ვინ შემოიხია ტრუსები "მისტერ ვალენტინზე"

13 თებერვალს "ქორთიარდ მარიოტში" დიდი აურზაური იყო. კონკურს "მისტერ ვალენტინის" ახალმა ორგანიზატორმა კახი ხაბეიშვილმა დამსწრე საზოგადოებასა და ჟიურის 13 კონკურსანტი წარუდგინა.

კახი ხაბეიშვილი:
- კონკურსის იდეა გია ჯაჯანიძეს ეკუთვნის. 2009 წლიდან ამ კონკურსს ქალბატონი ქეთი ნაჭყებია ატარებდა. სამწუხაროდ, ჯანმრთელობის პრობლემების გამო ქეთი გარდაიცვალა და 2012 წელს კონკურსი აღარ ჩატარებულა. შემდეგ დამიკავშირდა გია ჯაჯანიძე და კონკურსის ორგანიზების უფლება მომცა. გავაკეთე ლიცენზია და წელს პირველად ვატარებ "მისტერ ვალენტინს".

- როგორ შეარჩიეთ მონაწილეები?
- ყველა სამოდელო სააგენტოს გავუგზავნე მოწვევა და ბევრმა თავი შეიკავა. სამწუხაროდ, ბიჭი მოდელი საქართველოში კომპლექსებთან ასოცირდება, თუმცა რამდენიმე სააგენტოს წარმომადგენლებს დღეს პოდიუმზე მაინც ნახავთ. პირველ შესარჩევ ტურზე 70-მდე ბიჭი მოვიდა, აქედან ავარჩიეთ 30. მეორე ტურში შევარჩიეთ 13 კონკურსანტი. ასე რომ, გვყავს 13 კონკურსანტი, ჟიურის 13 წევრი, 13 სპონსორი და 13-ში ვმართავთ კონკურსს.
ჟიურის წევრებს შორის იყვნენ გია ჯაჯანიძე, კრისტი ყიფშიძე, ეკა მგალობლიშვილი, ნანა მელქაძე, დალი ჩიტალაძე, შოთიკო ბოჭორიშვილი, დათუნა სულიკაშვილი.

საღამოს წამყვანმა თამუნა მუსერიძემ თავიდანვე ხაზგასმით აღნიშნა, ეს არ არის მოდელების კონკურსი, ეს კაი ტიპების კონკურსიაო და ბიჭებიც თავაწეულნი ამაყად გამოვიდნენ პოდიუმზე. ფავორიტები პირველივე გამოსვლაზე გამოიკვეთნენ. მახო მაჭარაშვილისა და ბერდია თოფურიას გამოსვლას ისეთი სტვენა-კივილი ახლდა თან, ასე მეგონა, მთელი დარბაზი მათი მეგობრებით იყო სავსე.

გენადი ჟორჟოლიანის გამოსვლამ ფილმი "სიყვარული ყველას უნდა" და მისი გმირი ბურნუთა გამახსენა, სწორედ რომ "რადიოზე ჰქონდა დაყენებული" თმა. ბურნუთა უძახე და, ისეთი ჩაატარა ჟიურის წინ, ყველა პირდაღებული დარჩა, საცურაო კოსტიუმს ხელი მოჰკიდა და ტანზე შემოიხია. გადავრჩით, შიგნით წითელი გულებიანი თეთრი ტრუსები სცმია. კონკურსს შავკანიანი მონაწილეც ჰყავდა, ჟან კლოდი, ოღონდ ვან დამი არა - აბო.

საპატიო სტუმრებს შორის ლელა წურწუმიას დედა, ქეთი ორჯონიკიძე, მარკუს მეტრეველი და ეკა კვალიაშვილიც იყვნენ. მუსიკალურ პაუზას ყოფილი "ჯეოსტარელები" ავსებდნენ. სანამ ჟიური "განაჩენის" გამოსატანად იყო გასული, დარბაზში ხალხი ჩურჩულებდა, ჩაწყობილია ეს კონკურსი, მაჭარაშვილი გაიმარჯვებსო.

არ გამართლდა ვარაუდები, "მისტერ ვალენტინის" ტიტული ბერდია თოფურიას ხვდა წილად.
მოკლედ, ამ ჯერზეც გულდაწყვეტილი დამტოვეს. ჯერ კიდევ "ელიტ მოდელ ლუქ"-ზე ვგულშემატკივრობდი მახო მაჭარაშვილს და იქაც მეორე ადგილზე გავიდა. არადა, რა ბიჭია! არ ვიცი, არ ვიცი, უკვე მეორედ მაწყენინა ჟიურიმ.



ჟურნალი "რეიტინგი"