• ჩიყვი - ქალის ახალგაზრდობის მთავარი მტერი

    ენდოკრინული სისტემა აერთიანებს შინაგანი სეკრეციის ჯირკვლებს, რომლებიც განსაკუთრებულ ბიოლოგიურად აქტიურ ნივთიერებებს – ჰორმონებს გამოიმუშავებს.

    ჰორმონები მნიშვნელოვან გავლენას ახდენს ნივთიერებათა ცვლის პროცესზე, რასაც შეუძლია შეცვალოს როგორც მთლიანი ორგანიზმის, ასევე ცალკეული ორგანოების ფუნქცია. ორგანიზმში ჰორმონების საკოორდინაციო ცენტრს ფარისებრი ჯირკვალი წარმოადგენს.

    სწორედ ის აწვდის მთელ ორგანიზმს გამომუშავებულ ჰორმონებს, რაც, თავის მხრივ, ააქტიურებს ცხიმების, ცილებისა და ნახშირწყლების ცვლის პროცესს; აძლიერებს ენერგიის გამომუშავებას, რაც მაშინვე აისახება ყველა სისტემისა და ორგანოს მუშაობაზე; მატულობს სხეულის ტემპერატურა და სისხლის წნევა, ჩქარდება გულის მუშაობა, ძლიერდება ნაწლავთა პერისტალტიკა და კუჭის წვენის სეკრეცია.

    თუ ფარისებრი ჯირკვალი საჭიროზე მეტ ჰორმონებს გამოიმუშავებს, ორგანიზმი მუშაობის ავარიულ რეჟიმში გადადის - ნაადრევად იწყებს ყველა მარაგის ხარჯვას, რაც უარყოფითად აისახება ჯანმრთელობაზე, ადამიანი მუდმივად გაღიზიანებულია, მნიშვნელონად იკლებს წონაში.

    ქალებში ამ დაავადების საწყისად უმეტესწილად სტრესი და ნერვული დაძაბულობა მიიჩნევა. გარეგნულად ეს პროცესი ფარისებრი ჯირკვლის გადიდებით - ჩიყვით აღინიშნება.

    ჯანმრთელობისთვის ასევე საზიანოა ფარისებრი ჯირკვლის მუშაობის დაქვეითებაც - ჰიპოფუნქცია.

    ამ დროს ორგანიზმს არ ჰყოფნის ჰორმონები, ნელდება ნივთიერებათა ცვლის პროცესები და ვითარდება დაავადება - ჰიპოთირეოზი. ამ დროს ორგანიზმში მნიშვნელოვნად მცირდება სასიცოცხლო ტონუსი, სუსტდება პულსი, ადამიანი სწრაფად იღლება და ითენთება.

    ზემოაღნიშნული სიმპტომები აუცილებლად საჭიროებს კვალიფიციური ენდოკრინოლოგის, ზოგჯერ კი ქირურგის ჩარევასაც.

    კრიტიკული სიტუაციები

    სტატისტიკის თანახმად, ფარისებრი ჯირკვლის დაავადებები ქალებში უფრო ხშირია. საქმე ის არის, რომ ფარისებრი ჯირკვლის მიერ გამომუშავებული ჰორმონები დიდ გავლენას ახდენს ქალის რეპროდუქციულ ფუნქციაზე.

    განსაკუთრებულ მნიშვნელობას იძენს ფარისებრი ჯირკვლის მდგომარეობა ორსულობისას. დედის ფარისებრი ჯირკვლის ჰორმონები გავლენას ახდენს ორსულობის მთელ პერიოდზე. თუ ფეხმძიმობისას ქალის ორგანიზმს საკმარისად არ მიეწოდება იოდი, მას შეიძლება ჩიყვი გაუჩნდეს და მშობიარობის შემდეგ ფარისებრმა ჯირკვალმა ნორმალური ფუნქციონირება ვერ შეძლოს, მით უმეტეს, რომ ძუძუთი კვების პერიოდში ორგანიზმი იოდის ნაკლებობას განიცდის.

    დედის ორგანიზმში იოდისა და ფარისებრი ჯირკვლის ჰორმონთა ნაკლებობა აფერხებს ჩვილის ტვინის ნორმალურ ფორმირებას, რამაც შეიძლება ხელი შეუშალოს ბავშვის ინტელექტუალურ განვითარებას. ამიტომ ორსულობამდე აუცილებლად ეწვიეთ ენდოკრინოლოგს და შეიმოწმეთ ფარისებრი ჯირკვლის ჰორმონული დონე.

    როგორ ინიღბებიან ჰორმონები

    ფარისებრი ჯირკვლის დაავადებები, ძირითადად, ახალგაზრდა ქალბატონებს აწუხებთ, რომელთა მდგომარეობა შეიძლება შეფასდეს, როგორც "არც ჯანმრთელი, არც ავადმყოფი". ამასთან, კონკრეტული დიაგნოზის დასმა ჭირს და მკურნალობას შედეგი არ მოაქვს. ფარისებრი ჯირკვლის ჰორმონთა უკმარისობისას თავს იჩენს სხვადასხვა დაავადება, რომლებიც სინამდვილეში მხოლოდ "ნიღაბია".

    მაგალითად, ფარისებრი ჯირკვლის ფუნქციის უკმარისობისას შეიძლება, ჰეპატიტი ივარაუდონ, რადგან მისთვის კანის ოდნავ მოყვითალო შეფერილობაა დამახასიათებელი. ამ პრობლემის დროს ახალგაზრდა გოგონებს ასევე აწუხებთ ძლიერი უმიზეზო შიში და დეპრესია. თავს იჩენს მოთენთილობა, ძილიანობა, ძალების დაქვეითება. ის გავლენას ახდენს გულ-სისხლძარღვთა სისტემაზეც. ფერხდება გულის ნორმალური მუშაობა, ვითარდება მაღალი ან დაბალი წნევა. მისთვის დამახასიათებელია ასევე ანემია.

    რა ვიღონოთ

    ახალგაზრდა ქალბატონებმა ფარისებრი ჯირკვლის ნორმალური მუშაობის შესანარჩუნებლად აუცილებლად უნდა გაითვალისწინონ ექიმის რეკომენდაციები. ნებისმიერ შემთხვევაში აუცილებელია პროფესიონალი ენდოკრინოლოგის კონსულტაცია. რაც შეეხება მედიკამენტებს, უმჯობესია, ისინი სპეციალიზებულ აფთიაქებში მოიძიოთ, სადაც ნებისმიერი დეფიციტური პრეპარატის შეძენა შეიძლება სრული სანდოობის გარანტიით.


    ჟურნალი "რეიტინგი"
    2 610 ნახვა
    10-12-2012, 02:23
    GOGATV

    abezara