წმინდა ნინოს როლის შემსრულებელი ნიცა კაპანაძე მონასტერში იცხოვრებს

გამოაქვეყნა: admin
//
28 სექტემბერი 2013
//
//
//
ნახვები: 656
წმინდა ნინოს როლის შემსრულებელი ნიცა კაპანაძე მონასტერში იცხოვრებს
წმინდა ნინოს როლის შემსრულებელი ნიცა კაპანაძე მონასტერში იცხოვრებს

საქართველოს უდიდესი წმინდანის ცხოვრებაზე ფილმს იღებენ. მისი რეჟისორი ამერიკაში მცხოვრები გია კერესელიძე გახლავთ. მან მთავარი როლის შემსრულებელს ინტერნეტის საშუალებით მიაგნო. არადა მანამდე 4.000–მა გოგონამ გაიარა კასტინგი, მაგრამ უშედეგოდ. 2 წლის შემდეგ კი ნიცა კაპანაძე აღმოაჩინა. როგორც ამბობს, 16 წლის გოგონამ ის თვალებით მოხიბლა. ნიცა საქართველოს კათოლიკოს–პატრიარქმაც გაიცნო და კურთხევა მისცა, წმინდა ნინოს როლი შეასრულოს.
ფილმს "ნინო" ერქმევა. მასზე მუშაობა უკვე აქტიურ ფაზაშია, მსახიობებისთვის კოსტიუმები ამერიკაში იკერება. ბატონ გიას დიდი გეგმები აქვს. დარწმუნებულია, რომ საქართველოს უდიდეს წმინდანზე ფილმს მთელი მსოფლიო ნახავს და შეიყვარებს. ამაში ერთმა სასწაულმაც დაარწმუნა, რომელიც მის თავს დატრიალდა. ამის შესახებ რეჟისორი ქვემოთ გვიამბობს.
– ბატონო გია, აქამდე ანიმაციურ ფილმებს იღებდით, რატომ გადაწყვიტეთ საკმაოდ მძიმე მისიის საკუთარ თავზე აღება და წმინდა ნინოს ცხოვრებაზე ფილმის გადაღება?
– ყოველთვის მინდოდა, ჩემს ფილმებში უფლის სახელი მედიდებინა და ამას ვცდილობდი კიდეც. თავიდან ასეთი იდეა მქონდა, რომ წმინდა ნინოზე სრულმეტრაჟიანი ანიმაციური ფილმი გადამეღო. როცა ნინოს ცხოვრება წავიკითხე, იმდენი საინტერესო მასალა აღმოვაჩინე, რომ მხატვრული ფილმის გაკეთება ვამჯობინე. ეს ფილმი ჩემი დებიუტია და ვიცი, რომ ძალიან მაგარი გამოვა. რა თქმა უნდა, ამის დაწყება საქართველოს პატრიარქის კურთხევის გარეშე არ შეიძლებოდა. ფილმის შექმნაზე კურთხევა კათოლიკოს–პატრიარქისგან, ილია მეორისგან მივიღე. უწმინდესმა მთხოვა, წმინდა ნინოს როლზე მსახიობი არ ამერჩია. ამასთან დაკავშირებით ცოტა სირთულეებს კი წავაწყდი, მაგრამ უწმინდესის ეს გადაწყვეტილება სწორია.
– რა მხრივ წააწყდით პრობლემებს?
– ძალიან რთულია, მთავარ როლზე არაპროფესიონალი აიყვანო. თამაშისას მსახიობებსაც კი ეშლებათ და... ნინოს როლზე კასტინგი 2 წლის წინ გამოვაცხადეთ, 4.000 გოგონა მობრძანდა, მაგრამ მათგან ვერავინ შევარჩიე. ისევ უკან, ამერიკაში წავედი.
– რატომ არ უნდოდა პატრიარქს, ამ როლზე მსახიობს ეთამაშა?
– ნინოს როლის შესრულების შემდეგ ის გოგონა სხვა რეჟისორმა საშინელებათა ჟანრის ფილმში რომ გადაიღოს, წარმოიდგინეთ, ეს როგორი იქნება. ამიტომ პატრიარქის ამ მოსაზრებას აბსოლუტურად ვეთანხმები. სხვათა შორის, ფრანკო ძეფირელის ფილმში "იესო ნაზარეველი" ქრისტეს როლის შემსრულებელ მსახიობს ვატიკანმა სთხოვა, სხვა როლში აღარ ეთამაშა, მან ეს არ გაითვალისწინა და ავტოკატასტროფაში დაიღუპა... ნიცას მსახიობობა არც სურს, მას ჟურნალისტობა უნდა. ამ როლით ეს ბავშვი ისედაც ისტორიაში შევა. მას სხვა არაფერი სჭირდება. სანამ ფილმის გადაღებები დაიწყება, ნიცა ერთი თვით დედათა მონასტერში გაემგზავრება, რომ ის გარემო კარგად გაითავისოს და იქაური აურა კარგად აითვისოს. ეს აუცილებელია. ნიცა ამ როლისთვის შინაგანადაც უნდა მოემზადოს და კარგი ენერგეტიკა მიიღოს.
– როგორ აღმოაჩინეთ წმინდა ნინოს როლის შემსრულებელი?
– ნიცა კაპანაძე ინტერნეტით ვიპოვეთ. ფილმში შამირას როლზე ლილიკო ელბაქიძე გვყავს აყვანილი, სწორედ მან ნახა ინტერნეტით ნიცა. ამის შემდეგ ნიცას დავუკავშირდით, თავიდან უარი გვითხრა, ძალიან მორწმუნე და კარგი გოგონაა. მერე რჩევა თავის მოძღვარს ჰკითხა, ძალიან ღელავდა, ასეთ სერიოზულ როლზე დათანხმება ეშინოდა, ის ხომ 16 წლისაა. მოძღვარმა კარგად დაარიგა და ნიცაც დაგვთანხმდა. მოკლედ, მას 2 წელი ვეძებდით და მივაგენით. შეიძლება დამთხვევაა, მაგრამ ფრანკო ძეფირელიც ქრისტეს როლზე მსახიობს 2 წელი ეძებდა. მთელი მსოფლიო მოიარა და ვერავინ ნახა, განსაკუთრებულ თვალებს ეძებდა და იპოვა კიდეც. სრულიად შემთხვევით ნახა ის მსახიობი, სახლთან კიბეზე იჯდა და ძაღლს ეთამაშებოდა. ჩვენც ასე შემთხვევით, ინტერნეტის საშუალებით ვიპოვეთ ნიცა.
– რითი დაიმსახურა ნიცამ თქვენი ყურადღება? რა ჰქონდა მას ისეთი, რაც 4.000 გოგოში ვერ იპოვეთ?
– თვალები! სწორედ მას და ასეთ თვალებს ვეძებდი! თვალები ადამიანის სულის სარკეა. ყველა ჩემი მსახიობი თვალებით მყავს შერჩეული. თამაში იმდენად არ არის მნიშვნელოვანი, რამდენადაც თვალები. ამით გადმოსცემ ენერგიას და პერსონაჟის შინაგან სამყაროს.
– როგორ მოერგო ნიცა ნინოს როლს?
– მან კასტინგი გაიარა, სადაც ტროპარი წაიკითხა და თანაც ისე, მთელი შემოქმედებითი ჯგუფი ტიროდა. ეს ბავშვი მართლა უნიჭიერესია, მორცხვი და კარგი გოგონაა.
– რამდენადაც ვიცი, ნიცა მოდელია. ამის გამო სოციალურ ქსელებში უარყოფითი კომენტარებიც გაკეთდა.
– ნიცას მოდელობასთან დაკავშირებით ვიღაცეები არასასიამოვნო რაღაცეებს წერდნენ. ვინც უცოდველია, ქვა მან ისროლოს!.. ვიცოდი, რომ რაღაცას მაინც იპოვიდნენ. ჩვენი დიდი შეცდომა ის არის, რომ ადამიანებს მსგავსი რაღაცეებით ვაფასებთ. ჩვენი გულები შიგნიდან უფალმა იცის.
– პატრიარქმა რა გითხრათ ნიცაზე, მოეწონა?
– კი, ძალიან მოეწონა. მინდა, ერთი საინტერესო შემთხვევა გიამბოთ. 25 დეკემბერს, კათოლიკური ქრისტეშობის დღესასწაულზე, ამერიკიდან საქართველოში პატრიარქთან შესახვედრად მოვფრინავდი. ამერიკიდან მოძღვრებმა ივერიონის მირონმდინარე ხატი გამომაყოლეს, რომ პატრიარქთან მიმებრძანებინა.
იმ დღეს კინაღამ ტრაგედია დატრიალდა, ჩვენი თვითმფრინავი ოკეანეში ვარდებოდა. მსგავსი სიტუაცია მხოლოდ ფილმებში მინახავს, ხალხი პანიკაში იყო, რეალურად ყველა ვიხოცებოდით. ცხოვრებაში პირველად ძალიან შემეშინდა. ცოტა აზრზე რომ მოვედი, ჩემთვის გავიფიქრე, აღსარება ნათქვამი მაქვს, ზიარება მივიღე, მირონმდინარე ხატი ხელში მიჭირავს, რა მომკლავს–მეთქი და ღმერთს ვთხოვე, უფალო, თუ ამ ფილმის გადაღების ღირსი არ ვარ, ამდენ ხალხს ნუ დახოცავ–მეთქი. თვითმფრინავში გვერდით ინდოელი ცოლ–ქმარი მესხდნენ. ქალმა გამომხედა და მკითხა, ასე წყნარად რატომ ზიხარ, მღვდელი ხარო. მღვდელი – არა, მაგრამ ქრისტიანი ვარ და სიკვდილის შიში არ მაქვს–მეთქი, ვუთხარი. ჩვენ რა ვქნათო, მკითხა. როგორც ქრისტიანს, უფლება მაქვს, მოგნათლოთ, ქრისტე, როგორც უფალი, უნდა მიიღოთ–მეთქი. ცოლი ყვიროდა, მომნათლეო. ქმარი გათიშული იჯდა, უცებ მომიტრიალდა და მითხრა, მეც მომნათლეო. ავდექი და ორივეს მირონი ვაცხე, ლოცვა წავიკითხე და დაწყნარდნენ კიდეც. ლოცვას მოვრჩი თუ არა, ვიგრძენი, რომ ყველაფერი კარგად იქნებოდა. ამ დროს ბორტგამცილებელმა გამოაცხადა, თვითმფრინავი ექსტრემალურად უნდა დაეშვას იოანე ნათლისმცემლის კუნძულზეო. წარმოიდგინეთ, როგორი დამთხვევა იყო. პატრიარქს ეს ყველაფერი რომ მოვუყევი, ძალიან გაუხარდა, ორი ადამიანი მოგინათლავსო.
– სხვა როლებზე ვინ შეარჩიეთ, თუნდაც მირიან მეფის, ნანა დედოფლის?
– ნანას როლის შემსრულებელს ისევ ვეძებთ. მირიან მეფის როლს კი პაატა წიქურიშვილი ითამაშებს. კახა მოისწრაფიშვილი აბიაფარის როლზეა დამტკიცებული, ზურა ბეგალიშვილი – ზევახის როლში, მგელიკას როლს გიორგი გეგელაშვილი თამაშობს. ელენა შამოვა კი სიდონიას როლზე ავიყვანეთ. მას უსიტყვო და ყველაზე რთული როლი აქვს, კვართს ის იღებს. ნინოს ბავშვობის როლზე კვლავ ვეძებთ მსახიობს. ორი ბავშვი შევარჩიეთ, მაგრამ თუ უკეთესი გამოჩნდა, შეიძლება არჩევანი შევცვალოთ. სულ 86 პერსონაჟი გვეყოლება. ფილმის ქრონომეტრაჟი დაახლოებით 2 საათი და 20 წუთი იქნება. ასევე, ერთ–ერთ მთავარ როლს, გუჯა ბურდული ითამაშებს. ის, ზურა ნიჟარაძე და გიორგი გაბუნია იმ მწყემსების როლში იქნებიან, რომლებიც ნინოს საქართველოში შემოსვლისას პირველები შეხვდებიან.
– რა ეტაპზეა ახლა ფილმი, გადაღებები დაწყებული გაქვთ?
– არა. ახლა მოსამზადებელ ეტაპზე ვართ, გუნდი იკვრება. მსახიობების უმეტესობა არჩეულია, მაგრამ, როგორც გითხარით, კასტინგი კვლავ მიმდინარეობს. აქვე მინდა გითხრათ, რომ ფილმის დეკორატორები გახლავთ ორი უნიჭიერესი ადამიანი – მარიამ ჭიჭივეიშვილი და ნათია ქადაგიშვილი.
– ფილმის ბიუჯეტი დიდია?
– ამ ფილმში საქართველოს ჯერჯერობით ერთი თეთრიც არ ჩაუდია, არც კულტურის სამინისტრო დაგვხმარებია. კინოსტუდია "ქართულმა ფილმმა", მისმა ახალმა ხელმძღვანელობამ ამ ფილმის პერსპექტივა დაინახა და გვერდში დაგვიდგა. მათ ერთი თვის განმავლობაში კასტინგის ჩასატარებლად ოთახიც კი გამოგვიყვეს, რისთვისაც მადლობას ვუხდი. სხვათა შორის, ბევრი ადამიანი გამოთქვამს დახმარების სურვილს.
– ფილმს რა სახსრებით იღებთ?
– ლაზარე ალიევი გახლავთ ჩემი ამერიკელი პროდუსერი. ის ჩემი ნათლულია, წარმოშობით აზერბაიჯანელია, მაგრამ ამერიკაში ცხოვრობს. მას ამ ფილმისთვის თავისი ჯიბიდან 200.000 დოლარი აქვს დახარჯული. საქართველოდან კი ყველა რუსეთისკენ იშვერს ხელს, მეუბნებიან, ისინი დაგეხმარონო. რუსეთში რომ ჩავალ, არ მინდა მკითხონ, ქართველებმა არაფერი გაგიკეთესო. ალბათ პირველი კითხვა ეს იქნება, იმასაც იტყვიან, ეს ხომ თქვენი წმინდანიაო. რუსეთის წინააღმდეგი არ ვარ. სამუშაოდ იქაურ გუნდსაც წამოვიყვან, მაგრამ არ მინდა, ეს ფილმი რუსეთს ეკუთვნოდეს და მათ ჩაეთვალოთ გადაღებაში. ამ ფილმს რუსეთის ბაზარზეც გავუშვებთ, საბერძნეთიდან, ბრაზილიიდან მივიღეთ შემოთავაზება, რომ იქაურ ბაზარზეც გავიდეთ. აქაური პროდიუსერები კი შეშინებულები არიან, ფილმში ფულს არ დებენ. როგორც ჩანს, მათ აქამდეც ჩაადებინეს ფული, უკან კი ვერაფერი მიიღეს. როგორც ჩანს, ისეთ ფილმებს არ იღებდნენ, რომლებიც მსოფლიო ბაზარზე გავიდოდა.
– თქვენ რა გათვლა გაქვთ ფილმზე?
– მომავალზე წინასწარ ვერაფერს ვიტყვი, მაგრამ მჯერა, რომ ეს ფილმი ძალიან ბევრ მაყურებელს მოეწონება. მსოფლიოში ძალიან ბევრია ისეთი, ვინც ასეთ კინოს ელოდება. ფილმი ჰოლივუდის დონის იქნება, ფესტივალებზეც გავა. "ნინო" იქნება ხელოვნების ნიმუში და, ბუნებრივია, საქართველოს სახელიც იქნება.
– ამ ფილმით რისი თქმა გსურთ?
– იმის, რომ უფლისკენ ნაბიჯი უნდა გადავდგათ. როცა უფლისკენ გადადგამ ნაბიჯს, ის შენთან იქნება და ყველაფერს გაგაკეთებინებს, მას უყვარხარ. ნინოც სწორედ ასე მოიქცა...

– მხატვრულ ფილმებში რეჟისორები რეალურ ისტორიას ფეხდაფეხ არ მიჰყვებიან. თქვენ რა გადახვევები გექნებათ?
– ამას გადახვევა არ ჰქვია. ეს იქნება დინამიკური, ძლიერი ფილმი. ის კანონიკურად დაცული იქნება, რადგან მართლმადიდებელი ქრისტიანი ვარ და ისეთ არაფერს გავაკეთებ, რომ ეკლესიას ზიანი მივაყენო. რა თქმა უნდა, ფილმში გამოგონილი გმირებიც იქნებიან – ანგელოზები, დემონები.
– გადაღებებს სად გეგმავთ?
– იერუსალიმში, კაბადოკიაში, იტალიაში, სომხეთში. ყველაფერი მზად არის, უბრალოდ მხარში დგომა გვჭირდება.
ეკა ლემონჯავა, ჟურნალი სარკე
Popular Login Last More