სილამაზის ინდუსტრიის ”მკვლელი” პროდუქტები

არავისთვის არის საიდუმლო, რომ სილამაზე მსხვერპლს მოითხოვს, მაგრამ ხანდახან ეს მსხვერპლი მეტისმეტად დიდია:

მცენარეების ექსტრაქტები, რომლებსაც მძლავრი ქიმიური კონსერვანტები ფარავს; ემულგატორები; სტერილიზაციის გარეშე ჩატარებული პროცედურები; ტოქსიკური ნივთიერებები და მასალები -სილამაზის ინდუსტრიის საქონელი ხანდახან არა მხოლოდ სახიფათოა ჯანმრთელობისთვის, ადამიანის სიცოცხლესაც კი ემუქრება.

ტუჩსაცხი -გავრცელებულია ინფორმაცია, რომ ტუჩსაცხის 400 მწარმოებელი იყენებს წარმოებაში ტყვიას, რომელსაც შეუძლია ნეგატიური ზემოქმედების მოხდენა ორგანიზმის ძირითად პროცესებზე და ადამიანის ყველა ორგანოსთვის საზიანოა.

ტუჩის ”ბლესკი” - სწორედ ვაზელინის წყალობით ბრწყინავს ის, მაგრამ ვაზელინი ნავთობგადამუშავების სუბპროდუქტია. საშუალო სტატისტიკური ქალი თავისი ცხოვრების განმავლობაში გაუცნობიერებლად სამ კილოზე მეტ ნავთობმრეწველობის ნარჩენებს იყენებს.

ევროკავშირმა უკვე აკრძალა ვაზელინის შემცველი პროდუქტის წარმოება, რადგან მას
ონკოლოგიური დაავადებების გამოწვევა შეუძლია. იმ ქალების სისხლში, რომელთაც მკერდის სიმსივნე აქვთ, ორჯერ მეტია ვაზელინის შემადგენლობაში შემავალი ნივთიერება, ვიდრე ჯანმრთელი ქალების შემთხვევაში.

ავტორუჯის სპრეი -ავტორუჯი უსაფრთხო საშუალებად მიიჩნეოდა, მაგრამ ბოლო კვლევებმა ცხადყო, რომ მასში შემავალი ძირითადი ინგრედიენტი DHA ქსოვილებს აზიანებს და საბოლოო ჯამში სიმსივნის პროვოცირებას იწვევს.

ეს განსაკუთრებით ეხება სპრეის -მისი შესხურების დროს შემთხვევით შეიძლება მისი შესუნთქვა, რაც მომწამვლელ ეფექტს იძლევა.

ფრჩხილების ლაქი - როცა აღმოაჩინეს, რომ ფრჩხილის ლაქში შემავალი ერთ-ერთი აქტიური ინგრედიენტი DBP შეიძლება პოტენციურად საშიში იყოს, ოფიციალურად აკრძალეს მისი გამოყენება. პრობლემა ის არის, რომ ბევრი ფრჩხილის ლაქი კვლავ შეიცავს ფორმალდეჰიდს. ამ ნივთიერებას მეცნიერები იყენებენ მკვდარი ქსოვილების შესანახად. მან შეიძლება ასთმა და კიბოს განვითარების პროვოცირება გამოიწვიოს.

თმის საღებავი - კვლევამ უჩვენა, რომ ქალებს, რომლებმაც 1980-იანი წლებიდან დაიწყეს თმის შეღებვა მუქ ფერად, ავთვისებიანი ლიმფომა განუვითარდათ. ასევე გაირკვა, რომ პარიკმახერებს, რომელთაც ხუთ წელზე მეტი აქვთ ნამუშევარი, სამჯერ მეტი აქვთ მკერდის სიმსივნით დაავადების შანსი.

ბრაზილიური კერატინული თმის მკურნალობა -ძალიან პოპულარულია გოგონებს შორის, რადგან მოცულობითი თმის გარანტიაა. ”ჯადოსნობა” თმაზე კერატინის პროტეინების ზემოქმედების შედეგია, მაგრამ ექსპერტებს მიაჩნიათ, რომ საქმე აქაც ფორმალდეჰიდშია.

იაფფასიანი ბიჟუტერია -ვისაც არ შეუძლია ძვირად ღირებული სამკაულების შეძენა, ან, უბრალოდ, მოსწონს ბიჟუტერია, ხშირად იყენებს იაფფასიან ანალოგებს. ამგვარი ბიჟუტერიის წარმოება საკმაოდ მომგებიანია. თუმცა აღმოჩნდა, რომ ამგვარი სამკაულების უმრავლესობის შემადგენლობაში შედის ტყვია, დარიშხანი, კადმიუმი და ვერცხლისწყალი.

მჭიდრო ტანსაცმელი -ვიწრო ტანსაცმელს შეუძლია თრომბებისა და საშარდე ბუშტის ინფექციების პროვოცირება. დაბალწელიან და ვიწრო ჯინსებს კი თეძოებზე კანის დაზიანება შეუძლიათ.

აღარც ღირს ლაპარაკი ისეთ აღიარებულ ”მავნებლობებზე”, როგორებიცაა მიკრონემსები, მკერდის იმპლანტანტები, ტატუირება, პირსინგი, პერმანენტული მაკიაჟი (რომლებსაც სხვადასხვა ინფექციის გადატანა და ნერვული უჯრედების დაზიანება შეუძლიათ) და სხვა.

ქალებმა გაცილებით მეტი ყურადღება უნდა მიაქციონ სილამაზის სხვადასხვაგვარი ატრიბუტის ხარისხს, შემადგენლობას და საკუთარი სიცოცხლე და ჯანმრთელობა საფრთხეში არ უნდა ჩაიგდონ, თუნდაც სილამაზისთვის.