• ოჯახური ბედნიერების ახალი რეცეპტი - ფლირტი და ღალატი

    ქორწინების მიღმა ფლირტი ოჯახს ამყარებს. ბრიტანელი სოციოლოგი კეტრინ ჰაკიმი თავის ახალ წიგნში ბრიტანელებს ოჯახური ფასეულობების გადახედვასა და ღალატის მიმართ დამოკიდებულების რადიკალურად შეცვლას სთავაზობს. წიგნი ინტერნეტის ეპოქაში ქორწინების ახალ წესებს ეძღვნება. მკვლევარის აზრით, ბრიტანელებმა მაგალითი ფრანგებისგან უნდა აიღონ და მეუღლის ღალატის მიმართ უფრო მშვიდი რეაქცია ჰქონდეთ.

    წიგნის ავტორი წერს, რომ "ცდუნების ოსტატებად" აღიარებული ფრანგების "ფილოსოფიური მიდგომა ცოლქმრული ღალატის მიმართ" ქორწინებას ამყარებს. კეტრინის აზრით, ღალატმა ოჯახურ ჰარმონიას ზიანი არ უნდა მიაყენოს. თუმცა, ეს არ ნიშნავს, რომ პარტნიორს ყველამ უნდა უღალატოს. მისი თქმით, საკვანძო მომენტი ღალატის მიმართ შემწყნარებლობა უნდა გახდეს, როგორც ამას ფრანგები, იტალიელები და ესპანელები აკეთებენ.

    როგორც ჩასახვის საწინააღმდეგო აბების შექმნამ 70-იან წლებში ქორწინებამდე სექსის ერას დაუდო სათავე, ახლა ინტერნეტი წარმოშობს დაქორწინებულ ადამიანებს შორის რომანების ახალ კულტურას. სექსი ჩვენს ეპოქაში მოცალეობის ჟამს ძირითად გართობად იქცა, რომელიც ყველა ადამიანისთვის არის ხელმისაწვდომი, განურჩევლად ოჯახური და მატერიალური მდგომარეობისა. ჰაკიმი მიიჩევს, რომ დადგა დრო ადამიანებმა ცდუნების ხელოვნება დახვეწონ.

    სტატისტიკური მონაცემებით, განქორწინებათა მაჩვენებლით მსოფლიოში აშშ და დიდი ბრიტანეთი ლიდერობენ. ეს კი ცოლქმრული ღალატის მიმართ მეტისმეტად მკაცრი მიდგომით არის განპირობებული. ხოლო ისეთ ქვეყნებში, სადაც ამ პრობლემის მიმართ ლიბერალური მიდგომა აქვთ, განქორწინების მაჩვენებელი საკმაოდ დაბალია. მაგალითად, საფრანგეთში დაქორწინებული ქალებისა და მამაკაცების მეოთხედი, რომლებიც რეგულარულად ღალატობენ პარტნიორებს, ამას მშვიდად უყურებენ. იაპონიაში კი გეიშების ტრადიციამ ორგანული ტრანსფორმაცია განიცადა და მისი ახალი ფორმები შეიძინა.

    როგორც წიგნის ავტორი წერს, კიდევ უფრო შორს წავიდნენ ჩრდილოეთ ევროპის მაცხოვრებლები, სადაც წყვილები  ქორწინებისმიღმა "პარალელურ კავშირებს" ღიად განიხილავენ.

    კეტრინი ქორწინებისა და რომანების მიმართ ახალებური დამოკიდებულების ფორმირებისას ისტორიის გახსენებასაც გვირჩევს და წერს, რომ იმპერატორები კურტიზანებთან ერთობოდნენ, მეფეები კი ცოლებს პოლიტიკური ინტერესების შესაბამისად ირჩევდნენ.

    კეტრინ ჰაკიმი წარსულში პოლიტოლოგიური კვლევების ცენტრში მუშაობდა და ლონდონის ეკონომიკის სკოლაში ლექციებს კითხულობდა.

    მომზადებულია The Telegraph-ის მიხედვით.

    3 470 ნახვა
    28-08-2016, 13:50
    GOGATV

    abezara