მოდელთა დიეტისა და ფიტნესის საიდუმლო

ამბობენ, მოდელად უნდა დაიბადოო, თუმცა პოდიუმის ვარსკვლავები გულხელდაკრეფილნი როდი სხედან და ელოდებიან დიდების გვირგვინს - დილიდან საღამომდე ვარჯიშობენ სპორტდარბაზებში და გმირულად სჯერდებიან შეზღუდულ რაციონს.

გაგაცნობთ Victorias Secret-ის "ანგელოზთა" სილამაზის საიდუმლოს.

დაუტცენ კრეზი

27 წლის ჰოლანდიელ მოდელს მიაჩნია, რომ მისი სამუშაოა, კარგად გამოიყურებოდეს და ისიც ცდილობს, ეს სამუშაო მაღალ დონეზე შეასრულოს. ამისთვის კი მართლაც სერიოზული გარჯა უწევს.

საქმე ის არის, რომ დაუტცენი ვერა და ვერ ამბობს უარს საყვარელ კარტოფილ "ფრიზე", რომელიც საკმაოდ კალორიულია და ამიტომაც აქტიურად ვარჯიშობს კრივში, ხტუნავს სახტუნელათი და დარბის.

დაუტცენი ამბობს, რომ კარგი მწვრთნელი ჰყავს, რომელმაც ზუსტად იცის, რა სჭირდება მას. მეორე მწვრთნელიც ჰყავს - საკუთარი ვაჟი. პატარა ბიჭუნა დედას მოდუნების საშუალებას არ აძლევს.

აი, რას ამბობს დაუტცენ კრეზი: "არ შეიძლება შემადაროთ მას, ვინც ყოველ დილით სამსახურში მიიჩქარის. მე სულ სხვანაირი ცხოვრება მაქვს, კარგად გამოვიყურები იმიტომ კი არა, რომ ასეთი ყოჩაღი ვარ, არამედ იმიტომ, რომ ეს ჩემი მოვალეობაა".

ადრიანა ლიმა

ის 31 წლისაა, ჰყავს ქმარი, მშვენიერი გოგონა და ახლა მეორე შვილსაც ელოდება. ერთი შეხედვით, შესაშური იდილიაა. თუმცა ადვილად არც მას მიუღწევია წარმატებისთვის. ლიმა გულწრფელად აღიარებს, რა შრომის ფასად უჯდება საკუთარი მოხდენილი გარეგნობის შენარჩუნება და მცდელობა, სხვა "ანგელოზებს" არაფრით ჩამორჩეს.

მარკის ყოველწლიური შოუსთვის მზადებას ორი თვით ადრე იწყებს და პირადი მწვრთნელის მეთვალყურეობით დღეში ორჯერ ვარჯიშობს. ჩვენებამდე ცხრა დღით ადრე ადრიანა წყვეტს მყარი საკვების მიღებას და მხოლოდ წყლითა და პროტეინების კოქტეილებით იკვებება. დეფილემდე 12 საათით ადრე კი ლიმა წყალზეც კი უარს ამბობს.

მოდელმა თავისი ეს "საიდუმლოებები" შარშან გამოაქვეყნა და შემდეგ ინანა, რადგან "ჯანსაღი ცხოვრების წესის" დამცველთა რისხვა დაატყდა თავს. მათი აზრით, ადრიანა ლიმას უამრავი თინეიჯერი თაყვანისმცემელი ჰყავს და შეიძლება თავიანთი კერპის მეთოდები მისაბაძად და სამაგალითოდ გაიხადონ, რაც მათ ჯანმრთელობას სერიოზულ საფრთხეს შეუქმნის.

სპეციალისტთა აზრით, ლიმას მიბაძვა არ ღირს. ყველა ადამიანს სხვადასხვა ორგანიზმი აქვს და სხვადასხვა მეთოდი სჭირდება. ადრიანას მიბაძვა მხოლოდ ნებისყოფის თვალსაზრისით შეიძლება. დაუღალავი შრომა და ძლიერი ნებისყოფა აუცილებლად მოგიტანთ წარმატებას.

აი, რას ამბობს ადრიანა ლიმა: "როცა სითხის მიღებას წყვეტ, ორგანიზმი თითქოს შრება და ამ დროს სწრაფად შეიძლება ოთხი კილოგრამის დაკლება".