ანნა იმედაშვილი ქმარმა დიდი სახლის დიასახლისად აქცია

2 075 ნახვა
ტელეპროდიუსერ დათო იმედაშვილს და მის ცოლს, ტელესახე ანნა იმედაშვილს, თავისუფლად შეუძლიათ თქვან, რომ ცხოვრება ტრიალ მინდორზე დაიწყეს. თბილისში, დიღმის დასახლებაში მიწის ნაკვეთი რომ იყიდეს, იმ ადგილას მხოლოდ მინდორი იყო, ბოძები ჩაარჭვეს და შემოღობეს. მერე კი სახლის აშენებაც დაიწყეს და ყველაფერი თავიანთი გემოვნებით გააკეთეს. მაშინ ანნა ორსულად იყო, მაგრამ სამშენებლო პროცესში აქტიურად ჩაერთო. თითქმის ყველაფერი წინასწარ გათვალეს. ცოლ–ქმარმა ბევრი დეტალის გამო იკამათეს, ხან ერთი თმობდა, ხან – მეორე და საბოლოოდ ისეთი სახლი გამოვიდა, როგორიც სურდათ.
– ანნა, როდის გადმოხვედით ახალ სახლში?
– ზაფხულში. ეზოში აუზი გვაქვს და ზაფხულში ჩემი შვილის, პეტრეს და–ძმებიც აქ იყვნენ, ჟრიამული გვქონდა. ამ სახლის პროექტი მე და დათომ დავხაზეთ. საკმაოდ დიდხანს ვფიქრობდით, როგორი უნდა ყოფილიყო. მე მიყვარს დიდი ფანჯრები, სივრცე და რაც შეიძლება ნაკლები ავეჯი. დათოს კი დიდი ფანჯრები არ უნდოდა, ამბობდა, არაპრაქტიკულიაო. დილით ავდგები თუ არა, მაშინვე ფარდებს გადავწევ ხოლმე, დათო პირიქით, აფარებს. ამის გამო სერიოზული ომი გვქონდა, ბოლოს ცოტა მე დავთმე, ცოტა – დათომ და რასაც ხედავთ, ეს გამოვიდა.
– გარედან სახლს საკმაოდ ორიგინალური დიზაინი აქვს. ესეც თქვენი მოფიქრებულია?
– კი, ჩვენი გემოვნებით გავაკეთეთ. გვინდოდა, სადა და ამავე დროს ელეგანტური სახლი ყოფილიყო. ისეთი ფორმა აქვს, რომ ეზოს სამ ნაწილად ყოფს. უკანა ეზო მოსასვენებელი ადგილია, სადაც მწვადების შეწვა შეიძლება, ზაფხულში იქ ბევრად უფრო გრილა, ვიდრე სხვა ადგილებში. წინა მხარე მზიანია. აქ ძლიერი ქარი იცის, მაგრამ წინა ეზოში ქარი ყველაზე ნაკლებადაა. აუზიც ამ მხარეს გავაკეთეთ, გავითვალისწინეთ, რომ მზიანი ადგილია. ეზოს მესამე ნაწილი "მოსატეხია". ვაპირებთ, იქ ავეჯი დავდგათ და წიგნის კითხვისთვის შესანიშნავი ადგილი იქნება.
ეს ყველაფერი წინასწარ გავთვალეთ, მაგალითად, ისიც, რომ ვიტრინები ქარიან მხარეს არ ყოფილიყო და ა.შ. საკმაოდ რთულია ამ ყველაფერზე წინასწარ ფიქრი, მაგრამ ჯობს, რაღაცნაირად გათვალო, იდავო, იჯღავლო, ვიდრე აშენების შემდეგ პრობლემა შეგექმნას.
– ყველაფერი ისე გამოვიდა, როგორც ჩაფიქრებული გქონდათ?
– თავიდან რომ ვაშენებდეთ, ბევრ რაღაცას მაინც სხვანაირად გავაკეთებდი. ისეთი დეტალების შეცვლაც კი მინდა, რაზეც ძალიან ბევრი მაქვს ნაფიქრი. ყველა წვრილმანის სწორად გათვლა თითქმის შეუძლებელია. როგორც წესი, ან დიზაინერი აჰყავთ, ან არქიტექტორი და ის ეხმარებათ, მაგრამ თავიდან ბოლომდე ყველაფერი ჩვენი ძალებით გავაკეთეთ. ასეა თუ ისე, შედეგით მაინც კმაყოფილები ვართ.

– მშენებლობას აქტიურად ადევნებდით თვალყურს თუ დათო აკონტროლებდა ყველაფერს?
– მაშინ ფეხმძიმედ ვიყავი, მაგრამ მაინც აქტიურად დავდიოდი მშენებლობაზე. იმ პერიოდში პროექტ "ახალი ხმის" ჩაწერები მიმდინარეობდა, მაგრამ ორივე საქმეს ვასწრებდი. პეტრე რომ გაჩნდა, მეგობრები მეხუმრებოდნენ, მღერის თუ ბავშვს "ბარგალკა" უჭირავს ხელშიო. მე და დათო იმდენად გავიწაფეთ, რომ შეგიძლიათ დაგვიძახოთ და ყველაფერში მოგეხმარებით. სად რა იყიდება, რა რის შემდეგ კეთდება, ყველაფერში გავერკვიეთ. ცდებისა და შეცდომების შედეგად ვსწავლობდით. პირველად რომ მოვედით, მხოლოდ ტრიალი მინდორი იყო, სახლები მერე ააშენეს. ბოძები ჩავარჭვეთ, შემოვღობეთ. მერე ყველაფერი აგურ–აგურ აშენდა. მიუხედავად იმისა, რომ ძლიერ ნერვებს მოითხოვს, მშენებლობა მაინც კარგი პროცესია.

– ეზოიანი სახლი თქვენი ოცნება იყო?
– მე იმდენად ვიყავი კორპუსის ბინას მიჩვეული, რომ წინააღმდეგობას ვუწევდი. რთულია, ბევრი შრომა სჭირდება, მაგრამ ამავე დროს ბევრი ხიბლიც აქვს. როცა გავიგე, რომ ფეხმძიმედ ვიყავი, კერძო სახლში ცხოვრების იდეა უკვე მომეწონა. ახლა ძალიან ბედნიერი ვარ, რომ პეტრე სუფთა ჰაერზე იზრდება, სიმშვიდეა, ზაფხულში აუზში იცურავებს. ეს სახლი პეტრემ უფრო შემაყვარა.
– ამხელა სახლს როგორ უმკლავდებით?
– შვილი რომ გვეყოლა, ჯერ კიდევ ძველ ბინაში ვცხოვრობდით და ყველაფერს ვახერხებდი. მეუბნებოდნენ, ძიძა რატომ არ გყავსო, მაგრამ ამაზე არ ვფიქრობდი. დილით რომ ვდგებოდი, სახლს ვალაგებდი და მერე მთელი დღე ბავშვს ვუვლიდი. აქ რომ გადმოვედით, მეგონა, ყველა საქმეს იგივენაირად გავუმკლავდებოდი, მაგრამ ეს არც ისე ადვილი აღმოჩნდა, ამიტომ მყავს არაჩვეულებრივი ქალი, რომელიც საოჯახო საქმეებში მეხმარება. მე კი ვცდილობ, ძირითადი დრო პეტრესთან გავატარო.
– საოჯახო საქმეებში ხელმარჯვე ხართ?
– უკვე 7 წელია მე და დათო ცოლ–ქმარი ვართ და ყოველთვის ყველაფერს მე ვაკეთებდი. ეს პირველი შემთხვევაა, როცა სხვისი დახმარება დამჭირდა. ამ სახლშიც ყველაფერს თავად ვაკეთებდი, მაგრამ მივხვდი, რომ სხვა რაღაცეებისთვის დრო აღარ მრჩებოდა და თან ძალიან ვიღლებოდი.
– სახლი შიგნიდან და გარედან თეთრად არის შეღებილი. თქვენი საყვარელი ფერია?
– ღია ფერები ძალიან მიყვარს. დიდი სახლის გაწყობა საკმაოდ რთულია და მცირე დროში შეუძლებელია ყველაფრის გაკეთება. მე და დათო წელიწადნახევარი ლოს ანჯელესში ვცხოვრობდით და, ეტყობა, იქაური შთაგონებით მოვინდომეთ ასეთი სტილის სახლის აშენება. ბავშვების ოთახებიც თეთრ ფერში გავაკეთეთ. თუ რამის შეცვლა მოუნდებათ, მათი გადასაწყვეტი იქნება.
– სამზარეულოს გაკეთებისას, პირველ რიგში, რა გაითვალისწინეთ?
– სამზარეულოზე ყველაზე მეტი დავა გვქონდა და ჯერ ბოლომდე არც არის მოწყობილი. მე ძალიან მინდოდა დიდი სამზარეულო, დათოს კი – არა. თავიდან დათო ამბობდა, სამზარეულო და მისაღები ოთახი გავაერთიანოთო, მაგრამ მე არ მინდოდა და ჩემი გავიტანე. დათომ როგორც კი შეძლო, სამზარეულო დამიპატარავა. მინდოდა, შუაში დიდი კუნძული გაგვეკეთებინა, მაგრამ საბოლოოდ კუნძული კედელს მივაბით. სამზარეულოში გრძელი ფანჯრები იყო, მე კი ავიტეხე, პანორამული ფანჯარა მინდა, ჭურჭელს რომ გავრეცხავ, წინ ლამაზი ხედი უნდა მქონდეს–მეთქი. ეს ჩემთვის ერთგვარი თერაპიაა. პროექტი უკვე დამტკიცებული იყო, მაგრამ ცვლილებები მაინც შევიტანეთ და გავაკეთებინე. გაზქურა სამზარეულოს შუაში გვაქვს, მაგრამ შუაში დასაყენებელი გამწოვები თურმე ძალიან დიდ პრობლემას წარმოადგენს, ვერ ვშოულობდით. ამის გამო დათო მსაყვედურობდა, ეს რა გამიკეთეო, მაგრამ რა ვიცოდი, მისი შოვნა ასეთი პრობლემა თუ იყო. მოკლედ, დიდი ამბები გადავიტანეთ. საბოლოო ჯამში, ჩემი სამზარეულოთი კმაყოფილი ვარ. პეტრე ფეხს რომ აიდგამს, სამზარეულოს ფანჯრებიდან შემიძლია ეზოში ვუყურო, არაფერი გააფუჭოს და თან საქმეც ვაკეთო.
მე და დათოს ჩვენს საძინებელშიც გვაქვს გრძელი და ვიწრო ფანჯარა, საიდანაც ბავშვების ოთახების აივნები ჩანს და სათვალთვალოს ვეძახი. აქედან შემიძლია ვაკონტროლო, კარგად იქცევიან თუ არა და თან ვერც შემამჩნევენ, რომ ვუყურებ.
– ბავშვების ოთახები როგორ მოაწყვეთ?
– დათოს შვილებს, ლუკას და ელენეს ვკითხეთ, როგორი ოთახები უნდოდათ და მათი აზრები გავითვალისწინეთ. ავეჯი კი მათთან ერთად, მათივე გემოვნებით შევიძინეთ.
– პეტრეს თავის ოთახში სძინავს?
– კი, მაგრამ ჯერ მის ოთახს ფარდები ვერ შევურჩიეთ.
– სახლისთვის ჭაღის, განათების შერჩევა ძალიან რთულია. ამ შემთხვევაში რითი იხელმძღვანელეთ?
– მისაღებში სტუდიური განათება მინდოდა, მაგრამ არ გამოვიდა, ამიტომ გზადაგზა გეგმები შევცვალეთ და სადა ოთახი მივიღეთ. სახლში მთლიანად თეთრი განათება გვაქვს და ამით კმაყოფილი ვარ. რაც შეეხება ჩვენი ოთახის ჭაღს, დავინახე თუ არა, მაშინვე მივხვდი, რომ საძინებლისთვის უნდა გვეყიდა.
– გარდერობის ოთახი ყველა ქალის ოცნებაა, რაზეც თქვენც ვერ იტყოდით უარს.
– რა თქმა უნდა, ეს ჩემი ოცნებაც იყო, მაგრამ უფრო დიდი მინდოდა. პროექტი ასეთი გვქონდა, რომ საძინებლიდან ცალკე გასასვლელი უნდა ყოფილიყო გარდერობის ოთახში და ცალკე შესასვლელი უნდა ჰქონოდა აბაზანას, მაგრამ დათომ თავისი გაიტანა და აბაზანაში გარდერობის ოთახიდან შედიხარ. ფანჯრები აბაზანასაც აქვს. დათომ ჩემთან დიდი კამათის შემდეგ თავისი გაიტანა და საძინებელში ჯაკუზის დგამს.
– რითი აგიხსნათ თავისი სურვილი?
– მეუბნება, წარმოიდგინე, დაღლილი მოვდივარ სახლში, ვწვები ჯაკუზიში, აქეთ ტელევიზორი, იქით მშვენიერი ხედი, აქეთ საწოლი და, ძალიან ბედნიერი, სრულ იდილიაში ვიქნებიო.
– კომფორტის მოყვარული ყოფილა.
– ძალიან! ამის გამო საკმაოდ დიდხანს ვდაობდით, მაგრამ ბოლოს დავთმე, მაგრამ რომ მახსენდება, ოთახში ჯაკუზი უნდა გვქონდეს, ნერვები მეშლება. თუმცა იმაშიც დარწმუნებული ვარ, რომ გაკეთებული მომეწონება.
– სახლისთვის კიდევ რის შემატებას აპირებთ?
– ასეთი კიბე კი გვინდოდა, მაგრამ პეტრე ფეხს რომ აიდგამს, გვეშინია ამ კიბის და ამიტომ მოაჯირს გავუკეთებთ. თავის დროზე ეს კიბეც დიდ პრობლემად გვექცა, რადგან ასეთს ვერავინ აკეთებდა, ყველა უარს გვეუბნებოდა. ბოლოს ვიპოვეთ არაჩვეულებრივი ხელოსანი, რომელმაც საოცრად იმუშავა. თითოეული დეტალი სასწაული გათვლებით გააკეთა. ზოგი მეუბნება, შუშის მოაჯირი გაუკეთეთო, მაგრამ მე მეჩვენება, რომ ცივი იქნება.
– ეზოს რას უპირებთ, როგორ გაალამაზებთ?
– ეზოში ნაძვი დავრგეთ, ახალ წელს მოვრთეთ კიდეც. სხვა ნერგებიც გავახარეთ. ეზოში ძალიან მაგარი რაღაცის გაკეთებას ვაპირებ, მაგრამ ჯერჯერობით საიდუმლოა, არ გეტყვით, მერე კი აუცილებლად დაგპატიჟებთ. გაზაფხულზე გამწვანებასაც მივხედავთ.
ქეთი დინოშვილი, ჟურნალი სარკე
ჩვენთან განთავსებული კონტენტი გაზიარებულია სხვადასხვა საჯაროდ გავრცელებული წყაროებიდან.

ლინკები filmebi qartuladadjaranetimoviessaitebi ფილმები ქართულადGEMOVIEmykadriEskortebi palmix.vip Speed Test