ნანკა კალატოზიშვილი და ირაკლი კეიდია ჩვილის მოვლას სწავლობენ

6 ივნისს მსახიობი ნანკა კალატოზიშვილი და კალათბურთელი ირაკლი კეიდია, იგივე კედო, ბიჭის, დანიელის მშობლები გახდნენ. ვიდრე ნანკას ცხოვრებაში ეს მნიშვნელოვანი ეტაპი დადგებოდა, რას აღარ ჭორაობდნენ, მისი ფეხმძიმობაც კი არ სჯეროდათ, ამბობდნენ, ბალიში უდევსო... ირაკლის ჩვილის არ "შეშინებია", თამამად აჰყავს ხელში, ნანკა კი პირველი რამდენიმე დღე ბავშვს ვერ ეკარებოდა. მსახიობი ჯერჯერობით ჟურნალისტებს არ ეკონტაქტება.
ოჯახურ სიხარულზე "სარკეს" ნანკას დედა, ქალბატონი თამარ გოჩიტაშვილი ესაუბრა:
– ნანკას ძალიან კარგი ფეხმძიმობა ჰქონდა, არც ტოქსიკოზი აწუხებდა. მეცხრე თვე ყველა ორსულისთვის დამღლელი და მძიმეა, ნანკაც არ იყო გამონაკლისი. სხვა არანაირი პრობლემა არ ჰქონია. დედობისთვის ძალიან ემზადებოდა, არ ღელავდა, ინტერნეტით ბავშვის მოვლასთან დაკავშირებულ ლიტერატურას კითხულობდა.
ბავშვი 6 ივნისს დაიბადა და 9–ში უკვე სახლში იყვნენ. ნანკამ ფიზიოლოგიურად იმშობიარა. საშინლად არ უნდოდა საკეისროს გაკეთება. დანიელი 4 კილო და 100 გრამი და 53 სანტიმეტრი დაიბადა.
– სახელი ვინ შეურჩია?
– დანიელის დარქმევა ირაკლის იდეა იყო და ნანკასაც ძალიან მოეწონა.
– მშობლებს გოგო უნდოდათ თუ ბიჭი?
– ბიჭი. მართალია, ქალებს გოგო უნდათ, მაგრამ ნანკას რატომღაც ვაჟი უფრო უნდოდა.
– ნანკა ახლა თქვენთანაა თუ მარტო უვლის ბავშვს?
– ჩემთან არიან, ასე უფრო კომფორტულად გრძნობენ თავს. თან ბავშვის მოვლაში დახმარება სჭირდება. ვერ ვიტყვი, რომ ღამე მაწუხებენ, მაღვიძებენ–მეთქი, მშობლები თავადაც მშვენივრად უვლიან. მეც წყნარად ვარ, ჩემთან რომ არიან. თუ საქმე მაქვს და გასავლელი ვარ, თამამად ვტოვებ ბავშვს მშობლებთან.
– ნანკა მშიშარა დედა ხომ არ გამოდგა?
– პირველი ორი დღე შიშები ჰქონდა. ნანკას პატარა ბავშვების ყოველთვის ეშინოდა. რბილია და ხელს ვერ ვკიდებო, ამბობდა. ბოლო დღეებში ეს შიში გადალახა და ახლა უკვე ყოჩაღადაა. რაოდენ გასაკვირიც უნდა იყოს, ირაკლისაც არაფრის ეშინია, დანიელი ხელში თამამად აჰყავს. ყურადღებიანი, უშიშარი მამაა.
– ნანკას ხასიათი შეცვალა შვილის დაბადებამ, რაიმე ცვლილებებს ატყობთ თქვენს ქალიშვილს?
– ყურადღებიანი ყოველთვის იყო და ბავშვის მიმართ ხომ გაასმაგებულად ყურადღებიანია. ნანკაც და ირაკლიც უზომოდ ბედნიერები არიან. შვილიშვილები მყავს, მაგრამ იმხელა ინტერვალი მქონდა, რომ ამ პატარამ ყველა დადებითად აგვაღელვა.
– კიდევ ერთხელ გილოცავთ და ნანკასაც მიულოცეთ "სარკის" სახელით.
– დიდი მადლობა! ნანკა არავის აძლევს ინტერვიუებს, არაფრის თავი აქვს.
ქეთი დინოშვილი