ეკა კვალიაშვილი ახალ მუსიკალურ პროექტ „ორ ვარსკვლავში“ იმღერებს

„დეზინფექცია ჩავატარე სახლში, დღე-დღეზე პატარას ველოდებით, ბახილებს თუ ჩაიცვამთ, მადლობას გეტყვით, - გვითხრა სახლის კართან ეკა კვალიაშვილმა. 46 წლის მომღერალი ბებიობისთვის მზად არის, სავაჭრო ცენტრებში ბავშვების სექციებს სტუმრობს. ნუკა ბიჭს ელოდება.

- ეკა, დიდი აჟიოტაჟი ატეხეთ საახალწლო კონცერტთან დაკავშირებით. გვახსოვს ბრიფინგები, სადაც მომღერლები საპროტესტო გამოსვლებითაც კი იმუქრებოდით. რა ეტაპზეა ეს პროცე-სი?
- იურიდიულ ეტაპზეა ჩვენი პროტესტი. ამის მეტს ვერაფერს გეტყვით.
- სარჩელი შეიტანეთ სასამართლოში?
- ამის მეტს ჯერჯერობით ვერაფერს გეტყვით.
- პროტესტის ძირითადი მიზეზი რა არის?
- შეურაცხყოფა, შეურაცხყოფილი ვართ მომღერლები ამ ქალის ვიგინდარული გამოსვლებით, უზრდელური დამოკიდებულებით ადამიანების მიმართ. შეიძლება, პირადი განწყობა გქონდეს ვინმეს მიმართ, მაგრამ ამით ხალხი არ უნდა შეაწუხო. მეც არ მიყვარს მარინა ბერიძე, მეტსაც გეტყვით, ვერ ვიტან, მაგრამ როცა საჯარო პირი ვარ, არ მაქვს უფლება, მას სახალხოდ შეურაცხყოფა მივაყენო, მისი საჯარო შეურაცხყოფების ფაქტები არსებობს, რომელიც თან დაერთვება საქმის მასალებს. კვალიაშვილი შეუმდგარი მომღერალიაო, ვინ არის კახა კუხიანიძე, არ ვიცნობ, არ გამიგიაო... კულტურის სამინისტროში ხელმძღვანელ თანამდებობაზე რომ მუშაობ, შეიძლება, არ იცოდე, ვინ არის კახა კუხიანიძე?!
- თქვენი პროტესტის მიზეზი მხოლოდ მარინა ბერიძეა თუ ზოგადად, შოუბიზნესში შექმნილი კრიზისი?
- აქედან დავიწყეთ, იმიტომ, რომ ეს ქალი მთელი ცხოვრება ცუდად გვეხება. როცა იქნება, ხომ უნდა დამთავრდეს?! ხომ გინახავთ მედიცინის ემბლემა, გველი რომ არის ჭიქაზე შემოხვეული და შხამს რომ აწვეთებს შიგნით... რა ქნას, ეგეთი დაიბადა.
- მარინა ბერიძე ამბობს, რომ სიებს თავად არ ადგენს.
- სიებსაც ადგენდა, როცა „არტ-იმედში ვიყავით და გადასარევად უფუჭებდა საქმეს ადამიანებს. ამის ფაქტები არსებობს. ზოგადად, საქართველოში ზეპირსიტყვიერად წყდება საკითხები. ქაჯი არავინ არის, შენს დაბლოკვას ხელი მოაწეროს.
- ნახე საახალწლო კონცერტი, რომელზეც ვერ მოხვდით?
- ვნახე. ეს იყო ქართული სისხლის ყივილი (იცინის). ეს რა ნახა ჩემმა თვალე-ბმა და რა მოისმინა ჩემმა ყურებმა!… მაგის იმედი არ ჰქონდეს მარინა ბერიძეს, რომ დიდი ხანი შეადგენს სიებს.
- დღეს რას აკეთებს ეკა კვალიაშვილი?
- სახლს ვამზადებ შვილიშვილისთვის. ნუკა უკვე დღე-დღეზე ელოდება ბავშვს. შეიძლება, ჩემთან მოისურვოს მოსვლა, არ ვიცი, ყოველი შემთხვევისთვის, სახლს დეზინფექცია ჩავუტარე. სანამ ნუკა სამშობიაროში იქნება, მის სახლშიც იმავეს გავაკეთებ. არ არის გამორიცხული, თქვენი ჟურნალის გამოსვლის დღეს ჩვენი ბიჭი უკვე დაბადებული იყოს. ყველაზე დიდი საქმე დღეს ჩემთვის ეს არის.
- სახელი შერჩეული აქვთ უკვე?
- რომ დავინახავ, მერე გადავწყვეტო, ასე ამბობს ნუკა. ჯერ ვერ შეთანხმდნენ.
- ზედმეტად ახალგაზრდულად გამოიყურები ბებიობისთვის...…
- კარგია, ბავშვი რომ წამოიზრდება, გაუხარდება, ბებია კარგად რომ გამოიყურება, მაგას რა სჯობს. მაგ პერიოდისთვის ჩვენ აქ არ ვიცხოვრებთ.
- სად იცხოვრებთ?
- სადაც ყველაზე კარგად ვიქნებით.
- არაერთხელ აგიცრუვდა გული საქართველოში ცხოვრებაზე...
- ახლა ინტერესიც კი დავკარგე. ერთ რამეს მივხვდი, ჩემთვის, შენთვის და სხვისთვის არაფერი არ ხდება ამ ქვეყანაში. აღარ მინდა, რა. ხელოვანი ვარ და მჭირდება რეალიზება. მყავს უნიჭიერესი შვილი, რომლის ხმაც მინდა, მთელმა მსოფლიომ გაიგოს. და არ მინდა აქ ვიღაც ბოღმებმა საკუთარი ინტერესებიდან, გემოვნებიდან თუ უგემოვნობიდან გამომდინარე, კონცერტს ეტყობოდა რა გემოვნებაც აქვთ, გზა გადაუღობონ. მარინა ბერიძე ბევრს ილა-პარაკებს, კონცერტთან დაკავშირებით მე არაფერ შუაში ვიყავი, სხვამ გააკეთაო, მაგრამ მერე ის სხვა აყეფდება და ნახავს. ვინ გააკეთა ის კონცერტი, ვინ, გამაგებინეთ, ხალხო! იცი რა, „იუთუბზე ჩავრთავ ბიონსეს თავის ცეკვებიანად და ვუყურებ, თუ მომინდება. არ ვამბობ, რომ ცუდია ის ბავშვი ან ცუდად იმღერა და იცეკვა, არა, სწორად მინდა გამიგოთ. ქართულ საღამოს თუ აკეთებ, იმღერე, ადამიანო, ქართულად! ათი წლის წინ კონცერტები იმართებოდა, კომპოზიტორები სიმღერებს წერდნენ, ხალხი დადიოდა კონცერტებზე, ნუთუ არ შეიძლება, ავიღოთ ის სიმღერები, გავარემიქსოთ, შოუ დავდგათ და ახალ თაობას ვაჩვენოთ. ასე აკეთებს ყველა. ვანდერი თავისი შავი გრიმით, არ შემიძლია! მრცხვენია, ისეთი შეგრძნებაა, თითქოს ჩვენი არაფერი არ გაგვაჩნია.
- არაერთი მუსიკალური პროექტი ვნახეთ ქართულ ტელესივრცეში. არც ერთის ჟიურის წევრობა არ შემოგთავაზეს?
- არა, სად შემიძლია მე შეფასება (იცინის)? მაგდენი სად ვიცი, შემომთა-ვაზეს მხოლოდ მონაწილეობა ერთ-ერთ პროექტში, რომელიც „იმედზე გავა, „ორი ვარსკვლავი. მე ვიქნები ერთ-ერთი კონკურსანტი.
- რა ტიპის პროექტია?
- „ცეკვავენ ვარსკვლავების მსგავსია, ოღონდ აქ იქნება ცეკვის მაგივრად სიმღერა. ჯერ არ ვიცი, ვინ იქნება ჩემი მეწყვილე ვარსკვლავი. ჯერ მოლაპარაკების პროცესში ვართ. მძიმე 4 თვე მელის წინ. თან ბებია, თან კონკურსანტი….
- ნუკა შეცვალა ფეხმძიმობამ?
- მე ვერ ვატყობ ჯერ, ალბათ, ბავშვს რომ დაიჭერს ხელში, მერე უფრო შეიცვლება. სულ სხვა ადამიანი ხდები, როცა შენს პირმშოს იჭერ ხელში. ვეუბნები, მოვალ, მოგეხმარები, ან ჩემთან გადმოდი-მეთქი, უარზეა, პატარა ხომ აღარ ვარ, თვითონ მივხედავ თავსო.
- დამხმარე ჰყავს?
- მარტო ცხოვრობენ. მშობიარობის შემდეგ ჩემთან გადმოსვლა შევთავაზე, სახლიც მაქვს, კარიც, ქმარიც მყავს და მივხედავთ თავსო, მითხრა. თუ დავჭირდები, აქ ვარ.
- მამასთან ხომ არ აღადგინა ურთიერთობა?
- არა, აბა, სად არის მამა (იღიმება)? ამის სურვილი თვითონ მამას უნდა ჰქონდეს. არ არსებობს ეს ადამიანი ჩვენს ცხოვრებაში და აღარ მინდა მასზე ლაპარაკი.
- მაშინ იმ ადამიანზე ვილაპარაკოთ, ვისაც შენი პირადი ცხოვრება ჰქვია...…
- აბა, სად არის პირადი ცხოვრება (იღიმება)? არც პირადი ცხოვრება მაქვს.
- 48 წლის ქალი ასე რომ გამოიყურება, იქ ფლირტი მაინც არის, ეკა, ხომ მეთანხმები?
- ფლირტი და ქათინაური სულ არის ჩემს ცხოვრებაში. ეს სტიმულია ჩემთვის, როგორც ყველა ქალისთვის. მეპრანჭებიან კიდეც.
- შენ თუ ეპრანჭები ვინმეს?
- თუ დაიჯერებ, არასოდეს არავის ვეპრანჭები. არ მახსოვს სიტუაცია, რომ კაცს ვეპრანჭებოდე. არც ვიცი, როგორ აკეთებენ ამას ქალები. მხოლოდ წამიკითხავს და მინახავს. მამრობით სქესთან ძირითადად მეგობრულ დამოკიდებულებას ვამჯობინებ, კომპლექსიც კი არ მაქვს, დაძმურად შემიძლია ვიკონტაქტო მათთან.
- კარგი ახლა, ამ დაძმობაში სამი ქმარი გამოიცვალე…...
- მოიცა გითხრა, მე კი ვარ დაძმურად, მაგრამ ისინი (იცინის)? სხვათა შორის, გუშინ სასწაული მოხდა, ასეთი რამ 20 წლის ასაკში დამემართა და მას მერე არ მქონია.
- რა? ერთი ნახვით შეგიყვარდა?
- არა, რა შემიყვარდა. ქუჩაში რომ გავდივარ, ვერც ვამჩნევ ვერავის, ბაქოში ჩემი მეგობარი მეტყვის ხოლმე, „პასმატრი, კაკოი კრასავჩიკო. სად არიან, ვერ ვხედავ. შეიძლება, მე ვერ ვხედავ, სათვალე მჭირდება (იცინის), სანამ სათვალეს გავიკეთებ და შევხედავ, აღარ არის ეს შენი „კრასავჩიკი. სუპერმარკეტში გავიარე, სალათის ფურცლების ყიდვა მინდოდა. მიყვარს სუპერმარკეტებში ბოდიალი, ავიღე დიდი კალათა, ვითომ გავავსებდი და ბევრი ვიბორიალე. ბავშვების სექციაშიც გავიარე, მეტყობა უკვე, ბებიობისთვის რომ ვემზადები. ამასობაში ერთ-ერთ რიგში ჩემ წინ ვიღაც მაღალი, სიმპათიური მამაკაცი შევნიშნე. ამოვიღე სათვალე, გავიკეთე და უცხოელი აღმოჩნდა. ჩემს ცხოვრებაში პირველად მომეწონა ასე ქუჩაში მამაკაცი და გამიხარდა. როგორც ჩანს, გაიღვიძა მძინარე მზეთუნახავმა ჩემში (იცინის). ვხუმრობ, იმედია, მკითხველი სწორად გამიგებს და მერე ლანძღვას არ დამიწყებენ საიტებზე.
- კონცერტს გეგმავდი, შენი სტატუსი წავიკითხე „ფეისბუქზე.
- ის აღარ წაიკითხე, რომ გადავიფიქრე? დამფინანსებელი არ გამოჩნდა.

ნინო მჭედლიშვილი
ჟურნალი „რეიტინგი“