თეთრი სახლი ლუდსახარშად აქციეს?!

აშშ-ის პრეზიდენტმა ბარაკ ობამამ თეთრ სახლში ნამდვილი ლუდსახარში მოაწყო.

ობამას ამ ჰობის შესახებ ცნობილი გახდა მის წინასაარჩევნო ტურის დროს აიოვას შტატში. მაშინ აშშ-ის პრეზიდენტმა ადგილობრივ ყავის სახლს საკუთარი წარმოების ლუდი უსახსოვრა.

ობამას საჩუქარმა ჟურნალისტებში დიდი ინტერესი გამოიწვია. ამიტომაც პრეზიდენტის პრესსამსახურს სპეციალური განცხადების გაკეთება მოუწია.

როგორც ობამას პრესმდივანმა, ჯეი კარნიმ განაცხადა, ლუდი სახელწოდებით White House Honey Ale ისხმება როგორც თეთრი, ასევე შავი სახით.

ლუდის დასამზადებლად იმ ფუტკრის თაფლს იყენებენ, რომელიც თეთრი სახლის ბაღში პრეზიდენტის ცოლს, მიშელ ობამას ჰყავს მოშენებული.

პრესმდივანმა უარი განაცხადა სხვა დეტალების გამხელაზე და ჟურნალისტების მიერ დასმულ ზედმეტ კითხვებს ასე უპასუხა: "როცა მე ლუდს მთავაზობენ, მე არ ვკითხულობ, როგორ დაამზადეს ის. უბრალოდ, სიამოვნებით მივირთმევ მას".

სხვათა შორის, 2009 წელს, როცა მიშელ ობამა თეთრი სახლის დიასახლისი გახდა, მან პრეზიდენტის რეზიდენციის მიმდებარე ტერიტორიაზე მთელი ბაღ-ბოსტანი გააშენა. პირველმა ლედიმ ამით ამერიკელ დიასახლისებს მოუწოდა, რომ ოჯახის ყოველდღიურ რაციონში აუცილებლად უნდა შედიოდეს ხილი და ბოსტნეული.