რიანას ატეხილი დებოშის გამო ლონდონის ერთ-ერთი კლუბიდან გაძევება დაუპირეს

როგორც ცნობილი გახდა, მომღერალი რიანა ბრიტანეთის დედაქალაქში River Island-ის საკუთარ კოლექციაზე სამუშაოდ ჩავიდა. საქმისგან განტვირთვის მიზნით ის ლონდონის ერთ-ერთ კლუბში გასართობად შევიდა.

მას მერე, რაც ნასვამი რიანა მაგიდაზე ავიდა და შამპანურის რამდენიმე ბოთლი დაამტვრია, მასთან კლუბიდან გაძევების მიზნით დაცვის დაკუნთული თანამშრომლები მიიჭრნენ. როცა რიანას მეგობრები შეეცადნენ შეეჩერებინათ დაცვის თანამშრომლები, ჩხუბი ატყდა. "არ იცით, ვინ ვარ?" - გაჰყვიროდა ვარსკვლავი.

დაცვის სამსახურის თანამშრომლები ცდილობდნენ, რიანა კლუბიდან გაეძევებინათ, მომღერლის მეგობრები კი მთელი ხმით გაჰკიოდნენ: "ეს ხომ რიანაა, იდიოტებო!" როგორც ჩანს, მომღერალი კლუბის თანამშრომლებმა მაინც ვერ იცნეს.

სიტუაცია დაწესებულების მენეჯერმა გამოასწორა, როცა მიხვდა, ვის გაძევებას ცდილობდნენ კლუბიდან. იმისათვის, რომ სკანდალი ჩაეფარცხა, მენეჯერმა მომღერლის კომპანიას ახალი მაგიდა და უფასო სასმელი შესთავაზა. უსიამოვნო ინციდენტის მიუხედავად, მომღერალმა მეგობრებთან ერთად მოლხენა დილამდე გააგრძელა.