ხათუნა ჟორდანია, ზურაბ ხაჩიძე და ნინი ქარსელაძე საქართველოდან იმედგაცრუებულები მიდიან

პოპულარული წყვილი, მომღერალი ზურა ხაჩიძე და მისი ცოლი ხათუნა ჟორდანია, საქართველოდან ისევ მიდიან. როგორც ხათუნამ "სარკესთან" გულისტკივილით აღნიშნა, მისმა ქმარ–შვილმა ამ ქვეყანაში თავიანთი ადგილი ვერ მოძებნეს და ამიტომ თავის დამკვიდრებას საზღვარგარეთ შეეცდებიან.
ხათუნა ჟორდანიას უფროსი ქალიშვილი, ნინი ქარსელაძე, დიდიხანია გასცდა თინეიჯერობის ასაკს, თუმცა ისევ დედის მეთვალყურეობის ქვეშ არის. მის გეგმებში გათხოვება ჯერჯერობით არ შედის. ხათუნა კი თვლის, რომ მისი უფროსი ქალიშვილი უცხოეთში შეძლებს საკუთარი თავის რეალიზებას, "როგორც მომღერალი, როგორც ქალი და როგორც ადამიანი".
დედა–შვილმა "სარკეს" თავიანთი ოჯახის ცხოვრებასა და მიზნებზე უამბეს.
– ხათუნა, ნინი ჯერ კიდევ ბავშვობაში იყო პოპულარული თავისი სიმღერებით, ახლა კი აღარსად ჩანს. ქალიშვილის მომავალს სად და როგორ ხედავთ?
ხათუნა: ნინიმ უნდა დატოვოს აქაურობა და სხვა ქვეყანაში მოახდინოს საკუთარი თავის რეალიზება, სადაც შედგება როგორც მომღერალი, როგორც ქალი და ადამიანი.

– ესე იგი ქვეყნიდან წასვლას აპირებთ?
ხათუნა: ასეთი სურვილი გვაქვს. არ მინდა, ნინის ცხოვრებამ ისე გაიაროს, რომ ვერ განვითარდეს და წინ ვერ წავიდეს. 22 წლის ასაკში ის რეალიზებულია, ამ ასაკამდე ბევრი რამის გაკეთება მოასწრო, მაგრამ არ მინდა, გაჩერდეს. რადგანაც ამ ქვეყანაში თავისი საქმიდან შემოსავალი არ ექნება, მინდა, სხვა ქვეყანაში მოძებნოს საკუთარი თავი. თუ ამ ქვეყანაში და ამ ქალაქში არც ჩემს ქმარს და არც ჩემს შვილს თავიანთი პროფესიიდან შემოსავლის წყარო არ ექნებათ, იძულებულები ვიქნებით, აქედან წავიდეთ.

– საქართველოში ვერანაირ პერსპექტივას ვერ ხედავთ?
ხათუნა: სანამ ეს ქვეყანა იმისთვის მოიცლის, რომ ხელოვან ადამიანებს ხელი შეუწყონ, მანამდე მათი წლები გავა. არ მინდა, ზურამ და ნინიმ თავიანთი ცხოვრება ფუჭად გაატარონ. კარგი იქნება, თუ სხვა ქვეყანაში ცდიან ბედს. საქართველოდან წასვლა ახლო მომავლის გეგმებშია.
ნინი: ჩემი მიზნის მისაღწევად უცხო ქვეყანაში ცხოვრებას მარტივად შევეგუები. კონცერტზე გასვლის შეგრძნებები დიდი ხნის წინ დავკარგე. ჩემი აზრით, საქართველო არის ქვეყანა, სადაც წინა პლანზე მხოლოდ და მხოლოდ პოლიტიკაა წამოწეული.
ხათუნა: შესაბამისად, მომღერლებს არ აქვთ სურვილი, ახალი პროდუქტი შექმნან. არ არსებობს მუსიკალური არხი. მახსოვს, როცა ნინი იწყებდა კარიერას, მამუკა ღლონტს ტელეკომპანია "პირველ სტერეოზე" არაერთი მუსიკალური გადაცემა ჰქონდა. კლიპის გადაღება გვიხაროდა, რადგან ვიცოდით, რაღაც შედეგს მივიღებდით. მომღერლებს შორის ერთგვარი შეჯიბრიც კი იყო, მსჯელობა მიდიოდა, ვისი კლიპი და სიმღერა იყო უკეთესი.
– დედა–შვილის აზრი ყოველთვის ყველაფერში ემთხვევა ერთმანეთს?
ხათუნა: მე და ნინის ნორმალური ურთიერთობა გვაქვს – არც ძალიან კარგი და არც ძალიან ცუდი. არის რაღაც თემები, რაზეც ვერ ვთანხმდებით. მგონია, რომ ჩემი ნათქვამი მასში აგრესიას იწვევს. პერიოდულად მეჩვენება, რომ ნინი რაღაცეებს მალავს, რადგან იცის, რომ არ მომეწონება. ხანდახან ისე არ ფიქრობს, როგორც ამბობს. კონფლიქტს რომ ავცდეთ, მასთან ურთიერთობაში გარკვეული ზღვარი მიჭირავს.
– ობიექტურად რომ შეხედოთ თქვენს ქალიშვილს, ზოგადად როგორი გოგონაა?
ხათუნა: ვფიქრობ, რომ ჩემს სანაცნობო წრეში ერთ–ერთი კარგი შვილია. ნინი ყურადღებიანი, მოწესრიგებული ადამიანია. ამ ეტაპზე კონკრეტული მიზნები გვაქვს დასახული და მის მისაღწევად ყველაფერს აკეთებს.
ნინი: არის თემები, რაზეც შეიძლება მე და ხათუნას კონფლიქტი მოგვივიდეს, ამიტომ შეიძლება ჩემი აზრი არ ვუთხრა. ზოგიერთ რამეზე ვკამათობთ და, თუ კამათში არ ავყვები, ბრაზდება. პრინციპში, თამამად შემიძლია გითხრათ, რომ არ არსებობს საკითხი, რაშიც ხათუნა ჩემ მიმართ სიმკაცრეს იჩენს.
– რა საკითხებზე კამათობთ – სწავლაზე, თაყვანისმცემლებზე თუ შინ დროულად დაბრუნებაზე?
ნინი: თქვენ ის ჩამოთვალეთ, რაზეც თითქმის სულ ვკამათობთ, თუმცა ხათუნასგან აკრძალვები არ მაქვს. ერთი პერიოდი ხშირად მეუბნებოდა უარს, მაგრამ ახლა – აღარ. უფრო დამთმობი გახდა, ვიდრე იყო. როცა საქმე უმნიშვნელო რამეს ეხება, ცდილობს, კონფლიქტი აირიდოს თავიდან. დაგვიანება ყველაზე მეტად არ სიამოვნებს. მისგან კატეგორიული უარის თქმა ალბათ ჩემი საქციელით დავიმსახურე. ახლა წინასწარ ყველაფერზე ვთანხმდებით, მან ყოველთვის იცის, სად და ვისთან ერთად ვარ. მასთან ტყუილი არ მჭირდება.
– ხათუნა, გამოდის, ნინი მორჩილი შვილი გახდა?
ხათუნა: ნინის ბავშვობიდან საკუთარი აზრი გააჩნია და, სანამ ცხვირს არ წაიმტვრევს, მანამდე ჩემს აზრს არ ითვალისწინებს.
ნინი: არის რაღაც საკითხები, რომლებზეც არამცთუ დედასთან, არავისთან უნდა ილაპარაკო.
– ნინი, ხათუნას ხშირად აღუნიშნავს, რომ თქვენ ისეთ ახალგაზრდა ასაკში გაგაჩინათ, თქვენთან ერთად გაიზარდა და მისთვის და ან მეგობარი უფრო იყავით, ვიდრე შვილი. თქვენც გქონიათ ასეთი შეგრძნება?
ნინი: გარდა იმისა, რომ ხათუნა საუკეთესო დედაა, ჩემი საუკეთესო მეგობარიცაა. დღემდე ვეკითხები, რა ჩავიცვა. ხშირად ვერ ვთანხმდებით, მაგრამ ამ კითხვის გარეშე დღე არ ჩაივლის. ერთადერთი ადამიანი, ვისთან ერთადაც საყიდლებზე წასვლა მიყვარს, დედაა. თუ ჩემ გვერდით არ არის, ტანსაცმელს ფოტოს ვუღებ, მობილურით ვუგზავნი და აზრს ვეკითხები.
– ერთმანეთის გარდერობსაც იყენებთ?
ნინი: არა, ხათუნას არ უყვარს და მეც არ მიმაჩნია სწორად სხვისი ტანსაცმლის ჩაცმა. ასე რომ, არც ერთმანეთის კოსმეტიკას ვეხებით და არც ერთმანეთის გარდერობს.
ხათუნა: მე წონაც არ მიწყობს ხელს, რომ ნინის გარდერობით ვისარგებლო. იშვიათად თუ ნინის ჩანთას დავიჭერ. ბავშვობიდან ვარიგებდი, რომ სხვისი ტანსაცმელი არ ჩაეცვა, მათ შორის – არც ჩემი, ეს ჰიგიენის საკითხია. ამ საკითხშიც დამიჯერა.
– ხათუნა, თქვენს ორ ქალიშვილს, ნინისა და ანასტასიას შორის დიდი ასაკობრივი სხვაობაა, რომელ თობასთან უფრო გიადვილდებათ კომუნიკაცია – უფროსთან თუ უმცროსთან?
ხათუნა: ამაზე არასდროს მიფიქრია. ანასტასია, ნინისგან განსხვავებით, ცოტა უფრო მოწესრიგებულია და შოუბიზნესი არ აინტერესებს. როცა მინდა, რომ მიმღეროს, შედეგს დიდი ხვეწნის შემდეგ ვიღებ. დამოუკიდებელი ბავშვია, ნინი კი ყოველთვის ჩემზე იყო მოწებებული, მე მიცდიდა, რომ ყველაფერი დამეგეგმა. ანასტასიას შემთხვევაში პირიქით არის. ვიოლინოზე უნდოდა სიარული და რაღაცნაირად ვერ მოვაბი თავი. ერთ მშვენიერ დღეს აღმოვაჩინე, რომ ანასტასიამ სკოლაში იპოვა ვიოლინოს წრე და დამოუკიდებლად დაიწყო სიარული.
ჩემი შვილებიდან არც ერთი მგავს. ბავშვობაში ნინი უფრო მგავდა, ვიდრე ანასტასია.
– როცა ანასტასია დაიბადა, ნინი მასზე ეჭვიანობდა. დღეს როგორია მათი ურთიერთობა?
ხათუნა: და არასოდეს მყოლია, მაგრამ ჩემს წარმოდგენაში როგორიც უნდა იყოს კარგი დების ურთიერთობა, ნინის და ანასტასიას ისეთი აქვთ. ნინი რომ წასასვლელად გამოეწყობა, ანასტასია ყოველ ჯერზე ეკითხება, სად მიდიხარო. ვხვდები, მასაც უნდა, რომ ნინისთან ერთად წავიდეს.
ნინი: თითქმის ყველგან დამყავს. არ არის ცელქი და უზრდელი, რასაც ვეტყვი, ყველაფერს მიჯერებს. ჩემთან ერთად სიარული იმდენად უყვარს, ცდილობს, ისე მოიქცეს, რომ არ გავღიზიანდე.
– ნინი, თქვენს პირად ცხოვრებაში რაიმე საინტერესო სიახლეები ხომ არ ხდება?
ნინი: პირადი ცხოვრება ჩემთვის მეორე ადგილზეა. აბსოლუტურად სხვა გეგმები მაქვს, რასაც წინასწარ ვერ ვიტყვი. ვნახოთ, რა გამოვა.
ხათუნა: ნინის გათხოვებაზე დიდად არ ვფიქრობ, უბრალოდ სურვილი მაქვს, რომ მის გვერდით ისეთი ადამიანი იდგეს, რომელიც შეძლებს, ისევე უზრუნველყოს ნინი, როგორც ჩემი ოჯახი უზრუნველყოფდა მას თავისი ცხოვრების ყოველ ეტაპზე. არ მინდა, ისეთ კაცს დაუკავშიროს ცხოვრება, რომელიც მისი სათრევი იქნება. ყველა დედას თავისი შვილისთვის საუკეთესო უნდა და მეც იმ დედებს შორის ვარ, რომლებსაც სურთ, რომ რეალიზებული, ღირსეული სიძე ჰყავდეთ და არა – მაჩანჩალა, რომელიც ცოლის სახელით იარსებებს.
– ასეთ საკითხებში თქვენს ცხოვრებისეულ გამოცდილებას ითვალისწინებს?
ხათუნა: რამდენად ითვალისწინებს, ვერ გეტყვით, მაგრამ გათხოვებას ჯერ რომ არ ჩქარობს, ფაქტია. ეს ის საკითხია, რომელშიც არასდროს ჩავერევი. ცხოვრებაში ყველა თავის არჩევანს აკეთებს, ვიღაცას უნდა, ცხვირით ტალახში ჩავარდეს, ვიღაცას მაღლა–მაღლა სიარული სურს. ნინი რომელს აირჩევს ამ ორიდან, მომავალი გვიჩვენებს.
– ნინი, მამასთან ხშირი ურთიერთობა გაქვთ?
ნინი: მამასთან ძალიან კარგი ურთიერთობა მაქვს, ჩვენ მეგობრები ვართ. ზოგადად იმ ფაქტს, რომ ის მამაჩემია, ვერ ვეჩვევი. ახლა ის პერიოდია, როცა ერთმანეთს ვსწავლობთ. ხანდახან ერთიმეორისგან რაღაც გვწყინს კიდეც, მაგრამ, საბოლოო ჯამში, იდეალური ურთიერთობა გვაქვს. მამასთან ხშირად მივდივარ, მაგრამ მასთან არ ვრჩები, საერთოდ არავისთან დარჩენა არ მიყვარს.
– ხათუნა, ქალიშვილებს და ქმარს ყურადღებას თანაბრად უნაწილებთ?
ხათუნა: მე და ზურას ცოლქმრობის საწყის ეტაპზე პატარა პრობლემა გვქონდა. ნინი გარდატეხის ასაკში იყო და ცოტა იეჭვიანა, მაგრამ ეს ისე დალაგდა, ვერც კი მივხვდით. ოჯახის ყველა წევრი თავის წილ მზრუნველობას იღებს.
ნინი: ჩემი და ზურას მეგობრობამ დროს გაუძლო, მასთან უმნიშვნელო კონფლიქტიც არ მახსოვს.
ლანა კიკნაძე, ჟურნალი სარკე