ერთი "გაუხსნელი" რგოლი ოლიმპიადის გახსნის ცერემონიაზე +ვიდეო

სოჭში, მოსკოვის დროით 20:14 სთ-ზე ოლიმპიური თამაშების გახსნის ცერემონია დაიწყო. ცერემონიაზე, ოლიმპიადის სიმბოლო 5 რგოლიდან, მხოლოდ ოთხი "გაიხსნა". აღნიშნულ ფაქტი არ გამოპარვიათ სოციალური ქსელის მომხმარებლებს და ფაქტის ამსახველ ფოტოებს აქტიურად ათავსებენ ინტერნეტსივრცეში. ფაქტის ამსახველი ფოტო "ტვიტერის" საკუთარ გვერდზე BBC-მაც განათავსა.

ოლიმპიადის გახსნის ცერემონია სტადიონ "ფიშტზე" იმართება. ცერემონიის ხანგრძლივობა 160 წუთია. მასში მონაწილეობას 3 000 არტისტი და 2 000 მოხალისე იღებს. წარმოდგენის შემდეგ სოჭის ცას გრანდიოზული ფოიერვერკი გაანათებს.

სოჭის ოლიმპიადაში სულ ოთხი ქართველი სპორტსმენი იღებს მონაწილეობას:
მოთხილამურეები ნინო წიკლაური, იასონ აბრამიშვილი, ალექსი ბენიაიძე და მოციგურავე ელენე გედევანიშვილი, რომელიც სოჭში 14 თებერვალს კანადიდან ჩავა. საქართველოს ნაკრების მედროშე ოლიმპიადის გახსნაზე ნინო წიკლაური იქნება.

2014 წლის სოჭის ზამთრის ოლიმპიადა 23 თებერვალს დაიხურება.