მამამთილმა დაბადების დღეზე გასაბერი კაცი მაჩუქა

დედამთილ-მამამთილმა მე და ჩემი მეუღლე ქორწილის პირველივე დღიდან საცხოვრებლად ცალკე გაგვიშვეს. რვა თვეა, რაც მე და გელა ერთად ვართ და მალე პატარასაც ველოდებით.
დიდი სახლი არ გვაქვს და სტუმრების მიღება გვიჭირს. ამიტომ მეუღლის მშობლებთან ხშირად მივდივართ, ისინი - ნაკლებად. ორი კვირის წინ დაბადების დღე მქონდა. ჩემს მდგომარეობაში ორი კაცის გამასპინძლებაც მეზარება, მაგრამ მამამთილმა თავი მოიკლა, რაც ჩემი რძალი ხარ, პირველად გაქვს დაბადების დღე და რესტორანი უნდა დავკეტოო.

სამოცდაათ კაცამდე დავპატიჟეთ. რესტორანში მამამთილის მანქანით მივედით. მანამდე ჩვენთან ამოვიდა, ყუთით საჩუქარი გადმომცა და წავედით. დაბადების დღეზე უამრავი საჩუქარი მივიღე. სამი გზა გააკეთა მეუღლემ, რომ ყველა პარკი და ყუთი სახლში ამოეტანა.

მეორე დღეს მეუღლე სამსახურში გავუშვი და ჩემს საჩუქრებს ჩავუჯექი. ორი საათი მაინც მოვუნდი ყველას ნახვას და უცებ მამამთილის მოტანილი ყუთი გამახსენდა. სასწრაფოდ გავხსენი და კარგა ხანს გონზე ვერ მოვედი.

შიგნით გასაბერი კაცი იდო. კინაღამ გავგიჟდი, ვისთვის დამერეკა, არ ვიცოდი. ბოლოს ყუთი საგულდაგულოდ გადავმალე და მოვლენების განვითარებას დაველოდე. მამამთილმა დაახლოებით ორ საათში დამირეკა, გამომიტყდა, რომ ექვსი წელია, რაც საიდუმლოდ საყვარელი ჰყავს და ჩემთვის კაბის შერჩევა სწორედ იმ ქალბატონს სთხოვა, აინტერესებდა, მომეწონა თუ არა.

ამაზე სულ დავიბენი. ვერ გავიგე, მამამთილის საყვარელმა გამიჩალიჩა, თუ რაღაც გაუგებრობა მოხდა. ფაქტია, რომ კაცი მადლობებით ავავსე და სასწრაფოდ ტელეფონი გავუთიშე. გასაბერი კაცი ჯერჯერობით ისევ დამალული მაქვს. არ ვიცი, როგორ გავუმხილო მეუღლეს, რა გადამხდა.

ჟურნალი "რეიტინგი"