სალომე ღვინიაშვილი: "დიდი შრომა მჭირდება, რომ კარგად გამოვიყურებოდე"

ყოფილი მოდელი, სალომე ღვინიაშვილი, თავს მოდუნების საშუალებას არ აძლევს, მკაცრად აკონტროლებს, რომ მუდამ კარგ ფორმაში იყოს, განსაკუთრებით კი მაშინ, როცა მისი ქმარი, ფეხბურთელი ზურა ხიზანიშვილი, თურქეთიდან თბილისში ჩამოდის. თავისი მოდელობის მანძილზე სალომემ ბევრი სასარგებლო და პრაქტიკული ცოდნა შეიძინა ჯანსაღ კვებასთან თუ სწორ მაკიაჟთან დაკავშირებით, რასაც დღეს წარმატებით იყენებს. რა თქმა უნდა, მნიშვნელოვანია ძვირადღირებული კოსმეტოლოგიური პროცედურებიც, თუმცა არანაკლებ ეფექტს ახდენს სტიმული, რომ ფეხბურთელების ლამაზმან ცოლებს შორის არავისზე ნაკლებად გამოიყურებოდეს და აგრეთვე ბედნიერების შინაგანი განცდა, რომელიც, სალომეს აზრით, გარეგნობისთვის საუკეთესო წამალია.
– სალომე, როდის უფრო მეტად ზრუნავდით, რომ იდეალური ფორმები შეგენარჩუნებინათ, როცა პოდიუმზე გამოდიოდით თუ ახლა, როცა მოდელობას თავი დაანებეთ?
– მოდელი დიდი ხანია აღარ ვარ, მაგრამ ჩემს თავს უფლებას ვერ მივცემ, კარგად არ გამოვიყურებოდე. მიმაჩნია, რომ ყველა ქალმა, არ აქვს მნიშვნელობა, ცნობილი სახეა თუ არა, თავს უნდა მოუაროს. უფლება არ გვაქვს, მოვეშვათ და ცუდად გამოვიყურებოდეთ, უპირველესად – საკუთარი თავის გამო, მერე კი ჩვენი ქმრების და შვილების ხათრით. ვცდილობ, ვივარჯიშო და თავს მოვუარო.
პარიზში რომ მოვხვდი, ისეთი კონკურენცია დამხვდა, მივხვდი, თუ ძალიან გამხდარი არ ვიქნებოდი, უბრალოდ ვერ ვიმუშავებდი. ამიტომ მხოლოდ იოგურტს ვჭამდი. თბილისში ამის არ მეშინოდა. ანაზღაურებაზე ბევრი რამ არის დამოკიდებული – როცა "ვიქტორია სიკრეტის" მოდელებს მილიონებს უხდიან, მათ აქვთ მოტივაცია, დღეში 6 საათი ივარჯიშონ. მილიონები რომ გადამიხადონ, მეც ასე მოვიქცევი.
– მხოლოდ იოგურტით კვება თქვენს ჯანმრთელობაზე როგორ მოქმედებდა?
– არამხოლოდ იოგურტი შედიოდა ჩემს მენიუში: პომიდორი, ყველი მოცარელა და ა.შ. მყავდა მენეჯერი, რომელიც მენიუს მიდგენდა. მაშინ ჩემს სხეულზე ზედმეტს ვერაფერს ვხედავდი და წონას განსაკუთრებულად არც ვაქცევდი ყურადღებას.
– დღეს, როცა სამი შვილის დედა ხართ, რა მეთოდებს მიმართავთ ფორმის შესანარჩუნებლად?
– ეს არ არის ადვილი. ძალიან დიდი შრომა სჭირდება იმას, რომ კარგად გამოიყურებოდე. ქართველებს გენში გვაქვს მიდრეკილება მრგვალი ფორმებისკენ და განიერი თეძოებისკენ. თან ბოლო პერიოდში საკვებიც ცუდია, აღარ არის ისეთი ჯანსაღი, როგორიც თუნდაც ჩვენი ბებიების დროს იყო. ამიტომ კვებას ძალიან დიდ ყურადღებას ვაქცევ. არის პერიოდი, როცა ყველაფერს ვჭამ, მაგალითად, ახალი წლის დღეებში, მაგრამ წლის განმავლობაში ჯანსაღი კვების რეჟიმს ვიცავ. ახლა მყავს პირადი მწვრთნელი, რომელიც მენიუს მიკონტროლებს. მერე თავადაც ხვდები, რა უნდა მიიღო და რა – არა. შიმშილი გამოსავალი არ არის. მეც დამიშვია შეცდომა – სამი დღე მიშიმშილია და მერე ჩვეულებრივად დამიწყია ჭამა. ეს ძალიან ცუდია. ამიტომ ვცდილობ, ჯანსაღი კვების რეჟიმს მივყვე – ბოსტნეული, ხორცი, ყველი და არავითარი ცხიმი, შემწვარი თუ ცომეული! რაც მთავარია, აუცილებელია ვარჯიში. ბევრი ფიქრობს, რომ ვარჯიშობს და ამიტომ, რაც უნდა, იმას შეჭამს, მაგრამ არა! სხეულის ფორმები 70–80 პროცენტით კვებაზეა დამოკიდებული. თუ არაჯანსაღად იკვებები, რაც უნდა ივარჯიშო და მასაჟები იკეთო, ცელულიტი მაინც გექნება.
– ვიღაცას მეტი ძალისხმევა სჭირდება სილამაზისთვის, ვიღაცას – ნაკლები. თქვენი ოჯახის ქალები, დედის თუ მამის მხრიდან, სილამაზით გამოირჩეოდნენ, ალბათ გენეტიკაც გიწყობთ ხელს, მუდმივად ფორმაში იყოთ.
– თამამად ვიტყვი, რომ გენეტიკურად არც სიმსუქნისკენ მაქვს მიდრეკილება და არც პრობლემური კანი მაწუხებს, მაგრამ გარეგნობაზე მაინც ვზრუნავ. გენეტიკა არ მაძლევს უფლებას, რომ მოვდუნდე.
– როგორ უვლიდა თავს თქვენს ოჯახში უფროსი თაობა?
– ჩემი ბებია 90 წლისაა და ძალიან კარგად გამოიყურება. ის დღემდე ზრუნავს თავის გარეგნობაზე, მაგრამ მე არ ვეთანხმები თმაზე კვერცხის გულის დადებას და სახის კანზე კვერცხის ცილის წასმას. დღეს ქალს უკეთესად შეუძლია თავს მოუაროს.
– მაგრამ ის საშუალებები, რასაც თქვენ გულისხმობთ, ძვირი სიამოვნებაა.
– თავის მოვლა არამხოლოდ ფინანსებზეა დამოკიდებული. ვისაც საშუალება არ აქვს, კანზე ვიტამინის კოქტეილები გაიკეთოს, შეუძლია სახლის პირობებში სწორი კვებით, ბევრი წყლის მიღებით შეუწყოს ხელი კანის გაჯანსაღებას.
– თქვენ როგორ უვლით სახის კანს?
– ბევრ დროს ვუთმობ. მყავს კოსმეტოლოგი, ვისთანაც ხშირად დავდივარ და ის მირჩევს, თუ რა უნდა გავიკეთო, რომელი ნიღაბი მომიხდება და ა.შ. მისი რჩევაა, რომ ძალიან ხშირად ვსვა წყალი და ნაკლებად გავირუჯო.
– ახლაც გარუჯული ხართ, გამოდის, არ უჯერებთ.
– რუჯი ძალიან მიყვარს. იყო პერიოდი, როცა სოლარიუმში ხშირად დავდიოდი, მაგრამ ბოლო წლებია აღარ მივდივარ. ზღვაზე კი ძალიან მიყვარს მზის სხივების აბაზანა. ამ დროს კანს განსაკუთრებულ ყურადღებას ვუთმობ: დამატენიანებლებს და დამცავებს ვიყენებ. ამავდროულად, როცა მზეზე ვწევარ, თუ ჩვეულებრივ დღეებში ორ ლიტრ წყალს ვიღებ, გარუჯვისას სამ ლიტრს ვსვამ.
– ბოტოქსსა და პლასტიკურ ქირურგიაზე რას ფიქრობთ?
– ბოტოქსის მომხრე ვარ. ჯობია, ადრევე გაიკეთო, 25 წლიდან და ნაოჭს გაჩენის უფლება არ მისცე, რადგან მისი გამოსწორება ძალიან ძნელია.
– თქვენ იკეთებთ?
– არა, ჯერ არ დამჭირვებია. ბოტოქსის გარდა, სახის კანისთვის კარგია მეზოთერაპია თუ ბიორევიტალიზაცია. რაც შეეხება პლასტიკურ ქირურგიას, არ მესმის, როცა ვინმეზე ამბობენ, ყველაფერი გაკეთებული აქვსო. ეს ჩვეულებრივი თავის მოვლაა. სხვათა შორის, ბავშვობაში ცხვირის ოპერაციის გაკეთება მინდოდა. ეს გარდატეხის ასაკის პერიოდი იყო, როცა საკუთარი თავი არავის მოსწონს.

– თქვენზე ამბობენ, ეგზოტიკური გარეგნობა აქვსო.

– ალბათ ხვეული თმის გამო, თორემ მგონია, რომ ძალიან ქართული გარეგნობა მაქვს.

– ალბათ რთულია ასეთი თმის მოვლა.
– აბსოლუტურად – არა. ბევრად უფრო ადვილია, ვიდრე სწორი თმის მოვლა. ჩემი მეგობრები სადმე რომ მიდიან, სალონებში საათობით სხედან, მე კი ჩვეულებრივად ვიბან თმას, მუსს ვისვამ, ვიშრობ და სულ ეს არის. მისი მოვლისთვის კი ვიყენებ სპეციალურ საშუალებებს, რომლებიც, ვიცი, რომ თმას უხდება.
– თქვენი გოგონები, 7 წლის ტასო და 5 წლის ნიტა, დედის კოსმეტიკას ხომ არ ემტერებიან?

– უჯრაში, სადაც პარფიუმერია მიწყვია, ზოგჯერ საოცარი ქაოსი მხვდება. კოსმეტიკა რომ არ გამიფუჭონ, მე თვითონ ვუკეთებ მაკიაჟს, მაგრამ ცოტა ხნით, რომ ინტერესი გაუქრეთ. ბავშვებთან დაკავშირებით ერთადერთი გართულება მაქვს – კვება. არ მინდა, რომ ჩიპსები და გაზიანი სასმელები მიიღონ. რა თქმა უნდა, არ ვუკრძალავ, რადგან უფრო მეტად მოუნდებათ, მაგრამ ვუხსნი, რომ ცუდია და თავად ირჩევენ, რა ჯობია და რა – არა. სახლში არაჯანსაღი საკვები არასდროს გვაქვს.
– ისეთი გამოცდილება გაქვთ, ალბათ პროფესიონალურად შეგიძლიათ მაკიაჟის გაკეთება.
– შემიძლია, რადგან, გამოცდილების გარდა, ლონდონში მაკიაჟის კეთების ერთთვიანი კურსი გავიარე, სადაც დღის, საღამოს და საქორწილო მაკიაჟი ვისწავლე, რაც ძალიან მადგება. ხანდახან ჩემი მეგობრები მოდიან და მაკიაჟს ვუკეთებ.
– სწორ მაკიაჟად რა ითვლება?
– ვფიქრობ, რომ ყოველდღიურად მინიმალური და ბუნებრივი მაკიაჟია საჭირო. დღის საათებში მხოლოდ ტუშით და "რუმიანით" იოლად გახვალთ. საღამოს, რა თქმა უნდა, თავისი მაკიაჟი აქვს. მე ძალიან მიყვარს თვალის ლაინერი, რომელიც ხშირად მისვია. ცუდ ტონად მივიჩნევ, როცა დღის საათებში ოფისში შევდივარ და ვინმეს მძიმე მაკიაჟი უკეთია. ასევე ძალიან ცუდ ტონად მივიჩნევ ორი სუნამოს არევას და არც ის მესმის, დილიდან გამოპრანჭულები, ქუსლიანი ფეხსაცმელებით როგორ დადიან.
– მსოფლიოს კვალდაკვალ უკვე საქართველოშიც ტენდენციად დამკვიდრდა, რომ სპორტსმენებს ცოლად მოდელები მოჰყავთ. ფეხბურთელების ცოლებს ერთმანეთთან როგორი ურთიერთობა გაქვთ, კონკურენცია იგრძნობა?
– ნამდვილად ასეა. როცა ფეხბურთელების ცოლები თამაშებზე მივდივართ, მაინც მგონია, რომ ერთმანეთისთვის ვიცვამთ, ვიდრე თუნდაც ქმრებისთვის. ამას წინათ ვლაპარაკობდით, ფეხბურთელებს უმეტესად მოდელები რატომ მოჰყავთ ცოლად და ამ კითხვაზე პასუხი ვერ ვიპოვეთ. ფეხბურთელების ცოლებს შორის ჯანსაღი მეტოქეობა ნამდვილად არსებობს. თუმცა მე ბევრთან დღემდე კარგი ურთიერთობა მაქვს და საერთოდ ძალიან უკონფლიქტო ადამიანი ვარ.
– ქმარი თქვენს გემოვნებას ენდობა?
– ზურასგან არასდროს გამიგია, რომ ჩემი რამე არ მოსწონდეს. ერთხელ კითხვაც გამიჩნდა, განსაკუთრებით რა მოგწონს–მეთქი. ყველაფერი, რაც გაცვიაო, მიპასუხა. მე კი რჩევების მიცემა ძალიან მიყვარს. ზურას საშოპინგოდ თუ მივყვები, ჩემს აზრს ვუზიარებ და ითვალისწინებს. მეც ხშირად ვეკითხები რჩევებს.

– არასდროს ყოფილა შემთხვევა, როცა ქმარს რაიმე აუკრძალავს თქვენს ჩაცმულობასთან დაკავშირებით?
– არა, რადგან ძალიან გამომწვევად არასდროს ვიცვამ, თუმცა საკმაოდ თამამი კაბები ჩამიცვამს და ზურას პრობლემა არ ჰქონია. ერთხელ თბილისის ერთ კლუბში ძალიან მოკლე და ტანზე მომდგარ კაბა მეცვა და ამას მეორედ აღარ ვიზამ.

– რატომ, ეს რაიმე უსიამოვნო ამბავს უკავშირდება?
– თბილისში ასე ჩაცმა მიღებული არ არის. ლონდონის კლუბებში ძალიან მოკლე და ვიწრო კაბები აცვიათ, თბილისში – იშვიათად. ამიტომ სამოსის არჩევისას სიტუაცია უნდა გაითვალისწინო.
– როგორ ფიქრობთ, საქართველოში ქალები თავს სათანადოდ უვლიან?
– სხვათა შორის, თბილისში თავს ძალიან კარგად უვლიან, ყველა ვარჯიშობს და კვებას ყურადღებას აქცევენ. სტამბულშიც ძალიან მოვლილი ქალები ცხოვრობენ, მაგრამ ვერ ვიტყვი, რომ ლონდონში თავს უვლიან, ამას ინგლისში ნაკლებ დროს უთმობენ. პარიზი კი ჩემთვის ელეგანტურობასთან ასოცირდება.
– გარეგნობასთან დაკავშირებით ექსპერიმენტებს მიმართავთ?
– ბოლო ჩემი ერთ–ერთი თამამი ექსპერიმენტი იყო, როცა თმა წითლად შევიღებე. თმაც გამისწორებია, მაგრამ ეს იმიჯი არ მომწონს. როცა რამე ცვლილებას ვგეგმავ, ზურას ყოველთვის წინასწარ ვეუბნები. როცა თმის წითლად შეღებვა გადავწყვიტე, ზურას თურქეთში სურათი გავუგზავნე, ვუთხარი, რომ თმის შეღებვას ვაპირებდი. მგონი, მოგიხდებაო, მომწერა და მეც შევიღებე. უარი, რომ ეთქვა, გავითვალისწინებდი.
მაღაზიაში კაბა თუ მომწონს და ოდნავ ეჭვი მეპარება, სურათს ვუღებ და ზურას ვუგზავნი. მისი გემოვნებით ვარჩევ სამოსს. ყოველთვის მოწესრიგებული ვარ, მაგრამ განსაკუთრებით მაშინ, როცა ზურა თბილისშია. ამიტომ ყველა ხვდება, ზურა როდის არის საქართველოში. ზოგადად, მთელი დღე თავისუფლად, სპორტულად ჩაცმული დავდივარ. ხანდახან მაკიაჟის გარეშეც გავდივარ სახლიდან.
– რა არის თქვენი ქალური სისუსტე?
– ვგიჟდები ჩანთებსა და ფეხსაცმელებზე. საზღვარგარეთ ყოფნისას შემიძლია მხოლოდ ფეხსაცმელები და ჩანთები შევიძინო. ზურა ხუმრობს, რომ სახლში ოჯახის წევრები და ჩემი ჩანთები და ფეხსაცმელები ერთად ვეღარ ვეტევით.
– თქვენი სამკაულები და აქსესუარები ყურადღებას ყოველთვის იპყრობს. ესეც ალბათ თქვენი სისუსტეა.
– კი, მიყვარს აქსესუარები, სამკაულები, მაგრამ გართულება არ მაქვს, რომ მაინცდამაინც ოქროსი იყოს. მთავარია, მომეწონოს.
– ვინ გიყურებთ სარკიდან, როგორ შეაფასებთ თქვენს ორეულს?
– სარკის წინ საკუთარ თავს არასდროს ვუღრმავდები. გააჩნია ხასიათს – იშვიათად, რომ მოწყენილი ვიყო. შეიძლება უბრალო თეთრ მაისურში და დახეულ ჯინსებში თავი ძალიან მომეწონოს, საღამოს ძვირადღირებულ კაბასა და ძალიან ლამაზ ფეხსაცმელში კი – არა.
– დაბოლოს, რას უკავშირდება თქვენი უახლოესი გეგმები?
– შეიძლება ტელეწამყვანად მიხილოთ, არის ამაზე საუბარი, თუმცა ეს პროექტი რატომღაც დროში გაიწელა. ყოველ შემთხვევაში, ჩემი სურვილია ტელევიზიაში ყოფნა. ზურა ამჟამად თურქეთშია, თამაშები აქვს. მე და ბავშვები საქართველოში ვართ.
საუბრის დასასრულს გეტყვით, ქალი თუ ბედნიერია, ეს გარეგნობაზე ეტყობა. ბედნიერება გვაძლევს სტიმულს, რომ თავს მოვუაროთ და გავიღიმოთ.
მანანა ნოდია, ჟურნალი სარკე