მეჯვარის ღალატი_ რა მოხდა ზუგდიდში

ვინც ზუგდიდში ბავშვობის მეგობრებს, კახა გულორდავასა და მის მეჯვარეს, გოგა ანჩაბაძეს იცნობდა, ვერავინ იფიქრებდა, რომ მათ მეგობრობას ასეთი საშინელი დასასრული ექნებოდა და, პირველ რიგში, ეს რა თქმა უნდა, თავად მათთვის იყო წარმოუდგენელი.
ამა წლის 12 ნოემბერს გოგა ანჩაბაძე ზუგდიდში, პოლიტექნიკური კოლეჯის ეზოში, მძიმე მდგომარეობაში – დასერილი, ყურმოჭრილი და შიშველი იპოვეს. როგორც შემდეგ გაირკვა, ეს კახა გულორდავას შურისძიება იყო იმისთვის, რაც გოგამ ჩაიდინა. მეგობარი მეგობარს ასე სასტიკად ცოლის შეურაცხყოფისთვის გაუსწორდა. გოგა ანჩაბაძე კახას ცოლის, ორი თვის ორსული ანა ძაპტაშვილის გაუპატიურების მცდელობაშია ეჭვმიტანილი. გოგონა გაუპატიურებას კოლეჯის ეზოში მცხოვრებმა დევნილებმა გადაარჩინეს.
კახა გულორდავა სამართალდამცავებს საკუთარი ნებით ჩაბარდა და აღნიშნული ფაქტის შესახებაც თავად განაცხადა. მის მიმართ ბრალი სხეულის განზრახ მძიმე დაზიანების მუხლით არის წაყენებული. სასამართლო დარბაზიდან გირაოს, 2.000 ლარის სანაცვლოდ გაათავისუფლეს, რასაც რამდენიმე დღის განმავლობაში წინ უძღოდა ნათესავ–ახლობლების ხმაურიანი აქციები ზუგდიდში მისი გათავისუფლების მოთხოვნით.
დასახიჩრებული გოგა ანჩაბაძე ქუთაისის საავადმყოფოში გადის მკურნალობის კურსს. მის მიმართაც საქმეა აღძრული გაუპატიურების მცდელობის ბრალდებით. შინაგან საქმეთა სამინისტროს პრესსამსახურის უფროსმა ნინო გიორგობიანმა "სარკესთან" აღნიშნა, რომ საგამოძიებო მოქმედებების დასრულების შემდეგ გოგა ანჩაბაძეს პოლიციელის წოდება ჩამოერთმევა.
ორსული ანა ძაპტაშვილი ამჟამადაც მძიმე სტრესულ მდგომარეობაშია. მას ჯანმრთელობასთან დაკავშირებით პრობლემები შეექმნა, რის გამოც ექიმების მეთვალყურეობის ქვეშ იმყოფება.
გახმაურებული ინციდენტის დეტალები "სარკეს" ანა ძაპტაშვილის დედამ, რუსუდან ლომაიამ უამბო. "სარკე" შეეცადა, მეორე მხარეს, ანუ გოგა ანჩაბაძის ოჯახსაც დაკავშირებოდა, მაგრამ ეს ვერ მოხერხდა. როგორც ჩვენთვის ცნობილია, ისინიც მძიმედ განიცდიან მომხდარს და არავის ეკონტაქტებიან.
რუსუდან ლომაია:
– გოგა ანჩაბაძე ქორწილის შემდეგ არც ჩემი სიძის სახლში ყოფილა და არც ჩვენთან. ამას მის მოუცლელობას ვუკავშირებდით. ჩემი სიძის, კახა გულორდავას დედას თბილისში ოპერაციას უკეთებდნენ. რადგანაც ანა ორსულადაა და განსაკუთრებული ყურადღება სჭირდება, კახამ ჩემთან სახლში მოიყვანა, ჩვენ ერთმანეთთან ახლოს ვცხოვრობთ. საღამოს ანას ტელეფონზე ვიღაცამ დარეკა. ჩემმა შვილმა ნომერი ვერ იცნო, ჰკითხა, რომელი ხარო. გოგა ვარ, თქვენი მეჯვარე, შენი მეუღლე სად არისო. კახა თავის სახლშია, მე დედასთან ვარო, უპასუხა ანამ. ჩხოროწყუდან მოვდივარ, გზად შენს სახლს გავივლი და თქვენი ნახვა მინდაო, უთხრა გოგამ. მოკლედ, სტუმარს ჭიშკართან შევეგებეთ. ანა გულში ჩაიხუტა, უთხრა, ჩემი დაიკო ხარო. მეც მომიკითხა, ქალბატონო, ძალიან მიყვარხართ, ჩხოროწყუში ღვინო მაჩუქეს და მოგიტანეთო. რა თქმა უნდა, სახლში შევიპატიჟეთ.
– შემდეგ თქვენი ქალიშვილი გოგა ანჩაბაძის მანქანაში აღმოჩნდა და საბოლოოდ კოლეჯის ეზოში ის დრამა დატრიალდა. ეს როგორ მოხდა?
– როცა გოგა სახლში შემოვიპატიჟეთ, გვითხრა, ნასვამი ვარ, ანა გამომყვეს, კახას წამოვიყვანთ და ერთად ვიქეიფოთო. ანას უთხრა, უკან დაჯექიო. ვიფიქრე, წინ ალბათ ღვინო ან ნობათი უდევს–მეთქი. ჩემი შვილი მართლაც უკან ჩაუჯდა. მანქანის უკანა ფანჯრები დაბურული იყო, ეს ყველაფერი ახლა მახსენდება, თორემ მაშინ ყურადღება არ მიმიქცევია. როგორ შეიძლებოდა, მეჯვარეზე რამე მეფიქრა?!
მოკლედ, სუფრის გაშლა დავიწყე. დაახლოებით ერთ საათში ან ცოტა მეტში ანა სახლში აკანკალებული, შეშლილი სახით შემოვიდა. მარტო რომ დაბრუნდა, გამიკვირდა. ვკითხე, გოგა და კახა სად არიან–მეთქი. დედა, გოგა ვინ ყოფილა, კინაღამ მომკლა, მანქანა 200–ით მიჰყავდა, ლამის ორმა მანქანამ გაგვიტანა, ისეთ ადგილას გააჩერა, შემეშინდა, ხალხმა დამინახა, რომ შეშინებული ვიყავი, ტაქსში ჩამსვეს და სახლში მომიყვანეს, გოგა კი წავიდაო.
ზუგდიდში, წერეთლის ქუჩის დასაწყისში, ყოფილი კოლეჯია, სადაც აფხაზეთიდან დევნილები ცხოვრობენ. სწორედ მათ მომიყვანეს ჩემი შვილი სახლში.
– ანუ ანამ მისი გაუპატიურების მცდელობის ფაქტი დაგიმალათ?
– დიახ. სახლში ოჯახის ყველა წევრი ვიყავით, მათ შორის – ანას მამაც და ძმაც, ამიტომ იქ არაფერი უთქვამს. როცა საძინებელში შევიყვანე, სიბნელის მეშინიაო, ამბობდა. დამამშვიდებელი მივეცი და მაშინ მკითხა, დედა, შენ თუ მიხვდი, რაც მოხდაო. ისეთი საშინელება მომიყვა, ახლაც შოკში ვარ.
იქ, სადაც დევნილები ცხოვრობენ, მიტოვებული ადგილია. ეზოში რომ შეხვალთ, შემდეგ ჭიშკარია და იქიდან უკვე ბნელი და უკაცრიელი ადგილი. ანამ მითხრა, გოგამ გზაში სისწრაფეს მოუმატა, ძალიან შემეშინდა, ამიტომ კახას ნომრის აკრეფა დავიწყე, მაგრამ საჭე ისე ატრიალა, ტელეფონი ხელიდან გამივარდაო. გოგას დევნილებით დასახლებულ ადგილას შეუხვევია და იმ ადგილისკენ წასულა, სადაც სიბნელე იყო. კიდევ კარგი, ის ჭიშკარი დაკეტილი დახვდა.
გოგას მანქანის კარი დაუბლოკავს და, რადგან ანა უკან იყო, მისკენ გადასვლა მოუნდომებია. ამ დროს უფლის ნებით ჩემმა შვილმა კარის გაღება შეძლო. ანა სიფრიფანა გოგოა, ის კი – გოლიათი. გოგა ანას თმაში სწვდა, მანქანის "კაპოტს" თავი არტყმევინა, მისი გათიშვა მოინდომა. თურმე ეუბნებოდა, ჩემი ქალი ხარ, აქ მოდიო. ჩემი შვილი კი იბრძოდა. გოგა კისერში სწვდა, მაგრამ რაღაცნაირად ანა ხელიდან დაუსხლტა, თან კიოდა. თურმე ამ დროს გარეთ დედა–შვილი იყვნენ და კივილის ხმა გაიგონეს. ეს ქალი რომ მისულა, თურმე გოგა ყვიროდა, ეს ჩემი ქალია, თქვენი საქმე არ არისო. ანა კი კიოდა, მოტაცებული ვყავარ, მოტყუებით წამომიყვანა, მეჯვარეაო. ეს ქალი გაბრუნებულა და ვინც იმ კორპუსში ცხოვრობდა, ყველა ჩამოუყვანია. მათით უდგას დღეს სული ჩემს ქალიშვილს... ანას ხელი ჩაავლეს, თურმე ერთ მხარეს ისინი ეჭიდავებოდნენ, მეორე მხარეს გოგა. ხალხმა ანა დამალა. თურმე გოგა ოთახებში დარბოდა, სისხლი დაიღვრება, შენ თუ ხმას ამოიღებ, შენი ქმარი ცოცხალი აღარ იქნება, მოკვდება, ახლავე გამოდიო. ჩემი შვილი იმ სრულიად უცნობმა ადამიანებმა გადაარჩინეს. ანა ტაქსში ჩასვეს, რამდენიმე მათგანიც ჩაუჯდა და სახლში მომიყვანეს.
– თქვენმა სიძემ, კახა გულორდავამ, როდის და ვისგან შეიტყო ეს ამბავი?
– პირველ რიგში, ჩემი შვილის მომავალზე ვიფიქრე, ამიტომ იმ ღამეს არავისთვის არაფერი გვითქვამს. თან ანა ისეთ მდგომარეობაში იყო, დამამშვიდებელი მივეცი. მეორე დღეს პოლიციის შენობასთან მივედი, გოგა ანჩაბაძეს სამჯერ დავურეკე, მაგრამ არ მიპასუხა. როგორც ჩანს, მიხვდა, რომ მე ვიქნებოდი, რადგან პედაგოგი ვარ და კორპორაციული ნომერი მაქვს. ამის შემდეგ მას შეტყობინება გავუგზავნე, ანას დედა ვარ, პოლიციის შენობის წინ ვდგავარ, დალაპარაკება მინდა, თუ არ გამოხვალ, საჩივარს დავწერ–მეთქი. იმ წამსვე დამირეკა, მაგრამ ვერ ვუპასუხე, რადგან შემთხვევით ჩემმა სიძემ ჩამოიარა. კახა სამარშრუტო ტაქსზე მუშაობს. ასეთი აღელვებული რომ დამინახა, მაშინვე მკითხა, ანა ხომ არ არის ცუდადო. ვუთხარი, რომ მასთან საქმე მქონდა, მაგრამ მანამდე სადღაც უნდა გავსულიყავი და მას მანქანაში ჩავუჯექი.
კახას მანქანიდან ისეთ ადგილზე ჩამოვედი, სადაც გოგასთან დალაპარაკებას შევძლებდი. მთელი ამ ხნის განმავლობაში, სანამ მე კახას ვესაუბრებოდი, გოგა სულ მირეკავდა. პირუტყვი ხარ–მეთქი, ვუთხარი. კი, ქალბატონო, სახედარიც ვარ, პირუტყვიც, რადგან გუშინ ძალიან შემეშალა, მაგრამ გირჩევთ, ეს არ გაახმაუროთ, თქვენი შვილის მომავალზე იფიქრეთ, ოჯახი არ დაენგრესო, მითხრა. ალბათ წარმოგიდგენიათ, ასეთ მდგომარეობაში რას ვეტყოდი და როგორ დაველაპარაკებოდი. ამ დროს ჩემი სიძე მანქანიდან ჩამოსულა. მკითხა, რა ხდება, ვის ელაპარაკებოდით, ასეთ მდგომარეობაში რატომ ხართო. ვუთხარი, რომ მის მეჯვარეს, გოგას ველაპარაკებოდი, მაგრამ სიმართლე ვერ გავუმხილე. იგივე ვარიანტი მოვუყევი, რაც ანამ თავიდან გვითხრა. გაუკვირდა, ჩემი მეჯვარე ასე როგორ მოიქცაო.
იმ დღეს კახა ჩვენთან სახლში დარჩა. დილით კი ჩემმა შვილმა ყველაფერი უთხრა და სწორედ იმ დილით მოხდა ის ამბავი. ამის შემდეგ კახა პოლიციაში თვითონვე გამოცხადდა.
– მანამდე როგორი ურთიერთობა ჰქონდათ თქვენს სიძესა და გოგა ანჩაბაძეს, მათ შორის რაიმე კონფლიქტი ხომ არ იყო?
– არა, რას ამბობთ! ისინი ბავშვობის მეგობრები იყვნენ, საბავშვო ბაღიდან, სკოლიდან სულ ერთად მოდიან. ახლაც თვალწინ მიდგას გოგას ღიმილი, მისი საუბარი.
– მაშინ რას უკავშირებთ ამ ფაქტს?

– არ ვიცი, რა ვთქვა, ალბათ გულში ჩაუვარდა ჩემი ქალიშვილი.
– გოგა ანჩაბაძე დაოჯახებულია?
– ცოლი და ერთი ბიჭი ჰყავს.
– მისი ოჯახის წევრებთან ამ ამბის შემდეგ გქონდათ შეხვედრა ან საუბარი?
– ის ოჯახი ისეთივე განადგურებულია, როგორიც ჩვენი. მას ძალიან კარგი დედ–მამა ჰყავს. როგორც ვიცი, მამამისი ოთახიდან საერთოდ არ გამოდის, დედა ცოცხალ–მკვდარია. ნათესავები ჩემთან მოვიდნენ, პატიება მთხოვეს. კიდევ ერთხელ გეუბნებით, ცოცხალ–მკვდრები არიან. მართალია, დღეს ჩემი შვილი უფლის და კეთილი ადამიანების წყალობით გადარჩა, მაგრამ შეიძლება მან ხვალ სხვა გააუბედუროს, ამიტომ ასეთმა ადამიანმა პასუხი უნდა აგოს. მან მეჯვარეობა, მართლმადიდებლობა შეურაცხყო. ის, რითიც ჩვენ ვსულდგმულობთ. ჩემი ბავშვების გადარჩენისთვის ეკლესიაში სანთელი დავანთე და მასაც შენდობისთვის დავუნთე სანთელი.
– რა მდგომარეობაშია ახლა ანა?
– მასთან ახლა ქმარი იმყოფება. ექიმის დაკვირვების ქვეშაა, რადგან ძალიან დიდი სტრესი მიიღო.
თქვენი ჟურნალის საშუალებით მინდა, ძალიან დიდი მადლობა ვუთხრა იმ კეთილ ადამიანებს, რომლებმაც შვილი გადამირჩინეს, ასევე მათ, ვინც მთელი ამ პერიოდის განმავლობაში გვერდიდან არ მომშორებიან. ესენი ჩემი აღსაზრდელები, პედაგოგები, ახლობლები და უბრალო ნაცნობები არიან.
...
კახა გულორდავას ადვოკატმა ჯიტა გულუამ "სარკესთან" საუბარში აღნიშნა, რომ გოგა ანჩაბაძის მამას ოლქის პროკურორისთვის წერილობითი თხოვნით მიუმართავს და კახა გულორდავას დაუყოვნებლივ გათავისუფლება უთხოვია. წერილში ანჩაბაძის მამა საკუთარ თავს შვილის საქციელით შეურაცხყოფილ მამად მოიხსენიებს.
ჯიტა გულუა:
– გოგა ანჩაბაძე და კახა გულორდავა თანაქალაქელები არიან. გულორდავას სახლის წინ გოგას მამიდა ცხოვრობს. გოგა სულ იქ დადიოდა, იქ იზრდებოდა, ამიტომ გოგას და კახას ძალიან ახლო მეგობრობა აკავშირებდათ. მათ ერთმანეთთან ბეწვისოდენა წყენაც კი არ ჰქონიათ. გოგა ანჩაბაძე კახა გულორდავას ყოველთვის ეუბნებოდა, რომ ქორწილში მისი მეჯვარე უნდა ყოფილიყო.
კახა გულორდავამ და ანა ძაპტაშვილმა 4 თვის წინ იქორწინეს. დაპირებისამებრ, მათ ქორწილში კახას მეჯვარე გოგა იყო. ქორწილამდე მას ანა ერთხელ ჰყავდა ნანახი, მეორედ ქორწილის დღეს ნახა, მესამედ კი – ქორწილის მეორე დღეს მათ სახლში. გოგას ანასთან სხვა ურთიერთობა არ ჰქონია.
– რა იცით იმ დღის შესახებ, როცა გოგა ანჩაბაძემ ანა ძაპტაშვილის გაუპატიურება სცადა?
– 10 ნოემბერს გოგა ანჩაბაძე ანას მშობლებთან მივიდა, მაგრამ სახლში არ შესულა. მათ უთხრა, ანას წავიყვან და კახას ერთად მოვიყვანთო. ანას მეჯვარის მიმართ ეჭვის არანაირი საფუძველი არ ჰქონია, ამიტომ გაჰყვა. გოგა ანჩაბაძემ მანქანა მიყრუებულ ადგილას გააჩერა. უცებ მხეცივით დამესხა თავსო, ამბობს ანა. როგორც თვითმხილველები ყვებიან, გოგონა მანქანიდან წივილით–კივილით გადმოვიდა. მეჯვარე, ოჯახის მეგობარი მეგონე და მხეცი ყოფილხარ, კახა მოგკლავსო, ყვიროდა თურმე. გოგა კი მისდევდა, მანქანაზე თავს არტყმევინებდა. ხალხი რომ გამოცვივდა, გოგას უთქვამს, ცუდი ყოფაქცევის ქალი მყავს მოყვანილი, თავი გამანებეთ, თქვენს ბინებში შედითო, მაგრამ ხალხმა არ დაანება, გოგონა ხელიდან გამოგლიჯეს.
– გოგა ანჩაბაძე ნასვამი იყო?
– როგორც მეუბნებიან, წინა დღის ნასვამი იყო და პლანიც ჰქონდა მოწეული. ექსპერტიზის ოფიციალური დასკვნები ჯერ არ არის.
– იცოდა, რომ ანა ორსულად იყო?
– დიახ. წინა დღეს შეხვედრია კახა გულორდავა და უხარებია, ანა ორსულადაა, შვილი გვეყოლებაო.
კახას და ანას წყვილს ყველა ისე იცნობს, როგორც ერთმანეთზე უზომოდ შეყვარებულ ახალგაზრდებს. მათ სიყვარულზე ლეგენდები დადიოდა. ორივე ძალიან წესიერი ადამიანია. კახა გულორდავა ჩემთან ახლოს ცხოვრობს. იმდენად კარგი წყვილია, მათი შეუღლება ყველას უხაროდა. ორი პატიოსანი ოჯახი ერთმანეთს შეხვდაო, ამბობდნენ. ისინი ფიზიკურად, ბუნებით, ადამიანობით ერთმანეთს ძალიან უხდებიან.
– როგორ მოხდა გოგა ანჩაბაძის დაჭრის ფაქტი?
– კახა გულორდავა ამბობს, ანა ძალიან მიყვარს, ცოლადაც ამიტომ მოვიყვანე, მაგრამ როცა ასეთი რამ მიამბო, მისი მონაყოლი და გოგას ბუნება ერთმანეთთან ვერაფრით შევათავსე, ამიტომ ერთი სული მქონდა, პირადად გოგასგან გამეგო, თუ რა მოხდა, მაინტერესებდა, რას მეტყოდაო. კახას თავისი მეგობრისთვის დაურეკავს, შენ და გოგა ჩემთან ამოდით, მჭირდებითო. ის მეგობარი ბიჭი ყვება, როცა ის და გოგა ანჩაბაძე კახა გულორდავასთან მიდიოდნენ, გზაში ანჩაბაძეს უთქვამს, როცა დავთვრები, მხეცი ვხდები, მოსაკლავი ვარ და მომკალითო. მანქანიდან გადმოსულმა ანჩაბაძემ კახა გულორდავა რომ დაინახა, მიხვდა, რომ მან სიმართლე უკვე იცოდა და სანამ კახა რამეს ჰკითხავდა, უთქვამს, მოსაკლავი ვარ, მომკალიო და მის წინაშე თავი დაუხრია. სწორედ ამ დროს ჩაიდინა კახამ ის ფაქტი, რაც ყველამ იცით.
– კიდევ ვინ იყო იქ, როცა კახა გულორდავამ გოგა ანჩაბაძე დაჭრა?
– იქ კახას ძმაც იყო, მაგრამ მან არ იცოდა, რა ხდებოდა, ისევე, როგორც მათმა მეგობარმა. მართალია, კახა გოგას მოკვლას არ აპირებდა, მაგრამ ის ადამიანები იქ რომ არ ყოფილიყვნენ, ალბათ უარეს დაზიანებებს მიაყენებდა. როგორც კახა გულორდავა ამბობს, მისი სურვილი გოგას მოკვლა კი არ იყო, არამედ მისთვის ისეთი დაღის დასმა, რაც მთელი ცხოვრების განმავლობაში დაეტყობოდა და ყველა გაიგებდა, თუ რის გამო სჭირდა ეს. გულორდავამ ანჩაბაძეს პოლიციელის მუნდირი შემოაჭრა, ამის ღირსი არ ხარო. სრულიად შიშველი თავისი სამარშრუტო ტაქსით წაიყვანა ზუსტად იმ ადგილას, სადაც ანას გაუპატიურებას ცდილობდა და სწორედ იმ ხალხის თვალწინ ჩამოსვა, ვინც გაუპატიურების მცდელობის ფაქტს უყურებდა.
ანას რაც შეეხება, ის სტრესულ მდგომარეობაშია, თირკმელზე ჰქონდა პრობლემები, თავი სტკიოდა, ექიმ–ექსპერტის ცნობაშიც წერია, რომ მას თმა აგლეჯილი აქვს. ანას წოლითი რეჟიმი აქვს და ნაყოფის შენარჩუნებისთვის იბრძვიან.
– კახა გულორდავა გირაოთი გაათავისუფლეს. რა ელოდება მას?
– კახას ბრალი სისხლის სამართლის კოდექსის 118–ე მუხლით ჰქონდა წაყენებული. ეს ჯანმრთელობის განზრახ ნაკლებად მძიმე დაზიანებას ითვალისწინებს, მაგრამ, როგორც კი ექსპერტის დასკვნა მიიღეს, რომ გოგა ანჩაბაძეს მძიმე დაზიანება აქვს მიყენებული, ბრალი 117–ე მუხლით წაუყენეს, ანუ ჯანმრთელობის განზრახ მძიმედ დაზიანების მუხლით, რაც 5 წლამდე თავისუფლების აღკვეთით ისჯება. იმ პირობების გათვალისწინებით, რომ კახა გულორდავა პოლიციაში თავად გამოცხადდა, მისი მიმალვის საშიშროება არ იყო, ნივთიერი მტკიცებების ამოღება მისი მითითებით განხორციელდა და ახალი დანაშაულის ჩადენის საშიშროება არ იყო, ის არც უნდა დაეკავებინათ. მადლობა ღმერთს, დარბაზიდან გირაოთი, 2.000 ლარის სანაცვლოდ გაათავისუფლეს.
თვითონ კახა გულორდავას ამ ფაქტზე საუბრის სურვილი არ აქვს, ვერ ითავისებს, რომ მეგობარმა უღალატა. არც იმის გახსენება უნდა, რაც შემდეგ მოხდა. ძნელად გადმოსაცემია ახლა მისი მდგომარეობა. მორალურად შეიძლება გოგა ანჩაბაძე ღირსი იყო, მაგრამ კახა ნამდვილად არ არის ბედნიერი, რომ ამის გაკეთება მოუწია და ძალიან განიცდის, დეპრესიაშია. ამ ეტაპზე კახას ბრალეულობის საკითხზე მსჯელობა არ ყოფილა. სასამართლო სხდომა 25 დეკემბერსაა დანიშნული.

– რა სასჯელი ელოდება გოგა ანჩაბაძეს?

– როგორც ვიცი, ის ქუთაისის საავადმყოფოშია. განცხადება მაჩვენეს, სადაც გოგა ანჩაბაძის მამა ოლქის პროკურორს მიმართავდა თხოვნით, ჩემი შვილის საქციელის გამო შეურაცხყოფილი მამა ვარ, მორალურად განადგურებული ვარო. ის პროკურორს კახა გულორდავას დაუყოვნებლივ გათავისუფლებას სთხოვდა.
ეკა ლემონჯავა, ჟურნალი სარკე