ქრისტინე ძიძიგური: "აქ, პარიზში, სილამაზეს სიგამხდრით ზომავენ"

ქრისტინე ძიძიგური პარიზის მაღალი მოდის წრეში უკვე ნაცნობი სახელია. 24 წლის მოდელი "კრისტიან დიორის" პარფიუმის ერთ–ერთი სახეა. ქართველი ლამაზმანი სხვა ცნობილ სამოდელო სახლებთანაც თანამშრომლობს. ქრისტინემ კარიერა საქართველოში დაიწყო. ცოტა ხანი ანსამბლ "ერისიონში" ცეკვავდა. 12 წლის ასაკში მოდელი გახდა. 2008 წელს "ვიცე მის საქართველოს" ტიტული მოიპოვა და მალაიზიაში გამართულ საერთაშორისო კონკურსზე "მის პერსონა" გახდა. 2010 წელს თბილისში მოდის კვირეულზე სტუმრად მიწვეული ქრისტინე ფრანგმა მოდის აგენტებმა შენიშნეს და ერთწლიანი კონტრაქტით პარიზში მიიწვიეს. პარიზის პრესტიჟულ სამოდელო სააგენტო "ელისეს" ინტუიციამ არ უღალატა – ქართველმა მოდელმა ცნობილი ბრენდების მიერ გამოცხადებული კასტინგები წარმატებით გაიარა.
მაღალი მოდის სფეროში ტრიალი თავის მოვლის მაღალ სტანდარტებს მოითხოვს, რაც ქრისტინემ კარგად აითვისა და პარიზში მიღებულ გამოცდილებას "სარკის" მკითხველებსაც უზიარებს.
– ქრისტინე, მსოფლიო მოდის დედაქალაქში ჩასული ქართველი გოგონა როგორ გრძნობთ თავს, მოდის ტენდენციებს როგორ აუწყვეთ ფეხი?
– მაქვს ჩემი საყვარელი სტილი და მიყვარს ჩემი გემოვნებით ჩაცმა, თუმცა მოდელს გარკვეული სტანდარტები აქვს დაწესებული. კასტინგებზე სპეციალური სტილით ჩაცმა მოეთხოვება, მოდელებს ძირითადად ისე უნდა გვეცვას, რომ სხეული კარგად გამოჩნდეს. უნდა გამოირჩეოდე, რომ მოდელი ხარ.
– საფრანგეთში როგორ ქალს უწოდებენ ელეგანტურს, მიმზიდველს?
– ეს ის საკითხია, რომელსაც ალბათ ყველგან განიხილავენ. ჩემი გამოცდილებიდან, ელეგანტურად და მიმზიდველად ითვლება ქალი, რომელიც საკუთარ თავს პატივს სცემს, ძალიან თავაზიანი, ჭკვიანი და ამავდროულად მოვლილი და ნაზია.
– თქვენს ცხოვრებაში არსებობს მამაკაცი, ვის აზრსაც ენდობით გარეგნობასთან დაკავშირებით და მისგან რჩევებს იღებთ?
– ჩემს ძმას ხშირად ვეკითხები ბევრ რამეს, რადგან მისი რჩევები ყოველთვის მადგება. შეცდომებს ზუსტად ხედავს. ვაკვირდები, როგორი სტილის გოგონებს უყურებს, რას აქცევს ყურადღებას, ამიტომ მისი ბოლომდე მჯერა.
– თქვენი ძმა რას საქმიანობს?
– კონსერვატორიის სტუდენტია, დრამატული ტენორი აქვს.
– აქვე თქვენი ოჯახის სხვა წევრებიც გაგვაცანით.
– დედა და მამა ექიმები არიან. დედაჩემი 1991 წლის საქართველოს სილამაზის კონკურსის გრან პრის მფლობელია. ჩემი და საერთაშორისო ურთიერთობების ფაკულტეტზე სწავლობს, ევროპის ახალგაზრდული პარლამენტის მუშაობაში აქტიურად არის ჩართული და ნატო–ს ახალგაზრდულ სამიტებში მონაწილეობს. ჩემთვის ძალიან ახლობელი ადამიანია ბებია, რომელმაც გამზარდა და მუსიკა შემაყვარა. მისი წყალობით, ბავშვობიდან ვმღერი და ვუკრავ ფორტეპიანოზე, კონსერვატორიის ნიჭიერთა ათწლედში ვსწავლობდი.
– პარიზში მარტო ცხოვრობთ?
– პარიზში ვცხოვრობ ერთ ფრანგ ქალთან, რომელიც ჩემი ოჯახის ძალიან ახლობელია, ჩემებიც ძალიან ხშირად ჩამოდიან.
– გვერდით საყვარელი მამაკაცი თუ გყავთ?
– არა. ყოველი წამი გათვლილ–გაანგარიშებული მაქვს, ვმუშაობ და თან ვსწავლობ, სხვა რამისთვის კი დრო აღარ მრჩება.
– თავის მოვლის კულტურა ალბათ ოჯახიდან მოგყვებათ. რა ისწავლეთ დედისა და ბებიისაგან?
– დედასაც და ბებიასაც ძალიან უყვართ თავის მოვლა. უმეტესი რამ მათგან ვიცი და დღემდე ბევრ რამეს მასწავლიან. მათ უყვართ ის, რაც საუკეთესოა. დედაჩემი ძალიან ლამაზი, განათლებული, მტკიცე და უშიშარი ქალია. სულ ვცდილობ, რომ მას დავემსგავსო. ბებია გარეგნობასთან დაკავშირებით სულ შენიშვნებს მაძლევს, თავის ფოტოებს მაჩვენებს, სადაც ჩემი ასაკისაა. მეუბნება, თუ როგორ იცვამდა ლამაზად, რამხელა მნიშვნელობას ანიჭებდა სტილსა და ხარისხს. იგი დღესაც ძალიან მოწესრიგებული და სულ გაპრანჭულია, მოდის ტენდენციებში იმდენად არის გაცნობიერებული, რომ რჩევებს აქეთ გვაძლევს.
– საფრანგეთში როგორ უვლიან თავს ქალები, რას აქცევენ ყურადღებას?
– ალბათ ყველაფერი მაინც ცხოვრების რიტმზეა დამოკიდებული. აქ, პარიზში, ძალიან დიდ ყურადღებას აქცევენ წონას, სილამაზეს სიგამხდრით ზომავენ. ფრანგებისთვის მოდა და სტილი ყველაზე მნიშვნელოვანია, მას ადამიანის შეფასების კრიტერიუმადაც კი იყენებენ. ფრანგი ქალები, ასაკის მიუხედავად, ძალიან მოვლილები არიან და ლამაზად გამოიყურებიან.
– პარიზელი წარმატებული მოდელის ცხოვრებას როგორ დაახასიათებდით?
– ეს იმას ნიშნავს, რომ ხვდები მაღალ საზოგადოებაში, ეცნობი გლამურული ცხოვრების სტილს, ბევრს მოგზაურობ, უცხო ხალხთან თანამშრომლობის გამოცდილებას იღებ. მოდის სამყარო ძალიან სწრაფად ვითარდება, შესაბამისად შენც ძალიან მალე ვითარდები და მოკლე დროში დიდ წარმატებას აღწევ, თითქოს დიდი ნაბიჯებით მიიწევ დიდი საზოგადოებისკენ. არასოდეს იცი, რა სიურპრიზი დაგხვდება წინ. შეიძლება უცებ დაგირეკოს შენმა ბუქერმა და გითხრას, "დიორთან" იმუშავებო, როგორც ჩემს შემთხვევაში მოხდა. საბოლოოდ ისეთ ადგილზე ხვდები, რომელზედაც ვერც იოცნებებდი.

– თუმცა ამ ყველაფერს შრომის გარეშე ვერ მიაღწევ.
– რა თქმა უნდა. ასევე მთავარია პროფესიონალიზმი, მოთმინება და საკუთარი თავის რწმენა, სხვა შემთხვევაში ძალიან რთულია, გაუძლო კონკურენციას და შეინარჩუნო ის ადგილი, სადამდეც მისვლის შანსი მოგეცა.
– თქვენ რითი მიიქციეთ ყურადღება?
– ფრანგების თქმით, ჩემი ბუნებრივი სილამაზით მოიხიბლნენ – სქელი წარბებით, რაც პიროვნულ ხასიათს უსვამს ხაზს, ღია ფერის კანით, ნავარჯიშევი სხეულით. ჩემი აგენტების გარეშე გარეგნობაში ცვლილებას ვერ შევიტან. ასევე, სახეს, თმას და სხეულს მაქსიმალურად უნდა მოვუარო.
– როგორია თქვენი კვების რაციონი?
– ყველაფერს ვჭამ, ოღონდ ცოტას. გვიან ჭამას ვერიდები. ძირითადად ვიკვებები ბოსტნეულით, ხილით, მოხარშული ხორცით და თევზით. ვცდილობ, ყოველთვის ჯანსაღი საკვები მივიღო და არასდროს – გაზიანი სასმელები.
– დიეტას არ იცავთ?
– მკაცრ დიეტაზე არასოდეს ვყოფილვარ. ძალიან ბევრს ვვარჯიშობ. გარეგნობისთვის ცხოვრების ჯანსაღი წესი ყველაზე მნიშვნელოვანია. ამაში იგულისხმება ბიოსაკვების მიღება, დიეტოლოგიის ცოდნა, რომ ვიცოდეთ, რა რასთან უნდა ვჭამოთ, სპორტი და ფიზიკური აქტივობა, რაც ამავდროულად სტრესისგან და უარყოფითი ენერგიისგან ათავისუფლებს ადამიანს, ღამის ხანგრძლივი ძილი და ა.შ.
– სახის კანს როგორ უვლით?
– ბუნებრივი პროდუქციით, თუმცა, როგორც გითხარით, ჯანსაღი საკვები და ძილი უმთავრესია.
– რამდენად მისაღებია თქვენთვის ბოტოქსი ან პლასტიკური ქირურგია?
– უკეთესია ბუნებრივად შევინარჩუნოთ სილამაზე, სადამდეც ეს შესაძლებელია და შემდეგ მის დასაბრუნებლად ყველაფერი მისაღებია, თუმცა პლასტიკური ქირურგიის შემთხვევაში ზღვარს არ უნდა გადააბიჯო.
– გრძელ თმას როგორ უვლით?
– ამისთვის უამრავ საშუალებას ვიყენებ – ნიღბებს, ზეთებს და ა.შ.
– ეს ძვირი სიამოვნებაა, განსაკუთრებით საფრანგეთში?
– მთავარი მონდომებაა. კარგი ხარისხის პროდუქცია შეიძლება შევიძინოთ ხელმისაწვდომ ფასში. ქიმიურ საშუალებებს ყოველთვის ბუნებრივი საშუალებები სჯობია. არსებობს შედარებით დაბალფასიანი, მაგრამ კარგი ხარისხის ფრანგული პროდუქცია, რაც თბილისის აფთიაქებშიც იყიდება.
– მაკიაჟის გაკეთებისას რა წესები უნდა დავიცვათ?
– ბევრი მაკიაჟი დღისით ძალიან არაესთეტიკურია. დღისით საკმარისია სახის კრემი, კორექტორი, წამწამების ტუში და ტუჩისფერი პომადა. საღამოს კი შეგიძლიათ ფანტაზია მოიშველიოთ, ადგილის და საღამოს ტანსაცმლის შესაბამისად მკვეთრი მაკიაჟი მისაღებია. როდესაც თვალები არის მკვეთრად ჩახატული, ტუჩები შედარებით უფერული უნდა იყოს, ხოლო, როცა ტუჩებზეა აქცენტი გადატანილი, მაგალითად, წითელი ტუჩსაცხით, მაშინ თვალები ნაკლებ ჩახატული და უფრო ბუნებრივი უნდა იყოს.
– აქსესუარებს და სამკაულებს რა პრინციპით ირჩევთ?

– აქსესუარები მიყვარს, მაგრამ ნაკლებად ვხმარობ. მოდელი ძალიან ბუნებრივად უნდა გამოიყურებოდეს, ამიტომ მეც უკვე იშვიათად ვხმარობ სამკაულებს.
– ვინ გიყურებთ სარკიდან?
– ძლიერი, თავდაჯერებული, საკუთარი თავის მიმართ კრიტიკული ადამიანი.
მანანა ნოდია, ჟურნალი სარკე