• ალა პუგაჩოვა თბილისში ჩამოდის?

    გავრცელებული ინფორმაციით, სა­ქართველოში რუსული ესტრადის ვარსკვლავების კონცერტები იგეგმება. ამ საკითხზე არაერთი კულტურული პროექტის ორგანიზატორი დავით ოქიტაშვილი გვესაუბრება:

    2013 წლის 11 მაისს კომპოზიტორისა და მუსიკალური პროდიუსერის კონსტანტინე მელაძის იუბილე გვქონდა დაგეგმილი, მაგრამ იმ სამწუხარო ინციდენტის გამო (ავტოსაგზაო შემთხვევას, როდესაც მელაძე საკუთარ "ლექსუსს" მართავდა, მსხვერპლი მოჰყვა), რაც მას შეემთხვა, ვნახოთ, როგორ განვითარდება მოვლენები. 20 იანვარს სრულიად საქართველოს კათოლიკოს-პატრიარქთან ერთად მოსკოვში მივემგზავრები და დეტალები ამის შემდეგ გაირკვევა.

    დაახლოებით 15 მარტისთვის არის დაგეგმილი თამარ გვერდწითელის კონცერტი, მასთან ერთად სცენაზე იქნება დიმიტრი დიუჟევი. ანჟელიკა ვარუმისა და ლეონიდ აგუტინის კონცერტი კი მოგვიანებით, 29 მარტისთვის არის დაგეგმილი.

    - თქვენი აზრით, თუ ჰყავს დღეს რუსულ ესტრადას საქართველოში ფართო მსმენელი, განსაკუთრებით ახალ თაობას შორის?
    - ვალერი მელაძე რუსული ესტრადის წარმომადგენელია და შარშან მისმა კონცერტმა სრული ანშლაგით ჩაიარა, კონცერტამდე 15 დღით ადრე სალაროში ერთი ბილეთი აღარ იყო. ეს ნიშნავს, რომ ქართველ მსმენელს მოენატრა რუსული ესტრადა. ალა პუგაჩოვადან დაწყებული, რუსული ესტრადის არაერთმა ვარსკვლავმა გამოთქვა საქართველოში ჩამოსვლის სურვილი, მათ აქ ბევრი მეგობარი ჰყავთ. შესაძლოა, ჩემმა ნათქვამმა ზოგიერთი გააღიზიანოს, მაგრამ ვფიქრობ, ქართული შოუბიზნესი რუსულთან უფრო ახლოა, ვიდრე თუნდაც ამერიკულთან. ბევრმა ჩვენმა ნიჭიერმა მომღერალმა რუსეთში უფრო წარმატებული კარიერა გაიკეთა, ვიდრე სხვაგან, ცხადია, ესტრადის მომღერლებს ვგულისხმობ.

    - ალა პუგაჩოვასთან გქონდათ მოლაპარაკებები ამ საკითხზე?
    - მას სურვილი აქვს, ჩამოვიდეს. კონცერტით ჩამოვა თუ სტუმრის სტატუსით დაესწრება თამრიკო გვერდწითელის ვარსკვლავის გახსნას, მალე გაირკვევა. რამდენიმე დღის წინ ვესაუბრე მელაძეს და მითხრა, რომ ვლადიმირ პრესნიაკოვს სურს ჩამოსვლა საქართველოში. ვფიქრობ, შეცდომა იყო, მათ ჩამოსვლის საშუალება რომ არ ეძლეოდათ. დიმიტრი დიუჟევს 2015 წლამდე ყველა დღე გაწერილი აქვს, მაგრამ მითხრა: ყველაფერს გავაკეთებ, რომ თამრიკოს ვარსკვლავის გახსნაზე ჩამოვიდე, შავი ღვინოც ძალზე მომენატრაო. რაც მთავარია - ამ დღეებში საქართველო მსოფლიოს ყურადღების ცენტრში მოექცევა!

    ნინო კვიტაშვილი


    ყოველკვირეული გაზეთი "ყველა სიახლე"

    2 496 ნახვა
    GOGATV

    abezara