ნინა წკრიალაშვილი: "ნუკი კოშკელიშვილი შეყვარებულთან მე არ დამიშორებია და არც ორსულად ვარ!"

მომღერალ ნინა წკრიალაშვილის ცხოვრებაში ახლა სრული თავისუფლებაა, ის სასიყვარულო ურთიერთობებისგანაც ისვენებს და არც სამსახურის დაწყებას ჩქარობს. რამდენიმე თვის წინ მეორე ქმარს დაშორდა, მას შემდეგ საკუთარ თავს მეტ დროს უთმობს. ბოტოქსი, სხეულის მოვლის პროცედურები და ვარჯიში – ნინას თავის მოვლის პროგრამა მინიმუმია. გარეგნობაში ჩატარებული ექსპერიმენტების შესახებ გულახდილად გვესაუბრა და, სხვათა შორის, ბოლო დროს თბილისში მოარულ ჭორებზეც გააკეთა კომენტარი, რომ თითქოს ნუკი კოშკელიშვილი შეყვარებულს, ოთო მარგოშვილს მის გამო დაშორდა და ნინა ოთოსგან შვილს ელოდება. მომღერალთან საუბარი სწორედ ამ თემით დავიწყეთ.
ნინა წკრიალაშვილი:
– ნუკიმ დამირეკა და მითხრა, რომ შეყვარებულს დაშორდა, ამ ჭორზეც მიამბო, თითქოს მე და ოთო ერთად ვიყავით და მისგან შვილს ვაჩენდი. ამაზე ორივემ ვიცინეთ. ნუკის შეყვარებულს არ ვიცნობ და არც ორსულად ვარ. ეს ჭორი "ფეისბუქიდან" გავრცელდა.
– ამჟამად როგორია თქვენი ცხოვრების რეჟიმი?
– ბოლო ათი წელია სულ ვმუშაობ და ახლა პირველად ხდება, რომ საერთოდ არაფერს ვაკეთებ. ასე ცხოვრება მომწონს კიდეც, შვილთან მეტ დროს ვატარებ. მუშაობის დროს ისე ვიღლებოდი, იყო შემთხვევა, როცა ჩაცმულს მეძინა. პერიოდულად ნევროპათოლოგთან სიარულიც კი მჭირდებოდა, იმდენად სტრესულ გარემოში მიწევდა ყოფნა.
– ამდენი თავისუფალი დრო რითი შეავსეთ?
– ვერ ვიტყვი, რომ საერთოდ არაფერს ვაკეთებ. ყოველთვის მინდოდა, ვარჯიში დამეწყო, მაგრამ ვერ ვახერხებდი, ახლა კი ამისთვისაც მოვიცალე. სამედიცინო გამოკვლევები ჩავიტარე და სრულიად ჯანმრთელი ვარ. ფრანგულ ენაში ვმეცადინეობ, რომ არ დამავიწყდეს, ინგლისური ენის შესასწავლადაც დავდივარ. მოკლედ, საკუთარ თავზე ვმუშაობ. რაც ყველაზე მთავარია, ფიქრი დავიწყე, ბენდთან ერთად ახალი პროგრამა ჩავწერო. მინდა, საკუთარი ძალები მუსიკის სხვა ჟანრში მოვსინჯო, რომელიც კომერციული არა, მაგრამ გემოვნებიანი იქნება.
– მას შემდეგ, რაც ვარჯიში დაიწყეთ, რა სასიკეთო ცვლილებები შეამჩნიეთ გარეგნობაში?
– უძილობა აღარ მჭირს, უფრო ენერგიული გავხდი. როცა ხედავ, რომ შენი სხეულის ფორმები იხვეწება და ლამაზდება, გაცილებით თავდაჯერებული ხდები. 35 წლის ვარ და როგორც ყველა ქალს, არც მე მინდა, მალე დავბერდე. ვარჯიში ჩემი ცხოვრების წესი გახდა. წელიწადში ორჯერ სურნელოვანი ზეთებით გამაჯანსაღებელ მასაჟებს ვიტარებ.
– სწორად კვებას რამდენად აქცევთ ყურადღებას?
– ეს ძალიან მნიშვნელოვანია, მაგრამ ვერ ვიტყვი, რომ ასი პროცენტით სწორად ვიკვებები. მთელი ცხოვრება გემრიელ და არადიეტურ საკვებზე უარის თქმა ძალიან რთულია. ამიტომ მე ასე ვიქცევი: თუ წვეულებაზე ან დაბადების დღეზე ვარ, ყველაფერს მივირთმევ, მაგრამ მერე რამდენიმე ხნის განმავლობაში კვების სწორ რეჟიმს ვიცავ. ყოველდღიურ რაციონში მაქვს – დილით ყავა, ორი საათის შემდეგ სალათა ან რძის ნაწარმი, საღამოს მოხარშულ თევზს ან ხორცს გეახლებით. არ ვშიმშილობ, რადგან ამის ნერვები აღარ მაქვს. ვცდილობ, ღამის ორ საათზე არ ვჭამო. ასეთ დროს თუ ძალიან მომშივდა, ხილს მივირთმევ.
– თქვენთვის სასურველი წონა რამდენია, როცა თავს კარგად გრძნობთ?
– 53 კილო, ახლა კი ერთი კილოგრამით მეტი ვარ. ჩემი სიმაღლე 168 სანტიმეტრია.
– რა ასაკიდან დაიწყეთ სახის კანზე ზრუნვა?
– დედამ მცირე ასაკიდან მიმაჩვია რუსული საბავშვო კრემების გამოყენებას. სახლიდან გასვლის წინ მკვებავს აუცილებლად ვისვამ. ახლა უკვე თვალის გარშემო წასასმელ საცხსაც ვხმარობ. წელიწადში ერთხელ სახის მასაჟს ვიკეთებ, კოსმეტოლოგთანაც დავდივარ.
– მისგან რა რჩევებს იღებთ?
– კოსმეტოლოგმა მირჩია, რომ ჩემს კანს უკვე სჭირდება პილინგი. ეს კანს ასუფთავებს. კვირაში ერთხელ ვიდებ ნიღაბს, რომელიც სახის კანს ჭიმავს და კუნთების მოდუნებას ხელს უშლის.
– როგორც ვიცი, ბოტოქსსაც იყენებთ.

– კი, მინიმალური დოზით – წარბებს შუა და თვალების გარშემო. არ მომწონს, როცა სახე გაშეშებულია და მიმიკა არ აქვთ. ვთვლი, რომ ასაკის მატებასთან ერთად ოდნავ შესამჩნევი ნაოჭები უნდა გქონდეს.
– დიდი ხანია, რაც ბოტოქსის გამოყენება დაიწყეთ?
– წელიწადნახევარია, მეზოთერაპიაც მიცდია, მაგრამ საკმაოდ მტკინვეული პროცესია, ამიტომ მისი გაკეთება მეზარება.
– ხშირად უსვამენ ხაზს, რომ ბევრი პლასტიკური ოპერაცია გაქვთ გაკეთებული...
– კი, ამოიჩემეს, ნინა აწყობილიაო. სინამდვილეში კი ცხვირის ოპერაცია მაქვს გაკეთებული და ზედა ტუჩი ოდნავ გადიდებული.
– ამბობენ, რომ თვალების გარშემო კანი გადაიჭიმეთ.
– არა, ასე რომ იყოს, არ დავმალავდი. თვალებზე ფანქარი თუ არ წავისვი, ჩამოწეული, მოწყენილი მიჩანს. გადაჭიმული რომ მქონდეს, ფანქარი აღარ დამჭირდებოდა. ასაკი რომ მომემატება და მივხვდები, კანი მომიდუნდა, ამ ოპერაციას აუცილებლად გავიკეთებ. იმაზეც ლაპარაკობენ, რომ სხეულზე პლასტიკური ოპერაცია მაქვს გაკეთებული, რაც სიმართლე არ არის. უბრალოდ, ორსულად რომ ვიყავი, ძალიან მოვიმატე, მშობიარობის შემდეგ კი 30 კილო დავიკელი.
– ბოტოქსი, მასაჟები, ძვირადღირებული კრემები – ეს ყველაფერი ფინანსებს მოითხოვს. ვისაც ამის საშუალება არ აქვს, რას ურჩევთ, თავს როგორ მოუარონ?
– ვიცი, რომ თმისთვის კარგია მაიონეზი და მეც გამომიყენებია. ვისაც საშუალება არ აქვს, ძვირადღირებული პროცედურები ჩაიტაროს, ვურჩევ კანის ნიღაბს, რომელსაც ფანტასტიკური ეფექტი აქვს: კვერცხის ნაჭუჭი კარგად უნდა დავფქვათ, შევურიოთ კვერცხის ცილაში, სახეზე წავისვათ და მანამდე გავიჩეროთ, სანამ არ გახმება. შემდეგ თბილი წყლით ჩამოვიბანოთ. ეს კანს ჭიმავს და ნაოჭების პროფილაქტიკისთვის კარგი საშუალებაა. ეს ნიღაბი თვეში მხოლოდ ათჯერ შეიძლება გამოვიყენოთ, მეტჯერ რეკომენდებული არ არის. მჭადის ფქვილი გამოიყენება სახის კანის გასაწმენდად, ზეითუნის ზეთიც ძალიან კარგია. ერთი სიტყვით, მთავარია მონდომება და ქალი ფინანსების გარეშეც მიხედავს თავს. ვინც ამბობს, რომ ფული არ აქვს და იმიტომ გამოიყურება ცუდად, უბრალოდ თავს იმართლებს. სამი ლარი ღირს თმის საღებავი და მისი ყიდვა, მგონი, ყველას შეუძლია. არ არის საჭირო, აუცილებლად ძვირადღირებული საღებავი გამოიყენო, მით უმეტეს, თუ ამის საშუალება არ გაქვს.
– ყველა ექსპერიმენტი მოგწონთ, რაც გარეგნობის შესაცვლელად გიცდიათ?
– არ მომეწონა, ზედა ტუჩი რომ გავიდიდე, თან ძველ ფორმაშიც არ დგება, მიუხედავად იმისა, რომ უკვე 13 წელია გასული. თუმცა არასდროს არაფერს ვნანობ. როცა გადაწყვეტილებას ვიღებ, რომ ყველაფერი თავიდან უნდა დავიწყო, გარეგნობას ვიცვლი. ახლა ხვდებით, რამდენჯერ მაქვს ყველაფერი თავიდან დაწყებული? აქ მარტო პირად ცხოვრებას არ ვგულისხმობ. საერთოდ, საკუთარი შეცდომების დანახვა და მისი აღიარება შემიძლია. ჩემი ეს თვისება ძალიან მომწონს.
– ისევ ხომ არ აპირებთ პირად ცხოვრებაში ახალი ნაბიჯების გადადგმას?
– ახლა სამსახურისგანაც ვისვენებ და პირადი ცხოვრებისგანაც, უნდა ვაღიარო, რომ ეს ძალიან კარგი ყოფილა. მართლა ბედნიერი ვარ. თავისუფლება შეუფასებელია!
– თქვენი შვილი, სანდრო დადიანი 15 წლისაა და ალბათ უკვე გაძლევთ რჩევებს, რა გიხდებათ და რა – არა.
– ჩვენ ვმეგობრობთ, ფაქტობრივად ერთად გავიზარდეთ. თუ ჩემს ჩაცმულობაში რამე არ მოეწონება, მეუბნება და მეც ვითვალისწინებ. ცოტა ხნის წინ წთელი ტუჩსაცხი წავისვი და მითხრა, არ გიხდებაო. მეც დავეთანხმე.
მანანა ნოდია