იტალიელმა მაღაროელმა პროტესტის ნიშნად ტელეკამერების წინ გადაიჭრა ვენები

იტალიაში, სარდინიაზე, მაღაროელების ლიდერმა სტეფანო მილეტიმ ჟურნალისტებთან ინტერვიუს დროს, ჩართული ტელეკამერების წინ წამოიძახა: "მათ ჩვენთან საქმის დასრულება გადაწყვიტეს. უკეთესი იქნება, თუ თავს თავად მოვიკლავთ!" და ვენები გადაიჭრა.

დაჭრილი მაღაროელი საავადმყოფოში გადაიყვანეს. ამჟამად მის სიცოცხლეს საფრთხე არ ემუქრება.

ნურაკსი ფიგუსის მაღაროში საპროტესტო აქცია უკვე მესამე დღეა მიმდინარეობს. მუშები მაღაროს დახურვას აპროტესტებენ. მათ 400 მეტრის სიღრმეზე ბარიკადები აღმართეს და თან 350 კგ ასაფეთქებელი ნივთიერება აქვთ. მაღაროელები მათი მოთხოვნების შეუსრულებლობის შემთხვევაში, თავის აფეთქებით იმუქრებიან.