ნანა ნებიერიძეს ცეკვა მოენატრა

ნანა ნებიერიძეს გასულ წელს ბევრი ოცნება აუსრულდა. ''ცეკვავენ ვარსკვლავებში''მიიღო მონაწილეობა და ''ყინულის დედოფალი''გახდა. მსახიობობაზე ბავშვობიდან ოცნებობდა და ამიტომ ერთი წუთითაც არ დაფიქრებულა, ისე დათანხმდა სპექტაკლში დედოფლის როლს. იგეგმება ''ყინულის დედოფლის''ბაქოში ჩვენება. ნანა ნებიერიძის საოჯახო ალბომის დათვალიერებისას მის ოჯახზე ბევრი საინტერესო და სევდიანი ამბები შევიტყვეთ.

რატომ ცხოვრობდა ბებია სხვისი სახელითა და გვარით

- მამა ქართველი მყავს, დედა - რუსი. მამა მძლეოსანი გახლდათ, დედაც ყოფილი სპორტსმენია, საკმაოდ პერსპექტიული წყალში მხტომელი იყო. ერთმანეთი ფიზკულტურის ინსტიტუტში გაიცნეს. კურსელები იყვნენ. დედა, ანა კალიაგინა-ნებიერიძე, საქართველოში დაბადებული რუსია. დედასა და მამას სურათი რამდენიმე წლის წინ აქვთ გადაღებული.



- დედა წარმოშობით რომელი ქალაქიდანაა?
- ჩემს რუს წინაპრებთან დაკავშირებით ძალიან სევდიანი ამბავი ვიცი. ბებია მყავდა გრაფინია ანა რაზუმოვსკაია. როდესაც რევოლუცია მოხდა, ბებიაჩემი დედამ ვაგზალზე დატოვა და უთხრა, მოვა ქალი და მას გაჰყევიო, როცა ყველაფერი დაწყნარდება, აუცილებლად მოგძებნიო.… მოხდა ისე, რომ ბებიაჩემის მშობლები ბოლშევიკებმა დახოცეს. ბებია იზრდებოდა მოსამსახურე ქალთან, რომელსაც დედის თხოვნით გაჰყვა. ის ქალი უკრაინელი იყო და ბებიას თავისი გვარი და სახელი მისცა. ბებია ნახევარი სიცოცხლე სხვისი გვარითა და სახელით ცხოვრობდა. გალია სიბარენკა ერქვა. წლების განმავლობაში ეშინოდა ნამდვილი ვინაობის გამხელის, ვერ ამბობდა, რომ სინამდვილეში ანა რაზუმოვსკაია იყო. წლების გასვლის შემდეგ უკვე აღარ იყო საშიში ამ ყველაფერზე ხმამაღლა ლაპარაკი.


- რუსეთში გყავთ ნათესავები?
- არავინ არ გვყავს. ბებიას ახსოვდა, რომ და ჰყავდა. სულ მეუბნებოდა, და მყავს და შეიძლება, მისი შთამომავლები სადმე ცხოვრობდნენო.
- რამდენი დედმამიშვილი გყავთ?
- და-ძმა მყავს. დედასა და დედმამიშვილებთან ერთად ფოტო კოჯორშია გადაღებული. პირველი ოჯახში დაიბადა ჩემი და, ნატალია ნებიერიძე. ის ექიმი გახლავთ. ახლა ამერიკაში ცხოვრობს. ამერიკელი სიძე მყავს. დრეინ მაიერსი. ორი შვილი ჰყავთ.



- მათ ხშირად ნახულობთ?
- ჩემი და ყოველთვის ამერიკაში ცხოვრებაზე ოცნებობდა. ოცნება აუსრულდა. ახლა ძალიან ენატრება ყველაფერი და ყოველ ზაფხულს ჩამოდის თბილისში. ძმა - თამაზ ნებიერიძე, დაოჯახებულია. ჰყავს მეუღლე, საოცრად ლამაზი რძალი მყავს. მათაც ორი შვილი ჰყავთ - დევიდ და ნანა ნებიერიძეები. მამიდის სახელი დაარქვეს.
- ბავშვობას დავუბრუნდეთ. მომდევნო ფოტო, როგორც მითხარით, პირველ კლასში გაქვთ გადაღებული. რომელ სკოლაში სწავლობდით?
- ვსწავლობდი მოსკოვში, კიევში, რადგან შეკრებებზე ვიყავი, სულ მიწევდა ორი-სამი თვე მოსკოვსა და კიევში ცხოვრება და იქვე დავდიოდით სკოლაში. რუსეთში დაახლოებით 27 წელი ვიცხოვრე. რადგან დედა რუსი მყავდა, სახლში ძირითადად რუსულად ვლაპარაკობდით. იმიტომ მაქვს რუსული აქცენტი. ჩემი შვილი ბრწყინვალედ ფლობს ქართულს. ქართული სკოლა დაამთავრა.
- მშობლების საქმიანობა დედმამიშვილებიდან მხოლოდ თქვენ გაგიგრძელებიათ, მიუხედავად იმისა, რომ როგორც ვიცი, ძალიან გინდოდათ მსახიობობა.
- მსახიობობა ჩემი ოცნება იყო. დავდიოდი მუსიკაზე, ფორტეპიანოზე, იმდენად კარგად ვსწავლობდი და ისე მომწონდა ის ყველაფერი, რომ მუსიკალურ სკოლაში მესამე კლასიდან მეხუთე კლასში გადამიყვანეს. იგივე სიტუაცია იყო სპორტში. ძალიან სწრაფად გავხდი ევროპის ჩემპიონი. სპორტსა და მუსიკას შორის არჩევანი უნდა გამეკეთებინა. ავირჩიე სპორტი. ჩემი ბავშვობის ოცნება კი გასულ წელს ამისრულდა, როდესაც ''ყინულის დედოფალში''ვითამაშე. ახალ წელს ვთამაშობდი დედოფალს და უბედნიერესი ვიყავი.
- ბევრს მოგზაურობდით და ბევრს ვარჯიშობდით. ეს ყველაფერი სწავლაში ხელს არ გიშლიდათ?
- ძალიან მკაცრი მამა მყავდა. მახსოვს, დილით სკოლაში მივდიოდი, მერე ვარჯიშზე და ვარჯიშიდან რომ ვბრუნდებოდი, ვმეცადინეობდი და თუ რამის სწავლას ვერ მოვასწრებდი, დილის ხუთ საათზე მაღვიძებდა და ვაგრძელებდი გაკვეთილების მომზადებას. ასე გრძელდებოდა წლების განმავლობაში. მამა სულ მაკონტროლებდა. დედაზე მკაცრი იყო. ძალიან კარგად ვსწავლობდი და მიყვარდა ბიოლოგია. კიდევ კითხვა მიყვარდა. შეკრებებზე დასვენების დროს სულ ვკითხულობდი. ჩვენს დროს კომპიუტერი და მობილური არ იყო და ჩემი თაობის ბავშვებისთვის კითხვა გართობის ერთ-ერთი საშუალება იყო. ძალიან მიყვარს დოსტოევსკი.

როგორ გახდა ''მის ბოიარდი''

- ცურვა რა ასაკში ისწავლეთ?
- არც მახსოვს, ცურვა როდის ვისწავლე. მიმიყვანეს აუზზე, ჩავხტი წყალში და გავცურე. ცამეტი წლის ვიყავი, როდესაც ყველაზე რთული პროგრამა მქონდა. სამნი ვიყავით მსოფლიოში, რომლებიც იმ პროგრამას აკეთებდნენ, მე, რუსი და ჩინელი გოგონა. ძალიან რთულ ილეთებს ვასრულებდით და საერთოდ არ მეშინოდა. დღეს რომ ათმეტრიან კოშკურაზე ავიდე, ალბათ შიშით გული გამისკდება და სიმართლე გითხრათ, არც ვაპირებ იქ ასვლას. ჩემი მოღვაწეობის დრო ამ სპორტში დამთავრდა.



- სპორტის გარდა კიდევ რას საქმიანობდით?
- ვმუშაობდი ტელეკომპანია ''ალანიაში'', მერე გადავედი ''პირველ არხზე'', ერთი წელი ვიმუშავე, მალევე გაიხსნა ტელევიზია ''პირველი კავკასიური,''სადაც საინფორმაციო გამოშვებისა და სპორტული გადაცემა ''ექსტრა ტაიმის''წამყვანი ვიყავი. ფოტო იმ პერიოდშია გადაღებული. ჟურნალისტიკის ფაკულტეტი არ დამიმთავრებია, მაგრამ იმდენად მომწონდა ეს ყველაფერი, რომ უცბად ავითვისე. ახლა, შეიძლება ითქვას, ჟურნალისტიკა ჩემი მეორე პროფესიაა, ძალიან მიყვარს.
- ტელევიზიაში დაბრუნებას არ აპირებთ?
- ჯერჯერობით არა, რადგან სხვა გეგმები მაქვს.
- იყავით ''ფორდ ბოიარდში'', მომდევნო ფოტო სწორედ ამ პროექტში გაქვთ გადაღებული. თქვენი გუნდი რა შედეგით დაბრუნდა საქართველოში?
- ჩვენმა გუნდმა გუნდურ შეჯიბრებაზე მეოთხე ადგილი აიღო. მე კი ''მის ბოიარდად''დამასახელეს, რაც ძალიან გამიკვირდა და, რა თქმა უნდა, გამიხარდა.



- რა დავალებების შესრულებამ მოგიწიათ?
- თავიდან, სანამ წავიდოდი, რასაკვირველია, ანკეტაში დავწერე, რომ ვიყავი ევროპის ჩემპიონი და სიდნეის ოლიმპიადის მონაწილე წყალში ხტომაში, ამიტომ წყალს არც კი მიმაკარეს. შემასრულებინეს სუპერექსტრემალური დავალება. თხიმალურებით გავიარე ძალიან მაღლა გაჭიმულ თოკზე. როდესაც კარის წინ დგახარ და არ იცი, რა გელოდება, ძალიან რთულია. ძალიან კარგი გუნდელები მყავდა, ''ისტერნ პრომოუშენის''ბიჭები. ისინი დიდი ხანია, ჩემი მეგობრები არიან. ახალგაზრდობაში წყალბურთელები იყვნენ.
- წახვიდოდით კიდევ ამ პროექტში?
- ახლა უფრო თამამად წავალ, იმიტომ, რომ დაახლოებით მაინც ვიცი, რა მელოდება.

''შენ არ იცი, რა მაგარი მამა მყავსო''

- პირველად როდის შეგიყვარდათ?
- პირველად ჩემი მეუღლე შემიყვარდა ძალიან. მიშა ჯაფარიძე, რომელიც ჩემი შვილის, ნინას მამაა. თვრამეტი წლისანი ვიყავით, როცა დავქორწინდით, ძალიან მალე დავშორდით. მიზეზს ყველა მეკითხება. ალბათ, არანაირი მიზეზი არ ყოფილა. მთავარი იყო ჩვენი ასაკი და გასული საუკუნის 90-იან წლები, როდესაც არც გაზი იყო ქვეყანაში, არც წყალი და არც სინათლე - ასეთი სიტუაცია ახალგაზრდებზე მოქმედებს. ვერანაირ პერსპექტივას ვერ ვხედავდით. გადავწყვიტეთ, ორივე ჩვენი გზით წავსულიყავით, ახლა ამერიკაში ცხოვრობს. სამწუხაროდ, არანაირი კონტაქტი არ გვაქვს. არც შვილთან ურთიერთობს. ორი წლის წინ ნინა ამერიკაში გავუშვი. ნინა ოთხი წლის იყო, როცა მამამისი ამერიკაში წავიდა, ორი წლის წინ 16 წლის გახდა და ამ წლების განმავლობაში მამა არც ერთხელ არ უნახავს. როცა ნინამ ამერიკიდან დამირეკა, პირველი შემდეგი ფრაზა მითხრა: შენ არ იცი, რა მაგარი მამა მყავსო. ცოტა გული მეტკინა. მაგრამ მაინც ბედნიერი ვიყავი, რომ ამდენი წლის მერე მაინც ნახა მამა. ფოტოზე ნინა მამამისთან ერთადაა. როგორც ამბობენ, მშობლებს არ ირჩევენ. ერთად ვართ თუ ცალ-ცალკე, ეს მშობლების პრობლემაა და არა შვილების. მეუღლეს რომ დავშორდი, ოცი წლის ვიყავი. მეგონა, ჩემი ცხოვრება დამთავრდა და ვფიქრობდი, რა უნდა გავაკეთო-მეთქი. წინ საერთოდ ვერაფერს ვხედავდი. ჩიხში ვიყავი. ერთადერთი, რასაც კარგად ვაკეთებდი, ეს იყო ჩემი საქმე. ისევ დავიწყე ვარჯიში, მეყო ნებისყოფა და ოლიმპიადის ლიცენზია ავიღე.



- ყოფილ მეუღლეს აქვს მეორე ოჯახი?
- არა. მარტოა. ჩემს მერე მეუღლე არ ჰყოლია. არ ვიცი, რატომ. ეს მისი ცხოვრებაა. არც ვეკითხები და ალბათ, არც უნდა მაინტერესებდეს. მასზე შემიძლია მხოლოდ ის ვთქვა, რომ ის ნინას მამაა.



- ნინას მამამისთან კიდევ აქვს ურთიერთობა?
- არა, მას შემდეგ, რაც დაბრუნდა ამერიკიდან, აღარ კონტაქტობენ. თავისებური ადამიანია. ნინა ჩემი ინიციატივით გავუშვი, რომ მამა ენახა. ვხედავდი და ვგრძნობდი, როგორი განცდა ჰქონდა ბავშვს მამის მიმართ. შემიძლია ვთქვა, რომ ნინა თავისი მინუსებით და პლუსებით მთლიანად ჩემი გაზრდილია. ვეცადე და ყველაფერი გავაკეთე იმისათვის, რომ მამა გაეცნო და თვითონ მიმხვდარიყო, ვინ არის და როგორია. მომდევნო ფოტოზე ნინაა. ჟურნალისტიკის ფაკულტეტზე სწავლობს. უნდა, მოგვიანებით სწავლა ამერიკაში გააგრძელოს.

''სიგიჟემდე მენატრება ის დრო...''

- მეორედ როდის შეგიყვარდათ?
- ჩემთვის მეუღლესთან დაშორება იმდენად მტკივნეული იყო, რომ ძალიან დიდი ხანი არავინ მყვარებია. იყო რაღაც გრძნობები და მოწონებები, მაგრამ სიყვარული და თავის დაკარგვა არ ყოფილა. ახლა მიყვარს. ამწუთას ჩემ გვერდით არის ადამიანი, რომელიც ძალიან მიყვარს და ჯერჯერობით ბედნიერი ვარ. ვცდილობ, ერთი დღით ვიცხოვრო. ცხოვრებას ვგეგმავ და გრძნობებს - ვერა. ალბათ დადგება დრო, როცა მასზე უფრო ბევრს ვილაპარაკებ და მის ვინაობასაც გავამხელ.
- ''ცეკვავენ ვარსკვლავებიდან''თქვენს წამოსვლას სკანდალი მოჰყვა. ამბობდნენ, რომ გოჩა ჩერტკოევი ''გერჩოდათ''. დღეს ამაზე რას ფიქრობთ?
- ძალიან მინდოდა ფინალში მოხვედრა, სამწუხაროდ, ასეთია ცხოვრება. ვერაფერს შევცვლი. სიმართლე გითხრათ, არ მინდა გოჩა ჩერტკოევზე ლაპარაკი. რაც სათქმელი იყო, ღია ეთერში ვთქვით. მე ვაჩვენე, რისი გაკეთება შემიძლია. გავიცანი არაჩვეულებრივი ადამიანი ლევან ახვლედიანი, უამრავი ძალიან მაგარი ხალხი და გამარჯვებულებს მინდა, გულით მივულოცო.


- ''ყინულის დედოფალში''მონაწილეობით ოცნება აისრულეთ. რას იტყვით, გამოგივიდათ მსახიობობა?
- ძალიან მოკლე დროში ბევრი რამის მოსწრებას ვახერხებდი. ვიყავი ''ცეკვავენ ვარსკვლავებში''და დავდიოდი ''ყინულის დედოფლის''რეპეტიციაზე. საინტერესო პერიოდი იყო. ძალიან ვიღლებოდი. დრო საერთოდ არ მქონდა. ერთმა მეგობარმა მითხრა, კარგი, რა პრობლემაა. ცეკვავ და რა არის ამაში რთულიო. კინაღამ მოვკალი. ჭამის დროც არ გვქონდა. ახლა ნელ-ნელა აზრზე მოვედი. მგონი, მსახიობობისთვის თავი ცუდად არ გამირთმევია.


- შეგიყვარდათ ცეკვა?
- ცოტა ხნის წინ ველაპარაკე ჩემს მეწყვილე ლევან ახვლედიანს და ვიწყებ მის სტუდიაში ცეკვაზე სიარულს. სიგიჟემდე მენატრება ის დრო, როდესაც ვცეკვავდი.

მერი კობიაშვილი
ჟურნალი ''რეიტინგი''