სალომე ჭაჭუამ შეყვარებულს ჩაცმის სტილი შეაცვლევინა

ცნობილ შეყვარებულ წყვილს, სამეჯლისო მოცეკვავეებს სალომე ჭაჭუას და გიგი გაჩეჩილაძეს, ტანსაცმლის მაღაზიებში შეიძლება ერთად წააწყდეთ. ერთ დროს გიგისთვის შოპინგის პროცესი სასიამოვნო არ იყო, მაგრამ საყვარელმა ქალმა საყიდლებზე სიარულსაც მიაჩვია და მის ჩაცმულობაშიც შეიტანა ცვლილებები თავისი გემოვნების მიხედვით.
სალომეს გარდერობში მუქი ფერები ჭარბობს, უყვარს შავი, მაგრამ განსაკუთრებით მოსწონს ლეოპარდის ბეწვის პრინტი. თავადაც ლეოპარდივით მოქნილი და პლასტიკურია. უწოდეს კიდეც ნამდვილი ავაზა პროექტის "ცეკვავენ ვარსკვლავების" ერთ–ერთ ტურში.
– სალომე, როგორია თქვენი ყოველდღიური სამოსი?
– თინეიჯერული. ჯინსები, კედები, "ბალეტკები", მაისურები... ყოველდღე კლასიკურ სტილში გამოწყობილი არ დავდივარ. თუ მნიშვნელოვან ადგილზე არ მივდივარ ან მაღალქუსლიანი ფეხსაცმლის ჩაცმის ხასიათზე არ ვარ, კლასიკურად არ ვიცვამ. ისედაც სულ მაღალქუსლიანებით ვცეკვავ და ყოველდღე მაღალი ქუსლებით სიარულს ვერ შევძლებ.
– სახლიდან გასვლამდე უცბათ წყვეტთ, რა უნდა ჩაიცვათ თუ ბევრს ფიქრობთ?
– ზოგჯერ წინა ღამეს მოვიფიქრებ და მეორე დღეს იმ სამოსს ვიცვამ. ხან, კარადის კარს რომ ვაღებ, პირველად რასაც დავინახავ, იმას ვიღებ. ისეთი შემთხვევებიც მქონია, როდესაც "ვჭედავ", სამი საათის განმავლობაში ნაირ–ნაირ სამოსს ვიცვლი, მაგრამ მაინც არაფერი მომწონს. ბოლოს რაღაც ძონძს ამოვიცვამ და ისე გავდივარ. ასეთი "გაჭედვები" ხშირად მჭირს, გააჩნია, როგორ ხასიათზე ვიღვიძებ. ცხრაჯერ შემიძლია გამოვიცვალო. ვგიჟდები, ისე მიყვარს ტანსაცმელი, შოპინგზე აღარაფერს ვამბობ. რომელ გოგოს არ უყვარს ეს პროცესი?
– საყიდლებზე მაშინ მიდიხართ, როდესაც ამის განწყობაზე ხართ თუ მაშინ, როცა ტანსაცმლის კარადას აღებთ და ხვდებით, რომ აუცილებელია რაღაც ახლის შეძენა?
– როცა დრო მაქვს, მაშინ მივდივარ მაღაზიებში და მე თუ იქ შევედი, აღარ გამოვდივარ. თუ ფული არ მაქვს, მაშინ მაღაზიაში არ შევდივარ. თუ მაინც შევედი და რაღაც მომეწონა, მერე ნერვები მეშლება, რომ ვერ ვყიდულობ. საშინელ ხასიათზე ვდგები და გამოსავლის ძიებას ვიწყებ.

– თქვენთვის პრიორიტეტი რა არის – ხარისხი, ფერი, სტილი...
– ყველაფერი ერთად, მაგრამ უპირატესობას ხარისხს ვანიჭებ. ბევრჯერ ყოფილა, რომ ბრენდის მაღაზიაში ცოტა ძვირადღირებული სამოსი შემიძენია, მაგრამ მალევე გაფუჭებულა. ცოტა ხნის წინ სწორედ ასეთ მაღაზიაში ერთ–ერთი ბრენდის პერანგი ვიყიდე და მეორე დღეს დაიძენძა. ალბათ არავის ეწყინება, თუ ვიტყვი, რომ ფასი ხარისხს არ ემთხვევა. ეს ალბათ მარტო მე არ მაქვს შემჩნეული.
– თქვენი და გამყიდველების ურთიერთობა როგორია? ალბათ ყველა მაღაზიაში გცნობენ.
– ამჟამად მცნობენ და ძალიან კარგად მექცევიან, მაგრამ არ მიყვარს, როდესაც მოდიან და უამრავ კითხვას მისვამენ, რა მინდა, როგორი მინდა. მირჩევნია, ჩემთვის, მარტომ დავათვალიერო. არ ვამბობ, რომ, რადგან პოპულარული ვარ, ამიტომ მოდიან და თავს მეხვევიან, ადრეც მქონია ასეთი შემთხვევები. თუ კითხვა გამიჩნდება, მირჩევნია, მივიდე და თავად ვკითხო. ზოგჯერ მაღაზიაში შევსულვარ და ისეთი გამყიდველი დამხვედრია, რომ... ეს კატასტროფაა, მაგრამ ბოლო პერიოდში ცოტა გამოსწორდა, ადრე კი ძალიან ცუდი სიტუაცია იყო. ბრენდების მაღაზიებში ისე ამხედ–ჩამხედავდნენ, რომ ბოდიშს ვიხდიდი შესვლისთვის.
– პროექტში "ცეკვავენ ვარსკვლავები" ვინ ზრუნავს თქვენს კოსტიუმებზე?
– ჯიჯი რეჯინი გვაცმევს, რომელსაც გუდუ (დიზაინერი ლაშა მდინარაძე. ავტ.) ეხმარება. ჩემს კოსტიუმებში კორექტივები შემაქვს, რადგან დიდი ხანი არ არის, რაც სპორტული ცეკვების კოსტიუმებთან აქვთ შეხება.
– საცეკვაო კოსტიუმს ალბათ თავისი სპეციფიკა აქვს, რომელიც თქვენ უკეთ მოგეხსენებათ.
– სცენაზე აუცილებელია კომფორტი, მით უმეტეს, ამ ცეკვებისთვის. კოსტიუმი კარგად თუ არ გადგას ტანზე, შეიძლება ცეკვის დროს რაღაც ცუდად გამოგიჩნდეს ან რაღაც თუ ცუდადაა დამაგრებული, ცეკვის დროს გაიხსნას. ამას ცოტა დაკვირვება და სპეციფიკური მკერავი სჭირდება, კოსტიუმებში კარგად უნდა ერკვეოდეს. ამ პროექტში კარგად გვიკერავენ, მაგრამ ყველაზე დიდი პრობლემა ისაა, რომ საქართველოში ნაჭრები არ იშოვება. ამ ცეკვაში კი ნაჭერს დიდი მნიშვნელობა აქვს.
– სანამ ინტერვიუს ჩაწერას დავიწყებდით, მითხარით, ძირითადად მუქ ფერებში ვიცვამო. ღია ფერის სამოსი არ გიყვართ?
– ღია ფერის სამოსი მომწონს, მაგრამ კაბები უფრო მუქ ფერებში მაქვს. შავი ჩემი საყვარელი ფერია. ღია ფერის სამოსთან შედარებით უფრო სექსუალურს გაჩენს. ზედატანები კი სხვადასხვა ფერის მაქვს.
– შოპინგზე თქვენი შეყვარებული გიგი დაგყვებათ?
– მარტოც მიყვარს სიარული, მაგრამ მაინც მირჩევნია, მეგობართან ან დედასთან ერთად წავიდე. იშვიათ შემთხვევაში გიგისთან ერთადაც დავდივარ. მირჩევნია, ვიღაცამ შემომხედოს და მითხრას, ეს კარგად გაქვს, იმას ნამდვილად სჯობსო.
– გიგისაც მოსწონს თქვენთან ერთად მაღაზიებში სიარული?
– გიგის ძალიან ეზარებოდა მაღაზიებში სიარული, მაგრამ მე შევაყვარე, დამყვება ხოლმე. მის აზრს უფრო ვითვალისწინებ. კარგი გემოვნება აქვს, ხშირ შემთხვევაში ჩვენი აზრები ერთმანეთს ემთხვევა.
– ქალის როგორი ჩაცმულობა მოსწონს გიგის?
– მოსწონს, როდესაც ჯინსებსა და "ბალეტკებში" ვარ. მაღლები რომ მაცვია, ეგეც მოსწონს, მაგრამ ვიცი, რომ სპორტული ჩაცმულობა ურჩევნია.
– თავად რა სტილში იცვამს?
– გიგის ცოტა განსხვავებული გემოვნება აქვს, რადგან წლების განმავლობაში ამერიკაში ცხოვრობდა. იქაურ ყაიდაზეა გადასული და აქაური სტილი დიდად არ მოსწონს. ჩვენთან კი ევროპული სტილია შემოსული, ამიტომ ცოტა ვერ ეგუება, რის გამოც ხშირად ვკამათობთ. საბოლოო ჯამში, მაინც მე ვიმარჯვებ და იმას იცვამს, რაც მე მომწონს. მერე ყველა რომ ეუბნება, რა კარგად გამოიყურებიო, ვეუბნები, აი, ხომ ხედავ–მეთქი. მთლიანად მენდობა და ვიცი, რა უნდა და რა უხდება.
– როგორ ფიქრობთ, ქალურობა შინაგანად უნდა გქონდეს თუ შეიძლება სამოსმა წარმოგაჩინოს ასე?
– ქალურობა შინაგანადაც უნდა გქონდეს, მაგრამ მხოლოდ ამაზე არაა დამოკიდებული. იგივე სამოსი, მანერა, თავის მოვლა ქალურობას განაპირობებს. ყველაფერი ერთად ქალურს გხდის. მხოლოდ შარმი რომ გქონდეს და სხვას არაფერს მიაქციო ყურადღება, ის ხიბლიც დაიკარგება.
– გამორჩეულად რა გიყვართ თქვენი გარდერობიდან?
– გამორჩეულად საყვარელი ტანსაცმელი არ მაქვს. ბოლო დროს გარდერობის განახლება ხშირად მიწევს, რადგან გადაღებებზე, ჩაწერებზე ერთნაირ ფორმაში არ უნდა ვიყო. ძირითადად კაბების ყიდვა მიწევს "ივენთებისთვის", ამიტომ კაბები მომიმრავლდა. ჩემთვის ყველაზე საყვარელი მაინც ჯინსის შარვლებია, რა ვქნა, ისე მიყვარს, მაბოდებს! ბევრი მაქვს, რის გამოც დედა მეჩხუბება, ამდენს ნუ ყიდულობო. მართლა ვერ ვიყენებ ამდენ ჯინსს, მაგრამ ძალიან მიყვარს და უარს ვერ ვამბობ. ასევე ძალიან მიყვარს შორტები, რომლის სეზონიც წავიდა, მაგრამ ვარჯიშზე მაინც ვიცვამ.

– ალბათ იმიტომ, რომ პრაქტიკულიც არის.
– ილეთებზე მუშაობას დიდი ძალა სჭირდება. ბოლო კვირებია, მხარი მტკივა. ილეთი რომ გამოგივიდეს, ერთი–ორჯერ ძირს უნდა დაეხეთქო. მე და გიორგი ვარდოსანიძე ვხუმრობთ ხოლმე, პროექტი რომ მორჩება, ბოლოს აქედან ყავარჯნებით გავალთ–თქო. საბედნიეროდ, გიორგი კარგ ჯანზეა და მაინც ადვილად გამოგვდის. ერთი–ორჯერ კი დავაგდეთ ერთმანეთი, მაგრამ სხვანაირად არ გამოვა. ხალხს ილეთების ყურება უფრო სიამოვნებს. ეს უფრო ადვილია, ვიდრე ცეკვა, უბრალოდ დამუშავების პროცესია რთული იმ მხრივ, რომ შეიძლება რაღაც დაიზიანო.
– ფერების თამამად შეხამებას რისკავთ?
– იშვიათად. ბოლო წელია, რაც ფერადების ჩაცმა დავიწყე, მაგრამ ფოსფორისფერ შარვალზე მწვანე ზედატანს ნამდვილად ვერ ჩავიცვამ. ჩანთას და ფეხსაცმელს ვუხამებ ერთმანეთს. ყველა მეხუმრება იმის გამო, რომ ლეოპარდის პრინტი მიყვარს. ჩანთა, ფეხსაცმელი, აქსესუარები, შარვალი... იცით, რამდენი რაღაც მაქვს ლეოპარდის? ტანგო რომ ვიცეკვეთ, მარინა ბერიძემ მითხრა, ნამდვილი პანტერა ხარო და მაგაზე ძალიან ვიცინეთ.
– როგორც ჩანს, აქსესუარები გიყვართ.
– კი და ვცდილობ, კარგი ბრენდის აქსესუარები გავიკეთო. ვთვლი, რომ აქსესუარები უფრო ფასეული უნდა გქონდეს, იგივე სათვალე, ჩანთა, ქამარი, თუნდაც ფეხსაცმელი. ამ ყველაფერში უფრო მეტ ფულს ვიხდი, ვიდრე ტანსაცმელში.
– არის რამე სტილი, რომელიც საკუთარ თავზე ვერ წარმოგიდგენიათ?
– კი, ძალიან განსხვავებულად, მაგალითად, პანკების, როკერების მსგავსად ვერასოდეს ჩავიცვამ. ამ სტილს მივესალმები, მაგრამ ასე გამოწყობილი საკუთარი თავი ვერ წარმომიდგენია. სხვათა შორის, მეცხრე კლასამდე რეპი მიყვარდა და ჩაჩაჩული შარვლებითაც დავდიოდი. შემიძლია უცებ რადიკალურად შევიცვალო სტილი. ამ ბოლო დროს სულ იმას მეკითხებიან, თმა ხომ არ შევიღებე, არადა ხელი არ მიხლია. უბრალოდ შუაზე რომ ვიყოფ, სულ სხვანაირად გამოვიყურები, გვერდით გადაწეულზე სხვანაირი ვარ, უკან გადაწეულ თმაში – სულ სხვანაირი. ამიტომ მეუბნებიან, რაღაც გაქვს შეცვლილიო. მიყვარს სტილის შეცვლა, მაგრამ თმას ისე არასოდეს შევიღებავ, რა ფერიც ჩემში არ ზის. შარშან რაღაცაზე ძალიან გავბრაზდი და თმა შევიჭერი, არადა ძალიან გრძელ თმას ვატარებდი. ამას დღემდე ვნანობ, მას შემდეგ ვეღარ გავიზარდე.
ქეთი დინოშვილი