თაკო ჩორგოლაშვილი ქმარს უცხოეთში თავის კაბებს ატანს

ტელეჟურნალისტი თაკო ჩორგოლაშვილი ადრე მოკლე კაბების ჩაცმას ერიდებოდა, რადგან ეგონა, რომ უშნო ფეხები ჰქონდა, ეს კომპლექსი ტელევიზიამ მოუხსნა. ახლა მინის თამამად იცვამს, შორტებსაც ხმარობს და მოკლე ქვედატანებსაც. სამაგიეროდ ტელევიზიაში მუშაობამ მაღალ ქუსლებს გადააჩვია, თუმცა მათი ჩაცმა აუცილებელი ხდება მაშინ, როცა თაკო კალათბურთელ ქმართან, რეზი დიდიასთან ერთად წვეულებაზე მიდის, მით უმეტეს, თუ მასთან ცეკვასაც აპირებს. სიმაღლეში ცოტათი მაინც ხომ უნდა დაეწიოს.
რეზის დიდ სიამოვნებას ანიჭებს საყვარელი ცოლისთვის უცხოეთიდან საჩუქრების ჩამოტანა, თუმცა კაბების ყიდვას ჯერ ვერ რისკავს, აქსესუარებით შემოიფარგლება. თაკოსთან ერთად შოპინგზეც კი არ ამბობს უარს და არჩევანის გაკეთებაშიც ეხმარება.
– თაკო, სამოსის შერჩევის დროს პრეტენზიული ხართ?
– კი. მაქვს ჩემი სტილი და იმას, რაც მომწონს, მარტივად ვერ ვარჩევ. შეიძლება რაღაც ძალიან მომეწონოს, კარგი იყოს, მაგრამ მე არ მომერგოს, ვერ მოვიხდინო, მიუხედავად იმისა, რომ ჭარბი წონა არ მაწუხებს და ფორმები ხელს არ მიშლის. ამიტომ ერთ საათში სამოსს ვერასოდეს ავარჩევ. ძირითადად ორი დღე მაინც დავდივარ და ბოლოს ვპოულობ ისეთს, როგორიც ძალიან მომწონს. თუ უცებ ვიყიდი რაღაცას, ძირითადად ვერ ვიყენებ. კარგა ხანს დევს გარდერობში და მერე ვხვდები, რომ ჯობია გავაჩუქო, გარდერობიდან მოვაშორო.
– ყოველდღიურად რა სტილში იცვამთ?
– ყოველდღიურად არც ვუყურებ, რა მაცვია. სამსახურში ძირითადად ჯინსებით დავდივარ, მაქსიმალურად კომფორტულად უნდა ვიყო. გადაღებებისთვის ცალკე ტანსაცმელი მაქვს. ვცდილობ, საეთერო სამოსი უფრო მეტი შევიძინო. ასეთი ბევრი მაქვს და ამიტომ აღარ ვიხარჯები, თავს არ ვიწვალებ იმაზე ფიქრით, რა ჩავიცვა.
– ეთერში საკუთარი სამოსით ჯდებით თუ ტელეკომპანია ზრუნავს თქვენს ჩაცმულობაზე?
– ჯერჯერობით ჩემი გარდერობიდან ვიცვამ, მაგრამ ვის აქვს იმდენი ტანსაცმელი, რომ ყოველდღიურად ეთერში სხვადასხვა ეცვას? ჩვენს ჩაცმულობაზე მალე მაღაზიები იზრუნებენ.
ეკრანზე ზოლიანი არასოდეს მაცვია, არც მწვანე ფერში. დანარჩენი ფერები გამოსადეგია. მიუხედავად იმისა, რომ შავი ფერი მიყვარს, ეკრანისთვის არაა მომგებიანი.
– ვიდრე თქვენს სტილს აირჩევდით, ბევრი ექსპერიმენტი ჩაატარეთ?
– არასოდეს ვატარებ ექსპერიმენტებს არც გარეგნობაში და არც სამოსის თვალსაზრისით. ერთადერთი ექსპერიმენტი, რაც ჩავატარე, კარიერაში იყო და, მგონი, გაამართლა. ის, რაც მორგებული მაქვს, ვფიქრობ, ჩემია და მიხდება. მისი შეცვლა და ახალი სტილის მორგება ამ ეტაპზე არ მინდა და მერე ვნახოთ. წლები რომ მომემატება, ალბათ თავისთავად შეიცვლება რაღაცეები, შეიძლება ახალგაზრდულად, თინეიჯერულად ვეღარ ჩავიცვა. ყოველთვის ვცდილობდი, ასაკთან შესაბამისობაში ვყოფილიყავი.
ბავშვობაში არასოდეს მეცვა მოკლე კაბები. სულ მეჩხუბებოდნენ, ფეხები გამოაჩინე, ნორმალურად ჩაიცვიო. კომპლექსი მქონდა, ვთვლიდი, რომ არ მქონდა კარგი ფეხები. ახლა კი მიმაჩნია, რომ ნორმალური ფიგურა მაქვს, შემიძლია ჩავიცვა მოკლეც და გრძელიც.
– ვინ შეგაცვლევინათ აზრი?
– ეს ყველაფერი მაშინ შეიცვალა, როდესაც ტელევიზიაში დავიწყე მუშაობა. ერთ–ერთი მაღაზია გვაცმევდა, ყოველდღე ეთერში ვიყავი და, რა თქმა უნდა, სხვადასხვა სამოსი მჭირდებოდა. მაღაზიაში რომ შევდიოდი, ყველაფერი მოკლე მხვდებოდა, ამიტომ, მინდოდა თუ არა, გარისკვა მიწევდა. მერე, ეკრანზე რომ შევხედე ჩემს თავს, მივხვდი, არც ისე ცუდად გამოვიყურებოდი. მას შემდეგ შორტები და მოკლე ქვედატანები ყოველდღიურადაც მაცვია.
– თქვენი პროფესიიდან გამომდინარე, ალბათ წარმოუდგენელია, ყოველდღე მაღალი ქუსლებით იაროთ. როგორ ფეხსაცმელს იცვამთ?
– იყო პერიოდი, როცა მაღლების გარეშე სიარული არ შემეძლო. ჩემი ყოველდღიური ცხოვრება იმას გულისხმობდა, რომ თაკო მაღალქუსლიანი ფეხსაცმლით უნდა ყოფილიყო. ამ დროს თავს ძალიან კომფორტულად ვგრძნობდი, დაბლებზე ფეხები მტკიოდა, მალე ვიღლებოდი. რაც ტელევიზიაში დავიწყე მუშაობა, მას შემდეგ აბსოლუტურად ყველაფერი შემოტრიალდა. მთელი დღე გადაღებებზე დავრბივარ და ამიტომ მაღალქუსლიან ფეხსაცმელებზე სიარული გამორიცხულია. "უგები" გახდა ჩემი საყვარელი ფეხსაცმელი. მაგრამ როცა სადმე მივდივარ, მით უმეტეს, ქმართან ერთად, რომელიც ძალიან მაღალია, აუცილებლად მაღალქუსლიან ფეხსაცმელს ვიცვამ.
– ქმარს მაღალ ქუსლებზე უფრო მოსწონხართ?
– თავიდან ამაზე გართულება ჰქონდა, უყვარდა, როცა მაღლებს ვიცვამდი. ახლა უკვე ასეთ რაღაცეებს ყურადღებას არ აქცევს, მისთვისაც მთავარია, მე ვიყო კომფორტულად. როცა ერთად ვართ და თუნდაც ერთად ცეკვა გვიწევს, მინდა, რეზის შევესაბამებოდე სიმაღლით და ამიტომ სულ მაღლებზე ვდგავარ. თუმცა როგორი მაღლებიც უნდა ჩავიცვა, მხრებამდე ვწვდები.

– თქვენ და რეზი საყიდლებზე ერთად დადიხართ?

– კი, ერთად დავდივართ, მაგრამ ზოგჯერ ცალკეც მიწევს. როცა აქაა და სამოსის ყიდვას გადავწყვეტთ, შოპინგის პროცესი ძალიან სიამოვნებს. უყვარს, როცა მახარებს და ჩემთვის რაღაცას ყიდულობს. დამყვება მაღაზიებში, არ ბეზრდება. მე უფრო ვიღლები ხოლმე, ვიდრე ის. თუ ისე ხდება, რომ ვერაფერს ვარჩევ, არ წამოვა, სანამ სიმბოლურად მაინც რამეს არ შევიძენ. ამის გამო სულ ვჩხუბობთ, ამიტომ ერთი შორტით ან მაისურით მაინც ვბრუნდები სახლში.
– თქვენ რომ არ ახლდეთ და თავად გიყიდოთ სამოსი, არის ასეთი შემთხვევები?
– ასეც ხდება, მაგრამ უფრო მეტად აქსესუარებს ყიდულობს, ვიდრე ტანსაცმელს, ძირითადად შარფებს, ჩანთებს... უცხოეთში ჩემი კაბა მიჰქონდა, უნდოდა, იგივე ზომის ჩამოეტანა, მაგრამ ასეთი მცდელობები ყოველთვის ჩაეშალა, მიხვდა, რომ აზრი არ აქვს. ცოტა ხნის წინ ბეწვის ულამაზესი ქუდი ჩამომიტანა. თოვლი მოვიდა და მომეცა საშუალება, გამომეყენებინა.
– ყოველთვის მოგწონთ მისი ნაყიდი აქსესუარები?
– კი, აბსოლუტურად ყველაფერი მომწონს, რაც ჩამოაქვს. დარწმუნებული ვარ, რომ გარისკოს და ტანსაცმელი ჩამომიტანოს, აუცილებლად მომეწონება. ველოდები, როდის გარისკავს. რეზი ძალიან გემოვნებიანია. ყოველთვის კარგად აცვია, მომწონს მისი სტილი. ქალების სამოსის შერჩევაშიც არ უჩივის გემოვნებას.
– თქვენც ყიდულობთ რეზისთვის ტანსაცმელს?
– კი, მე თამამად შემიძლია. ძალიან დიდი უნდა ვიყიდო და მისი სტილიც კარგად ვიცი. მაინც უფრო კარგია, როცა ერთად მივდივართ საშოპინგოდ. ადგილზე ნახვა, მოზომვა, ის ფაქტი, რომ ორივეს მოგვწონს, უფრო მამშვიდებს. სხვა შემთხვევაში ვნერვიულობ ხოლმე, როგორ მოეწონება, მოერგება თუ არა.
– ჩვენს მაღაზიებზე რას ფიქრობთ, მოგწონთ?
– კარგი იქნება, მეტი არჩევანი იყოს. მგონი, ეს მარტო ჩემი პრობლემა არ არის. ამჟამად მაქსიმალურად ვცდილობ, ქართველი დიზაინერების ტანსაცმელი შევიძინო. მართლა ძალიან კარგ და გემოვნებიან რაღაცეებს კერავენ. დიზაინზე რუბრიკა მაქვს და ამიტომ აქტიურად მიწევს მათთან სტუმრობა. გადაღებაზე რომ მივდივარ, პარალელურად მეორე საქმესაც ვაკეთებ და ჩემთვის ტანსაცმელს ვარჩევ. როცა მეკითხებიან, ვისი სამოსი მაცვია, მეამაყება, ქართველ დიზაინერს რომ ვასახელებ. თუ ტრადიციად დამკვიდრდება, ყველამ შევძლოთ ქართველი დიზაინერების სამოსის ჩაცმა, მასა ძალიან გემოვნებიანად ივლის.
– როგორც მივხვდი, მასობრივი სამოსი არ გიყვართ.
– ვერ ვიტყვი, რომ მასობრივ მაღაზიებში არ დავდივარ, ძალიან კარგადაც შემიძლია იქ რაღაცეების არჩევა. შეიძლება ათი ხელი არ ვიყიდო, მაგრამ ერთ რამეს, რაც განსაკუთრებულად მომეწონება, აუცილებლად ვყიდულობ. არ მაქვს იმაზე გართულება, რომ ბრენდი მეცვას და თან ჩემნაირი სხვას არავის ჰქონდეს. ასეთ დეტალებს ყურადღებას არ ვაქცევ, მთავარია, მიხდებოდეს და მომწონდეს. შეიძლება ჩემნაირი სხვაზე სხვანაირად გამოიყურებოდეს და მე სულ სხვანაირად მოვირგო.
რაღაცეებს ვიწერ კიდეც. ფეხსაცმელების უმრავლესობა გამოწერილი მაქვს. ყოველთვის იმაზე მაღალი ჩამოდის, ვიდრე სურათზე ჩანს და ერთადერთი დისკომფორტი ესაა. ძალიან მაღალქუსლიან ფეხსაცმელს ვეღარ ვიყენებ. შეიძლება საღამოებზე ჩავიცვა, იქ დაბლებით და მოუწესრიგებელი ნამდვილად არ დავდივარ.
– ანუ დრესკოდს ყოველთვის იცავთ.
– მგონია, რომ ყველგან შესაბამისად უნდა გეცვას და შენი ჩაცმულობა სალაპარაკო არ უნდა გახდეს. პროექტის "ცეკვავენ ვარსკვლავები" შემდეგ უფრო მეტად მოვექეცი საზოგადოების ყურადღების ქვეშ და უფრო მეტად მიწევს იმაზე ფიქრი, როგორ გამოვიყურები.

– კითხვა "რა ჩავიცვა?" თქვენთვისაც აქტუალურია?
– ეს ჩემი ყოველდღიური პრობლემაა. იქ რა ჩავიცვა, აქ რა ჩავიცვა, ეს სამკაული გავიკეთო თუ ის, ეს ჩანთა დავიკავო თუ ის... როცა სადმე მივდივარ, როგორც წესი, ჩემი გარდერობი მთლიანად გადმოყრილია. დედას განსაკუთრებულად არ უყვარს ჩემი სადმე წასვლა, რადგან მას უწევს დალაგება. ჩემს კითხვას "რა ჩავიცვა?" ყოველთვის გარდერობის გადმოყრა მოჰყვება, მერე სულ მეჩქარება და დალაგებას ვეღარ ვასწრებ.
– აქსესუარებიდან რა გიყვართ ყველაზე მეტად?
– ფერადი და ლამაზი აქსესუარები მომწონს, მაგრამ ვცდილობ, უფრო სადა საყურე, ბეჭედი ან სამაჯური გავიკეთო, დიდი სამკაულები მაღიზიანებს. დიზაინერებთან დავდიოდი და ვცდილობდი, ხელნაკეთი სამკაულები შემეძინა. ის ყველაფერი მილაგია, მომწონს, ვიცი, რომ მაქვს, მაგრამ არ ვხმარობ. თუ საღამოზე მივდივარ და კაბას რაიმე სამკაული ალამაზებს, ასეთ შემთხვევაში დიდი სიამოვნებით ვიკეთებ.

– ზამთარში რას ანიჭებთ უპირატესობას – ქურქს, პალტოს, ქურთუკს, მანტოს?..
– ბეწვსაც, ჯინსის დათბილულ ქურთუკებსაც და პალტოებსაც. მთავარია, მომეწონოს და შეიძლება მანტოც შევიძინო, რომელიც არასოდეს მქონია.
ქეთი დინოშვილი, ჟურნალი სარკე