მარიამ კუკუნაშვილი: "ჰომოსექსუალ წყვილებს სიამოვნებით ვემსახურებით"

გამოაქვეყნა: admin
//
11 ივლისი 2013
//
//
//
ნახვები: 1949
მარიამ კუკუნაშვილი:

"საქართველოდან საზღვარგარეთ მცხოვრები ჰომოსექსუალი წყვილებისათვის თოთო ბავშვები გაჰყავთ" – ამ განცხადებას სუროგატული დედობისა და დონაციის ცენტრის ხელმძღვანელი, თამარ ხაჭაპურიძე აკეთებს. ის განმარტავს, რომ ეს ბავშვები სუროგაციის მეთოდით იბადებიან. შემდეგ ყალბი დოკუმენტები დგება და ბავშვი საზღვარგარეთ გაჰყავთ.
თამარ ხაჭაპურიძე ასახელებს იმ ორგანიზაციასაც, რომელიც ამ სქემით მუშაობს – ჯანდაცვის საერთაშორისო სააგენტო "ნიუ ლაიფ ჯორჯიას". მისი ხელმძღვანელი, მარიამ კუკუნაშვილი, "სარკესთან" ინტერვიუში არ მალავს, რომ 4 წლიანი მუშაობის შემდეგ მილიონერი გახდა. ქალბატონი მარიამი ღიად აცხადებს, რომ ჰომოსექსუალებს სიამოვნებით ემსახურება, მაგრამ ამას საქართველოში კი არა, სხვა ქვეყნებში აკეთებს.
შეგახსენებთ, რომ სუროგატი დედა ბავშვის ბიოლოგიური დედა არ არის. სუროგატი ქალის საშვილოსნოში გადააქვთ სხვა ქალის, ბიოლოგიური დედის კვერცხუჯრედიდან მიღებული ემბრიონი, რომელიც უნდა გამოზარდოს თავის საშვილოსნოში.
საქართველოს პროკურატურამ თამარ ხაჭაპურიძის საჩივარი შეისწავლა და "ნიუ ლაიფ ჯორჯიას" თანამშრომლები პასუხისგებაში მისცა დოკუმენტების გაყალბების ბრალდებით, თუმცა მათ ამნისტიამ მოუსწრო. სუროგატი დედების მიერ გაჩენილი ბავშვების "ექსპორტი" კი გრძელდება. ამ დაუსრულებელი ისტორიის შესახებ ქვემოთ მოგითხრობთ.
თამარ ხაჭაპურიძე: სუროგატ დედებს ბავშვებს აჩენინებდნენ და შემდეგ ამ ქალებს დედებად აფორმებდნენ. საქართველოს კანონით, სუროგატი ქალის დედად დარეგისტრირება აკრძალულია. თუ სუროგატს დედად დაარეგისტრირებ, იქმნება საშიშროება, ბავშვი გააშვილოს. პროკურატურას მივმართე, რომელმაც დაადგინა, რომ რეალურად ყალბდებოდა დაბადების მოწმობები და ამ გზით ბავშვები საზღვარგარეთ გაჰყავდათ. შემდეგ კი, სავარაუდოდ, ჰომოსექსუალ წყვილებზე აფორმებდნენ. სუროგატ დედას აორსულებდნენ დონორული ემბრიონით. დასადგენია, სპერმა ერთ–ერთი ჰომოსექსუალის იყო და კვერცხუჯრედი – დონორის თუ ორივე გამეტას დონორისას იყენებდნენ. ვიცი შემთხვევები, როცა სუროგატ დედას ფულს სთავაზობდნენ, რომ სამშობიაროში შესვლისას მას არ გაემხილა, რომ ის თავის შვილს არ აჩენდა. სამშობიაროში ისე შედიოდნენ, როგოროც ჩვეულებრივი მშობიარეები. შემდეგ ამ სუროგატს ეუბნებოდნენ, რომ ეთქვა, თუ ვინ იყო ბავშვის ბიოლოგიური მამა, მაგალითად, ბრიტანეთის მოქალაქე ვინმე დავითი. იქმნებოდა დაბადების მოწმობა, რომელშიც დედად ეწერა ქალი, რომელსაც დედობის უფლება არ ჰქონდა და არც იყო. მამებად ჰომოსექსუალები ეწერებოდნენ. უცხოეთიდან ჩამოდიოდა ვიღაც მამაკაცი და ამბობდა, მე ვარ მამაო. შემდეგ ეს ქალები მიჰყავდათ ნოტარიუსთან და დედობაზე უარს აწერინებდნენ. ვინმე დაინტერესდეს, ბოლო წლებში რამდენ ქართველ ქალს აქვს ნათქვამი უარი დედობაზე და ეს ბავშვები გაყვანილები არიან თუ არა საზღვარგარეთ!
სამწუხაროდ, ჩემი მრავალგზის მცდელობის მიუხედავად, პროკურატურაში არავინ დაინტერესებულა, ვინ იყვნენ ის კაცები – ჰომოსექსუალები, ბავშვებით მოვაჭრეები თუ ნამდვილი მამები, რომლებმაც ქართველ ქალებს შვილზე უარი ათქმევინეს. ბავშვები სხვადასხვა ქვეყნებში არიან გაყვანილი, მათ შორის – გერმანიაში, ბრიტანეთში, საფრანგეთში...

– დაახლოებით რამდენ ბავშვზეა ლაპარაკი?

– ზუსტი რაოდენობა ჯერ არ დამიდგენია, მალე გავიგებ, მაგრამ მარტო ბრიტანეთში რომ 8 ბავშვია გაყვანილი, ზუსტად ვიცი. 8 ქალმა რომ უარი თქვა დედობაზე, ეს საბუთები დევს ბრიტანეთის საკონსულოში, მაგრამ პროკურატურამ მათ ამ საბუთების წარმოდგენა არ მოსთხოვა.

– "ნიუ ლაიფ ჯორჯიას" ხელმძღვანელი ამბობს, რომ თქვენ მას, როგორც კონკურენტს, შავ პიარს უგორებთ და ამ გზით ებრძვით.

– საქართველოში სუროგაციული დედობის პირველი ცენტრი მე დავაფუძნე. ახლა, კუკუნაშვილის ცენტრის გარდა, კიდევ 3 ასეთი ორგანიზაცია ფუნქციონირებს. მათ რატომ არ ვებრძვი?! ვინც აშავებს, იმას ვებრძვი და ამაზე თვალებს ვერასოდეს დავხუჭავ.
ბრიტანელებზე, იცით, როგორ გავიგე? ჩემს ცენტრში ბრიტანელ წყვილს შეეძინა ბავშვი. როცა ისინი მივიდნენ ბრიტანეთის საკონსულოში, რომ ოფიციალურად გაეკეთებინათ ბავშვის საბუთები, იქ შეიტყვეს საკონსულოს თანამშრომლის, ლიკა კალანდარიშვილისგან, რომ 8 ბავშვი იყო გაყვანილი საქართველოდან ისე, რომ მათმა დედებმა საკონსულოში დედობაზე უარის თქმის საბუთი წარადგინეს. ეს რომ გავიგე, დავუკავშირდი ლიკა კალანდარიშვილს, რომელმაც ეს ინფორმაცია დამიდასტურა. მას ვუთხარი, იცით თუ არა, ჯერ სუროგატი რომ რეგისტრირდება და მერე დედობაზე უარს აწერინებთ, ეს უკანონობაა–მეთქი. ვერ ხვდებოდა, რას ამბობდა, მიამიტურად მითხრა. ეს უკანონო გაშვილებაა, რადგან, როგორც კი ამაზე ყვირილი ავტეხე, ვეღარც ჟურნალისტები და ვეღარც მე ამ ადამიანს ვეღარ დავუკავშირდით. ყველას ეუბნებოდნენ, ასეთი ვინმე აქ არ მუშაობსო. ბრიტანეთის საკონსულომ კი გაავრცელა ზოგადი წერილი, ჩვენ არაფერ შუაში ვართო. 2009–10 წლებში არც ერთი ბავშვი არ არის ბრიტანეთში გაყვანილი. 2011 წელს კი უცბათ 5 თოთო ბავშვია გაყვანილი. 2012 წელს კიდევ 3 გაიყვანეს. ივლისში უკვე საქმე აღიძრა და მერე ალბათ ვეღარ გაბედეს.
– პროკურატურამ ბრიტანელების ამბავი გამოიძია?
– არა, გერმანელის. კონკრეტულ პიროვნებაზე მივაწოდე პროკურატურას ინფორმაცია, რომ ამა და ამ სუროგატმა იმშობიარა აქა და აქ, ამა და ამ რიცხვში და შემდეგ დაწერა დედობაზე უარი ამ ნოტარიუსთან, მისი ბავშვი გაიყვანეს გერმანიაში–მეთქი. ამ ინფორმაციას ვეღარსად წაუვიდნენ და ამაზე აწარმოეს გამოძიება. რა იყო გამოსაძიებელი, ყველაფერი გამოძიებული დავუდე. ახალი ხელისუფლება რომ მოვიდა, საქართველოს პარლამენტში ყველა დეპუტატის სახელზე შევიტანე ეს ინფორმაცია, რომ ვიღაც მაინც დაინტერესებულიყო. უამრავი პასუხი დამიბრუნდა, მაგრამ არც ერთი ნაციონალი დეპუტატი არ გამომხმაურებია. პროკურატურა კი იძულებული გახდა, ეს საქმე დაესრულებინა. ოღონდ მხოლოდ ეს ერთი შემთხვევა გამოიძია და ამის მიხედვით ბრალი წაუყენა "ნიუ ლაიფ ჯორჯიას" 5 თანამშრომელს დაბადების მოწმობის გაყალბებაზე სისხლის სამართლის 362–ე მუხლით, მაგრამ აღმოჩნდა, რომ ეს მუხლი ამნისტირებულია, ანუ ვინც ეს დანაშაული 2012 წლის ოქტობრამდე ჩაიდინა, თავისუფალია პასუხისმგებლობისგან.
პროკურორს და გამომძიებელს დავუსვი კითხვა, თუ რატომ გამოიძიეს მხოლოდ ერთი ფაქტი და არა ის მრავალი შემთხვევა, რომელთა შესახებაც მე ვაცნობე. თან მხოლოდ დოკუმენტის გაყალბებაზე აღძრეს საქმე და არ დაინტერესდნენ, რისთვის შეიქმნა ეს გაყალბებული დოკუმენტი, ვინ წაიყვანა და ახლა რა დღეშია ის ბავშვი. მხოლოდ დოკუმენტის გაყალბებით მთავრდება დანაშაული?! ეს არის არასრულწლოვანთან დადებული უკანონო გარიგება და ეს არის ტრეფიკინგი! იმ სუროგატმა, ვინც მე ამ გერმანელის ამბავი მომიყვა, მითხრა და დაასახელა სხვა სუროგატები, რომლებსაც ანალოგიური რამ გააკეთებინეს და ფული გადაუხადეს. პროკურორთანაც ხომ იტყოდა ამ ამბავს?! პროკურატურამ კი ეს ჩვენებები ალბათ გააქრო. სამჯერ შეიცვალა ამ საქმეზე პროკურორი და გამომძიებელი. ის სუროგატი, ვინც მე ეს ამბები მითხრა, უკვე თვეებია თურქეთში გადახვეწეს. ამ ამბების მერე ერთხელ მიპასუხა ტელეფონზე და მითხრა, შენთან დალაპარაკება პროკურატურამ ამიკრძალაო. ამის მერე კი საერთოდ გაქრა. ადვოკატებიც ჩავრთე ამ საქმეში.
მოკალი თუ გინდა, არ ინტერესდებიან ამ პრობლემით. ყველა ქალს აქვს უფლება, უარი თქვას შვილზე, მაგრამ როცა მასობრივად დედობაზე უარს წერენ ის ქალები, რომელთა "მამებსაც" ბავშვი საზღვარგარეთ გაჰყავთ, რა, საბავშვო ბაღია?! რატომ არ აინტერესებს სახელმწიფოს თავისი ქვეყნიდან ყალბი დაბადების მოწმობით გაყვანილი ჩვილი ბავშვების ბედი?!
– კლინიკებში, სადაც სუროგატ დედებს აფეხმძიმებენ, ხომ არსებობს აღრიცხვა?
– რა თქმა უნდა, აღრიცხვა არსებობს, მაგრამ ამის გაყალბებაც ძალიან ადვილია. კანონის თანახმად, ხელოვნური განაყოფიერების ტექნოლოგიები შეიძლება გამოყენებულ იქნეს მხოლოდ უშვილო ცოლ–ქმრის შემთხვევაში უნაყოფობის მკურნალობის მიზნით და არა – მარტოხელა მამაკაცის თუ ჰომოსექსუალისთვის შვილი ყოლის მიზნით. კლინიკას არ აქვს უფლება, მოახდინოს ხელოვნური განაყოფიერება ან ემბრიონის გადანერგვა სუროგატი დედის საშვილოსნოში, თუ ეს ემბრიონი არ არის წყვილის კუთვნილება იურიდიულად მაინც. ვფიქრობ, ბევრ კლინიკაში გამოიყენება ეს უკანონო ტექნოლოგიები. ბრიტანეთში გასაყვანი ბავშვი, რომელზეც მითხრეს, ნამდვილად ჰომოსექსუალმა წაიყვანა.
იცით, მეც ხშირად მიკავშირდებიან უცხოელი ჰომოსექსუალები და მთავაზობენ, რომ სუროგაციის მეთოდით ბავშვი გავუჩინოთ, რაზეც სასტიკ უარს ვეუბნები. როგორც ჩანს, სხვები ამას კადრულობენ. ახლა კი უამრავი ხელოვნური განაყოფიერების კლინიკაა საქართველოში და ვინ რას აკეთებს, რას გაიგებ. კლინიკა არ აღიარებს, რას აკეთებს. პაციენტს, რომელსაც უკანონოდ ემსახურება, საერთოდ არ დაარეგისტრირებს და ისე მოემსახურება. დაინტერესდეს პროკურატურა და ყველაფერს ჩავაბარებ, რაც მე გამოვიძიე.
– უცხოელი ცოლ–ქმარი, რომლებიც თქვენ მოგმართავენ, ქართველი დონორების კვერცხუჯრედსა და სპერმას იყენებენ?
– საქართველოს კანონმდებლობა იძლევა საშუალებას, რომ თუ არც ქალს უვარგა გამეტები და არც – კაცს, დონორის იქნეს გამოყენებული, მაგრამ როცა უცხოელებთან მაქვს საქმე, არ ვიღებ მათ წყვილს, თუ რომელიმე, ცოლი ან ქმარი, თავის გამეტას არ იყენებს. მე უნდა ვიცოდე, რომ ბავშვი წაიყვანა გენეტიკურმა მშობელმა და არა – ვინმე უცხომ. იმ ბრიტანელ ჰომოსექსუალს თავისი სპერმაც რომ გამოეყენებინა, საქართველოს კანონის თანახმად, უფლება არ ჰქონდა, ხელოვნური განაყოფიერების და სუროგაციის მეთოდით ესარგებლა.
– თქვენი აზრით, ვინ დგას ამ ყველაფრის უკან? ამბობენ, რომ მარიამ კუკუნაშვილს სანდრა რულოვსი მფარველობს.
– ამ სფეროში მომუშავე ყველა ადამიანმა იცის, ვინ დგას ამ ყველაფრის უკან, მაგრამ მე თუ დოკუმენტი არ მიჭირავს ხელში, არ ვლაპარაკობ. კუკუნაშვილს და სანდრა რულოვსს რომ ახლო ურთიერთობა ჰქონდათ ერთმანეთთან, ეს ყოველთვის ვიცოდი კუკუნაშვილის ჩემდამი მოწერილი წერილებიდან და ჩვენი საერთო ნაცნობი ექიმებისგანაც. იმასაც მწერდა კუკუნაშვილი, დიახაც, არ მიჭერენ და რატომაც არ დამიჭერენ, მეც კარგად ვიცი და შენცო. სხვებიც მეუბნებოდნენ, შეეშვი, მაგას მაინც არ დაიჭერენო. ერთხელ ჩემმა ქმარმა მითხრა, ეგ ალბათ სანდრა რულოვსის ფონდს აფინანსებსო და ცოტა ხანში ტელევიზიით პირველი ლედის ერთ–ერთ საქველმოქმედო აქციაზე სანდრას გვერდით ვიხილე.
კუკუნაშვილს აქვს ფილიალები სხვადასხვა ქვეყნებში და დიდი მასშტაბით ეწევა ამ საქმიანობას. თვითონ გამოდიოდა გადაცემა "ბიზნესკურიერში" და ღიად აცხადებდა, ჰომოსექსუალ წყვილებს ვემსახურებიო. სუროგატიც კი გამოიყვანა გადაცემაში, რომელმაც ინტერვიუ მისცა – მე ამერიკელი ჰომოსექსუალის სუროგატი ვარ და მერე რა, მასაც ხომ უნდა შვილიო. მერე პრესკონფერენციაზე თქვა, მე ვარ ადამიანი, რომელმაც საქართველოში პირველმა უნდა დაიწყოს ჰომოსექსუალების მომსახურებაო. ამაზე ერთი ამბავი ავტეხე. წარმოვადგინე დოკუმენტები, რომ საქართველოს კანონით, ჰომოსექსუალების მომსახურება ნებადართული არ არის. ამის შემდეგ ამ საქმის გახმაურებას თავი დაანება. ამბობდა, რომ ამას მხოლოდ სხვა ქვეყნებში, ინდოეთსა და ტაილანდში აკეთებდა. სხვათა შორის, ინდოეთში, მას მერე, რაც ეს პიროვნება ჩავიდა და იქ გახსნა სააგენტო და კლინიკა, აკრძალეს ჰომოსექსუალების მომსახურება. მანამდე დაშვებული იყო და კანონი შეცვალეს.
ქართველი სუროგატები კვიპროსზე მიჰყავს. ერთ–ერთმა მოყვა, მე და ერთი გოგო ორჯერ წაგვიყვანა, მაგრამ ვერ დავორსულდითო. კვიპროსზე საერთოდ აკრძალულია სუროგაცია, მაგრამ, როგორც ჩანს, იქაც ამ სქემით მუშაობს. კლინიკებს ატყუებს, ეს სუროგატი კი არ არის, უშვილოა და დაორსულება უნდაო. დედებად აფორმებს და დედობაზე უარს აწერინებს. ამ ქალს ისეთი სქემა აქვს, სულ არ აინტერესებს, რომელიმე ქვეყანაში სუროგაცია ნებადართულია თუ აკრძალული. გამოსავალს მუდმივად პოულობს. მაგალითად, ტაილანდში სააგენტო აქვს. ტაილანდიდან დონორის საზღვარგარეთ გაყვანა აკრძალულია. ტაილანდიდან დონორები გაჰყავს ინდოეთში და აფორმებს, როგორც ტურისტებს. აკრძალე, რამდენიც გინდა!
ამ ადამიანს სააკაშვილის დროში რომ მფარველი ჰყავდა, ფაქტია, სხვანაირად ვერ გამოძვრებოდა. ახლა რაშია საქმე, ყურს რომ არავინ იბერტყავს? ეჭვია ბავშვებით ვაჭრობაზე. ხომ შეიძლება ბავშვის გაყიდვა უნდათ და იმიტომ გაყალბდა საბუთები?!
– სუროგაციაში ჰომოსექსუალები უფრო მეტ თანხას იხდიან?
– ვერ გეტყვით. ერთადერთი, რაც შემიძლია გითხრათ, ის არის, რომ კუკუნაშვილი ამბობს, 4 წელიწადში მილიონერი გავხდიო. მე შედარებით ადრე დავიწყე სეროგატული მეთოდით ადამიანების მომსახურება და ერთ ჩვეულებრივ, კორპუსის ბინაში ვცხოვრობ. ეს ადამიანი კი ერთ–ერთ ინტერვიუში ამბობს, ერთ ღამეში ვიხდი 1.200 ევროსო. თუ კანონიერად მუშაობ ხელოვნური განაყოფიერების სფეროში, თავიც რომ მოიკლა მუშაობით, მილიონერი ვერ გახდები. ამ საქმეში თუ გვერდზე გაუხვევ, ნამდვილად იშოვი მილიონებს.
მე თვითონ ორი შვილის დედა ვარ და, პირველ რიგში, მაწუხებს იმ ბავშვების ბედი. გინდათ ჰომოფობი დამიძახეთ და გინდათ სხვა რამ. მიმაჩნია, რომ ჰომოსექსუალების ხელში ბავშვი ცოდოა. ბავშვს უნდა ჰყავდეს დედა და არ უნდა იზრდებოდეს ორი ავადმყოფი მამაკაცის ხელში! მე, ამ სფეროში მომუშავე ადამიანმა, თუ არ ვამხილე ამ სფეროში არსებული დანაშაული, რა იცის პროკურორმა, რა ხდება სუროგაციასა თუ ემბრიოლოგიურ ლაბორატორიაში?! ხელოვნური განაყოფიერების ტექნოლოგიები ქართველ უშვილო წყვილებს მართლა სჭირდებათ. ეს ტექნოლოგიები ასეთი ადამიანებისთვის არის გამოგონილი. ბოროტად რომ გამოიყენებს ვინმე, ის მკაცრად უნდა დაისაჯოს!
საქართველოს პარლამენტში მქონდა შეტანილი ინიციატივა, კანონში ჩაწერილიყო, რომ უცხოელ წყვილს უფლება არ ჰქონდეთ ორივე მხრიდან დონორული გამეტის გამოყენების. ერთ–ერთი მაინც უნდა იყოს გენეტიკური მშობელი. ბევრი ვიყვირე და ვიბრძოლე, სანამ კანონში არ ჩავაწერინე, რომ სუროგატსა და წყვილს შორის ხელშეკრულება მანამდე გაფორმებულიყო, სანამ ბავშვი ჩაისახებოდა, რათა ბავშვები ვეღარ გაეყიდათ. აქედანაც იპოვეს გამოსავალი. სუროგატებს დედებად გაფორმება დაუწყეს და სულაც აღარ ამბობენ, რომ საქმე სუროგაციასთან აქვთ.
...
მარიამ კუკუნაშვილი ამჟამად ტაილანდში იმყოფება. მასთან დაკავშირება "ფეისბუქით" მოვახერხეთ. კითხვებზე პასუხი წერილობით გაგვცა, სადაც თამარ ხაჭაპურიძეს ფსიქიკურად შეშლილს უწოდებს, თუმცა დაადასტურა, რომ ჰომოსექსუალ წყვილებს სიამოვნებით ემსახურება.
– მარიამ, ცოტა ხნის წინ საჯაროდ აცხადებდით, რომ ემსახურებოდით ჰომოსექსუალ წყვილებს – სუროგატი დედების მიერ მათთვის შვილების გაჩენით. რომელი ქვეყნის წარმომადგენლებს ემსახურებოდით, იქნებ კონკრეტული მაგალითი გვითხრათ.
– მე ახლაც ვემსახურები ჰომოსექსუალ წყვილებს, მაგრამ ეს ხდება და ხდებოდა ყოველთვის არა საქართველოში, არამედ იმ ქვეყნებში, სადაც ეს კანონით არის დაშვებული, მაგალითად, ტაილანდსა და ინდოეთში.
– ფიქრობთ, რომ ჰომოსექსუალ წყვილს ნორმალური შვილის გაზრდა შეუძლია?
– დიახ, ჰომოსექსუალ წყვილებს აქვთ შესანიშნავი ოჯახები და ზრდიან შესანიშნავ შვილებს. ასე მარტო მე არ ვფიქრობ, არამედ მთელი მსოფლიო და ყველა მეცნიერული კვლევა ამას ადასტურებს.
გვიკავშირდებიან ჰომოსექსუალი წყვილები და მათ დიდი სიამოვნებით ვეხმარებით ჩვენს უცხოურ ფილიალებში და არა – საქართველოში.
– თამარ ხაჭაპურიძე ღიად გადანაშაულებთ ქართველი დონორებისგან სუროგატი დედების მიერ გაჩენილი ბავშვების საზღვარგარეთ, ჰომოსექსუალ წყვილებისთვის მიყიდვაში.
– თამარ ხაჭაპურიძე უკვე 4 წელიწადია მადანაშაულებს ხან რაში და ხან – რაში. თუმცა არც ერთი მისი ბრალდება საქმის არასერიოზულობის გამო სასამართლომდე არ მისულა. რატომ გავაკეთებდით სუროგაციას საქართველოში ჰომოსექსუალი წყვილებისთვის, როდესაც ამის კეთება სრულიად კანონიერად შეგვეძლო ინდოეთსა და ტაილანდში?
– პროკურატურას თქვენი 5 თანამშრომელი დოკუმენტების გაყალბების ბრალდებით დაუდანაშაულებია. პროკურატურის წერილი, რომლითაც თამარ ხაჭაპურიძეს ამის შესახებ აცნობეს, ხელთ მეც მაქვს. შეგიძლიათ მითხრათ, კონკრეტულად რა დოკუმენტების გაყალბებაზეა საუბარი და ამ თანამშრომლების გვარებიც ჩამომითვალოთ?
– პროკურატურაში მის მორიგ საჩივართან დაკავშირებით ვიყავი დაკითხვაზე. თუმცა არც მე და არც ჩემი თანამშრომლები არავის დავუდანაშაულებივართ რამეში და არც არავინ დაუჭერიათ. რამდენადაც ვიცი, მთავრობის შეცვლის შემდეგ ბევრი აღძრული საქმე დაიხურა ამნისტიით.
– ერთ–ერთ ინტერვიუში თქვით, რომ მილიონერი გახდით. ამბობენ, რომ სანდრა რულოვსთან მეგობრობთ და თქვენს ბიზნესსაც ის მფარველობს.
– როგორც მოგახსენეთ, 9 ქვეყანაში მაქვს კლინიკები და ბიზნესი. ყოველწლიურად ვფართოვდებით და ვაპირებ, კიდევ გავხსნა კლინიკები ჩემს ესტონელ ბიზნესპარტნიორთან ერთად, რომელიც გახლავთ მსოფლიო ბანკისა და ევროკომისიის მრჩეველი ჯანდაცვის საკითხებში და ესტონეთის ყოფილი ვიცეპრეზიდენტია. მარტო სუროგაცია რომ იყოს საკმარისი მილიონერობისთვის, მაშინ თამარ ხაჭაპურიძეც მილიონერი იქნებოდა. მე ფული ჩემს ქვეყანაში არ მიშოვია და ასევე ძალიან შორს ვარ იმ აზრისგან, რომ ის მფარველების გარეშე არ იშოვება. ქალბატონ სანდრასთან ერთად ვმონაწილეობდი პროექტში, რომელიც ჩატარდა ბათუმში და რომელიც ემსახურებოდა გაჭირვებული უშვილო წყვილების დახმარებას უფასო ხელოვნური განაყოფიერებით. ჩვენ უფასოდ დავეხმარეთ უშვილო წყვილებს და მათი მადლიერების გამომხატველ წერილებსაც ვიღებ.
გარდა ამისა, მოგახსენებთ, რომ ჩემი ერთ–ერთი თანამშრომელი 11 წელი მუშაობდა ბატონ ბიძინა ივანიშვილთან. თამარ ხაჭაპურიძემ მას ელექტრონული ფოსტით წერილი მისწერა, სადაც ატყობინებდა, რომ ბიძინა ივანიშვილი მე მის გამო მაფარებდა ხელს.
ძალიან სასაცილოა და ბოდვაზე უარესი ქალბატონ სანდრასთან და ბატონ ბიძინასთან ჩემი რაიმე სახით დაკავშირება. იგი ახლაც მწერს წერილებს, სადაც პირდაპირ მეკითხება, თუ "რა დოსტუპები მაქვს" ბიძინა ივანიშვილთან.
თქვენი ჟურნალით ვისარგებლებ და გეტყვით, რომ მე ძალიან დიდი წვლილი მიმიძღვის იმაში, რომ საქართველო მსოფლიოს გავაცანი. ღირსეულად და წარმატებით ვემსახურებოდი მსოფლიოს ყველა კუთხის წარმომადგენელს და ვმონაწილეობდი და დღემდე ვმონაწილეობ სხვადასხვა ცნობილი არხების გადაცემებში. ინტერვიუებს ვაძლევ უამრავი ქვეყნის ჟურნალისტს. აქვე დავძენ, რომ ნებისმიერი ის ქვეყანა, სადაც მე ინვესტიცია მაქვს ჩადებული, მეც და ჩემს ოჯახსაც მოქალაქეობას უყოყმანოდ მოგვცემს. იმედს დავიტოვებ, რომ ქართველი სამართალდამცავები მიხვდებიან იმას, თუ რამხელა ტერორისა და ცილისწამებების ქვეშ ვყავართ თამარ ხაჭაპურიძეს ამდენი წელი მე და ჩემი ოჯახი და შესაბამის რეაგირებას მოახდენენ. თუ ასე არ მოხდება, გულდასაწყვეტი იქნება და ადრე თუ გვიან საერთოდ წავალ ამ ქვეყნიდან.
– მარიამ, კითხვა უნდა გაგიმეოროთ. პროკურატურის განცხადებაში წერია, რომ თქვენმა კომპანიამ დოკუმენტები გააყალბა და ეს საქმე ამნისტიის საფუძველზე შეწყდა. იქნებ დამიკონკრეტოთ, რა სახის დოკუმენტების გაყალბებაზეა საუბარი?
– 4 წელია დავდივარ სხვადასხვა უწყებაში სხვადასხვა სახის ბრალდებებზე ხაჭაპურიძის საჩივრების საფუძველზე. ჩემს საკუთარ შვილებზეც ჩიოდა, რომ გასაყიდად მინდოდა. მოკლედ, ფსიქიკურად ვერაა ეგ ქალი.
რუსუდან ადვაძე

Popular Login Last More