რას ულოცავდა ჭურჭლის რეცხვითა და იატაკის წმენდით გადაღლილი რატი წითელაძე ქალებს?

მიუხედავად აზრთა სხვადასხვაობისა და ბევრი სჯა-ბაასისა, ქალთა საერთაშორისო დღე 8 მარტი მაინც უწინდებურად აღინიშნება და თბილისი წელსაც ყვავილებით იყო სავსე; მამაკაცებსაც წლიდან წლამდე სულ უფრო თამამად უჭირავთ თაიგულები.
ჩემს საყვარელ "ფეისბუქზეც" მრავლად ვნახე საინტერესო მილოცვები. თქვენს მონა-მორჩილსაც მოულოცეს - მეგობრებმა, უბრალოდ ნაცნობებმა თუ გულშემატკივრებმა. თუმცა ყველაზე მეტად მაინც "ცეკვავენ ვარსკვლავების" ერთ-ერთმა "სელებრითმა", პოპულარულმა სპორტსმენმა რატი წითელაძემ გამაოცა.

მან თავის გვერდზე დადო ფოტო, რომელზეც ჭურჭლის რეცხვითა და იატაკის წმენდით გადაღლილ-გადაქანცული ულოცავდა ყველა ქალს 8 მარტს. ნამდვილად კრეატიული იყო და მომეწონა. მერე რატის გვერდზე შევიჭყიტე და მის სხვა, ახალ და საინტერესო ფოტოებთან ერთად, კიდევ ერთი ორიგინალური მილოცვაც ვნახე - ბარბარობას ულოცავდა საზოგადოებას გერგეტზე გადაღებული პიკანტური ფოტოებით. როგორც ჩანს, სკანდალურ პერსონად აღიარებულ რატის უყვარს ორიგინალობა და ამგვარი საინტერესო სიურპრიზებით ადამიანების მონუსხვა.

რასაკვირველია, ბუკლეს მადლობაც არ დაავიწყდება და სრულიად ქართველი ქალების სახელით, რატის დიდ მადლობას ვუძღვნი ამგვარი მოლოცვისთვის და იმისთვის, რომ ერთი დღით მაინც მოირგო "სუსტი სქესის" არც ისე სუსტი როლი. 

დიჯეი ბუკლე
ჟურნალი "რეიტინგი"