ვის გაკეთებულ ლობიოს მიირთმევს გემრიელად კოტიკო თოლორაია და რა ახსენებს ბავშვობას ეკო ფანგანს

ჩვენი რუბრიკის მიზანია, ცნობილ ადამიანებს კონკრეტულად დავასახელებინოთ ის ადგილები, სადაც ყველაზე კარგ მომსახურებას იღებენ და საუკეთესო პროდუქციას იძენენ, იქნება ეს ტანსაცმლის მაღაზია თუ, ვთქვათ, კაფე ან რესტორანი. ამ თემაზე მოდელსა და ტელეწამყვან ეკო ფანგანს და შოუმენ კოტიკო თოლორაიას ვესაუბრეთ.

ეკო ფანგანი:

- ხშირად დავდივარ საზღვარგარეთ და ტანსაცმელს იქ ვყიდულობ, მაგრამ ყოველდღიურ რაღაცებს აქაც ვიძენ. დავდივარ River Island-ში, სადაც ყოველდღიურად ჩასაცმელი ძალიან ლამაზი ქვედაბოლოები აქვთ. ძალიან ხშირად ვიცვამ ასევე დიზაინერ დიანა კვარიანის სამოსს. უცბად თუ რამე განსხვავებული დამჭირდა, მასთან ვყიდულობ. ''თბილისი მოლიც'' ძალიან მომწონს. ტელევიზიებში რომ ვმუშაობდი და გადაღებისთვის რამე დამჭირვებია, უცბად წავსულვარ და მიყიდია. სულ ვამბობ, ცოტა ფული და გემოვნება თუ გაქვს, იქ მშვენივრად ჩაიცვამ.
- ფეხსაცმელებსა და ჩანთებს სად ყიდულობ?
- ფეხსაცმელებს და ჩანთებს აქ არასდროს ვყიდულობ. წელიწადში ორჯერ ევროპაში, კერძოდ კი ბერლინსა და იტალიაში მიწევს ხოლმე წასვლა და იქ ვიმარაგებ. ჯინსი უფრო იშვიათად მაცვია, მაგრამ არც ესენი მიყიდია აქ. არის რაღაც მაღაზიები და უნდა გავიარო. ამბობენ, ''დისქუაიერდის'' ჯინსები კარგიაო, მაგრამ მგონი, მაინც არ არის ნამდვილი და პატენტია.
- სად იკვებები?
- ფრანგული რესტორანია აბაშიძეზე - Le Marais და ყოველდღე იქ დავდივარ. მშია, არ მშია, ყველაფერზე იქ შევდივარ. ახლა ყიფშიძეზე ძალიან მაგარი ფრანგული ბარი გაიხსნა - BreadBar-ი და საუზმეზე იქ დავდივარ. ფუნთუშები ძალიან მიყვარს და ძალიან გემრიელი აქვთ. მე და ჩემს მეგობრებს გვაქვს ასეთი ჩამოყალიბებული მოსაზრება, თუ კვების ობიექტში გემრიელი კლაბსენდვიჩია, ძირითადად, იქ კარგი საჭმელებია ხოლმე. კიდევ რუსულ-უკრაინულ სამზარეულოზე ვგიჟდები, კიევური კატლეტით დაწყებული, ''ვარენიკებით'' დამთავრებული. ამ ყველაფრის საჭმელად ''კალინაში'' დავდივარ. ძალიან მაგარი ინტერიერია და გემრიელად ზიხარ. ჭურჭელიც ცოტა ძველებურია და ბავშვობას მახსენებს, მომწონს.
- ქართული კერძების საჭმელად სად დადიხარ?
- ქართული საჭმელები ძალიან მიყვარს, მაგრამ ქართულ რესტორნებში ასე ხშირად არ დავდივარ. ''მაჭახელაში'' მივდივარ ხოლმე, როცა აჭარული ხაჭაპურის ჭამა მინდა. ჩემი ცხოვრების რაღაც პერიოდი მიწევდა ტაშ-ფანდურში ყოფნა და შესაბამისად, ძალიან ქართული რესტორანი რასაც ჰქვია, ყველგან ნამყოფი ვარ.

კოტიკო თოლორაია:
- ჩემი სამი საყვარელი მაღაზიებია: TopShop-i, H&M-i dდა ZARA. ძირითადად ამერიკიდან მიგზავნის ხოლმე ჩემი ძმა, ან მირჩევნია, რომ თვითონ წავიდე და მოვიმარაგო. აქ ჩემმა მეგობრებმა მასწავლეს რაღაც მაღაზიები და რამდენიმე შარვალი და ფეხსაცმელი ვიყიდე. აბაშიძეზეა Take Two. რამდენჯერმე Next-შიც ვიყავი და რაღაცები ვიყიდე. ჩემი ყველაზე დიდი პრობლემა ჯინსი და ფეხსაცმელია. ზოგადად, კლასიკურ ფეხსაცმელს იშვიათად ვიცვამ, უფრო კედები და ''ბათინკები'' მაცვია. ერთი თვის წინ Take Two-ში All Star-ი ვიყიდე.
- ბაზრობაზე შეგიძენია რამე?
- ძალიან, ძალიან ადრე. ისე, ჩემი ივენთებიდან გამომდინარე, სამუშაო პროცესში ძალიან ხშირად მიწევს ლილოში წასვლა. დეკორაციებისთვის ფარდებს და რაღაცებს იქ ვყიდულობ, მაგრამ ჩემთვის არაფერი მიყიდია.
- კვების ობიექტებზე რას გვეტყვი?
- ეს ჩემი სუსტი წერტილია. ჩინურ-იაპონურ სამზარეულოზე ვგიჟდები. სუშის ფანი ვარ. ქართულიც მიყვარს და მექსიკურიც. ჩინურში დავდივარ ხშირად, ხან პეკინზე, ხან შარდენზე, ხან ''პიკასოში''. საბურთალოზე დავდივარ ხოლმე კიდევ Hookah Lounge-ში. მიყვარს GrandGourmet-ში სიარული, იაპონური სუშის ბარებია პავლოვზე და მრგვალ ბაღთან, შარდენზეც არის, მაგრამ იქ არ დავდივარ.
- რა გიყვარს ყველაზე მეტად ქართული საჭმელებიდან?
- ვგიჟდები ლობიოზე. საერთოდ, ყველაზე მაგარ ლობიოს დედაჩემი აკეთებს, მაგრამ ისე მცხეთის სალობიეში დავდივარ ხოლმე.

კოტიკოს საყვარელი ტანსაცმლის ბრენდები:
1.TopShop
2.H&M
3.ZARA
4.Take Two
5.Next

ფავორიტი რესტორნები:

1.''პიკასო''

2.Hookah Lounge

3.GrandGourmet

4.მცხეთის სალობიე

ეკოს საყვარელი ტანსაცმლის მაღაზიები:

1. River Island

2. თბილისი მოლი

3.დიანა კვარიანის მოდის სახლი

ფავორიტი რესტორნები:
1. Le Marais
2. BreadBar
3.''კალინა''

4.''მაჭახელა''

ეკა ჩიკვაიძე
ჟურნალი ''რეიტინგი''