• ცოცხალი თოჯინები არ იცინიან

    "ნამდვილი" ბარბი და კენი ერთმანეთს ვერ ეწყობიან?

    32 წლის ჯედლიკამ კენს რომ დამსგავსებოდა, ასზე მეტი პლასტიკური ოპერაცია გაიკეთა


    ალბათ ყველას გაუგონია თოჯინა ბარბის შესახებ, რომელიც უკვე ისტორიაში შევიდა, როგორც ყველა დროის უპოპულარულესი თოჯინა. თუმცა, როგორც ჩანს, ბარბისა და მის ბოიფრენდ კენს ისეთი თავგამოდებული ფანებიც ჰყავთ, რომელთაც არც ის აფერხებთ, რომ უკვე გაიზარდნენ და არც ის, რომ საზოგადოება მათ თოჯინებით გატაცებას უკვე, ასე ვთქვათ, ახირებულობად აღიქვამს. თუმცა ახირებაცაა და ახირებაც. სწორედ ასეთი ადამიანები არიან "ნამდვილი" კენი და ნამდვილი ბარბი - ჯასტინ ჯედლიკა და ვალერია ლუკიანოვა და ბარბის ერთ-ერთი ყველაზე დიდი კოლექციის მფლობელი მსოფლიოში - სტენლი კოლორიტი. ის, რაც 32 წლის ამერიკელმა ჯედლიკამ საკუთარ სხეულს დამართა, უბრალო ახირების საზღვრებს ცდება - ასზე მეტი პლასტიკური ოპერაცია გაიკეთა, რათა რაც შეიძლება მეტად დამსგავსებოდა ბარბის ბოიფრენდსა თუ მეუღლეს - კენს: გაიდიდა ტუჩები, შეიცვალა თვალების, ნიკაპის, ცხვირის, ლოყების მოხაზულობა, მკერდსა და ბიცეპსებშიც კი ჩაიდგა ტრანსპლანტატები - "ნავარჯიშები" რომ გამოჩენილიყო. ის, რომ მსგავსი შედეგის მიღწევა ვარჯიშითაც შეიძლებოდა, სილიკონისკუნთებიან კენს არ ანაღვლებს - როგორც თავად აცხადებს, ვარჯიში მოსაწყენი საქმიანობაა და საკუთარი სხეულის სრულქმნის პროცესში მხოლოდ შეაფერხებდა.

    მასთან შედარებით  იოლად "გამოძვრა" უკრაინელი ბარბი ვალერია ლუკიანოვა, რომელმაც ბუნების მიერ ბოძებულ სხეულს მხოლოდ მკერდის ზომა დაუწუნა, ბარბის ცნობილი ზღვისფერი თვალების მისაღებად კი კონტაქტური ლინზები არჩია. ამ ორი დეტალის გარდა, როგორც ვალერია აცხადებს, მას ყველაფერი ბუნებრივი აქვს და ბარბისთან გარეგნული მსგავსების ეფექტს მაკიაჟის გამოყენებით აღწევს. რამდენიმე ხნის წინ ბარბი და კენი ერთმანეთსაც შეხვდნენ, თუმცა, როგორც ჩანს, ერთმანეთი მაინცდამაინც თვალში არ მოუვიდათ. ლამაზი კია, მაგრამ მაკიაჟისა და კორსეტის ხარჯზეო, - განაცხადა ჯედლიკამ, ვალერიამ კი კენს არაბუნებრივად აბურცული ტუჩები დაუწუნა - ჯასტინი ფრანკენშტაინის მონსტრს მაგონებსო.

    ბარბის თოჯინებისადმი ფანატიკურ სიყვარულს სხვანაირად გამოხატავს კოლექციონერი სტენლი კოლორიტი, რომელსაც უკვე 2000-ზე მეტი ბარბის მოდელი აქვს, მათ შორის რამდენიმე  იშვიათი და უნიკალური გამოშვება. სტენლი, რომელიც საკუთარ თავს "ბარბიმენს" (ბარბის კაცი) უწოდებს, თოჯინებს 1997 წლიდან აგროვებს და წლიურად მათ შეძენა-შენახვაზე 30 000 დოლარზე მეტს ხარჯავს. სტენლიმ საკუთარი სახლიც კი ბარბის ერთგვარ მუზეუმად გადააკეთა, სადაც საკუთარ კოლექციას ინახავს...

    ვაჟა თავბერიძე
    4 387 ნახვა
    16-04-2013, 20:05
    GOGATV

    abezara