს არ აკეთებს. ფილმ "ნაწილებში" მიიღებს მონაწილეობას. მიმდინარეობს ფილმისთვის მზადება, რომელსაც რეჟისორი ნიკოლოზ ჯავახიშვილი გადაიღებს. გიორგი ამ ყველაფერში აქტიურადაა ჩართული.

ქეთი მელაძე
ჟურნალი "რეიტინგი"