ჯულიანა ბარ–გნარს კაბებს დედა უკერავს

მოცეკვავე ჯულიანა ბარ–გნარი როგორც კი ხელში ფულს ჩაიგდებს, მაშინვე მაღაზიებისკენ გარბის. სასურველი სამოსის შესაძენად შეუძლია დაუღალავად იაროს. მისი გარდერობი ძალიან ჭრელია, მისი სტილიც შერეულია – სპორტულ–კლასიკური. ცდილობს, ყოველთვის განსხვავებულად ეცვას. განსაკუთრებულ ყურადღებას სასცენო კოსტიუმებს უთმობს. თურმე მათი დიზაინერი თავად არის, დედა კი უკერავს.
– ჯულიანა, შოპინგისთვის რა დრო გაქვთ გამოყოფილი?
– როგორც კი ჩემს ხელში ფული მოხვდება, მაშინვე შოპინგზე მივდივარ. მაღაზიაში რომ შევდივარ, რასაც ვიხდენ, ყველაფერს ვყიდულობ. თუ ცუდ ხასიათზე ვარ, ამ დროს სასურველია, რამე ვიყიდო, რადგან მაშინვე კარგ გუნებაზე ვდგები.
– საზღვარგარეთ ხშირად გიწევთ სიარული. იქაც დადიხართ მაღაზიებში?
– ვახერხებთ. "თელადან" უკრაინაში სამი კვირით ვიყავით წასული და წარმოუდგენელი იყო, ამ დროის განმავლობაში გოგოები მაღაზიებში არ წავსულიყავით. იქ ვიყიდე მწვანე ჩანთა, რომელიც მიყვარს, ასევე – საყურეები, საფულე, შარფი... ფერად და ლამაზ მაღაზიებზე ვგიჟდები! როცა იქ შევდივარ, სამყარო ჩემთვის უფრო ნათელი ხდება.
– აშკარაა, რომ სიჭრელეს და ფერების თამამად შეხამებას არ უშინდებით.
– ზამთარში, როცა ირგვლივ ყველაფერი ნაცრისფერია და ყველა რატომღაც შავ ან ნაცრისფერ ფერებში იცვამს, მე შემიძლია ვარდისფერი შარფით ან სტაფილოსფერი ზედატანით ვიარო. ფერებს საკმაოდ თამამად ვუხამებ ერთმანეთს. შეიძლება სხვებისთვის თუთიყუშივით გამოვიყურები, მაგრამ მე ნორმალურად მიმაჩნია ასე ჩაცმა.
– დიდი საყურეები ხშირად გიკეთიათ, ეტყობა, გიყვართ მასიური აქსესუარები.
– კი და ეს ყველამ იცის. პროექტში "ცეკვავენ ვარსკვლავები" მომღერალმა ნინა წკრიალაშვილმა ძალიან გრძელი საყურეები მაჩუქა, თითქმის მკერდამდე მქონდა და ყველამ დამცინა. ულამაზესი საყურეებია. ჩემმა მოსწავლეებმაც იციან, რომ დიდი საყურეები მიყვარს და ისინიც მჩუქნიან. ბეჭდებიც მიყვარს, თუმცა დიდთვლიანი ბეჭდები არ მომწონს, ყოველთვის სადა მირჩევნია. ძირითადად სამი ბეჭედი მიკეთია. ვერცხლის სამკაულებიც ძალიან მიყვარს, ოქრო კი – ისე რა. ალბათ ასაკი რომ მომემატება, მერე შემიყვარდება.
– არის სტილი, რომელიც საკუთარ თავზე ვერ წარმოგიდგენიათ?
– არასოდეს ჩავიცვამ ისეთ მოკლე კაბას, რომ ვულგარული გამოვჩნდე. ძალიან გამომწვევი სამოსის ჩაცმას ვერასოდეს გავბედავ.
– ჩაცმასთან დაკავშირებით ყველაზე მეტად ვის აზრს ითვალისწინებთ?
– სხვების აზრს ყოველთვის ვითვალისწინებ. თუ ჩემს რომელიმე სამოსზე რამდენიმე ადამიანი მეტყვის, არ გიხდებაო, დავიჯერებ. შენიშვნებს მშვიდად ვიღებ, უფრო მეტიც, მადლობასაც ვუხდი ამისთვის. სანამ სახლიდან გავალ, დედას ვეკითხები, როგორ გამოვიყურები.
– სასცენო კოსტიუმებს ყიდულობთ?
– არა, სასცენო კოსტიუმების ყიდვა ძალიან ძვირი ჯდება. საქართველოში არც იყიდება, უნდა შეიკერო. დედაჩემი მკერავია და ყოველთვის ის მიკერავს. ჩემი კაბების დიზაინერი ყოველთვის თავად ვარ. მყავს მეგობარი, რომელიც ძალიან მაგარ მოდელებს ქმნის. ზოგჯერ ისიც მთავაზობს რაღაცეებს და საბოლოოდ მაგარი კაბები გამოდის. კაბას ძალიან უხდება სვაროვსკის თვლები, ამ დროს ბრწყინავს და ულამაზესია.
– დედა მკერავი თუ გყავთ, როგორ არ იყენებთ შანსს, ყოველდღიური სამოსი შეაკერვინოთ?
– შეკერვის პროცესი ყოველთვის იწელება, თვეზე მეტი სჭირდება, რომ რამე შემიკეროს.
– ცეკვაში კაბა რა როლს თამაშობს?
– ჩემთვის – 50 პროცენტს და არა მგონია, მხოლოდ მე ვთვლიდე ასე. ალბათ ყველა მოცეკვავე გოგო ასე გიპასუხებთ. ძველ კაბაში იმ "მუღამით" ვერ ვცეკვავ, როგორიც საჭიროა. როცა ახალ საცეკვაო ნომერს ვამუშავებ, განსაკუთრებული სამოსი მჭირდება. თუ ძველ კაბას ვიცვამ, ისეთი შეგრძნება მაქვს, რომ ძველ სტილს ვუბრუნდები. ეს ალბათ ფსიქოლოგიური მომენტია. ამიტომ ვცდილობ, კონკურსებისთვის ყოველთვის ახალი კაბა შევიკერო. ასევე არ შემიძლია რამდენიმე წვეულებაზე ერთი და იმავე კაბით მივიდე. ერთი–ორჯერ რომ ჩავიცვამ, მერე გარდერობში დიდხანს მიკიდია. წელიწადი რომ გავა, შემიძლია ისევ ჩავიცვა. ამ დროს ისეთი გრძნობა მაქვს, თითქოს ახალია.

– ძველ კოსტიუმებს რას უშვრებით?
– ვყიდი. რატომ უნდა მეკიდოს ტყუილად გარდერობში, როცა შემიძლია გავყიდო?!
– ბიჭებზე როგორი ჩაცმულობა მოგწონთ?
– კლასიკური და სპორტული ერთად. მომწონს, როცა პიჯაკებზე ჯინსები და კედები აცვიათ. არ მიყვარს, როცა ყოველდღიურად კლასიკური შარვლით და პიჯაკით დადიან, ოფიციალური სტილია. მხოლოდ ბიჭებზე – არა, საკუთარ თავზეც მიყვარს სტილის არევა, რაღაც გიჟურის მოფიქრება, სტანდარტული სამოსი არ მომწონს. ისეთ ტანსაცმელს არ ვყიდულობ, რომელიც ბევრს აცვია, იმიტომ კი არა, რომ ჯულიანა ვარ, უბრალოდ მინდა, ჩემი ტანსაცმელი განსაკუთრებული იყოს.
– ორიგინალური ჩექმები გაცვიათ. სად შეიძინეთ?
– ზენკამ და მარიმ შემიკერეს. პროექტი რომ დაიწყო და მოზომვებზე მივდიოდით, მათ ფეხსაცმელებს ვათვალიერებდი. ბოლოს ეს მოდელი შევაკერვინე და მეც ძალიან მომწონს. მაღალქუსლიანი ფეხსაცმელები ძალიან მიყვარს. ყოველთვის ვამბობ, ქალმა აუცილებლად უნდა იცოდეს მაღალ ქუსლებზე სიარული და, თუ არ იცის, სახლში უნდა იმეცადინოს, რომ გარეთ ქათამივით არ იაროს. თუ ვერ სწავლობს, მაშინ ჯობია დაბალძირიანი ფეხსაცმელები ჩაიცვას.
– ყველაზე მეტ კომპლიმენტს როგორ ფორმაში იღებთ?
– როცა კაბა და მაღალქუსლიანი ფეხსაცმელი მაცვია. სპორტული, როგორი კარგიც უნდა იყოს, მაინც სპორტულია. ქალი ყოველთვის ქალად უნდა დარჩეს, მაღალქუსლიან ფეხსაცმელებში კი ყველა ქალურია. ბოტასებში ბიჭურად დავდივარ, მაგრამ, როგორც კი ქუსლიან ფეხსაცმელს ჩავიცვამ, ჩემი სიარულის მანერაც იცვლება და დგომაც.
– საყვარელმა ადამიანმა ჩაცმის სტილში რაიმე რომ აგიკრძალოთ, დაუჯერებთ?
– აკრძალვებს ვერ ავიტან! მიხარია, რომ ქართველ მამაკაცებში პროგრესია და, ამ მხრივ, მგონი, სიტუაცია გამოსწორდა. აკრძალვა იმას ნიშნავს, რომ არც ჩემს აზრს ითვალისწინებს და არც გემოვნებას. თუ რაღაც არ მოგწონს, მირჩიე ან მთხოვე, მაგრამ თუ ამიკრძალავ, ისეთი ჯიუტი ვარ, მაინც ჩავიცვამ! მეც არასოდეს არაფერს ავუკრძალავ, ვურჩევ და, თუ მაინც არ გაითვალისწინებს, ეს უკვე სხვა საკითხი იქნება. ჩემი ძმა რუსეთში ცხოვრობს და არ მახსოვს, რაიმე აეკრძალოს ჩემთვის, მხოლოდ რჩევებს მაძლევს, ამიტომ ყოველთვის ვითვალისწინებ. ვერ შევეგუები, რომ ვინმემ ჩარჩოებში ჩამსვას.
ქეთი დინოშვილი, ჟურნალი სარკე