• თბილისში კოსტუმირებული ვენეციური კარნავალი გაიმართება

    თბილისში კოსტუმირებული ვენეციური კარნავალი გაიმართება. როგორც "ამბები.გე"-ს ვენეციური კარნავალის ორგანიზატორებმა აცნობეს, 24 აპრილს "თბილისის ივენთ ჰოლში" დაგეგმილი ვენეციური კარნავალი საქართველოში პირველად ტარდება და ის საქველმოქმედო იქნება.

    ვენეციური კარნავალი იტალიის საელჩოს, საქართველოს კულტურის სამინისტროსა და თბილისის მერიის მხარდაჭერით ხორციელდება.

    ღონისძიება ასოციაცია "საქართველო-იტალიას", ტრენინგისა და ღონისძიებათა მართვის საკონსულტაციო ცენტრ "VIPR"-ის, მოდის სახლის "თინათინ მაღალაშვილი" თანადგომითა და ორგანიზებით გაიმართება.

    "ამბები.გე"-სთან კარნავალის იდეის ავტორმა და ასოციაცია "საქართველო-იტალიას" წარმომადგენელმა, ნიკა ესაკიამ აღნიშნა, რომ ვენეციური კარნავალის მიზანია, საქართველოსა და იტალიას შორის კულტურული ურთიერთობების გაღრმავება, ინოვაციისა და სიახლის შეტანა ქართულ რეალობაში, პოზიტიური განწყობის შექმნა საზოგადოებისათვის, იტალიური კულტურისა და ხელოვნების გაცნობა.

    ღონისძიებაზე დაგეგმილია იტალიური ბრენდების პროდუქციის, ახალგაზრდა მხატვრების ნამუშევრების გამოფენა. მონაწილეობას მიიღებენ პანტომიმის თეატრის მსახიობები და ქართული ესტრადის მომღერლები.

    ღონისძიება ყოველწლიურად გაიმართება, ექნება საქველმოქმედო ხასიათი და შემოსული თანხა ონკოლოგიურად დაავადებულ ბავშვებს გადაერიცხებათ.

    გიორგი ბერიძე

     


    წყარო

    3 783 ნახვა
    16-04-2013, 08:40
    GOGATV

    abezara