თიკა ჯამბურია: "ბექა ხოფერიას შემდეგ ჩემს ცხოვრებაში იყო ადამიანი, ვის მიმართაც დიდი სიმპათია მქონდა"

მომღერალი თიკა ჯამბურია ყოფილ ქმარზე, ბექა ხოფერიაზე ლაპარაკმა იმდენად დაღალა, რომ ტყუილი გამოაცხო, თითქოს უცხოეთში მცხოვრებ ქართველ ბიზნესმენზე დაინიშნა. მარჯვენა ხელის არათითზე ბეჭედიც გაიკეთა, სურათი გადაიღო და სოციალურ ქსელში გაავრცელა. ამ ნაბიჯს მართლაც მოჰყვა აჟიოტაჟი. დაიწყო ძიება, ვინ შეიძლებოდა ყოფილიყო საიდუმლოებით მოცული საქმრო... ახლა კი თიკა ამბობს, რომ ამით სურდა, სამაგიერო გადაეხადა იმ ჟურნალისტებისთვის, რომლებიც მის პირად ცხოვრებაში იქექებიან და არარეალურ ჭორებს ავრცელებენ.
22 წლის მომღერალმა 3 წლის წინ დაასრულა ბექა ხოფერიასთან ქორწინება. მათ ახლა მხოლოდ შვილი, პატარა ნინა აკავშირებთ. მიუხედავად იმისა, რომ ორივეს ცხოვრებაში მუდმივად არის სიახლეები, მაინც ხალხის ინტერესი ისევ ყოფილი ცოლ–ქმრის გარშემო ტრიალებს. თიკამ კი ცნობისმოყვარეებს პროვოკაციით უპასუხა და თავისი საქციელი დაწვრილებით "სარკესთან" განმარტა:
– თუ რატომ მოვატყუე ჟურნალისტები, გიპასუხებთ: იმიტომ, რომ ბოლო სამი წლის განმავლობაში ჩემი საუბარი ნებისმიერ მასმედიის საშუალებაში ჩემი პირადი ცხოვრების განხილვით იწყებოდა და მთავრდებოდა. ჩემი ქორწინება 3 წლის წინ შეწყდა. ხალხიც ხედავს, რომ ჩემი და ბექას თანაცხოვრება დასრულდა და არც აღარასდროს გაგრძელდება. ძალიან დიდი მადლობა იმ ადამიანებს, ვისაც სურვილი ჰქონდათ, რომ მე და ბექა შევრიგებულიყავით. ბევრი იჩენდა ამ ინიციატივას, მაგრამ... მეც დავიღალე და ხალხსაც ძალიან მობეზრდა ჩემი პირადი ცხოვრების განხილვა. ამის გამო გადავწყვიტე, რომ ჟურნალისტებისთვის, რომლებიც ცხვირით ბოლომდე არიან ჩამძვრალი ჩემს ცხოვრებაში, "სიურპრიზი" მომეწყო. ვფიქრობდი, ჩემი ეს საქციელი მათთვის მძიმე გადასატანი არ იქნებოდა, მაგრამ ასე არ აღმოჩნდა, ზოგს ეწყინა. არადა მეც მწყინდა, როცა ჩემ შესახებ უამრავ ცრუ და არასასიამოვნო ფაქტს აშუქებდნენ.
– ჟურნალი "სარკე" თქვენთან ყოველთვის საუბრობდა როგორც პირადზე, ასევე შემოქმედებით ცხოვრებაზე. გამოდის, ჩვენზეც განაწყენებული ხართ.
– არა, ჟურნალ "სარკეზე" გაბრაზებული არ ვარ. თუ გინდათ, ინტერნეტში გაჩვენებთ ყველა ჩემი ინტერვიუს სათაურს თუ შესავალს, რომელიც ჩემი ყოფილი ქმრის, ბექა ხოფერიას ხსენებით იწყება. ამ ბოლო დროს ასეთი სათაურიც იყო, თიკამ სიმღერა ყოფილ ქმარს მიუძღვნაო. რატომ წერენ ამას? მე ხომ არასდროს მითქვამს, რომ ჩემი რომელიმე სიმღერა ყოფილ ქმარს ეძღვნებოდა? ბექას შემდეგ ჩემს ცხოვრებაში იყო ადამიანი, რომლის მიმართაც დიდი სიმპათია მქონდა და ამის შესახებ დაიწერა კიდეც, მაგრამ შემდეგ მაინც ბექას მიუბრუნდნენ.
22 წლის ვარ, პირადი ცხოვრების აწყობა მინდა და ეს ყველაფერი ძალიან მიშლის ხელს. როცა მოვიტყუე, რომ დავინიშნე, ინტერნეტი ჩემი გათხოვების ამბით აჭრელდა და იქვე, გვერდით, დამონტაჟებული ჰქონდათ ბექას სურათი... ეს უბრალოდ სისულელეა! წარმოგიდგენიათ, ეს ინფორმაცია მართალი რომ ყოფილიყო, ჩემი ქმრისა და მისი ოჯახისთვის ეს სურათები და სტატიები როგორი წასაკითხი და სანახავი იქნებოდა?
თბილისში რთულია განათხოვარი ქალის სტატუსი ატარო, პლუს, საზოგადოება მცნობს და ჩემთვის ეს ორმაგი სტრესია. ყოველ წუთში ჩემი ყოფილი ქმრის სახელსა და ფოტოებს მიტრიალებენ. რითი არ უნდა დამთავრდეს ჩვენზე ლაპარაკი?! მორჩა, გავშორდით ერთმანეთს! ვის არ დანგრევია ოჯახი, პირველი ვარ თუ უკანასკნელი ვიქნები?! ისეთი შთაბეჭდილება მრჩება, ხალხს ისე არაფერზე უნერვიულია, როგორც ჩვენს განქორწინებაზე. ყელში ამოვიდა ეს თემა, ამაზე ლაპარაკით კარიერაშიც ხელი მეშლება და პირად ცხოვრებაშიც.
– და გადაწყვიტეთ, სამაგიერო გადაგეხადათ ჟურნალისტებისთვის.
– ჩვენ ხომ ჰოლივუდში არ ვცხოვრობთ? თბილისი ძალიან პატარა ქალაქია, ჭორიკნების ბუდეა. ეს ყველაფერი იმ ჟურნალისტებს ეძღვნებოდა, რომლებიც ჩემი პირადი ცხოვრების შესახებ თავიანთი ინტერპრეტაციებით წერდნენ. ვიცი, ჟურნალისტებთან კონფლიქტი არ შეიძლება, მაგრამ მივხვდი, რომ იმ ეტაპზე ეს გარდაუვალი იყო. შეიძლება ზოგმა იფიქროს, რატომ არ უნდა ამაზე ლაპარაკი, ესეც ხომ ერთგვარი პიარიაო, მაგრამ აღარ შემიძლია! ნუთუ შეიძლება 22 წლის გოგო ყოფილი ქმრით და მისი პირადი ცხოვრებით ვიყო აქტუალური, როცა ძალიან ბევრს ვშრომობ იმისთვის, რომ კარიერაში წარმატებული გავხდე?!
– მერე რა გამოვიდა, ამით რამე შეცვალეთ და თქვენზე და თქვენს ყოფილ ქმარზე აღარ ილაპარაკებენ?
– ყოველ შემთხვევაში, ხალხს ეცოდინება, რომ მე არ ვარ ის ადამიანი, რომელიც ამ თემაზე თავისი ინიციატივით ლაპარაკობს ან ბექასთან შერიგება სურს. მას თავისი ცხოვრება აქვს და შეიძლება არც უნდა ამ საკითხის ასე საჯაროდ განხილვა. აღარ მსურს, ერთხელ და სამუდამოდ დავამთავრე ბექაზე ლაპარაკი!
– ნიშნობის ბეჭდის ფოტოზე თქვენმა ყოფილმა დედამთილმა ხათუნა ხოფერიამ კომენტარი გააკეთა. მან ბეჭედი დაგიწუნათ და ისიც დასძინა, რომ სამი ბრილიანტის ბეჭედი გაჩუქათ ნიშნობის დღეს. ეს პიარი ყოფილ დედამთილთან წინასწარ გქონდათ შეთანხმებული თუ ისიც სხვებივით მოტყუვდა?
– ხათუნამ ამ ყველაფრის შესახებ წინასწარ იცოდა. მან ისევე იხუმრა, როგორც მე, მაგრამ არ გვეგონა, ამ ამბავს ამხელა გამოხმაურება თუ მოჰყვებოდა. უბრალო ბეჭედი, რომელიც წლებია ჩემს ზარდახშას ამშვენებს, მარჯვენა ხელზე გავიკეთე და ფოტო გადავიღე. ეს ყველაფერი თავიდან ბოლომდე მე დავგეგმე. ეს არ იყო პიარი, პირიქით, პირადი ცხოვრებით პიარმა დამღალა.
– რეალურად რა ხდება თქვენს პირად ცხოვრებაში?
– არც არაფერი, საქმეზე ვარ ორიენტირებული. საპროდიუსერო ცენტრ "სტატუს სტუდიოსთან" გავაფორმე ხელშეკრულება, ისინი ჩემს შემოქმედებას თავიდან ბოლომდე შეფუთავენ. ბავშვობა მახსენდება, როცა ჩემს კარიერაზე პროდიუსერი ნატო დუმბაძე ზრუნავდა. მინდა, საქართველოში ყველა მომღერალს თუ მსახიობს ჰყავდეს პროდიუსერი და ტექნიკურ მხარეებზე მან იზრუნოს. მომღერალმა კი მხოლოდ სცენაზე იმღეროს და თავისი საქმე გააკეთოს.

– თქვენთან ერთად სხვა მომღერლებიც არიან ამ საპროდიუსერო ცენტრში გაერთიანებული?
– მათი გუნდის წევრი ჯერჯერობით მხოლოდ მე ვარ.

– ჟურნალისტებს გაუბრაზდით, რომ თქვენი პირადით ინტერესდებიან და არა – შემოქმედებით. გვიამბეთ, რა სიახლეები გაქვთ სასიმღერო კარიერაში.
– უამრავი სიახლე მაქვს. ირინა ბაირამაშვილთან და მარიამ ლიკლიკაძესთან ერთად სიმღერა ჩავწერე, რომლის პრემიერაც ერთ–ერთ შოუში შედგა.

– ამაზე "სარკეში" პრემიერამდე ვწერდით.
– კი, მახსოვს. გარდა ამისა, "თეატრალურ კვარტეტთან" ერთად ჩავწერე კომპოზიტორ ქეთი გაბისიანის სიმღერა, მაგრამ ეს არ ნიშნავს, რომ ამიერიდან ქალაქურ ჟანრში ვიმღერებ. ეს მორიგი ექსპერიმენტი იყო. მართლაც ძალიან ლამაზი სიმღერა გამოგვივიდა. ასევე სოლო სიმღერა ჩავწერე, რომელიც რეპერმა მასტერმა დამიწერა, მისი სახელწოდებაა "არ მჯერა".
– რომლის ტექსტიც ისევ და ისევ მოგვაგონებს ბექასთან განშორების შემდეგ გადატანილ განცდებს...
– ეს სიმღერა ბექას არ ეძღვნება! უბრალოდ, ისეთი ტექსტი შეიქმნა, რომელიც სიმღერას ძალიან მოუხდა. მასტერთან ერთად ჩავწერე დუეტი, უახლოეს 10 დღეში კი კლიპის გადაღებები დაიწყება. მე და ირინა ბაირამაშვილმა საბავშვო სტუდია გავხსენით, რომელსაც ასე ჰქვია – "დო რე მი".
– "სარკემ" ამის შესახებაც დაწერა...
– ახლა ბავშვებს ვამზადებთ იმისთვის, რომ სატელევიზიო პრეზენტაცია მოვაწყოთ. ახლო მომავალში კიდევ სხვა სიახლეებს უნდა ელოდოთ ჩემგან.
– საზღვარგარეთიდან ხომ არ გაქვთ შემოთავაზება?
– რამდენადაც ვიცი, ჩემი საპროდიუსერო ცენტრი ამ საკითხზეც მუშაობს. მეზობელი ქვეყნებიდან რამდენიმე შემოთავაზება მაქვს, მაგრამ ჯერ არ დავაკონკრეტებ.
– რა ვალდებულებები გეკისრებათ საპროდიუსერო ცენტრთან ხელშეკრულების გაფორმების შემდეგ?
– მნიშვნელოვანი არაფერი. ერთის თქმა კი თამამად შემიძლია, რომ მე ვარ მომღერალი, რომელსაც აქვს ორი ალბომი, სადაც შესულია სხვადასხვა კომპოზიტორის 35 სიმღერა და არა – ქავერვერსიები. ეს ფაქტი ძალიან მახარებს.

– თქვენი კოლეგების მსგავსად, თქვენც მღერით კლუბში?
– არა, რადგან თბილისში არ არის ისეთი კლუბი, სადაც სტაბილურად ვიმღერებდი. რესტორანში კი არ მინდა სიმღერა, მხოლოდ კორპორატიულ საღამოებზე გამოვდივარ.
– გარეგნობაში რაღაცეები შეცვალეთ, თმა ქერად შეიღებეთ, ზედმეტი კილოგრამები დაიკელით. კიდევ რამეს ხომ არ აპირებთ?
– სასურველ წონამდე რომ მივიდე, რამდენიმე კილოგრამი მაქვს დასაკლები. ახალი წლის დღეებში დიეტის დარღვევა მომიხდა. თვის ბოლოს კლიპის გადასაღებად ვემზადები, ამიტომ აქტიურად ვვარჯიშობ, მინდა, კარგად გამოვიყურებოდე. იმიჯი პროდიუსერების ინიციატივით შევიცვალე, თმა შევიჭერი და ქერად შევიღებე. საკუთარი თავი ახალ ვარცხნილობაში ძალიან მომწონს. რაც შეეხება სამოსს და გარდერობს, ყველანაირი სტილის ტანსაცმელი მაქვს. ჩაცმის საკითხებზე აზრს ხშირად საშა პრიშვინს ვეკითხები. ახალი კლიპის გადაღების დროსაც მას მივმართავ.

– შემოსავალი გყოფნით, რომ სამოსში, კოსმეტიკაში თუ ოჯახის საჭიროებებში თავისუფლად დახარჯოთ?
– საქართველოში ადამიანი მხოლოდ მომღერლობით ვერ იცხოვრებს, თითქმის ყველა ჩემი კოლეგა დამატებით მუშაობს. სადღესასწაულო დღეები მომღერლისთვის გაცილებით შემოსავლიანია. ჩემი ჰონორარი თავიდან ბოლომდე ოჯახს ხმარდება. შეიძლება ითქვას, რომ სახლში შემომტანიც მე ვარ და გამტანიც. სამწუხაროდ, ჩემი მშობლები არ მუშაობენ, ასე რომ, ოჯახში ერთადერთი დასაქმებული მე ვარ. ნინა უკვე დიდი გოგოა, ბევრი რამ სჭირდება. როცა საშოპინგოდ მივდივარ, ბავშვთა სექციისკენ გამირბის თვალი და მთელ ჩემს ფულს მის ტანსაცმელსა და საჭირო ნივთებში ვხარჯავ.
– ნინას გაზრდაში ვინ გეხმარებათ?
– დედა, რომელსაც, არ ვიცი, მადლობა როგორ გადავუხადო. ჩემი დები ხშირად მეუბნებიან, მგონი, დედისერთა ხარო, რადგან დედა თავიდან ბოლომდე მე მეკუთვნის, ყველაფერს ის მახსენებს, დიეტის დაცვაში ხელს მიწყობს, მან იცის, რა დროს რამდენი გრამი უნდა ვჭამო. ყველანაირად მიდგას გვერდში. პატარაობიდან მას დავყავდი მასწავლებლიდან მასწავლებელთან. ბევრი გააკეთა ჩემთვის და ახლა დადგა დრო, კარიერა ისე ავიწყო, რომ მშობლებს თავად მივხედო. ამისთვის ბევრს ვიშრომებ და თავს არ დავზოგავ.
ლანა კიკნაძე, ჟურნალი სარკე