აქტუალური აბრეშუმი და დაბალძირიანი ფეხსაცმელი

''ტამანინი'' არის ბრენდი, რომელსაც მეგობარი დიზიანერები თაკო ლეკიშვილი და ნინო გოგიძე ქმნიან. ამჟამად ისინი გაზაფხული-ზაფხულის ახალ კოლექციაზე მუშაობენ, რომელშიც იყენებენ ცისფერ, იასამნისფერ და ზოგადად, ნათელ ფერებს, მათ ნამუშევრებში ასევე შეხვდებით პრინტებს ყვავილებით. ამჯერად რჩევები მოდის ტენდენციებთან დაკავშირებით თაკომ მოგვცა.

- რომელი პერიოდის გავლენა ახდენს ზემოქმედებას 2014-2015 წლის მოდის ტენდენციებზე?
- წლევანდელი მოდა კონკრეტულად ერთ სტილს არ გვთავაზობს, არჩევანის საშუალება გვეძლევა. სილუეტის თვალსაზრისით ქალურობა მნიშვნელოვანია, თუმცა მამაკაცური დეტალების მინიმალურად ჩართვაც შესაძლებელია.
- რომელი ფერებია აქტუალური?
- აქტუალურია ნათელი ფერები, აღსანიშნავია: ვარდისფერი, ცისფერი და კრემისფერი.
- როგორი ფაქტურისგან შეკერილი სამოსის მორგებას გვირჩევთ გაზაფხული-ზაფხულის სეზონზე?
- სეზონიდან გამომდინარე გირჩევთ აბრეშუმისგან შექმნილი სამოსის მორგებას, ასევე კარგი იქნება მაქმანის გამოყენებაც. გარდა ამისა, პრინტი ისევ მოდურ თემად რჩება, განსაკუთრებით - ყვავილებიანი პრინტი.
- რაც შეეხება კაბისა და შარვლის ფორმას, სიგრძეს, წელს, ამაზე რას გვეტყვით?
- ამ სეზონზე კაბის სილუეტი საკმაოდ ქალურია, უმჯობესია, წელი დაფიქსირებული იყოს, სიგრძე კი მისაღებია მუხლზეც და წვივზეც, არჩევანში შეზღუდულები არ ვართ. შარვლის შემთხვევაში, ტოტი კოჭზე აქტუალურობას ინარჩუნებს, მაგრამ ნელ-ნელა გადადის უფრო გრძელ და განიერ ფორმაზე, წელის სიმაღლე აქაც შენარჩუნებულია.
- გაზაფხული-ზაფხულის სეზონზე როგორი სტილისა და ფორმის პიჯაკები იქნება მოდური?
- პიჯაკი, კაბისგან განსხვავებით, ფართო და სწორი სილუეტის უნდა იყოს, ყოველგვარი დეკორატიული ნაკერის გარეშე, მხარი გადასული, საყელოს კი მაქსიმალურად შემცირებული უნდა ჰქონდეს ფუნქცია. შეიძლება იყოს ძალიან მცირე ზომის, ან საერთოდ საყელოს გარეშე. გარდა ამისა, შეგიძლიათ, პიჯაკი მოირგოთ ქამრით, თუმცა მის გარეშეც საკმაოდ მოდური იქნება.
- რაც შეეხება ფეხსაცმელს, ამ მხრივ რა დეტალებია საგულისხმო?
- მოდურია ფეხსაცმელი დაბალ ძირზე, სანდლების ტიპის, შესაძლებელია, მასშიც იყოს გამოხატული მამაკაცური ელემენტები, ქუსლიანი ფეხსაცმელი კი გამორჩეული უნდა იყოს დამახასიათებელი დეტალებითა და ფერებით.
- ჩანთები... წელს ქლაჩები ისევ მოდურია, თუ დიდი ზომის ჩანთები ხდება აქტუალური?
- ქლაჩი ისევ აქტუალურია, თუმცა ამას ემატება დიდი ზომის ხელჩანთები.
- აქსესუარებზე რისი თქმა შეგიძლიათ, როგორი აქსესუარით შეიძლება გავხადოთ ჩაცმულობა თვალში საცემი?
- დიდი ფორმის აქსესუარები თვლებით, ეფექტურობას სძენს ტანისამოსს, აქცენტი კი ყელსაბამზეა გაკეთებული
- რა უნდა იყოს მოდური ქალბატონის გარდერობში ''შანელისეული'' შავი კაბის გარდა?
- ჩანთა და სათვალე.

ციცი ომანიძე
ჟურნალი ''რეიტინგი''